1. Ida luba wafuranguagüdüni ligaburi aban gürigia gudemehabuti ani ka sügǘ arufudahabei woun luagu gürigia le gudemehabubei?

DAN LE wasaminarun luagu aban gürigia le gudemehabuti, másiñati wasaminarun luagu aban gürigia le hínsiñehabuti, le gunfuranda lumutiña amu ani gíchigadi ligía. Másiñati adüga lan le lun wasaminarun luagu wügüri samariana le uágubei labahüdaha Hesusu. Gudemehabuti terenchana le lun aban wügüri huríu le ábürühabei háhaburugu híwerutiña. Dan le larihinbalin wügüri Samariana aba “lagudemedagun lun”, ani adügati ínsiñeni lun tánhingichun lanigi, aba letenirun lun (Luk. 10:29-37). Sagatiwa aban lubuidun igaburi lúmagiñe Bungiu lidan sügǘ le, ítara liña larufuduni línsiñehabu woun sagü weyu ani lidan ámuñegueinarügü igaburi: lugudemehabu.

2. Ka ida amu igaburi larufudúa gudemehabu?

² Arufudúati giñe gudemehabu lau mabeichun lan gürigia íbini anihein lan resun lun labeichuniwa. Lidan burí kesi libe le, wéiriti larufudun Heowá gudemehabu woun, kei lariñaguni abürühati sálumu: “Mabeichun lumutiwa Bungiu keisi le wadünabei mafayeihángüdalawa luagu wariban luagu wafigoun” (Sal. 103:10). Íbini ítara, anihein dan mosu labeichuni Heowá aban gürigia ladüga lafigouhan.

3. Kaba álügüdahani wakutiha lidan aturiahani le?

³ Lidan aturiahani le, warihibei óunabagülei le tíchugubei Bíbülia lun ǘrüwa álügüdahani burí le: ka uagu larufudaha Heowá gudemehabu?, ida liña ítara lan abeichúni le íchugubei lau aban úhabu dǘgüdati luma gudemehabu? ani kaba íderaguawa arufudei igaburi le?

4. Ka uagu larufuda Heowá gudemehabu?

⁴ Hínsiñeti lun Heowá lun gudemehabu lan. Abürühati apostolu Pábulu lau lídehan lani Bungiu sífiri sandu “wéiriti lan wagudemen” lun Bungiu. Lidan kesi le, layanuhaña meha Pábulu luagu ru  lan Bungiu emenigini houn lubúeingu ha kristiánugu anuadirúaaña lun hawinwandun sielu íbini chará hamá (Efe. 2:4-7). Lau sun lira, mámarügüñein houn kristiánugu anuadirúaaña larufuda Heowá gudemehabu. Ariñagati Dawidi lidan aban Sálumu: “Buiti Aburemei hama sun gürigia, ani góunigi lumuti giñe le ladügübei lau areiduni” (Sal. 145:9). Kei le hínsiñe habéi sun gürigia lun Heowá, arufudati gudemehabu dan le larihini resun lun larufuduni.

5. Ida liña lafurendeiruni Hesusu gudemehabu lan Heowá?

⁵ Subudi lumuti Hesusu buidu buidu hínsiñe lan lun Heowá larufudun gudemehabu. Rédeiti luma Lúguchi sielu luagu saragu milu irumu, lubaragiñe liabin Ubouagu (Ari. 8:30, 31). Lidan saragu kesi, ariha lumuti ida liña lan larufudun Lúguchi gudemehabu houn saragu gürigia gafigountiña (Sal. 78:37-42). Ani dan le larufudahan Hesusu houn amu, súnwandan meha larufuduni ligaburi Lúguchi.

