SAGÜ irumu, hagiribudun saragu gürigia lidoun damuriguaü. Samina humá luagu lanarime “ugundani sielu” sagü lagiribudun kada aban hádangiñe gürigia gebegitiña ha lidoun damuriguaü (Luk. 15:7, 10). Anhein giribuhadün lubéi lidoun damuriguaü chouru huméi gunda lan Hesusu, ánheligu luma Heowá luagu giribuhadün lan lidoun damuriguaü. Guentoti, lau haransehañein lan humadagua luma Heowá, másiñati hadunragun luma ámuñegueinarügü lénrengunga. Ka lídangiñe lénrengunga ligía, ani ka gayaraabei líderagunün?

Lárigiñe hagiribudun saragu íbirigu lidoun damuriguaü, aban burí hageindagun luma luriban saminaü. Anhein ligía lubéi asuseredubei hun másiñati gunfuranda humani ida liña lan meha lasandiragun urúei Dawidi lungua. Íbini lárigiñe ferudunawa lan lifigoun, ariñagati: “Maguraasunhadina” (Sal. 40:12; 65:3). Aban gürigia le agiribuduti lun Heowá gayaraati sandiguagili lan lungua lau duru o lau busiganu luagu saragu irumu. Kéiburi meha Isabelle, * to meha erederuboun lóugiñe 20 irumu bugawaañu, ariñagatu: “Güreweiti meha nun nafiñerun gayara lan feruduna lánina Heowá”. Anhein ábürüha barüna, ledebiliduba bumadagua luma Heowá (Ari. 24:10). Áfaagua humá lun masuseredun lan le hun.

Añahein amu ibidiñeti houn halíagiñeba lan hagumesera lau hasaminarun luagu sun le lunbei hadügüni lun haransehani hamadagua luma Heowá. Lárigiñe lagiribudun Antoine lidoun damuriguaü, ariñagati: “Bulíei nan meha ida liña lan nibagari keisi aban kristiánu”. Ladüga saminaü le, másiñati añahein lan míchugun hamuti sun hayaraati lidan heseriwidun lun Heowá.

Ru wama aban hénpulu. Anhein lagünrinchagua aban herigini aban muna, másiñati ibidiñe lan lun tabureme halíagiñeba lan lagumesera láurügü lasaminarun luagu dan luma áfaaguni le lunbei ladireirun  lun laransehanu. Ítarameme anhein gádeiha lubéi humadagua luma Heowá ladüga somu figóu wéiriti, háfuga genege lan hun mégeibadün lan hadügün aban lanarime áfaaguni lun haransehani. Gama lumoun anihein ídemuei.

Agunbiraha lumutiwa Heowá: “Higougu, wadimureha libügürü katei le” (Isa. 1:18). Hínsiñetün lun Heowá ladüga áfaaguadün lan lun haransehani humadagua luma. Samina humá luagu le, gayaraati layusuruni Heowá hani hénpulu lun larufuduni marasualugu lan Mafia (Ari. 27:11).

Hayarafaduña lun Heowá lau hagiribudun lun, ani füramaseti ladügüni ligiaméme huagu (Sant. 4:8). Buiti lun harihini amu giribuhadün lan lidoun damuriguaü, gama lumoun, mosu hadügün lanwoun lira. Lunti hasigirun ederebudagüdei ínsiñeni le hasandirubei luagu Heowá le Húguchi ani Humada. Ida luba hadügüni?

Áfaagua humá lun hasaminarun luagu le hiyaraabei adüga. Chóuruti aritagua humagili lan arufudahani le lébubei hafiñerun luagu Bungiu mini lan le, le hasubudirubei luagu Heowá luma le füramase lubéi. Gama lumoun lunti haransehani le líbiri, mini lan, hadügüni katei kei ladügüni aban kristiánu, háfuridun apurichiha, hadamuridagun luma lun hásügürün dan hama híbirigu. Ariha wamá fiu katei le gayaraabei hadügüni.

