ABAHÜDAGUATU Sylviana, aban prekursora kéiburi 25 irumu tau: “Dan le meha habahüdagun numadagu luagu ugundani le hasandirubei lidan heseriwidun ñein lubéi mégeiwa hamá prekursorugu, aba meha busén nan nasandiruni ligiaméme”. Lárigiñe, ábaya tariñagun: “Gama lumoun, genegeti meha nun siñabei lan nidin eseriwida ñein lubéi mégeiwa lan ídemuei”.

Sandiguañahaadün san hungua kei Sylviana? Hínsiñeti hamuga san hun hidin eseriwida lidan aban fulasu le ñein lubéi mégeiwa lan ídemuei, ani machourun humuti anhein gayaraabei lubéi hadügüni? Anhein ítara liña lubéi, meferidira huméi hemenigin! Íderaguali Heowá saragu íbirigu lun hiñuragun lídangiñe turóbuli le adügübei lun siñá lan haganwoundagüdüni heseriwidun. Ida liña san ladügüni? Lun warihin fiú hénpulu, ayanuha wamá luagu Madagaskárü, ligadürün ubouhu le wéiritimabei ubouagu.

Lidan lagumuhóun diisi irumu, águyaaña hóugiñe 70 prekursorugu hama apurichihatiña ha lídangiñetiña 11 ageiraü * lidoun fulasu le, Áfürika, wéiriti habusenrun gürigia hafurendeirun luagu Bungiu ñein ani inebetu Bíbülia houn saragu hádangiñe. Gíbetiña giñe apurichihatiña ha lílana ageiraü ha águyutiña lidoun amu burí fulasu lun hídehan apurichihei uganu le tídanbei Bíbülia lidan óunwenbu ubouhu le. Hínsiñeti hamuga san hun hasubudirun fiú hádangiñe?

Louis tuma Perrine aban feru maríeitiña darandi gáfadahaña irumu hau ha águyugubaña Fransiagiñe eseriwida Madagaskárü. Sügütiña saragu irumu asaminara houdin apurichiha lidan amu ageiraü, gama lumoun, machourun tumuti meha Perrine anhein lunti lubéi hadügüni. Ariñagatu: “Hanufudetina meha luéi katei le ibidiñeti nun. Nidiheritina meha nígiruniña waduheñu, damuriguaü, waban, wabagari luma sun le geyegubei wau wárigiñegua. Le linarün katei, anufudei meha le nuágubei turóbuli wéiritimati le meha adarasahabalina”. Gama lumoun, lidan irumu 2012 aba tárügüdün Perrine ganigi, ani aba háguyun. Ida liña san tasandiragun tungua guentó? Ariñagatu: “Dan le nasaminarun luagun le winwan wamaalibei, gayaraati nariñagun héretimahali lan wafiñen lárigiñe warihini lúhabu Heowá lidan wabagari”. Ariñagati giñe Louis: “Lidan furumiñeti Aritaguagülei le wásügürübei Madagaskárü chülütiña diisi hádangiñe  gürigia ha aturiahabarun Bíbülia wama. Ma lubuidun katei!”.

Ka íderagubaliña íbirigu ha ibihei erei le hemegeirubei lun herederun lidan fulasu le ñein lubéi heseriwida dan le hagagibudagunbei luma lénrengunga? Aba hafurieidun lun Heowá ani ayumuraguatiña lun lun líchugun erei houn lun hawandun (Fili. 4:13, TNM). Ariñagati Louis: “Aba wíchugun fe óunaba lani Heowá wafurieidun ani ru lani lidarangilan woun. Aba gayara lan wetenirun lun sun katei buiti le wibihibei lidan wani ministeriu. Óunahatiña giñe wamadagu ha Fransiabaña gárada woun, íbini luéigiñe Internet lun híchugun gurasu woun lun mabuchadun lan wawagu” (Fili. 4:6, 7; 2 Ko. 4:7).

