1, 2. Ka uagu lunti lubéi góunigi hamá lubúeingu Bungiu uguñe weyu? (Ariha humóun iyawaü burí to lídanboun lagumeseha arütíkulu).

GÍBETIÑA surusiagu hama anosuhatiña etenirutiña houn gürigia ha gawagutiña sandi le galugurahati. Adüga hamuti ladüga busén hamá híderaguniña. Gama lumoun, anhein mabusenrun habéi ladagarun sandi ligía hawagu, mosu hóunigiragun houngua. Ítarameme, gíbetiña lubúeingu Heowá awinwandutiña o nadagimeintiña hama gürigia ha gawagubaña igaburi le múaranti luma ligaburi Bungiu. Anhein mabusenrun wabéi labadülerun wawagu, mosu duari wamá.

² Uguñe weyu, menebenehabutiña gürigia lun lilurudun Bungiu luagu le buídubei luma le wuribabei. Tidan tibiaman gárada lun Timotéu, abürüha lumuti apostolu Pábulu ida luba lan hagaburi gürigia ha dísebaña luéi Bungiu. Ani gíbetimabaña gürigia óuserutiña ítara eibu layarafadun lagumuchagüle ubóu (aliiha huméi 2 Timotéu 3:1-5, 13). Ani íbini mínsiñe lan katei le woun, gayaraati wagumeserun asaminara, ayanuha luma óusera kei gürigia ha geyegubaña wau (Ari. 13:20). Ligíati, lidan arütíkulu le warihibei amu lan igaburi le hawagubei gürigia lidan lagumuhóun dan luma hagaburi lubúeingu Bungiu. Warihibei giñe ka lan gayaraabei wadügüni lun mabadülerun lan igaburi wuribati ligía wawagu, luma ida luba lan wíderagun amu asubudirei Bungiu.

3. Ka san arufudubalin igaburi le iridúbei lidan 2 Timotéu 3:2-5?

 ³ Kei aubei warihei, ariñagati apostolu Pábulu “liábinburiba lan weyu hénrenguti lídounme lagumuhóun dan”. Lárigiñe, íridati 19 igaburi mabuidunti le lunbei kamani lan lidan wadaani. Lidan Rómana 1:29-31 anuhein aban lísüta genegeguatu tuma to tídanboun gárada lun Timotéu, gama lumoun, to lídanboun Timotéu anihein dimurei ñein le madarirúnti lidan amu fánreinti lidan Abürüdǘni Güriegu Kristiánu. Tidan gárada lun Timotéu yusu lumuti Pábulu dimurei “gürigia”. Mítaranti hóuserun sun gürigia. Ámubei meha ligaburi hóuserun kristiánugu (aliiha huméi Malakíasi 3:18).

4. Ida luba hamuga hafuranguagüdüni ida liña lan aban gürigia íñuguti?

⁴ Lárigiñe lariñagun Pábulu hóunguarügübei lan gürigia habusenra buiti ani hínsiñebei lan seinsu houn, ariñagati pántabaña lan ani barüguabaña houngua. Íñuguti hasandiragun gürigia burí ha houngua ladüga hasubudin, ladüga buidu lan hágubu, ladüga gaseinsun hama, ani busentiña lun híchugun amu uéiriguni houn. Ayanuhati aban sásaamu hawagu gürigia íñugutiña ani aba lariñagun: “Anihein aban liraüraü latarü tidan hanigi le ñein lubéi háhuduragua houn guánarügü”. Añahein ariñagutiña weiri lan luriban íñuguni darí lun íbini lan gürigia ha íñugubaña safaguatiña dan le harihini igaburi le hawagu amu.

5. Ka asuseredubei íbini houn fiu lubúeingu Bungiu ha úaraguatiña?

⁵ Chóuruti mínsiñe lan íñuguni lun Heowá. Ariñagatu Bíbülia iyereegu lan “agu pántati” lun Heowá (Ari. 6:16, 17). Dísegüda lumutiwa íñuguni luéi Heowá (Sal. 10:4). Ani Mafia giñe gagaburibalin katei le (1 Tim. 3:6). Híruti íbini lan fiú lubúeingu Bungiu ha úaraguatiña óuseraaña lau íñuguni. Usíasi meha aban hádangiñe. Úaraguati meha lurúeite Hudá le lun Heowá luagu saragu irumu, gama lumoun, ariñagatu Bíbülia dan le lan laweiridunbei lubafu “aba lanaagun lungua, ligíati katei ligía agünrinchagubalin. Afigouhati ligibugiñe Wabureme le Lubungiute, beluti litenpulunrugun Wabungiute águdaha kupali luagu latarü le ñein lubéi lágudahoua kupali”. Saragu irumu lárigiñe, aba giñe lóuserun urúei Esekíasi lau íñuguni luagu fiú dan (2 Kro. 26:16; 32:25, 26).

