Ida luba wíderaguniña hasaanigu terencha
“Úati amu katei agundaaraguagüdütina keisi dan le naganbun luagu habagariduña lan nirahüñü úaragua luma inarüni” (3 HUAN 4).
UREMU: 20, 41
1, 2. a) Ka turóbuli úmabei hagagibudagua hasaanigu iduheñu ha awinwandubaña lidan amu ageiraü? b) Kaba burí álügüdahani wóunaba lidan arütíkulu le?
ARIÑAGATI aban Gefenti gíriti Hoshua: “Lídangiñetiña meha amu ageiraü nagübürigu, ani lúmagiñe ñüraügidina hañeñe meha nagübürigu nayanuhabei múnada luma lidan damuriguaü”. Gama lumoun, dan le lagumeserunbei Joshua leskuela, aba línsiñedun lun layanuhani iñeñein le ayanuhoubei ñein lubéi heredera. Ariñagati: “Lárigiñe fiú irumu wéiriti asansiruni le nadügübei: úati meha gunfuranda nani adamuridaguni ani masandiraguntina meha nungua buidu lidan hechun nagübürigu”. Kamaniti lasuseredun katei le.
2 Uguñe weyu, añahein hóugiñe 240 míñunu gürigia awinwandutiña bóugudi luéi hageira. Anhein aban hubéi úguchili le awinwanduti lidan amu ageiraü, ida luba san híderaguniña hisaanigu lun línsiñedun Heowá houn ani lun hasigirun lidan “inarüni”? (3 Huan 4). Ani ida liña san gayara lan hídehan amu íbirigu lidan damuriguaü?
AGÜBÜRIGU, RU HUMÁ ABAN HENPULU BUITI
3, 4. a) Ida liña gayara lan híchugun agübürigu aban hénpulu buiti houn hasaanigu? b) Ka katei lunbei magurabahan hamani agübürigu hámagiñe hasaanigu?
3 Agübürigu, anhein busén hubéi lun buidu lan hamadagua Matéu 6:33, 34). Lubaragiñe háluahan lanwoun umegeguni le húmabei, ru huméi heseriwidun lun Heowá lidan furumiñeti lúgaaru. Sensiyulá hawinwanduni hibagari ani houcha humá lun mebelurun humá lidoun dúeiti. Ani lubaragiñe hálugun hibihin saragu seinsu luma “uéiriguni le híchugubei gürigia”, áfaagua humá lun “hibihin irisini sielu”, lidan amu dimurei, lun lánharun Heowá hun (Huan 12:43; aliiha huméi Márükosu 10:21, 22).
hisaanigu luma Heowá ani winwan hagíame lun súnwandan, súdiniti lun híchugun aban hénpulu buiti houn. Anhein hariha hisaanigu háluahañein lan larúeihan Bungiu “furumiñe”, hafurendeiruba afiñera luagu líchugubei lan Heowá le hemegeirubei houn sagü weyu (4 Machülüralá dan lun weiri lan huberesegun darí lun madaani humá houn hisaanigu. Ariñaga humá houn panta humá hau dan le desidírü hamá híchuguni Heowá furumiñe ani máluguntiña háluahan uéiriguni luma seinsu hóuniwagua o hun. Méiguada humá lidoun charati lau hasaminarun mosu lan hawadigimaridun isaanigu lun híchugun aban ibagari buiti houn hagübürigu. Haritagua huméi “agübürigu [lan] lúnbaña hóundarun seinsu habá hasaanigu, mama isaanigu habá agübürigu” (2 Korintuna 12:14).
AGÜBÜRIGU, HOUCHA HUMÁ HAGAÑEIRUNI TURÓBULI LÁNINA IÑEÑEIN
5. Ka uagu lunti lubéi hayanuhan agübürigu houn hasaanigu luagu Heowá súnwandan?
5 Kei lariñaguni aban profesía tidan Bíbülia, hebeluruba gürigia ha ayanuhatiña “sun luwuyerigu iñeñein” tidoun lóundarun Heowá (Sakaríasi 8:23, TNM). Agübürigu, anhein ua lubéi gunfuranda hamani hisaanigu hiñeñe, hénrengubei hun harufudahani inarüni houn. Hagía aturiahatiña Bíbülia ha lúnbaña súdinitima hamá hun, ani lun hibihin ibagari magumuchaditi mosu hasubudiruni Heowá (Huan 17:3). Ligía lunti lubéi hayanuhan houn luagu le larufudahabei Heowá súnwandan (aliiha huméi 2 Lúrudu 6:6, 7).
