LIDAN irumu 1910, aba hígiruni nagübürigu uburugu Tiflis (Georgia) aba houdin eredera lidan aban liráüraü fulasu le ñein lubéi hagüriahóua animaalugu yarafa lun aban fulasu gíriti Pelly (Saskatchewan, luagun oubaü le ñeinhin lubéi lálüda Weyu Canadá). Lidan irumu 1928 nasirua nan, ani au amuleñibei hádangiñe sisi isaanigu. Hilati núguchi sisi hati lubaragiñe nasirua nan, ani aba tóunwen núguchu dan le figigidina. Murusun dan lárigiñe, aba tounwen Lucy, to níbugaña, 17 meha irumu tau. Ligía aba lubéi letenirun Nick le niyawürite nun luma houn níbugañanu.

Aban weyu, aba harihinina niduheñu achawahei lili aban hádangiñe walügüniña gabayu. Bián meha irumu nau. Hanufudetiña meha luéi ladügürünina gabayu ligía, ligía aba lubéi hagúaragun nun lun nígiragüdüni. Nanagan meha hawagunbei ani maganbun numutiña. Íbini meha masuseredun lan ni kata nun, aba híchugun niduheñu fe luagu maganbun nan.

Aba lariñagun aban hamada niduheñu buídutimabei lan nun lun hóunahadina tidan aban leskuela to ñein habéi irahüñü maganbuntiña. Ligía aba lubéi lóunahadina niyaurite Nick tidan aban leskuela houn maganbuntiña Saskatoon (Saskatchewan). Láfaruñadina meha anufudei, ladüga dísetu meha leskuela tuguya hawéi niduheñu ani seingü meha irumu nau. Lídanrügüñein meha lidaani fedu luma irumurugu gayara lan nidin abeluha hamoun niduheñu. Lau  lásügürün dan, aba nafurendeirun ayanuha seini ani gúndaatina meha adibiriha hama ha híbiri irahüñü.

Aba tamarieidun Marion, aba hádangiñe níbugañanu, luma Bill Danylchuck lidan irumu 1939, ani aba hetenirun biángubei hagía nun luma tun Frances to nitu. Hagía furumiñetiña aturiahatiña Bíbülia hama gefentiña luagu Heowá hádangiñe niduheñu. Dan le meha nidin ebeluha hamoun irumurugu, áfaaguatiña meha lun harufudahani sun le hafurendeirubei tídangiñe Bíbülia nun. Hénrenguti meha woun wayanuhan, ladüga mayanuhaditiña meha lidan seini. Íbini ítara, rútiña meha fe luagu hínsiñe lan le nafurendeirubei luagu Heowá nun. Aba gunfuranda nani úara lan le hadügübei luma le tarufudahabei Bíbülia, ligía aba lubéi desidírü nan nidin hama apurichiha. Fiú dan lárigiñe, busenhadina meha nabadiseirun. Weyu 5 lidan nefu-hati lidan irumu 1941, aba labadiseirunina Bill lidan aban duromu lauti gürabu buin lau duna lídangiñeti welu. Wéiriti meha lidili duna ligía!

Dan le nagiribudunbei wábiñoun irumurugu lidan irumu 1946, aba woudin lidan aban adamurini Cleveland (Ohio, Meriga). Le furumiñeti weyu, aba habürühani níbugañanu le ariñawagúbei lun gayara lan nafalaruni programa. Gama lumoun, lidan libiaman weyu aba nagundaarun saragu dan le níchugunbei fe lásügürawagüdüña lan adamurini lidoun iñeñein seini houn gürigia maganbuntiña ha ñéinbaña. Aba gayara lan gunfuranda nani le tarufudahabei Bíbülia. Hínsiñeti meha programa ligía nun!