6. Ka abahüdaguni labahüdahabei Hesusu le arufudubalin gudemehabu lan Lúguchi?

⁶ Ítara kei warihini lidan aturiahani le lubaragiñebei le, abahüdahati Hesusu aban sügǘ le ánhingichubarun wanigi luagu isaani le agiribudunbei lúbiñoun lúguchi, lun larufudahan weiri lan gudemehabu lan Heowá. Isaani le uágubei layanuhóua lidan sügǘ le, aba lidin hábiñegiñe ani aba “lachagaraguni liseinsun [...] lidan aban ibagari mabuidunti” (Luk. 15:13). Lau lásügürün dan, aba lasakürihan luagu ligaburi lawinwanduni libagari, aba lǘnabudaguagüdün lungua ani ábaya lagiribudun hábiñoun. Ka ladügübei lúguchi? Málüti nibureinti le lun lasubudiruni. Ariñagati Hesusu: “Dísegi liña, aba larihini úguchili irahü le, aba lagudemedagun lun. Aba léibaagun lubaroun, aba lóuburuni, aba lachuuruni”. Lubaragiñe lásügüragüdüni busiganu, aba larufudun lúguchi gudemehabu lun, ferudunalei, ani resibiléi. Gíbeeli meha lifigoun isaani le, lau sun lira feruduna lumuti meha lúguchi ladüga lasakürihan. Úguchili le gudemehabubei lidan sügǘ le Heowá. Lau hénpulu le, larufudahaña Hesusu busén lan Lúguchi feruduna lániña sun afigouhatiña ha asakürihabaña tídangiñe sun hanigi (Luk. 15:17-24).

7. Ida liña genegegua lan lichú lau Heowá luma lugudemehabu?

⁷ Arufuda lumuti Heowá gudemehabu ladüga lichú lau le móubabei. Lichú au le luágubei Heowá mama furumiñeguarügü subudi. Ariñagatu Bíbülia “lichú aau le lúmagiñebei Bungiu” buin liña lau “gudemehabu ani adüga” lumuti le buídubei (Sant. 3:17). Ítara kei aban úguchili hínsiñehabuti, subudi lumuti Heowá barǘ lan buiti lun gudemehabu hama lisaanigu (Sal. 103:13; Isa. 49:15). Ruti katei le emenigini houn lau sun  chará hamá. Lau lichú aau le magumuchaditi, arufudati Heowá gudemehabu dan le ladarirun resun lun ladügüni. Lau sun lira arufuda lumuti igaburi le ani subudi lumuti kaba lan dan marufudun lan gudemehabu. Kei weiri lubéi lichú lau, subudi lumuti halíaba lan lébeda ani magudemedaguntiña gürigia lun anhein gadurun habéi.

8. Ka lunbei ladügüniwa, ani ka uagu?

⁸ Guentó samina wama, anihein lan aban lubúein Bungiu abagarida lidan figóu lau lichú lau. Ligíati, kaba adügǘwa? Abürühati, apostolu Pábulu lau lídehan sífiri sandu: “Móundarun humá luma” (1 Ko. 5:11). Sun afigouhati le masakürihanti labugúba lídangiñe damuriguaü. Lunti ladügüniwa lun hóunigiruniwa íbirigu ha úaraguabaña ani arihúa ligíame sandu lan liri Heowá. Lau sun añahein lan saminatiña mama lan larufuduña lugudemehabu Bungiu dan le habugún gürigia lídangiñe damuriguaü. Ariha waméi anhein inarüni lubéi.

9, 10. a) Según warihini lidan Ebüréu 12:5, 6, ka uagu gayara lubéi wariñagun larufuduña lan gudemehabu dan le labugun aban gürigia lídangiñe damuriguaü? b) Ka hénpulu gayarabei lafuranguagüdüni woun?

⁹ Dan le lichugún ariñahani lidan damuriguaü luagun “mámaali lan aban Gefenti luagu Heowá” somu gürigia le wéiribei línsiñe woun, sanditiwa aban íruni le wéiriti. Másiñati wálügüdagun woungua anhein lunti lubéi yebe labugúniwa. Le san lúgubu arufuda lan labugun aban gürigia lídangiñe damuriguaü gudemehabu? Anha, ítara liña. Anhein megei lubéi aban gürigia labeichún, buídutimabei lun, larufudun gudemehabu lun ani aban óunwenbu ínsiñeni líchuguniwa lun (Ari. 13:24). Gayaraati san lídehan labugun gürigia le masakürihanti lun lasansiruni ligaburi? Anha gayaraati. Saragu gürigia ha adügübaña aban figóu wéiriti aba híchugun fe luagu úaraguni le harufudubei wéiyaaña lidan afiñeni, adügati lun táhigichu hanigi lun hadügüni asansiruni le mégeiwabei lun hagiribudun lúhaburugu Heowá (aliiha huméi Ebüréu 12:5, 6).

