1. Ka uagu wariñaga wawinwanduña lan lidan aban dan súdiniti?

WAWINWANDUÑA lidan aban dan hénrenguti. Kei tariñaguni Bíbülia lidan aban profesía, lóundaraguña Heowá “saragu gürigia lídangiñetiña sun fulasu, sun rasa, sun iñeñein luma néchani”. Ítara haña saragu gürigia hagía kei aban “óunwenbu néchani” hau hóugiñe widü míñunu gürigia ha gúndaatiña ani ha eseriwidubaña lun Bungiu “wéyuagu áriebu tidan litenpulun” (Aruf. 7:9, 15; Isa. 60:22). Úañahagiña saragu gürigia ha hínsiñehabutiña lun Bungiu luma houn gürigia háledigu.

2. Ka luwuyeri ínsiñeni hasandirubei gürigia ha dísebaña luéi Bungiu? (Ariha huméi dibuhu le lídanbei lagumeseha arütíkulu).

² Ariñagatu giñe Bíbülia harufuduba lan gürigia aban luwuyeri ínsiñeni le mabuidunbei lidan lagumuhóun dan le, ínsiñeni hawouguounrügü. Abürühati apostolu Pábulu luagu “lagumuhóun dan” ani ariñagati “hóunguarügübei burí [lan] gürigia habusenra buiti”, “hínsiñebei seinsu houn” ani háluahabei hagundan guánarügü lubaragiñe hamuga háluahani Bungiu” (2 Tim. 3:1-4). Dan le hawouguarügüñein lan gürigia hasandira ínsiñeni múaranti ínsiñeni ligía luma ínsiñeni luagu Bungiu. Ani masandirun hamuti giñe gürigia hagía ugundani le hagurabubei hasandirun.  Lubaragiñe lira, adügarügüti lun hóuserun amu gürigia ítara ani adügati lun hénrengu lan ibagari houn amu.

3. Kaba wariha lidan arütíkulu le, ani ka uagu?

³ Subudi lumuti meha Pábulu lachülürüba lan dan lun hawouguounrügü lan gürigia hasandira ínsiñeni ani denchabei lan meha igaburi le houn kristiánugu. Ligía lariñagunbei woun lun wadisedun hawéi gürigia ítaratiña (2 Tim. 3:5). Inarüni siñati lan wadisedun sunsuinagubei hawéi gürigia hagía. Ida luba wadüga lun mabadülerun lan hagaburi gürigia ha geyegubaña wau wawagu luma lun wáfaagun lun wadügüni lugundan Heowá, Bungiu le hínsiñehabubei? Ariha waméi ida liña lan amu lan ínsiñeni le labusenrubei Bungiu lun warufuduni luéi ínsiñeni le iridúbei lidan 2 Timotéu 3:2-4. Líderagubadiwa katei le lun warihini ida luba lan warufuduni ínsiñeni le lunbei líchugun ugundani le inarüniti woun.

4. Ida liña wasubudiruni mariban lan wasandirun somu ínsiñeni wawougua?

⁴ Kei aubei warihei, abürühati Pábulu: “Hóunguarügübei burí gürigia habusenra buiti”. Mini lan san le mabuidun lan hasandirun gürigia ínsiñeni hawougua? Uá. Buiti ani lunti giñe wasandirun ínsiñeni wawougua. Ítara liña ladügüniwa Heowá. Ariñagati Hesusu: “Hínsiñela bíbiri bun kei bínsiñegua bungua” (Mar. 12:31). Ánhawa masandirun ínsiñeni wawougua, siñabei hínsiñedun amu gürigia woun. Ani ariñagatu giñe Bíbülia: “Ítara liña lunti lan tínsiñedun lúmari wügüri lun kei línsiñe lúgubu guánarügü lun. Le hínsiñehabuti tun lúmari hínsiñeguati lungua. Úati gürigia meberesenti lau lúgubu guánarügü; hóugüdarügü lumuti, góunigilei” (Efe. 5:28, 29). Ligíati, buiti lun wasandirun ínsiñeni wawougua.