6. a) Ka meha katei gayaraabei ladügün lun lóuserun Dawidi lau íñuguni? b) Ka íderagubalin lun ǘnabugumeme lan?

⁶ Añahein apantahatiña luagu lubuidun haríawagun, luagu subudiwa hamá saragu, ladüga gáfaradi hamá o geremuhadi hamá, ladüga here hamá o ladüga weiri tan hanigi amu hau. Anihein meha sun katei le luagu Dawidi, gama lumoun, ǘnabuguti meha súnwandan. Kéiburi dan le láfarunbalin Dawidi Goliadi, aba lariñagun urúei Saulu lun gayara lan lamarieidun tuma lisaani. Aba lóunabun Dawidi: “Ni kata au, ni kata giñe niduheñu uburugu Ísüraeli lun libarimubadina lan urúei” (1 Sam. 18:18). Ka íderagubalin Dawidi lun ǘnabugumeme lan? Ladüga subudi lumuti meha seremei lan letenirun ani lǘnabugun Bungiu lun, anihein lan meha igaburi buiti, iarani luma lubuidun chansi luma lun leseriwidun lun (Sal. 113:5-8). Gunfuranda lumuti meha Heowá lan íchugubalin sun buiti le lúmabei lun (ariha huméi giñe 1 Korintuna 4:7).

7. Kaba íderaguawa lun ǘnabugu wamá?

⁷ Uguñe weyu, sun lubúeingu Bungiu áfaaguatiwa lun ǘnabugu wamá kei Dawidi. Wéiritu wanigi lau wasubudiruni ǘnabugu lan Heowá lau sun ligía lan Suntigabafubei (Sal. 18:35). Súdiniti warihini ladundehan Bungiu le: “Abagarida humá [...] lau gudemehabu, areiduni, ǘnabuguni, gaganbadi, luma gaguraasuni” (Kol. 3:12). Ani subudi wamuti giñe gürigia lan le hínsiñehabubei “mapantanti,  manaagun ligía lungua” (1 Ko. 13:4). Haritagua wamuti giñe ítara lan kei gayara lan tadügün würi maríeitu lun lafiñerun tani weiriei luagu Bungiu lau tusan, gayaraati giñe hayarafadun gürigia lun Heowá dan le harihini ǘnabugu hamá lubúeingu (1 Fe. 3:1).

8. a) Ida liña harihini fiú gürigia maganbadi houn agübürigu uguñe weyu? b) Ka gumadi tíchugubei Bíbülia houn isaanigu?

⁸ Afuranguagüda lumuti giñe Pábulu ida luba lan hóuserun gürigia hámagua lidan lagumuhóun dan. Ariñagati maganbunhabaña lan isaanigu hagübürigu. Uguñe weyu, arufudúati maganbadi tidan burí líburu, pelíkula luma tidan bigibigitu kei aban katei maribanti. Ani le linarün katei dan le maganbadi hamá isaanigu mabuidunti léibugun katei hadan iduheñu luma hadan sun gürigia. Subudiwati inarüni lan katei le lúmagiñe lidan binadu dan. Lidan binadu Güresia, dan le lagayuahan aban isaani hawagu lagübürigu, aba meha leferidiruni sun katei le yuubei lun. Ani ariñagati meha lúrudu rómana ítara liña lan lagayuahan gürigia luagu lúguchi kei láfarahan. Dandu Abürüdǘni Ebüréu kei Abürüdǘni Güriegu Kristiánu ruti gumadi lun inebehabu hamá isaanigu houn hagübürigu (Afu. 20:12; Efe. 6:1-3).

9. Kaba íderaguaña nibureintiña lun gaganbadi hamá houn hagübürigu?

⁹ Ka lunbei hadügüni isaanigu lun mabadülerun lan maganbadi le ubouagubei hawagu? Hasaminarun luagun le adüga hamaalibei hagübürigu hawagu. Ani anhein gunfuranda habalin busén lan Bungiu, le Wáguchi sun wagía, lun gaganbadi wamá, harufudubei heteingiradi. Dan le hayanuhan nibureintiña buidu hawagu hagübürigu, íderaguatiña amu nibureintiña lun giñe inebehabu hamá houn hagübürigu. Anhein mínsiñehabu habéi agübürigu houn hasaanigu háfuga hénrengubei lan houn isaanigu lun gaganbadi hamá houn hagübürigu tídangiñe sun hanigi. Ariñagati aban nibureinti Gefenti gíriti Austin: “Anihein dan busén nan nadügüni le mabuidunbei, gama lumoun rútiña nagübürigu gumadi le gayara nubéi agunfulira, afuranguagüda hamuti nun ka lan wagu híchigei ani adügatiña lun ua lan ni kata eredehati wadimurehan furangu. Adügati sun le lun gaganbadi nan. Súnwandan narihini nidiheri hamá nuagu, ani adügati le lun busén nan nagundaaragüdüniña”.