¹⁰ Samina wamá luagu hénpulu le. Aba líchugun aban hóuniri mudún fe, sándiñoun lan aban hádangiñe lilügüniña mudún. Ani subudi lumuti lubaragiñe lan lagaraniha tun mudún to sándiboun mosu lan lagidarunu hádangiñe ha híbiri mudún. Lau sun lira gamadóuntiña mudún. Busentiña hama hamá ha híbiri ani aba hasusudun dan le hasagarún hádangiñe ha híbiri mudún. Ligíati, anhein anüga aban hóuniri mudún aban hádangiñe mudún lun lagaraniha tun, mini lan san lóuseruñoun lan wuriba? Furanguti mítaran lan. Subudi lumuti, anhein lan ligira haganagua ha híbiri mudún, gayarabei laburuchagun sandi le hadan. Ligíati dan le lasagarunu to sándiboun lóunigiruñanu ha híbiri mudún (ariha huméi giñe Fad. 13:3, 4).

11. a) Ka ida genegegua lan aban gürigia le bugawaali lumoun aban mudún le sándibei? b) Ka san ídemuei aniheinbei houn gürigia ha abugúbaña lídangiñe damuriguaü?

¹¹ Gayaraati wariñagun ítara liña lan aban bugawaali kei aban mudún le sánditi ladüga sandi lan lidan lumadagua luma Bungiu (Sant. 5:14). Ítara kei lisandi úgubu, dan laribadun wamadagua luma Heowá gayaraati giñe laburuchagun kei aban sandi le galugurahati. Ligíati, anihein lubéi dan mosu lasagaruniwa gürigia lídangiñe damuriguaü. Arufudati labugún aban gürigia lídangiñe damuriguaü lueirin hínsiñe íbirigu ha úaraguabaña lun Heowá, ani gayaraati giñe lánhingichunu lanigi le afigouhabei, luma lun ladügün lun lasakürihan. Sun bugawaañu liña lan gürigia, gayaraati labasiihan adamuridagua lun leresibirun ariñahani le ítarabei kei éigini, lun lederebudagüdüni lafiñen. Gayaraati giñe leresibirun agumeiraguagüdüni lun laturiahan lábuguarügü ani arihaleime JW Broadcasting^®. Ani, danme harihin wéiyaaña lidan afiñeni ladügüña lan asansiruni lidan libagari, sagü átiri dan gayarabei híchugun adundehani lun lun híderaguni,  gayara láamuga lanharúniwa lun lidan damuriguaü keisi aban gefenti luagu Heowá. *

12. Ida liña harufudun wéiyaaña lidan afiñeni ínsiñehabuni luagu aban afigouhati le masakürihanti?

¹² Súdiniti lun waritaguni gürigiarügüñanu lan ha afigouhabaña ani masakürihan hagía abugúbaña lídangiñe damuriguaü. Subudi hamuti wéiyaaña lidan afiñeni, weiri lan seriu lan katei le ani siñati ladügün lau lóufudagun. Ani subudi hamuti bei lumutiña lan Heowá afigouhatiña keisi hadüna lun babeichún (Her. 30:11). Hínsiñetiña hábirigu houn ani mabuseeruntiña lun laribadun hamadagua luma Heowá. Lau sun, anihein lan dan larufudúña lan ínsiñehabuni luma gudemehabu dan le lasagarun aban gürigia afigouhati tídangiñe damuriguaü ani masakürihanti.

13. Ka uagu mosu lubéi meha labugún aban kristiánu lídangiñe damuriguaü le Korintubei?

¹³ Ariha waméi ida liña lan letenirun apostolu Pábulu lidan furumiñeti sígulu lun aban kesi le lani aban afigouhati le masakürihanti. Anihein meha aban kristiánu Korintuna awinwanda lidan magíaguni, lawinwanduña meha tuma lúmari lúguchi. Ma luriban! Ani ariñagaali meha Heowá houn binadu néchani Ísüraeli: “Anhein arounra gürigia tuma lúmari lúguchi, ǘnabudagüda lumuti lúguchi guánarügü. Lasiadirúba lubeiti wügüri ligía lun lounwen tau sun würi to úmaboun larounra, hagíaba giñe gadurun luagu hóunwegun” (Fad. 20:11). Chóuruti, mariñagun lan Pábulu lun damuriguaü le Korintubei lun háfaruni wügüri ligía hilagubei; gama lumoun ariñagati houn lun habuguni lídangiñe damuriguaü. Lagadeiruñanu meha fiu hádangiñe lílana damuriguaü ladüga magíaguni le ladügübei. Añahein meha giñe hádangiñe íbirigu saminatiña mama lan aban figóu wéiriti (1 Ko. 5:1, 2, 13).

