ABA tadilirun tanigi Doreen dan le tasubudirunbalin anihein lan aban tumoru gáfarahati lábulugu Wesley, le tani weiriei ani dimí-san-gádürü irumu lau. * Murusunrügüñein hati híchugun surusiagu lun lun lawinwandun. Ariñagatu Doreen: “Mafiñe numuti yebe le naganbubei, ibidiñeti meha nun kaba lan nadüga ani sügütina saragu dimaasu ítara. Sanditina houn lan amu lasusereda katei le, mama woun. Maranserutina meha lubá”.

Híruti gibe hamá gürigia asandiragutiña houngua kei tasandiragun Doreen tungua. Gayarati ladagarun sandi máraninati hawagu furumiñeguarügü gürigia lidan furumiñeguarügü dan. Wéiritu wanigi hau saragu gürigia ladüga hetenirun lau sun hagundan óunigiraña haduheñu ha asufurirubaña somu sandi libe burí le. Gama lumoun, güreweiti letenirún lun aban gürigia sánditi. Ka gayarabei hadügüni iduheñu lun híchugun gurasu lun haduhe le laubei sandi máraninati luma lun hóunigiruni? Ka gayarabei hadügüni ha óunigirubaliña sánditiña lun hagagibudagun luma furumiñeguarügü katei le gayarabei hasandiruni? Ka gayarabei wagurabuni eibu ayarafadeina lan gürigia lun lounwen? Furumiñe, ariha waméi ka lan uagu hénrengu lubéi lounigirún aban sánditi le yarafaali lun lounwen uguñe weyu.

San irumu lubaragiñe le, mamigifenti meha habagari gürigia kei uguñe weyu, íbini lidan burí ageiraü awanseti. Fureseti meha hounwen gürigia ladüga sandi burí le galugurahati o ladüga danaguaü. Fiúrügüñanu meha hádangiñe gayara houdin háspitalirugu, ani saragu gürigia góunigi hamutiña meha haduheñu, ani múnada meha hóunwegua.

Uguñe weyu, adügati awanseruni lidan siensia lun hayusurun surusiagu agaranihani le hanarimeti lun hamigifedagüdüni ibagari. Gürigia ha awinwandubaña saragu dan lau sandi guentó, lidan binadu  dan hilatiña hamuga lau lufuresen. Gama lumoun, úati mini lan le gayara lan hareidagun. Libe-agei dan súfuritiña lanarime gáriti darí lun lásiñarun hadügüni hemegeirun houngua. Adügati katei le lun güreweitima lan hounigirún luma lun labuchadun hawagu ha óunigirubaliña.

Ligíati, eibu dan gibetimatiña gürigia óunwegutiña háspitalirugu sügǘ lau hábiñe. Hibe-agei gürigia uguñe weyu ibidiñeti houn ida liña lan larihín aban gürigia dan le lounwe lan ani fiúrügüñanu ha arihaaña aban gürigia ounwe. Ligíati, ladüga anufudei luéi katei le ibidiñeti houn gayarati hamahadun hóunigiruni haduhe le sándibei. Ka gayarabei líderaguniña?

Kei warihini lidan tikesin Doreen, nidiheritiña saragu gürigia dan le ladarirún sandi máraninati luagu haduhe. Labadinagua saragu idiheri, anufudei luma igarigu, ka gayarabei líderagunün ararama lun sügǘ le? Furíeiti aban lubúein Bungiu le úaraguati ítara: “Arufudahabá woun lun wabahüdüni waweyuri buidu, ragǘ láamuga wachügü lichú aau” (Sálumu 90:12). Ayumuragua humá lun Bungiu lun larufuduni hun ida luba lan habahüdüni huéyuri lau lichú aau, lun gayara lan hasagarun buiti lídangiñe murusun dan le lunbei labagariduni hiduhe.

Lun hibihini, mégeiwati hadügün aban lubuidun aransehani. Anhein ayanuhagili lubéi hiduhe ani busenti layanuhan luagu katei le, buídubei lun hálügüdüni kaba lan ayanuha luagu danme le siñaali ladügüni. Lídehaba hayanuhan luma furangu luagu le labusenrubei lun ua lan turóbuli o lun masandirun hamá iduheñu duru dan le mosu lan desidírü hamá luagu iduhei le sándibei. Gayarati hayanuhan luagu anhein busén lubéi lun layusurún máhina lun háguyuguagüdüni, hígiruni háspitalirugu o libihin amu luwuyeri agaranihani. Dan le hayanuhan iduheñu furangu adügati lúntima hetenirun lun sánditi buidu eibu akomoradeina lan. Ariñagatu Bíbülia: “Dan le ua lan álügüdahani, wuribati aransehani” (Ariñawagúni 15:22).