5. Ida haña san gürigia ha asandirubaña ínsiñeni hawouguounrügü?

⁵ Lidan 2 Timotéu 3:2 ariñagati hawouguounrügübei lan gürigia hasaminara ani mabuidunti katei le. Moun lumuti hawouguounrügü lan gürigia hasandira ínsiñeni. Ha asandirubaña lanarime ínsiñeni hawougua wéiriti hasaminarun hawouguoun sügǘ lau le lubeibei (aliiha huméi Rómana 12:3). Wéiritimati hadiheridun hawougua sügǘ lau hasaminarun hawagun amu. Ani dan le wuriba lan lasalirun somu katei, aba híchuguni duru hawagun amu lubaragiñe hamuga hánharun gadurun hamá giñe lidan. Gürigia ha óuserubaña ítara masandiruntiña ugundani inarüniti.

6. Ka resultóu buiti lanügübei hínsiñe lan Bungiu houn gürigia?

⁶ Ariñagatiña fiú sásaamu, dan le lan layanuhanbei Pábulu luagu ida haba lan gürigia lidan lagumuhóun dan, aba lan líriduni hawouguounrügübei lan gürigia hasaminara ladüga ligía lan igaburi le anügübalin sun igaburi wuribati le iridúbei lárigiñe. Ánheinti gürigia ha hínsiñehabubaña lun Bungiu amu igaburi harufudubei. Ayanuhatu Bíbülia luagu ínsiñeni luagu Bungiu úara luma ugundani, darangilaü, gaguraasuni, areiduni, lubuidun igaburi, úaraguni, ǘnabuguni, ragüguaü unguaü (Gal. 5:22, 23). Eremuhati abürühati aban sálumu: Fuleseiwatiña lílana fulasu ha Heowábei Habungiute (Sal. 144:15). Aban Bungiu gúndaati Heowá, ani arufuda hamuti lubúeingu igaburi le. Ha asandirubaña ínsiñeni hawouguounrügü busenrügütiña heresibirun hámagiñe amu, ánheinti lubúeingu Heowá gúndaatiña ladüga rútiña lídangiñe le hámabei lun híderagun amu (Adü. 20:35).

7. Anhein busén wabéi wasubudiruni ida liña lan wamadagua luma Bungiu, ka gayaraabei wadügüni?

⁷ Ida luba wasubudiruni anhein laweiriduña lubéi ínsiñeni le wasandirubei wawougua sügǘ lau ínsiñeni le wasandirubei luagu Bungiu? Samina wamá luagun adundehani le lídanbei Filipuna 2:3, 4. Ariñagati ñein: “Madüga humá ni kata huouguarügü lun hanügǘniwa weiri [...]; lubaragiñe lira lau lan ǘnabuguni, ani buidulá hanügüniña amu gürigia huéi guánarügü”. Ariñagati giñe: “Mámarügüla katei le buídubei hun háluaha, áluaha huméi giñe le buídubei houn  amu”. Gayaraati wálügüdagun woungua: “Falá numuti san adundehani burí le lidan nibagari? Áfaaguatina san lun nadügüni lugundan Bungiu? Áluahatina san ida luba lan níderagun amu lidan damuriguaü luma lidan apurichihani?”. Mama súnwandan lun ménrengun lan wíchugun wámagiñegua houn amu. Háfuga mosu lan wáfaagun saragu ani ígira waméi wadügün katei le hínsiñeti woun. Gama lumoun, úati katei lunti lanügün saragu ugundani woun kei wasubudiruni gunda lan Heowá wau.