6. Ka buiti lanügübei hafurendeiruni isaanigu iñeñein le hayanuhabei hagübürigu? (Ariha humóun iyawaü to lídanboun lagumeseha arütíkulu).
6 Chóuruti hafurendeirubei lan hisaanigu iñeñein le ayanuhóubei lidan fulasu le ñein lubéi heredera danme le houdin leskuela luma dan le hama hamá amu gürigia. Anhein hechu hubéi ayanuha hama ligíarügübei hafurendeirun ayanuhei hiñeñe. Anhein hafurendeira, ménrenguntimabei houn hayanuhan humá luma habahüdaguni hun ida liña lan hasandiragun houngua. Ani lanügüba le amu buiti. Líderagubaña hayanuhan lóugiñe aban iñeñein lun chútima lan hau ani líderagubaña giñe lun gunfuranda hamani ligaburi hasaminarun amu gürigia. Líchuguba giñe chansi houn lun gíbetima lan hadüga lidan apurichihani. Ariñagatu Carolina, hasaani gürigia ha lídangiñetiña amu ageiraü: “Gúndaatina lau lidan nan aban damuriguaü le ídanbei layanuhóua amu iñeñein. Ani hínsiñeti nun saragu nídehan ñein lubéi mégeiwa hamá apurichihatiña”.
7. Ka gayarabei hadügüni agübürigu anhein anihein lubéi turóbuli lánina iñeñein hadan haduheñu?
7 Dan le hígiruni gürigia hageira lun houdin lidoun amu murusun murusun aba árügüdeina hamani hasaanigu échuni luma iñeñein le ayanuhóubei lidan fulasu le ñein lubéi hawinwanda. Ligía gayara lubéi siñagua hamá fiú hádangiñe houngua lun hayanuhani hañeñe hagübürigu o aba mabusenrunhaña lan hayanuhani. Anhein ligía lubéi asuseredubei houn hisaanigu, gayarati san hafurendeirun ayanuha íbini murusun lidan iñeñein le ayanuhóubei ñein lubéi hawinwanda? Ménrenguntimabei híderaguniña hisaanigu lun kristiánugu hamá anhein subudi hubalin ka lan uagu hayanuha hama amu, * (Ariha huméi abürüdǘni).
ka lan hisebaharibei luma ida liña lan lidin houn lau dasi le ichugúbei leskuelarugu. Gayarabei giñe buídutima lan híderaguniña anhein gayara hayanuhan hama hamaisturungu. Inarüni mégeiwa lan dan, áfaaguni luma ǘnabuguni lun lafurendeirúniwa amu iñeñein. Gama lumoun, lanügüba buiti hun. Samina huméi le. Lun hamuga lerederun hisaani maganbunga, ma háfaaguña hamuga lun hafurendeirun seini lun hayanuhan luma? Ligíati, anhein buídutima lubéi layanuhan hisaani lidan amu iñeñein, ma lunti hamuga giñe hadügüni ligiaméme?8. Ida liña gayara lan híderaguniña agübürigu hasaanigu íbini mayanuhan hamani iñeñein le lídanbei fulasu ligía buidu?
8 Houn saragu agübürigu ha ñüdünbaña lídangiñe hageira lun lidoun amu gayarati hénrengu lan houn hayanuhan buidu hama hasaanigu lidan iseri iñeñein le hayanuhabei. Háfuga ligía hénrengu lubéi houn híderaguniña hasaanigu lun gunfuranda hamanu “Lererun Bungiu” (2 Timotéu 3:15). Háfuga ligía hiturobulinbei. Íbini ítara, gayarati híderaguniña hisaanigu asubudirei Heowá luma lun línsiñedun houn. Ariñagati aban wéiyaali lidan afiñeni gíriti Shan: “Tabuguarügü núguchu tagüriahawa, ani iñeñein létima gunfuranda nubéi hama namuleenu mayanuhan tumuti meha wáguchu buidu, ani mariñagaditiwa meha lun iñeñein le tayanuhabei buidu. Gama lumoun íderagua lumutiwa warihinu aturiaha, afurieida luma áfaagua lun tadügüni áhuduraguni keisi iduheñu wama sagü dimaasu, adügati katei le lun gunfuranda wamani súdini lan wasubudiruni Heowá”.
9. Ka gayarabei hadügüni agübürigu lun híderaguniña hasaanigu ha mégeibaña haturiahan lidan bián iñeñein?
9 Háfuga megei hamá fiú isaanigu hafurendeirun luagu Heowá lidan bián iñeñein. Ka uagu? Ladüga amu lan iñeñein hayanuhabei leskuelarugu amu múnada. Ligía añahein lubéi agübürigu yúsutiña agumeiraguagüdüni to aliihóuarügütu tuma to aganbahóuarügütu luma burí bidéu lidan bián iñeñein. Chóuruti megei hamá agübürigu ha lídangiñetiña amu fulasu háfaagun lun híderaguniña hasaanigu lun buídutima lan hamadagua luma Heowá.