Biní lumuti Heowá Louis tuma Perrine luagu hawandun. Ariñagati Louis: “Lidan diisi-hati lidan irumu 2014 ñǘdüntiwa tidan Leskuela Kristiánu houn Maríeitiña Fransia. * Aban idewesei lúmagiñeti Heowá gayara lan woudin tidan Leskuela to, ani mabulieidun wabéi”. Gúndaatiña maríeitiña ha luagu ábanya lan hóunahoun eseriwida Madagaskárü dan le tagumuchunbei Leskuela.

Dan le háguyunbei aban feru maríeitiña gíritiña Didier tuma Nadine Fransiagiñe lun Madagaskárün lidan irumu 2010 lóugiñehaali meha 50 irumu hau. Abahüdaguati Didier: “Prekursorugu meha wagía dan le nibureingidiwa, ani lárigiñe aba wagüriahaniña ǘrüwa wasaanigu. Dan le haweinamudunbei, aba wasaminarun woudin eseriwida lidan amu ageiraü”. Ariñagatu Nadine: “Eredeha lumutina meha nasaminarun nadisedun hawéi nisaanigu, gama lumoun, aba hariñagun woun: ‘Ánhadün águya lidoun amu ageiraü lun hídehan lidan apurichihani, gúndaabadiwa hau!’. Hererun ínchahabaliwa lun wadügüni. Íbini díseti lan werederun, gayaraati wayanuhan hama súnwandan, ani gúndaagüda lumutiwa lira”.

Hénrenguti meha lun Didier tuma Nadine hafurendeiruni iñeñein malgache. Aba tariñagun Nadine hayañu: “Mámaali 20 irumu wau”. Ka hadügübei lun hafurendeiruni? Furumiñe, aba houdin lidan aban damuriguaü le ñein lubéi layanuhóua faransu. Dan le hasandiragunbei houngua gayaraahali lan háguyun lidoun damuriguaü le ñein lubéi layanuhóua malgache, aba hadügüni. Ariñagatu Nadine: “Daritiwa saragu gürigia lidan apurichihani ha hínsiñeti houn haturiahanu Bíbülia ani rútiña seremei woun luagu woudin bisidaña. Furumiñe, genegeti meha nun neweneduhaña lan. Ruti neseriwidun kei prekursora lidan fulasu le saragu ugundani nun. Dan le násaarun binaafin, aba nasaminarun: ‘Ma lubuidun náfurida lan apurichiha, uguñe!”.

Siñati máhayachun lan Didier dan le labahüdagun luagu dan le lagumeserunbei afurendeira malgache. Abahüdaguati: “Aban weyu, nalidihañein adamuridaguni ani úati meha gunfuranda nani óunabagülei le híchugubei íbirigu. Rúrügütina meha seremei houn. Lárigiñe tíchuguni aban íbiri tóunabagüle ani aba níchugun seremei tun, aba hagumeserun ha añuurubaña tanagangiñe adüga seini nun. Busentiña meha hariñagun nun mabuidun lan óunabagülei ligía. Aba níchugun chansi lun amu íbiri lun lóunabun ani aba líchuguni óunabagülei le buídubei. Agurabatina ítara liña lan”.

Lidan aban adamurini lidan irumu 2005, aba larihini Thierry tuma Nadia, to lani weiriou dürama le gíribei Vayamos  tras metas que honran a Dios, le ayanuhabei luagu libagari Timotéu. Dagati abahüdaguni tídangiñeti Bíbülia ligía tidoun hanigi ani ábatima busén hamá heseriwidun lidan aban fulasu le ñein lubéi mégeiwa lan ídemuei lidan apurichihani. Abahüdaguati Thierry: “Dan le lagumuchunbei dürama ani dan le wapouhañein lubéi wáhabu, aba nariñagun tun nani weiriou: ‘Haliñounba woudin?’. Aba tariñagun nun ligiaméme lan tasaminarubei”. Murusun dan lárigiñe, aba hagumeserun adügei le mégeiwabei lun gayara lan hagunfuliruni le hasaminarubei. Ariñagatu Nadia: “Murusun murusun, aba wadügün lun mibe lan wemegen. Lagumuhóun, gabarati sun wálagu tidan gádürü baliha!”.