14. Ida liña larufudun Pábulu gudemehabu lun wügüri le lídanbei damuriguaü le Korintubei, ani ka uagu? (2 Korintuna 2:5-8, 11).

¹⁴ Fiu dan lárigiñe aban líchugun, Pábulu fe adügaali lan afigouhati sánsiguaü ani asakürihaali lan tídangiñe sun lanigi. Lau sun dasei laali lan meha wügüri le liri damuriguaü, ariñagati Pábulu houn wéiyaaña lidan afiñeni mabusenrunti lan “laweiridagüdüni katei”. Aba líchuguni adundehani le houn: “Guentó, lunti feruduna humani, ru huguyame gurasu lun”. Ani ariñaga lumuti houn ka lan uagu: “Luéi ladügün saragu íruni wuribati lun”. Aba lagudemedagun wügüri le lun Pábulu ladüga asakürihaali lan. Mabusenrunti meha Pábulu tabuinchun lanigi wügüri le  lau saragu íruni luma duru ladüga lueirin igarigu darí lun siñá lan hamuga láluaha ferudun (aliiha huméi 2 Korintuna 2:5-8, 11).

15. Ida liña harufudun wéiyaaña lidan afiñeni úaraguni luma gudemehabu keisi lubudubu?

¹⁵ Kei lasuseredun lidan likésin Heowá, hínsiñeti houn wéiyaaña lidan afiñeni harufudun gudemehabu. Deregüdatiña wéiyaaña dan le mégeiwa lan, ani arufudatiña gudemehabu dan le gayara lan anhein anihein lubéi resun lun ladügüniwa. Ánhaña madügün ni kata lau gürigia le afigouhabei, mama harufuduña gudemehabu, harufuduña meberesehabuni. Guentoti, hóunrügüñein san wéiyaaña lidan afiñeni yu lan harufudun gudemehabu?

16. Según Ariñawagúni 21:13, kaba ladüga Heowá houn ha marufudunbaña gudemehabu?

¹⁶ Busentiña sun kristiánugu lun gudemehabu hamá kei Heowá. Ka uagu? Ladüga gürigia ha marufudunbaña gudemehabu houn amu maganbun lubaña Heowá (aliiha huméi Ariñawagúni 21:13). Kei busén wabéi lun laganbuni Heowá wafurieidun, mosu góunigi wamá luéi wóuseruniña amu wuriba. Lubaragiñe warufudun meberesehabuni “lun laguwaragun le mégeihabubei”, súnwandan aranseñu waña lun waganbuni wábiri le asufurirubei. Lau sun lira, sériuti wanügüni eweridihani le tíchugubei Bíbülia: “Ha magudemehabubaña houn amu, magudemehábubei giñe Bungiu houn lídanme weyu lánina aguseruni” (Sant. 2:13). Anhein ǘnabugu wabéi ani gabaroun wamani megei wamá harufudun amu gudemehabu woun, aranseñu waba lun warufudun gudemehabu houn amu. Lau sun lira, busentiwa warufuduni igaburi le lun aban íbiri le asakürihaali lídangiñe lifigoun ani aba leresibirun lidoun damuriguaü.

17. Ida liña larufudun urúei Dawidi gudemehabu tídangiñe sun lanigi?

¹⁷ Tidan Bíbülia, daritiwa fiu hénpulu le arufudahabei woun ida luba lan warufudun gudemehabu houn amu ani lun móuserun wamaniña lau wuribani. Samina wamá luagu urúei Dawidi, aban gürigia le meha arufudubei gudemehabu tídangiñe sun lanigi. Íbini, busén lan meha Saulu láfaruni hilagubei, arufudati Dawidi gudemehabu lun urúei le lanúadirubei Bungiu ani móuserun lumuti meha lau wuribani (1 Sam. 24:9-12, 18, 19).

18, 19. Ka idan bián sügǘ marufudun lan Dawidi gudemehabu?