KA LUWUYERI DAMURIGUAÜ LUNBEI ÍDOUN LAN HIDIN?
10. a) Kaba desidírü kaba lan damuriguaü idan hadamuridagua liduheñu? b) Ka lunbei ladügüni ichügüdinaü lubaragiñe desidírü lan?
10 Anhein dise lubéi herederun “terencha” hawéi amu Gefentiña ha ayanuhabalin hañeñe, mosu hadamuridagun lidan aban damuriguaü le ídanbei layanuhóua iñeñein le lídanbei fulasu ligía (Sálumu 146:9). Gama lumoun, anhein anihein lubéi aban damuriguaü yarafa houn le ñein lubéi layanuhóua hañeñe, lunti desidírü lan ichügüdinaü ka lan damuriguaü buídutimabei houn liduheñu. Gama lumoun, lubaragiñe desidírü lan, mosu lakutihani katei lau duari ani amuriaha ligíame luma Heowá lun ladundehani. Lunti giñe layanuhan tuma lani weiriou luma hama lisaanigu (1 Korintuna 11:3). Ka katei lunbei gabaroun lani? Ka burí adundehani tídangiñeti Bíbülia gayarabei líderaguni lun desidírü lan?
Mosu desidírü lan hachügüdina iduheñu ka lan damuriguaü buídutimabei houn liduheñu
11, 12. a) Ka lánibei iñeñein efekütu lidan le lafurendeirubei irahü lidan adamuridaguni? b) Ka uagu mabusenrun habéi fiú irahüñü hafurendeiruni hañeñe hagübürigu?
1 Korintuna 14:9, 11). Mama mosu lariñaguni irahü le lasaminarubei luma le lasandirubei lidan iñeñein le hayanuhabei lagübürigu. Le linarün katei, furendeitiña fiú irahüñü íchiga óunabagülei, adüga somu fánreinti o somu yanu lidan adamuridaguni lidan hañeñe hagübürigu, gama lumoun mariñagun hamuti létima hasaminarubei luma le hasandirubei.
11 Mosu gabaroun hamani agübürigu kátima lan hemegeirubei hasaanigu. Lun gunfuranda hamani isaanigu inarüni le tídanbei Bíbülia buidu, úati buídurügü lan murusun dan le hásügürübei lidan adamuridaguni. Gama lumoun, ánhaña ñüdün lidan aban damuriguaü le ñein lubéi layanuhóua iñeñein létima gunfuranda habéi buidu, gayarabei hafurendeirun láurügü ñein hamá. Gayarati hafurendeirun lóugiñe le hasaminarubei hagübürigu. Hénrenguti hafurendeirun irahüñü anhein ua lubéi gunfuranda hamani le ariñawagúbei lidan adamuridaguni (aliiha huméi12 Mámarügüñein iñeñein gani efekütu lidan ligaburi hóuserun luma ligaburi hasaminarun irahüñü. Ligía meha asuseredubei lun Joshua, le buga uágubei wayanuha. Ariñagatu Ester, to litu: “Houn isaanigu mafanreinragunti hañeñe, hechun luma hani hagübürigu relihión”. Anhein masandiragun habéi irahüñü houngua buidu lau hechun hagübürigu, gayarabei mabusenrun hamá giñe hafurendeiruni hañeñe ni lun hánharun lun hani relihión. Ka gayarabei hadügüni agübürigu lidan kesi burí le?
13, 14. a) Ka meha uagu houdin bián agübürigu ha águyubaña lidoun amu ageiraü hau hasaanigu lidoun aban damuriguaü le ñein lubéi layanuhóua iñeñein le lídanbei fulasu ligía? b) Ka hadügübei agübürigu ha lun hakipuruni hamadagua luma Heowá héreñu?