8. Ka adüga hamaalibei saragu kristiánugu ladüga hínsiñe lan Bungiu houn?

⁸ Adügaali ínsiñeni luagu Bungiu luma ayumahani le hasandirubei fiú kristiánugu lun haganwoundagüdüni heseriwidun lun Bungiu lun hígirun somu katei le gayaraabei líchugun saragu seinsu houn. Anuhein aban íbiri gíritu Erika, surusia íbiri tuguya, gama lumoun máluahantu aban ubaraü súdiniti lidan agaranihani. Lubaragiñe lira, aba teseriwidun kei prekursora ani aba teseriwidun luma tani weiriei lidan saragu ageiraü. Abahüdaguatu: “Wínwanhadiwa saragu katei lidan fulasu le ñein lubéi layanuhóua amu iñeñein ani adügaadiwa saragu umadagu. Barühali katei le saragu buiti lidoun wabagari. Anaheingua nadagimei kei surusia, gama lumoun, nayusuruni libe-agei nidaani luma nere íderaguaña gürigia ayarafada lun Bungiu luma nídehan lidan damuriguaü ligíatima íchugubei saragu ugundani nun”.

9. Ka uagu siñá lubéi gunda hamá ha hínsiñehabubaña lun seinsu?

⁹ Ayanuhati giñe Pábulu hawagu ha “hínsiñebei seinsu houn”. Fiú irumu lubaragiñe le, aba layanuhan aban prekursoru lun aban wügüri luagu Bungiu. Aba lasagarunu wügüri ligía lagei liseinsun, aba lasagarun seinsu tídangiñe ani aba lariñagun lau íñuguni: “Anihán nubungiutebei!”. Gíbetiña gürigia asaminarutiña kei gürigia le íbini mariñagun hamani. Hínsiñeti seinsu houn luma katei le gayaraabei hagañeihani lau. Gama lumoun, eweridihatu Bíbülia: “Le hínsiñehabubei lun seinsu súnwandan busén lan lanwoun liseinsun; le hínsiñehabubei lun irisini, súnwandan laritagun luagu lougua lan le lúmabei” (Apur. 5:10). Ha hínsiñehabubaña lun seinsu súnwandan busenbaña lan lanwoun le hámabei ani hayusurubei habagari áluaha lanwoun. Gama lumoun, buíngüdarügü hamuti habagari “lau asufuriruni” (1 Tim. 6:9, 10).

10. Ka tariñagubei Bíbülia luagu irisini luma luagu gudemei?

¹⁰ Inarüni megei wamá seinsu, lugundun seriwiti woun (Apur. 7:12). Gama lumoun, gayaraati san gunda lan aban gürigia le gámabalin lérügü lemegeirubei lun lawinwandun? Anha gayaraati (aliiha huméi Apurichihati 5:12). Amuriahati Aguru, le lisaani Haké luma Bungiu: “Marisidagüdabana magudemedagüdün báname, rubei lérügü nemegeirun nun”. Ménrengunti gunfuranda wamani ka lan meha uagu mabusenrun lubéi gudeme lan saragu. Ligía guánarügü ariñagubei mabusenrun lan líweruhan, ladüga lawiyedubei lan liri Bungiu ítara. Gama lumoun, ka san uagu lariñaga lun míchugun lan irisini lun: Ariñagati: “Ladüga anhein gíbeya numa, gayaraati nabulieidagun buéi, nariñagame luagu ibidiñe ban nun” (Ari. 30:8, 9). Gayaraati subudi wamá gürigia ha afiñetiña luagu harisin lubaragiñe hafiñerun luagu Bungiu.

11. Ka lariñagubei Hesusu luagu seinsu?

¹¹ Ha hínsiñehabubaña lun seinsu siñati hadügüni lugundan Bungiu. Ariñagati Hesusu: “Úati ni aban gayaraati leseriwidun houn bián iyubudirigu, ladüga línsiñeduba aban hádangiñe lun, liyereegudáme le aban lun; úaraguabei luma aban hádangiñe, líchigame mebereseni luagu le aban. Siñati leseriwidúniwa lun Bungiu luma lun seinsu”. Lubaragiñe lariñaguni Hesusu katei le ariñagaali: “Móundaragua humá irisini ya ubouagu le ñein lubéi gayara lan háhüchün hamutiri ani gagahüdadi ligía katei, le giñe ñeinhin lubéi gayara lan hebelurun híwerutiña lun híweruhan” (Mat. 6:19, 20, 24).