¹⁸ Íbini ítara, mama meha súnwandan larufudun Dawidi gudemehabu. Kei hénpulu, anihein meha aban wügüri gíriti Nawali wuribati meha ligaburi, máhati meha lau éigini ni lun Dawidi, ni houn wügüriña ha lúmabaña Dawidi, kei luribanbei lumene Nawali aba lagañidun Dawidi saragu darí lun lariñagun láfaralin lan Nawali hau sun tílana luban hilagubei. Seremei Awigaili to lani Nawali weiriou, lau lóufudagun aba tarufudun gíchigadi luma gaguraasuni, adügati lira lun máwiyurun lan Dawidi hitaü (1 Sam. 25:9-22, 32-35).

¹⁹ Lidan amu dan, aba layanuha profeta Natán luma Dawidi luagu aban wügüri rísiti le íweruhabarun lilügün aban wügüri gudemeti mudún to meha hínsiñeboun lun saragu. Aba lagañidun Dawidi saragu ani ariñagati: “Fiñutina bun luagu Wabungiute, luagu le lan adügübalin katei le, lunti lan lounwen” (2 Sam. 12:1-6). Subuditi  meha lilurudun Moisesi lun Dawidi, le ariñagubei anhein íweruha aban gürigia aban mudún, gasu lafayeirun gádürü mudún luagu mudún (Afu. 22:1). Gama lumoun lau lariñagun mosu lan lounwen wügüri ligía aba meha abeichúni, hǘrüyati lira. Le linarün katei, líchuguñein meha Natán hénpulu le lun Dawidi lun líderaguni gunfurandei adügaali lan Dawidi saragu duru wéiritimati. Ani arufudati Heowá gudemehabu lun Dawidi sügǘ luéi le larufudubei Dawidi luagu wügüri le uágubei labahüdaha Natán (2 Sam. 12:7-13).

20. Ka larufudubei lani Dawidi hénpulu woun?

²⁰ Ariha wamá, ka lan asuseredubei dan le lígiraguagüdünbei Dawidi lungua lun igañi, ariñagati mosu lan lounwen Nawali hau sun wügüriña ha lúmabaña. Ani masaminarun lumuti bián wéiyaasu lubaragiñe lasiadiruni wügüri le uágubei meha layanuha Natán lun lounwen. Lidan lagumuhóun kesi le háfuga wálügüdagun woungua, ka lan uagu lasaminara aban wügüri le buídubei igaburi ítara darí lun hanarimeeli lan ligaburi laguseragüdün. Gama lumoun, samina wama ka lan meha gádanbalin Dawidi lidoun dan ligía. Gíbeyaali meha katei lun lichügü. Ani dan le weiri lan wíchugun hadurun amu arufudati lira mabuidun lan wamadagua luma Heowá. Ruti meha Hesusu fiu eweridihani: “Míchiga humá hadurun amu, michugúnwa láamuga giñe hidurun, ladüga kei ligaburi híchugun hadurun amu, ítara luba giñe lichugúniwa hidurun” (Mat. 7:1, 2). Ligíati áfaagua wamá lun maweirin lan wíchugun hadurun amu ani houcha wama lun gudemehabu wama kei Wabungiute.

21, 22. Ka ida igaburi gayara lan warufudun gudemehabu?

²¹ Dan le gudemehabu lan gürigia mama sandirügü lumuti tidan lanigi; ínchaha lumuti katei le lasandirubei lun gayara lan ladügün somu katei hawagu amu. Ligíati, sun wagía gayaraati wasaminarun hawagu gürigia ha gayarabei wíderaguniña hadan waduheñu, lidan damuriguaü o lidan fulasu le ñein lubéi wapurichiha. Chóuruti wadariruba lan ámuñegueinarügü igaburi le ídanbei gayara lan warufudun gudemehabu. Subuditi san somu gürigia woun le mégeibei gurasu? Háfuga gayaraati wíderaguni lau wanügün éigini lun o wíderaguni lidan ámuñegueinarügü igaburi. Mégeiti san somu íbiri le sun liñabei lagiribudun lidoun damuriguaü dǘgüdaguaü lúmagiñe aban umadaü buiti? Gayaraati giñe wanügüni uganu lánina emenigini houn amu? Aniha aban lídangiñe igaburi buídutimati lun warufudun gudemehabu houn amu (Hob. 29:12, 13; Rom. 10:14, 15; Sant. 1:27).

²² Anhein, fegeñu liña lubéi wagu lau le geyegubei wau, wíchuguba fe anihein lan saragu chansi lun warufudun gudemehabu. Anhein warufuda igaburi le, wadügüba lun lagundaarun Wáguchi le siélubei, Bungiu le “buinbei lau gudemehabu”.