Libe-agei dan, létima lunbei ladügüni óunigiruti líchugun gurasu. Busenti sánditi lun lariñawagún lun hínsiñewa lan, ani mama lan lábuguarügüñein. Ida luba líderawagun? Lau haliihan agumeiraguagüdüni lun, luma lau heremuhan uremu le hínsiñeti lun ani le íchugubei dǘgüdaguaü. Añahein saragu buiti hasandiragun houngua dan le lárügüdüni haduhe háhabu ani ayanuha ligía houn lau darangilaü.

Dan le hachülürün gürigia arihei sánditi, buiti lun hariñaguni lun kátaña lan. Ariñagati aban ariñahani: “Ariñawagúati lídangiñe lan seingü hani gürigia sentidu aganbuni lagumuhóun eferidirubei. Gayaraagili laganbun gürigia le sándibei murusun íbini genege lan larumuguña lan. Ligíati, mariñaga  humá ni kata lurugabu le lunbei mariñagun humani dan le agagudúañu lan”.

Anhein gayara, furíei humá luma. Ariñagatu Bíbülia lidan aban ókaasion darigua lan meha apostolu Pábulu lungua hama lánigu paaná lidan lénrengunga darí lun hadiheridun luagu habagari. Ka ídemuei háluahabei? Ayumuraguati Pábulu houn lumadagu lun híderaguniña lau hafurieidun hawagu (2 Korintuna 1:8-11). Dan le lásügürün gürigia lídangiñe saragu idiheri ani aba ladagarun aban sandi máraninati luagu, buiti lun lafurieidun tídangiñe sun lanigi.

Sanditiña gürigia saragu idiheri láurügü hasubudiruni lóunweña lan somu haduhe. Susereti katei le ladüga madügǘntiwa lun wounwen ni lun wánharun lun ni lun wéchudun luagu (Rómana 5:12). Ariñagatu Lererun Bungiu aban lan “ágani” óunweni (1 Korintuna 15:26).Ligíati, gunfurandawati anhein mabusenrun wabéi wasaminarun luagu lóunweba lan waduhe le hínsiñebei woun.

Gama lumoun, hasaminarun luagu le gayarabei lasuseredun líderagubaña iduheñu lun manufudedun hamá luma lun hadügüni sun hayaraati lun hawanduni le asuseredubei. Anihein fiú lídangiñe katei le gayarabei lasuseredun lidan rekuáduru “ Lagumuhóun burí dimaasu hau sánditiña abagarida”. Masuseredunti sun katei le houn sun sánditiña masuseredun ligía aban lárigi aban. Íbini ítara, anihein saragu lídangiñe susereti houn fiú hádangiñe.

Lárigiñe lounwen aban iduhei, gayarabei líderagunün hayanuhan luma aban umadaü le yarafati hun ani le íchaagubei lungua lun lídehan. Háfuga megei hamá ha óunigirubalin sánditi hama liduheñu lichugúniwa awalidaguni houn lau laritaguagüdüniwa houn masufurirunhali lan haduhe ani sügüha lan létima hénrengubei. Lau ínsiñehabuni lachoururagüdei le Adügübaliña gürigia woun ibidiñe lan ni kata houn ha hilaañabaña (Apurichihati 9:5).

Súdiniti lun hafiñerun luagu Bungiu, mámarügü dan le anihein lan aban gürigia lau sandi máraninati hadan iduheñu, dandu giñe dan le hegeburihaña lan. Gayarati líchugun Bungiu gurasu hun lau dimurei gíchigaditi dǘgüdaguaü le hariñagubei amu gürigia hun luma lau lubuidun burí katei le hadügübei huagu. Ariñagatu Doreen: “Furendeitina ánhara lun hídehan amu. Le linarün katei, gíbetimati ídemuei weresibirun sügǘ lau le wagurabubei. Chouru numuti meha, nuguya luma nani weiriei, Heowá lan ariñagubei woun: ‘Anahein huma lun níderagunün agagibudagua luma katei le’. Mabulieidun nubéi”.

Le linarün katei, Heowá óunigiruti le buídutimabei. Kei ligía lan Adügübaliwa, gunfuranda lumuti wagarigu. Busenti ani gayarati líchuguni ídemuei le wemegeirubei woun lun wabaruaguóun wamá. Le buídutimabei, füramase haali lan lagidaruni óunweni lun súnwandan ani lásaaragüdübaña lan saragu míñunu gürigia ha lídanbaña laritagun (Huan 5:28, 29; Arufudúni 21:3, 4). Danme lasuseredun katei le gayarabei wariñaguni dimurei le lariñagubei apostolu Pábulu: Óunweni, hageigia bubafu lun bagañeirun? Hageigia bímiragüle?” (1 Korintuna 15:55).