12. Ka uagu buídutima lubéi leseriwidúniwa lun Bungiu anhein sensiyu lubéi wabagari? Ru humá aban hénpulu.

 ¹² Gíbeeña íchugutiña fe adüga lan sensiyu lan habagari lun gúndaatima hamá luma lun gadaanitima hamá lun heseriwidun lun Heowá. Anihein aban íbiri merigana gíriti Jack, anuhein meha aban muna wéiritu luma luma aban bísinisi, gama lumoun, aba lalugurunu lun leseriwidun kei prekursoru úara tuma lani weiriou. Ariñagati: “Hénrenguti meha desidírü nan nalugurunu tubuidun nuban luma fulasu le wámabei áraabu. Gama lumoun, gayaraati nariñagun sügǘ nan saragu irumu lau saragu idiheri dan le nagiribudun lídangiñe nuadigimari. Ánhounti nani weiriou kei le meha prekursora tan, gúndaatu meha súnwandan. Ábaha tariñagun: ‘Nawadigimariduña lun iyubudiri le buídutimabei’. Guentó kei prekursoru haadina lan, wawadigimariduña biángubei wagía lun ligiaméme iyubudiri, Heowá”.

13. Kaba íderaguawa asubudirei kátima lan wasaminarubei luagu seinsu?

¹³ Kaba íderaguawa asubudirei kátima lan wasaminarubei luagun seinsu? Lunti wálügüdagun woungua: “Arufuda numuti san lau ligaburi nawinwandun afiñe nan luagu le tariñagubei Bíbülia luagu seinsu? Lagañeirúniwa san seinsu súdinitimabei nun? Nidiheritimatina san luagu seinsu luma umegeguni sügǘ lau numadagua luma Heowá luma numadagua hama ha geyegubaña nau? Afiñetina san líchugubei lan Heowá le nemegeirubei nun?”. Gayaraati wachoururuni mígirun lubaña lan Heowá ha afiñerubaña luagu (Mat. 6:33).

14. Ida liña lunti lan warihini ugundani le lánina ibagari?

¹⁴ Kei tariñaguni Bíbülia, uguñe weyu, áluaha hamuti saragu gürigia “hagundan guánarügü”. Ítara kei gayara lan wasaminarun wawouguoun luma luagun seinsu lidan aban igaburi le richati, gayaraati giñe wagundaarun lau katei le lánina ibagari lau duari. Saminatiña fiú gürigia mosu lan wígiruni sun ugundani luma katei buiti le líchugubei ibagari. Gama lumoun, mama ligía larufudahabei Heowá. Ariñagatu Bíbülia houn sun lubúeingu Bungiu: “Houboun beigan fein gurabóunme buniñe diwéin lau ugundani” (Apur. 9:7).

15. Ka mini lubéi háluahani gürigia “hagundan guánarügü”?

 ¹⁵ Dan le layanuhan 2 Timotéu 3:4 hawagu ha áluahabalin hagundan guánarügü, layanuhaña hawagu ha ígirubalin Bungiu bóugudi luéi habagari. Ariha waméi mariñagun lan bérusu le hínsiñetimabei lan houn háluahani hagundan guánarügü sügǘ lau háluahani Bungiu, ladüga lariñaguña hamuga ítara hínsiñe lan Bungiu houn murusunraü. Aba lariñagun “háluahabei [lan] hagundan guánarügü lubaragiñe hamuga háluahani Bungiu”. Ariñagati aban sásaamu “úati lan mini lan bérusu le hínsiñe lan giñe Bungiu houn íbini murusun. Mini lan mínsiñe lan houn ni murusun”. Aban eweridihani le houn ha wéiribei línsiñe houn háluahani hagundan guánarügü. Dan le layanuhan bérusu le hawagun ha áluahabalin hagundan guánarügü, layanuhaña hawagu ha “áfuridubaña” áluahei “ugundani le lánina ubóu le” (Luk. 8:14).

16, 17. Ida liña meha larihini Hesusu ugundani le lánina ibagari?