Lidan irumu 2006 hachülüra Madagaskárü ani lúmagiñe furumiñeti weyu gúndaatiña lidan apurichihani. Ariñagatu Nadia: “Adügati ligaburi heresibiruni gürigia ha yáabaña uganu lun wagundaarun saragu”.

Gama lumoun, sisi irumu lárigiñe, aba hagagibadun maríeitiña ha luma aban turóbuli hénrenguti. Aba téiguadun Marie-Madeleine, túguchu Nadia, Fransia, ani aba labuleseirun tábulugu halá ligía aban tarüna. Lárigiñe hayanuhan luma tisurusian Marie-Madeleine, aba lálügüdünu Thierry tuma Nadia anhein busén tubéi tidin awinwanda hama Madagaskárü. Íbini 80 lan meha irumu tau, ánhatu lun agunbirahani ligía lau sun tugundan. Ida liña san tarihini ibagari lidan amu ageiraü? Óunabatu Marie-Madeleine: “Hénrenguti nun néchudun luagu fiú katei, gama lumoun, íbini anihein lan katei siñá naali adüga, huuti nasandiragun nungua lidan damuriguaü. Ani wéiritimati nugundan lau gayara lan tasigirun nisaani luma tani weiriei apurichiha lidan aban fulasu le ñein lubéi busén hamá gürigia hafurendeirun luagu Bungiu”.

Wein gáfadahaya irumu lau Riana. Lidan aban fulasu gíriti Alaotra Mangoro laweirida íbiri le, aban fulasu le ñéingiñe lubéi laboucha weyu Madagaskárü, le buídubei lun ábunaguni. Kei le buidu lan meha lidin lun leskuelarugu, busenti meha laturiahan tidan luban furendei íñuti. Gama lumoun, lárigiñe laturiahanu Bíbülia, aba lasansirun lisaminan. Ligía guánarügü ariñagubei: “Aba naturiahan saragu lun furese lan nagumuchuni nileskuelan ani aba füramase nan lun Heowá: ‘Anhein násügüra lagumuhóun egüsámini, ábame neseriwidun kei prekursoru’”. Lárigiñe leresibihan, aba lagunfuliruni Riana le füramasei lubéi. Aba lidin awinwanda luma aban prekursoru, aba láluahan lawadigimaridun fiú dan lidan dimaasu ani aba lagumeserun eseriwida kei prekursoru. Ariñagati: “Anihán katei buídutimati le desidírü naalibei lidan nibagari”.

Gama lumoun, úati meha gunfuranda hamani liduheñu ka lan uagu lígirei laturiahan. Ariñagati: “Busenti meha núguchi, niyaurite tuma tamulelua nagütü lun nidin aturiaha tidan luban furendei íñuti. Gama lumoun, mígirun nubéi meha neseriwidun kei prekursoru luagu ni kata”. Murusun dan lárigiñe, aba busén lan Riana láguyun lidoun aban fulasu le ñein lubéi mégeiwa hamá íbirigu lun hapurichihan. Ka ínchahabalin lun ladügüni? Ariñagati: “Aba hebelurun híwerutiña núbiñoun ani aba hanügün saragu katei nuéi. Adügati katei ligía lun nasaminarun luagun adundehani le líchugubei Hesusu lun wóundaragun ‘irisini sielu’. Ligía aba lubéi desidírü nan náfaagun lun nóundaragun irisini sielu” (Mat. 6:19, 20). Aba láguyun Riana lidoun suru lani ageiraü, lidoun fulasu le ñein lubéi hawinwanda antandroy. Milu-ǘrüwa-san kilómeturu (800 maili) lidise fulasu ligía luéi fulasu le ñein lubéi leredera. Ka uagu lidin lidoun fulasu díseti ligía?

Aban hati lubaragiñe hebelurun híwerutiña lúbiñoun Riana, gumeseeli meha íchiga aturiahani tídangiñeti Bíbülia houn bián wügüriña lídangiñetiña türibu antandroy. Furendeiti ariñaga fiú katei lidan hañeñe ani aba lasaminarun hawagun sun gürigia ha lídangiñetiña türibu ligía ha maganbun hamagilibei uganu luáguti Larúeihan Bungiu. Abahüdaguati: “Aba namuriahan luma Heowá lun líderagunina lun náguyun lidoun fulasu le ñein lubéi layanuhóua iñeñein tandroy”.