Málügili meha lagumuchun Libiaman Wuribu Wéiriti, ani busentiña meha gürigia harufuduni úaragua hamá lun hageira. Gama lumoun, dan le nagiribudunbei leskuelarugun lárigiñe adamurini, desidírühadina meha úaragua nan lun Heowá. Aba mabusuragunhadina lan lun fanidira, meremuhan naali meha luremun ageiraü ani mefeduhan au. Aba giñe mídinhadina lan ligilisirugu hama híbiri nánigu paaná. Mínsiñeti meha katei le houn ha nadagimeinbaña leskuelarugu, aba hadügüdarun nuagu ani abahüdagua hagía iyeeni nun lun nasansiruni nisaminan. Ariha hamuti meha nánigu paaná le asuseredubei, ani ruti katei ligía chansi nun lun napurichihan houn. Ánhatiña fiú hádangiñe lun inarüni dan lárigiñe. Haganagua añahein meha Larry Androsoff, Norman Dittrick luma Emil Schneider, ani añaheingua eseriwida lun Heowá.

Dan le meha nidin lidan amu uburugu, súnwandan meha náfaagun lun napurichihan houn gürigia maganbuntiña. Aban weyu, aba nidin lidan aban fulasu Montreal le ñein lubéi hadamuridagua lílana ageiraü ha maganbunbaña. Ñein napurichiha lun Eddie Tager, aba nibureinti lídanñein luriban üma. Seriwiti meha Eddie lidan damuriguaü lidan iñeñein seini Laval (Quebec) darí lounwen lidan irumu le ásügürübei. Subuditina meha giñe aban nibureinti gíriti Juan Ardanez. Ítara kei meha lílana uburugu Beréa lidan furumiñeti sígulu, akutihati Huan saragu lun lachoururuni lafurendeiruñein lan le tarufudahabei Bíbülia (Adügaü 17:10, 11). Chülüti lun aban lan Gefenti, ani seriwiti kei wéiyaali lidan afiñeni Ottawa (Ontario) darí luéyuri lounwen.

Lidan irumu 1950, aba náguyun lun Vancouver. Íbini hínsiñe lan meha nun napurichihan houn gürigia maganbuntiña, mabulieidun numuti le asuseredubei nun dan le nayanuhanbei ǘmada tuma aban würi  to aganbatu. Chris Spicer meha tíribei. Ánhatu meha teresibirunu wani garüdia sagü hati ani busentu meha giñe lun nasubudiruni Gary, le tani weiriei. Ligía aba lubéi nidin túbiñe ani lǘtiwa ayanuha abürüharügü. Aba madunragunhadiwa lan darí fiú irumu lárigiñe, dan le hayarafadunbei abusuragua nun lidan aban adamurini Toronto (Ontario). Ma lanarime ugundani! Labadiseira meha Gary weyu ligía. Haritaguagüda lumutina sügǘ ligía luagu lisudinin wasigirun apurichiha. Ibidiñeti woun anhein lánharuba lubéi somu hádangiñe gürigia ha únbaña wapurichiha lun inarüni lau lásügürün dan.

Dan lárigiñe, aban nagiribudun Saskatoon. Ñein nasubudira aban würi to amuriahaboun numa lun níchugun külase tídangiñeti Bíbülia houn bián tisaanigu mádounu, ani maganbuntiña. Jean tuma Joan Rothenberger híribei. Biángubei hagía haturiahaña meha tidan leskuela hountu maganbuntiña to meha ñein lubéi naturiaha. Fureseti meha hagumeserun afuranguagüdei le hafurendeirubei houn hánigu paaná, ani seingüñanu hádangiñe würiña nibureintiña ha aturiahabaña tidan leskuela tuguya achülürütiña lun Gefentiña hamá. Eunice Colin aban hádangiñe. Subudiguaadiwa meha woungua lidan lagumuhóun irumu le naubei leskuelarugu. Lidan dan ligía, aba tíchugun aban bímetu nun ani aba tálügüdünina anhein gayara lubéi gamadagua wamá. Chülütu Eunice lun aban tan gürigia súdinitu lidan nibagari: nani weiriou.