10, 11. a) Ka burí igaburi wuribati arufudubalin masandirun hamá gürigia ínsiñeni hawagu amu? b) Darí halíaba lébeda ínsiñeni le hasandirubei kristiánugu inarünitiña hawagu gürigia?

¹⁰ Íridati Pábulu amu burí igaburi wuribati le arufudubalin masandi hamá saragu gürigia ínsiñeni hawagu amu. Lárigiñe lariñagun “maganbunhabaña hagübürigu”, aba lariñagun meteingiradibaña lan, ítara haña ha meteingiradibaña gürigia luagu buiti le hadügübei amu hawagu. Mínsiñehabubaña giñe saragu ani magudemehabu hagíame, mini lan le maweiyasunbaña lan lun haransehani turobuli hama amu. Hadimurehaba wuriba luagu Bungiu ani halugurubaña hamadagu lugundun hadimurehaba katei mabuidunti hawagu amu ani le adügüti dañu. Ani marasualugubaña giñe ladüga hariñaguba iyeeni lúnrügü híchugun luriban iri hawagu amu. *

¹¹ Amu hawéi gürigia ha arufudubaña lanarime mínsiñehabuni, arufudatiña ha áhuduragubaña lun Heowá ínsiñeni le inarüniti hawagu ha híbiri gürigia. Súnwandan ítaragubeiñein lan. Ariñagati Hesusu, gumadi lan le wéirigutimabei, lídangiñe lugumadin Bungiu le líchugubei lun Moisesi le lan furumiñeti, ínsiñeni luagu Bungiu ani le libiaman ínsiñeni hawagu gürigia. Lagumuhóun ínsiñeni le, aban luwuyeri ínsiñeni le gíribei agápe  (Mat. 22:38, 39). Ariñagati giñe hasubudirúaba lan kristiánugu inarünitiña luagu ínsiñeni le hádanbei (aliiha huméi Huan 13:34, 35). Ani hínsiñeduba lan meha giñe íbini háganiñu houn (Mat. 5:43, 44).

12. Ida liña larufuduni Hesusu hínsiñe hamá gürigia lun?

¹² Arufuda lumuti Hesusu lanarime ínsiñeni le hawagu gürigia. Aweiyasuhati lidoun aban uburugu lun lidoun amu lun lapurichihani uganu luáguti Larúeihan Bungiu. Areidaguagüdati marihintiña, danimatiña, ha gawagubaña lépüra hama maganbuntiña, íbini hilaaña saragüda lumutiña (Luk. 7:22). Ru lumuti libagari hawagu sun gürigia, íbini iyereegu lan meha houn saragu. Arufuda lumuti buidu línsiñehabu Lúguchi. Uguñe weyu, sun gefentiña luagu Heowá ha lídanbaña sun ubóu áyeiha hamuti Hesusu ani arufuda hamuti hínsiñe hama gürigia houn.

13. Ka gayaraabei wibihini dan le warufudun ínsiñeni?

¹³ Gayaraati ladügün ínsiñeni le warufudubei lun busén hamá gürigia hasubudiruni Wáguchi le siélubei. Ítara liña lasuseredun lun aban wügüri Tailandia le achülürübei lidoun adamurini ǘrüwati weyu, wéiritu lanigi dan le larihinbei luagu ínsiñeni le hádanbei íbirigu. Dan le lagiribudunbei lúbiñoun, aba lamuriahan lun larufudahóun lun tídangiñe Bíbülia bián wéiyaasu luagu dimaasu. Apurichihati houn sun liduheñu, sisi hati lárigiñe adamurini aba laliiha luagu furumiñeti wéiyaasu tidan Luba Wadamuridagun. Anhein busén wabéi wasubudirun anhein warufuduña lubéi ínsiñeni hawagu amu, álügüdagua wamá woungua: “Áfaaguatina san lun níderaguniña híbiri niduheñu, lílana damuriguaü luma lidan apurichihani? Áfaaguatina san lun narihiniña ha híbiri kei larihiniña Heowá?”.

14, 15. a) Ka igaburi hagaburibei animaalugu le hawagubei saragu gürigia? b) Ka asansiruni hadügübei fiú gürigia?

¹⁴ Lidan lagumuhóun dan, harufuduba gürigia amu burí igaburi mabuidunti, ligíati lunti lubéi wadisedun hawéi. Besafu hádangiñe ha ibidiñehabúbaña lun Bungiu láganibaña sun le buídubei. Ariñagatu amu burí Bíbülia “iyereegubei lan le buídubei houn” o “láganibaña lan le buídubei”. Siñabei hárügüdagun houngua  ani hanarimebaña. Ani añahein hádangiñe hadügüba burí katei mabuidunti mini lan lira lidan güriegu márügüdagunbaña lan houngua luéi wuribani ani masaminarunbaña luagu le lunbei lanügüni hariban.