Ayanuha humá súnwandan luma Heowá. Gunfuranda lumuti Húguchi Bungiu háfuga lan hénrengu lan hun hafurieidun ladüga sandíguagidün lan hungua lau duru ladüga figóu le meha hadügübei (Rom. 8:26). Íbini ítara, sigí humá afurieida ani ariñaga humá lun Heowá busenmeme humá gamadagua humá luma (Rom. 12:12). Ariñagati Andrej: “Sanditina meha aban lanarime duru luma busiganu. Ani lárigiñe nafurieidun aba burí nasandirun darangilaü”. Anhein ibidiñe lubéi hun kaba lan uagu hafurieida, ráramagua humá asaminara luagu furíei le ladügübei urúei Dawidi dan meha le lasakürihanbei, ani dariwati furíei le lidan Sálumu 51 luma 65.

Aturiaha humóun Bíbülia súnwandan. Líderagubadün lira lun hederebudagüdüni ínsiñeni luma hafiñen luagu Heowá (Sal. 19:7-11). Ariñagati Felipe: “Le meha adügübei lun ledebilidun numadagua luma Heowá luma lun nachararun lun ladüga meha lougua lan naturiahan luma naliihanu Bíbülia. Keiti mabusenrunhadina lan lun néiguadun lidoun ligiaméme charati, aba nóunigiruni numadagua luma Heowá lau gani nan aban programa lun naturiahanu Bíbülia nábuguarügü”. Gayaraati giñe hadügüni ligiaméme. Anhein ibidiñe lubéi hun kaba lan tema hanúadirun lun haturiahan hábuguarügü, gayaraati hamuriahan ídemuei luma aban umadaü le derebuguti hafiñen.

Gamadaguaya humá hama íbirigu. Añahein hádangiñe ha agiribudubaña lidoun damuriguaü nidiheritiña luéi wuriba lan harihiniña amu. Ariñagatu Larissa: “Láfaraadina meha busiganu. Sanditina meha garabaguadina lan lun damuriguaü. Ítara liña meha nasandiragun nungua luagu saragu dan”. Chouru huméi, busén hamá wéiyaaña lidan afiñeni hama amu íbirigu ha derebugubei hafiñen híderagunün lun gamadaguaya humá luma Heowá (ariha huméi rekuáduru “ Le gayaraabei hadügüni wéiyaaña lidan afiñeni”). Gúndaatiña saragu íbirigu luagu giribuhadün lan lumoun Heowá ani busentiña lun gunda humá (Ari. 17:17).

Ka gayaraabei hadügüni lúntima yarafatima humá lun damuriguaü? Abasiiha humá lidoun sun adamuridaguni ani apurichiha humá súnwandan hama íbirigu. Ida luba líderagunün heseriwidun sunsuinagubei? Ariñagati Félix: “Hagurabahañein meha lílana damuriguaü nagiribudun. Aba nasandiragun nungua hínsiñewa nan. Sun hagía íderagua hamutina asandiragua nungua kei lílana damuriguaü, luma lun narihini feruduna láadina lan Heowá ani gayara lan nasigirun nubaruaguóun” (ariha huméi rekuáduru “ Le gayaraabei badügüni”).

Sun aünha lan aransehei humadagua luma Heowá, lasigiruba Mafia achüha saragu turobuli huagun lun ledebilidagüdüni humadagua luma Heowá (Luk. 4:13). Anhein busén hubéi aranseñu humá, derebugüda huméi humadagua luma Heowá.

Füramaseti Heowá houn lubúeingu: “Náluahabaña mudún ha eferidirubaña, nanügübaña ha ayuridagubaña, nagüragubei hagudi ha áhalachubaña ugudi, níderagubaña ha débilibaña” (Ese. 34:16). Íderagua laaña Heowá saragu lubúeingu lun haransehani hamadagua luma. Ligíati, chouru huméi busén lan líderagunün lun labuíduruntima humadagua luma.