¹⁶ Ariha lumuti meha Hesusu ugundani le lánina ibagari keisi lubudubu. Ñǘdünti meha lidan “aban maríei” luma lidan “aban óunwenbu fedu” (Huan 2:1-10; Luk. 5:29). Dan le tagumuchunbei diwéin lidan maríei, aba ladügün aban milaguru ani aba lasaliraguagüdün duna diweinme. Lidan amu dan, dan le hayanuhabei gürigia wuriba luagu ladüga leigin luma latun, ígira lumuti furangu maricha lan ligaburi harihini katei (Luk. 7:33-36).

¹⁷ Íbini ítara, mayusurun lumuti Hesusu libagari lun láluahani lugundan guánarügü. Ru lumuti Heowá lidan furumiñeti lúgaaru ani adüga lumuti sun liyaraati lun líderagun amu. Ani ánhati lasufurirun aban óunweni gáriti luagu wagabu lun gayara lan hesefurun saragu gürigia. Ariñagati houn sun ha afalarubalin: “Fuleseiwatün dan le hanabagunün gürigia, éibaaha hamáün, ariñaga hagía sun luwuyeri iyeeni huagu, luéigiñe nánigu humá. Gúndaañu humá, ladüga heresibiruba aban óunwenbu fáyeiti sielu; ítara liña meha giñe héibaahouniwa profetagu ha ñǘbuinbaña hubaragiñe” (Mat. 5:11, 12).

18. Kaba burí álügüdahani íderaguawa asubudirei átiriñein lan ínsiñeni wasandirun luagu ugundani le lánina ubóu le?

¹⁸ Kaba íderaguawa asubudirei átiriñein lan ínsiñeni wasandirun luagu ugundani le lánina ibagari? Álügüdagua wamá woungua: “Súdinitimati san isebáhari nun sügǘ lau adamuridaguni luma apurichihani? Aransetina san lun nígirun fiú katei le hínsiñeti nun lun gayara lan neseriwidun lun Bungiu? Dan le nanúadahani nisebáhari, álügüdaguatina san nungua anhein hínsiñebei lubéi lun Heowá?”. Anhein inarüni lubéi hínsiñe lan Bungiu woun, wígirubei wadügüni katei le mínsiñebei lun luma le uágubei wasaminara mínsiñebei lan lun (aliiha huméi Matéu 22:37, 38).

19. Ka hawuyeri gürigia lúnbaña masandirun hamá ugundani le inarüniti?

¹⁹ Súfurigüda laaña Satanási gürigia kéiburi luagu sisi-milu irumu. Guentó kei wawinwanduña lan lidan lagumuhóun dan, buin liña Ubóu hau gürigia ha asaminarubaña hawouguounrügü, luagun seinsu luma luagun háluahani hagundan guánarügü. Wéiriti háfaagun lun hibihini le hayumahabei luma le gayaraabei hibihini. Siñabei hasandiruni gürigia ha ugundani le inarüniti. Ánhounti Bíbülia ariñagatu: “Fuleseiwatiña ha líderagubaña lurúeite Hakobu, ha íchugubalin hemenigin luagu Bungiu le Lubungiute Hakobu” (Sal. 146:5).

20. Ida liña ladügün ínsiñeni le hasandirubei luagu Bungiu lun gunda humá?

²⁰ Keisi lubúeingu Heowá, eibu dan ábatima línsiñedun Wáguchi woun. Ani sagü irumu, gíbetimahaña gürigia asubudirei ani aba giñe línsiñedun houn. Arufuda lumuti katei le lagumadihaña lan Larúeihan Bungiu ani málühali lan anüga abinirúni wéinamuti woun. Gayaraati wibihin ugundani inarüniti guentó luma lun súnwandan dan le wadügüni lugundan Heowá luma dan le wasubudiruni gunda lan wau. Lidan leweñegua arütíkulu, warihibei igaburi wuribati le lanügübei hasandirun gürigia ínsiñeni hawouguounrügü luma igaburi buiti le harufudubei lubúeingu Heowá.