¹⁵ Uguñe weyu lagunfuliruña aban lubuidun profesía tídangiñeti Bíbülia le ariñagubei saragu lan gürigia ha gagaburibaña kei animaalugu gáñitiña asansirubei lan hagaburi (aliiha huméi Isaíasi 11:6, 7). Ariñagati profesía le animaalugu lan ha gáñitiña kei ounli áraabuna luma liñún hawinwanduba lan lidan darangilaü hama mudún tuma bágasu. Aniheinbei darangilaü le “lidan sun fulasu lau lasubudiruniwa luéirigun Wabureme” (Isa. 11:9). Siñati hafurendeirun animaalugu luagu Heowá, ligíati profesía le layanuhaña luagu hasansiruni gürigia hagaburi.

16. Ida liña tídehan Bíbülia asansirei hagaburi fiú gürigia?

¹⁶ Añahein saragu gürigia wéiriti meha hagañi kei ounli áraabuna, ani guentó hawinwanduña lidan darangilaü hama amu gürigia. Gayaraati waliihan luagu habagari lidan seksióun “Sansi tumuti Bíbülia habagari”, le áfuachubei lidan jw.org. Ha asubudirubalin Heowá ani seriwi hagía lun mítarantiña kei ha afamurubaña kamá gúnfulitiña luma Bungiu gama lumoun larihúba luagu iyeeni lan lau ligaburi habagaridun. Gürigia burí ha ariñagatiña hudugua hamá lun Bungiu, gama lumoun lau ligaburi habagaridun arufuda hamuti luagu iyeeni lan. Fiú lubúeingu Bungiu ha meha gáñibaña, dáüguaña “lau iseri igaburi, igaburi le ladügübei Bungiu kei ligaburi guánarügü, lidan irichaü le tímatimaati luma arumani” (Efe. 4:23, 24). Lau afurendeireina hamá luagu Bungiu, aba gunfuranda hamani mosu lan gaganbadi hamá lun lugumadin. Hénrenguti ladügün sánsiguaü le, gama lumoun gayaraati hibihini ha busenbaña hadügüni lugundan Bungiu tau sun hanigi lau lídehan sífiri sandu.

17. Ka gayaraabei wadügüni lun máyeiha wamani luriban hagaburi gürigia ha geyegubaña wau?

¹⁷ Éibutima dan larihin ka lan eseriwidubaña lun Bungiu hamoun ha meseriwidunbaña lun. Wagía le eseriwidubaña lun mosu wóunigiragun woungua lun malugurun hamaniwa gürigia ha geyegubaña wau lau luriban hagaburi. Busentiwa gaganbadi wamá lun ladundehan Heowá lun móundarun wamá hamoun gürigia ha uágubaña layanuhóua lidan 2 Timotéu 3:2-5. Inarüni siñabei lan móundarun wamá hamoun sunsuinagubei háfuga ladüga lan mosu lan wawadigimaridun, woudin leskuela o wawinwandun hama. Le lunbei madügün wamani wasaminarun luma wóuserun kei hagía. Kaba wadüga lun móundarun wamá hamóun? Mosu wederebudagüdüni wamadagua luma Heowá waturiahanu Bíbülia luma lun wanúadahaniña wamadagu ha aransebaña lun heseriwidun lun.

18. Ida luba lahuudun ligaburi wayanuhan luma wóuserun houn amu lun gamadagua hamá luma Bungiu?

¹⁸ Lunti giñe wáfaagun lun wíderaguniña gürigia lun gamadagua hamá luma Bungiu. Áluaha wamá chansi lun wapurichihan ani amuriaha wamá luma Heowá lun wariñaguni le buídubei lidan dan le buídutimabei lun wariñaguni. Ariñaga waméi houn gürigia luagu gefentiña lan luagu Heowá wagía. Ítara luba wíchugun uéiriguni lun Bungiu, mama wóuniwagua. Arufudahóuaali woun mosu lan“wígiruni wuribani luma igaburi lánina ubóu, lun wabagaridun aban ibagari le buiti lidan dan le, ragüguañu woungua ani lau gudemehabu sunme wagurabahaña lan lagunfulirun wemenigin” (Titu 2:11-14). Harihibei gürigia anhein gaganbaditiwa lubéi lun Heowá ani anhein wáyeihañein lan, ani háfuga ñéinbaña lan ariñagutiña: “Busentiwa woudin huma, ladüga aganbatiwa luagu anihein lan Bungiu huma!” (Sak. 8:23).