Kei láguyun ñeinhin, aba lagagibudagun luma aban turóbuli: madariti wadagimanu. Aba lariñagun aban wügüri lun: “Ka san uagu biabin ñahoun? Ñǘdünrügütiña gürigia yáagiñe lun houdin áluaha wadagimanu lidan fulasu le ñéingiñe lubéi biabin”. Bián dimaasu lárigiñe, aba lidin Riana lidan aban adamurini wéiriti. Kei le murusunrügaali lubéi liseinsun, aba lálügüdagun lungua kaba lan ladüga. Lidan lagumuhóun luéyuri adamurini, aba ládarun aban íbiri somu katei lubusedurugun Riana. Aba líchugun íbiri ligía seinsu le lemegeirubei lun, lun lagiribudun ñeinhin habéi antandroy luma lun lagumeserun aban liraüraü bísinisi aluguraha yogur. Abahüdaguati: “Sanditina ru lani Heowá lúhabu nun dan le nemegeirunbalin. Gayaraahali meha nerederun íderaguaña sun gürigia ha machansingiñabaña lun  hasubudiruni Heowá”. Gíbeti meha giñe wadagimanu lidan damuriguaü. Ariñagayati: “Mosu meha níchugun aban yanu hounti sun gürigia kada bián dimaasu. Laranseruñadina meha Heowá tau lóundarun”. Guentó aniheingua Riana arufudahei inarüni luáguti Larúeihan Bungiu houn ha ayanuhabaña tandroy ani busentiña hafurendeirun luagu Heowá”.

Füramaseti Heowá labiniruniña ha áfaagubaña lun heseriwidun lun (Isa. 65:16). Le linarün katei, dan le wadügüni sun wayaraati lun wagidaruni sun katei le adarasahabadiwa luéi waganwoundagüdüni weseriwidun, resibitiwa abinirúni. Kei hénpulu, genegeti meha tun Sylviana, to uáguboun wayanuha lidan lagumeseha arütíkulu, luagu siñabei lan tidin eseriwida lidan fulasu le ñein lubéi mégeiwa hamá apurichihatiña. Ka meha uagu tasandiragua tungua ítara? Ariñagatu: “Kei le chati lubéi núruna le nubaünan 9 sentimeturu [3,5 pulgada] sügǘ lau le luéigiñebei nóunwenren, adamahatina ani fureseti labuchadun nuagu”.

Íbini ítara, lidan irumu 2014 aba desidírü tan Sylviana tidin tuma Sylvie Ann, ábanya prekursora nibureintu lídangiñe damuriguaü, lidoun aban liraüraü aüdü le dísebei 85 kilómeturu (53 maili) tuéi haban. Lau sun anihein lan lénrengunga, adüga tumuti Sylviana le tabusenrubei tadügün. Ani resibitu aban lubuidun abinirúni. Ariñagatu: “Aban irumu lárigiñe náguyun, aba tabadiseirun Doratine, aban úguchuru nibureingiru to unboun níchiga aturiahani tídangiñeti Bíbülia, lidan aban adamurini sirkuitu”.

Arufudahati le habahüdagubei íbirigu úaraguatiña ha woun ánhawa lan áfaagua lun wagidarun somu katei le adarasahabaliwa luéi waganwoundagüdüni weseriwidun, warihibei inarüni lan lererun Heowá le: “Rútina erei bun, íderagua numutibu” (Isa. 41:10). Ladügüba katei le lúntima léredun wamadagua luma Heowá. Ani dan le wederegeragun woungua lau ugundani lun wídehan lidan wageira o lidan amu ageiraü, aranse lumutiwa lun wadagimanu le lunbei wadügüni lidan iseri ubóu. Kei lariñagun Didier, le buga uágubei wayanuha, “aranse lumutiwa weseriwidun lidan fulasu le ñein lubéi mégeiwa hamá apurichihatiña lubá ámuñegü”. Agurabatiwa lun híchaagun amu íbirigu houngua lau ugundani lun hibihini aransehani le.