13 Mosu híchuguni agübürigu kristiánu hemegeirun hasaanigu furumiñe lubaragiñe hetenirun hóuniwagua (1 Korintuna 10:24). Ariñagati Samuel, le lúguchi Joshua tuma Ester, aba lan harihini ka lan iñeñein ídanbei lachülüra inarüni tidoun hanigi hasaanigu. Amuriahatiña giñe luma Heowá lun líchugun lichú aau houn. Dan le liabin lóunabagüle hafurieidun, mámatima yebe ligía habusenrubei. Ariñagati Samueli hawagu lisaanigu: “Dan le warihinbei masagarun hamá saragu buiti lídangiñe adamuridaguni lidan wañeñe, aba desidírü wamá wasansirun damuriguaü. Ñǘdüntiwa meha adamuridagua luma apurichiha úara. Ani amisuraha wamutiña meha íbirigu eiga luma lun wáfuridun ebeluha úara. Ídehati sun katei le lúntima hasubudiruniña wasaanigu íbirigu buidu luma lun harihini Heowá mámarügü keisi Habungiute, ídehati lun harihini keisi Háguchi ani Hamada. Ariha wamuti meha súdinitima lan katei burí le sügǘ lau hafurendeirun ayanuhei wañeñe buidu”.
14 Ariñagati Samueli mosu lan meha lidin tuma lani weiriou adamuridagua lidan hañeñe, lun hakipuruni hafiñen héreñu. Ani ariñagati giñe: “Gíbeti meha katei lunti wadügüni ani buchá meha wawagu. Gama lumoun, biní lumuti Heowá wáfaagun luma sákürifisiu le wadügübei, ani teinki wamuti luagu lira. Ǘrüwagubei wasaanigu heseriwiduña lun Heowá lidan dan dayarüti”.
KA GAYARABEI HADÜGÜNI NIBUREINTIÑA
15. Ka uagu tasaminara aban íbiri gayara lan buídutima lan teseriwidun lidan aban damuriguaü lidan iñeñein le ayanuhóubei lidan fulasu le ñein lubéi hawinwanda?
15 Dan le haweinamudun isaanigu, háfuga híchugun fe gayarati lan buídutima lan heseriwidun lun Heowá lidan aban damuriguaü le ñein lubéi layanuhóua iñeñein le gunfuranda habéi buidu. Anhein asusereda ítara, moun lumuti hasaminarun agübürigu busén hamá hasaanigu hadisedun hawéi. Haritaguatu aban íbiri gíritu Adügaü 2:11, 41). Dan le tagunfulirunbei Kristina 18 irumu, aba tayanuhan hama tagübürigu ani aba desidírü tan tasansirun lidoun aban damuriguaü le ñein lubéi layanuhóua iñeñein le lánina fulasu ligía. Ariñagatu: “Íderagua lumutina nidin lidoun damuriguaü ligía lun nawanserun”. Fiú dan lárigiñe, aba teseriwidun Kristina kei prekursora, aba katei le adügübei lun tagundaarun.
Kristina: “Gunfuranda numuti meha hererun nagübürigu murusun, gama lumoun hénrenguti meha nun gunfuranda nani le ariñawagúbei lidan adamuridaguni. Dan le duusu lubéi irumu nau, aba nidin lidan aban adamurini lidan iñeñein le ayanuhóubei leskuelarugu. Aba níchugun fe luagu furumiñeti wéiyaasu naganbuñein lan inarüni. Susereti ábaya katei súdiniti lidan nibagari dan le nagumeserunbei afurieida lidan iñeñein le ayanuhóubei leskuelarugu. Ligía meha nasandiruni nayanuhaña lan lun Heowá tídangiñe sun nanigi!” (16. Ka uagu gunda tubéi Nadia luagu terederun lidan aban damuriguaü le terencha?
16 Nibureinti, himei bumuti san lidan ban aban damuriguaü le ñein lubéi layanuhóua iñeñein létima ayanuhóubei lidan fulasu le ñein lubéi bawinwanda? Anhein ítara liña lubéi, álügüdaguaba bungua ka lan uagu. Busentibu san bidin lidoun damuriguaü ligía ladüga líderagubadibu lan lun bederebudagüdüni bumadagua luma Heowá? (Santiagu 4:8). O busentibu basansirun ladüga mabusenrun ban harihini bagübürigu sun le badügübei o ladüga mabusenrun ban badügün ni kata lidan damuriguaü? Arihabei le tariñagubei Nadia, to eseriwiduboun Betelirugu guentó: “Dandu níbirigu kei nuguya dan le meha nibureintimagidiwa, busentiwa meha woudin lidoun damuriguaü le ñein lubéi layanuhóua iñeñein le ayanuhóubei lidan fulasu”. Gama lumoun, subudi hamuti meha hagübürigu madügünbei lan asansiruni ligía lun buídutima lan hamadagua hasaanigu luma Heowá. Ariñagatu Nadia: “Guenlé seremei wamutiña wagübürigu luagu háfaagun saragu lun harufudahani hañeñe woun luma luagu hígiruniwa lidan damuriguaü terencha ligía. Adügati katei ligía lun buídutima lan wabagari ani ruti chansi woun lúntima wíderagun saragu gürigia asubudirei Heowá”.