Dan le tasubudirunbalin túguchu Eunice taturiahañoun lan Bíbülia, aba tamuriahan luma tábuti leskuela lun lan layanuhan tuma lun tígiruni taturiahan. Íbini houcha lan ladügüni ani gidaloun agumeiraguagüdüni tídangiñetu Bíbülia to túmaboun tuéi, desidírüharu meha Eunice úaragua tan lun Heowá. Dan le tabusenrubei tabadiseirun, aba hariñagun tagübürigu tun: “Ánhabu abadiseira keisi gefentu luagu Heowá, mosu bidin múnadagiñe”. Ligíati, lau 17 irumu, aba tidin Eunice awinwanda hama fiú iduheñu Gefentiña. Aba tawanserun lidan taturiahan ani aba tabadiseirun. Aba wamarieidun lidan  irumu 1960, ani mídintiña tagübürigu lidan maríei. Lau lásügürün dan, aba hagumeserun tagübürigu arihawa lau inebesei ladüga wafiñen luma luagu ligaburi wagüriahaniña wasaanigu.

Sédüñanu wasaanigu ani aganbatiña súngubei. Hénrenguti meha woun wagüriahaniña. Gama lumoun aba wadügün lun hafurendeirun ayanuha lidan seini lun gayara lan wayanuhan hama buidu luma lun warufudahani inarüni houn. Íderagua hamutiwa íbirigu ha lídanbaña damuriguaü buidu. Kei hénpulu, abürühati aban úguchili aban tiraüraü gárada woun lun labahüdahan woun lanabahaña lan aban wasaani tidan Luban Adamuridaguni. Aba waransehani turóbuli ligía ñein guánarügü. Heseriwiduña nisaanigu James, Jerry, Nicholas luma Steven lun Heowá keisi wéiyaaña lidan afiñeni úara hama haduheñu. Ani ídehati Nicholas tuma Deborah, to lani weiriou lidan ásügüragüdüni lidoun iñeñein lánina seini tidan sukursali Gran Bretaña. Ani Steven tuma Shannan to lani weiriou, lídanñanu giñe ásügüragüdüni lidoun iñeñein lánina seini tidan sukursáli Meriga.

Híruti aban lan hati lubaragiñe wagunfulirun 40 irumu maríeiñu, aba tounwen Eunice lau kánserü. Lidan sun dan le taubei ageindagua luma tisandi, kipu tumuti meha tafiñen  luagun águyuguni héreñu. Busenhadina lachülürün weyu lunya gayara lan narihinu.

Lidan bián-hati lidan irumu 2012, aba néiguadun ani aba láhalachagun niranaagua. Aba níchugun fe mégeibadina lan ídemuei, ligía aba lubéi nidin awinwanda luma aban hádangiñe nisaanigu tuma lani weiriou. Lídanñadiwa aban damuriguaü lidan iñeñein lánina seini Calgary (Alberta), ñein lubéi neseriwida keisi wéiyaali lidan afiñeni. Anihán furumiñeti wéiyaasu lidan nan aban damuriguaü lidan seini. Ida liñati nakipuruni numadagua luma Heowá sun dan le lidan nubéi damuriguaü lidan inglesi? Lau lídehan Heowá. Gúnfuli lumuti lani füramasei luagu líderagubaña lan méteñuhaña (Sálumu 10:14). Seremei numutiña sun ha meha abürühabaña tirahüñü gárada, hama ha afurendeirubaña ayanuha lidan seini ani adüga haméi sun hayaraati lun hasubudiragüdüni nun ka lan ariñawagubei lidan adamuridaguni.

Anihein meha dan ibidiñe lan nun kaba lan nadüga ani aba burí lénrendun nun asigira, ladüga ua lan gunfuranda nani le ariñawagúbei o ladüga nasandirun ibidiñe lan houn ha híbiri ida luba lan híderaguniña maganbuntiña. Lidan burí dan ligía, aba naritaguni le lariñagubei Féduru lun Hesusu: “Kábagia umoun woudin? Dimurei burí le bariñagubei, lánina ibagari magumuchaditi” (Huan 6:66-68). Ítara kei saragu kristiánugu maganbuntiña ha seriwihañabaña lun Heowá luagu saragu dan, furendeihadina arufuda gurasu luma afiñera luagu Heowá luma tuagu lóundarun. Íderagua láadina katei le saragu. Guentó anuheinharu saragu agumeiraguagüdüni lidan niñeñe, ani gayarati nasagarun saragu buiti lídangiñe adamuridaguni luma burí adamurini lidan iñeñein lánina seini le merigana. Chóuruti gunda lan nibagari ani ibihaadina saragu abinirúni lidan neseriwidun lun Heowá, le Wabungiute.