IDA LIÑA GAYARA LAN HÍDEHAN AMU ÍBIRIGU
17. a) Ka un líchigei Heowá buligasion lun harufudahan houn hasaanigu? b) Ka gayarabei hadügüni agübürigu anhein busén habéi ídemuei lun harufudahani inarüni houn hasaanigu?
17 Ru laali Heowá buligasion houn agübürigu lun harufudahani inarüni houn hasaanigu. Míchugun lumuti wadagimanu le ni houn árugutinu ni houn amu gürigia (aliiha huméi Ariñawagúni 1:8 luma 31:10, 27, 28). Gama lumoun, agübürigu ha mayanuhadibaña lun iñeñein le ayanuhóubei lidan fulasu le ñein lubéi heredera, háfuga megei hamá ídemuei lun hachülürün tidoun hanigi hasaanigu. Dan le hamuriahan agübürigu ha ídemuei, mama hadügüñein lun hesefuragun houngua luéi hani buligasion lun harufudahan houn hasaanigu. Hamuriahaña ídemuei lun hasigirun arufudaha houn “kei labusenruni” Heowá (Éfesuna 6:4). Kei hénpulu, gayarati hamuriahan adundehani hama wéiyaaña lidan afiñeni luagu ida luba lan hadügüni áhuduraguni hadan iduheñu. Gayarati giñe hamuriahan hama lun híderaguniña adarira umadagu buítiña houn hasaanigu.
Gúndaatiña isaanigu hau sun hagübürigu dan le hama hamá amu íbirigu (Ariha huméi párafu 18 luma 19).
18, 19. a) Ida liña gayara lan híchugun amu kristiánugu ídemuei houn nibureintiña? b) Ka lunbei hasigirun agübürigu adügei?
18 Lun híderaguniña agübürigu hasaanigu, aniheinbei dan gayara lan hamisurahan amu burí iduheñu hábiñoun lun houaradun hama lidan áhuduraguni kei iduheñu. Furendeitiña saragu nibureintiña katei buiti dan le háfuridun apurichiha hama amu íbirigu o dan le hadügün Ariñawagúni 27:17). Ariñagati Shan, le buga uágubei wayanuha: “Haritagua nágiña íbirigu ha meha íderagubalina. Sagü meha híderagunina aranseha aban fánreinti, aba nafurendeirun amu burí katei. Ani hínsiñeti meha katei burí le wadügübei úara lun wisebáharime nun”.
amu katei hama (19 Gama lumoun, íbirigu ha íderagubaliña agübürigu lunti hínchahaniña isaanigu lun inebe hamá hagübürigu houn. Ida luba hadügüni? Lau hayanuhan buidu hawagu luma lau harufudun inebesei luagu hani agübürigu buligasion lun harufudahan houn hasaanigu. Ani danme le hama hamá hasaanigu íbirigu hagía, lunti háfaagun lun marufudun hamá somu igaburi le gayarati gunfuranda hamani amu wuriba dandu múnada kei bóugudi lun damuriguaü (1 Féduru 2:12). Íbini gayara lan hamuriahan agübürigu ídemuei hama amu, súnwandan hagía lan lúnbaña harufudahani inarüni houn hasaanigu. Lunti hetenirun lun ídemuei le híchugubei amu íbirigu houn haduheñu.
20. Ida liña gayara lan híderaguniña agübürigu hasaanigu lun lubúeingu hamá Heowá ha úaraguatiña?
20 Agübürigu, amuriaha humá luma Heowá lun líderagunün ani sigí humá adügei sun hiyaraati (aliiha huméi 2 Krónikasi 15:7). Súdinila harihini hamadagua hisaanigu luma Heowá sügǘ lau katei le hínsiñebei hun. Adüga huméi sun hiyaraati lun hachoururuni chülǘ lan Lererun Bungiu tidoun hanigi hisaanigu. Afiñe humá luagu gayara lan heseriwidun hisaanigu lun Heowá. Danme le hadügüni hisaanigu le tariñagubei Bíbülia ani falá hameime lubuidun hani hénpulu, hasandiraguba hungua kei apostolu Huan. Ariñagati hawagu ha únbaña larufudahei inarüni: “Úati amu katei agundaaraguagüdütina keisi dan le naganbun luagu habagariduña lan nirahüñü úaragua luma inarüni” (3 Huan 4).
^ par. 7 Ariha huméi arütíkulu “Usted puede aprender otro idioma”, tidan ¡Despertad! to lánina ǘrüwa-hati, 2007, páhina 10 darí 12.