1, 2. Ida liña layusuruni Heowá lumegen lun líderagun amu?

ABAN Bungiu gíchigaditi Heowá. Sun le wámabei ligía íchugubalin woun. Lani sun golu, pülata luma amu burí katei le ligibuagubei Ubóu, ani ru lumuti sun le mégeiwabei lun ñein lan ibagari (Sal. 104:13-15; Ahe. 2:8). Ariñagatu Bíbülia yusu lani Heowá katei burí le saragu wéiyaasu lun ladügün milaguru lun líchuguni le hemegeirubei lubúeingu houn.

² Kei hénpulu, ruti meha Heowá maná luma duna houn ísüraelina lidan bián-wein irumu le haubei lidan fulasu mageirawati (Afu. 16:35). Kei resultóu “memegeiruntiña ni kata” (Neem. 9:20, 21). Yusu lumuti meha Heowá profeta Eliséu lun ladügün milaguru lun laganwoundagüdüni garaba le túmabei aban würi hilaaru úmari to úaraguaboun lun Bungiu. Seremei milaguru ligía aba gayara lan tafayeiruni würi tuguya sun tadúeihan ani ígiragua ligía lun tawinwandun hau sun tisaanigu (2 Uru. 4:1-7). Luagu amu oubaü, ruti giñe Heowá ubafu lun Hesusu lun ladügün milaguru lun líchugun éigini íbini giñe seinsu dan le mégeiwa lan (Mat. 15:35-38; 17:27).

3. Kaba wakutiha lidan arütíkulu le?

 ³ Gayaraati layusuruni Heowá le labusenrunbei lun lakipuruni libagari sun le ladügübei ya ubouagu. Íbini ítara, amisuraha lumutiña lubúeingu ayusurei hemegen luma haseinsun lun hídehan tidan lóundarun (Afu. 36:3-7; aliiha huméi Ariñawagúni 3:9). Ka uagu aguraba lubéi Heowá lun wayusuruni wámati lun wíchugun lun lídangiñe le ru láalibei woun? Ida liña meha hayusuruni lubúeingu Bungiu ha lánina binadu dan hámati lun hídehan lidan áhuduraguni inarüniti? Ida liña tayusuruni wóundarun seinsu le tibihibei keisi budagia? Wakutihabei lóunabagüle álügüdahani burí le lidan arütíkulu le.

4. Ka warufudubei lun Heowá dan le wídehan lidan wadagimanu le líchugubei woun?

⁴ Ka uagu wíchiga lun Heowá lídangiñe le wámabei? Ladüga hínsiñe lan woun ani seremei wamuti luagu sun le adüga láalibei wawagu. Ñülüguatu wanigi dan le wasaminarun luagun. Sandiguatiwa woungua kei urúei Dawidi dan le lafuranguagüdünbalin ka lan mégeiwabei lun tábunawagun ténpulu. Ariñagati lúmagiñe lan Heowá liabin sun le wámabei, ani sun lan le wíchugubei lun lídangiñeti le ru láalibei woun (aliiha huméi 1 Krónikasi 29:11-14).

5. Ida liña tarufuduni Bíbülia aban lan fánreinti lídangiñe wáhuduragun wíchugun lídangiñe wámati magurabahanga afayeiruahaü?

⁵ Rútiwa giñe lun Heowá lídangiñe le wámabei ladüga ligía lan aban igaburi lun wáhuduragun lun. Lidan aban arufudúni, aganba lumutiña apostolu Huan lubúeingu Bungiu ha siélubaña ariñaga: “Wabureme, Wabungiute, garichatibu lun beresibiruni uéiriguni, inebesei, luma ubafu, ladüga buguya adügübalin sun katei; lau bugundan badügei, lau giñe bugundan anihein lubéi sun le aniheinbei” (Aruf. 4:11). Chóuruti yu lan lun wíchuguni sun uéiriguni luma inebesei lun Heowá, ligía lunti lubéi wíchuguni le buídutimabei wámagiñe lun. Lidan hadaani ísüraelina, yusu lumuti Heowá Moisesi lun líchugun gumadi houn lun hadügün ǘrüwa fedu lidan irumu. Ani ariñagati meha lúrudu: “Moun lumuti larufudagun ni aban lungua ligibugiñe Bungiu málouga lúhabu” (2 Lur. 16:16). Kei aubei warihei, aban meha fánreinti lidan háhuduragun ísüraelina híchugun somu katei lídangiñe hámati lun Heowá. Uguñe weyu, lídangiñeti giñe wáhuduragun wíchugun lídangiñe wámati magurabahanga wibihin somu katei. Dan le wadügüni, arufuda wamuti weiri lan lebegi wadagimanu le ladügübei fánreinti tani lóundarun Heowá le yaabei ubouagu woun.

6. Ka uagu buidu lubéi wíchugun lídangiñe wámati? (Ariha humóun iyawaü to lídanboun lagumeseha arütíkulu).

⁶ Buiti lun wíchugun lau areini lídangiñe wámati mama lun resibirügü wamá (aliiha huméi Ariñawagúni 29:21). Kei hénpulu, samina humá aba lan lagañeihan aban irahü aban idewesei houn lagübürigu lídangiñe seinsu le híchugubei lun. Ma heteingiruñein hamuga saragu? O samina wamá luagun aban prekursoru nibureingili le awinwandubei hama lagübürigu ani aba líchugun seinsu houn lun líderaguniña agañeihei hemegeirun iduheñu. Háfuga magurabun hamani ladügüni lira, gama lumoun, gayaraati hárügüdübei lan ladüga subudi hamani larufuduña lan hasaani teinki lániña luagu le hadügübei luagu. Ítara liña giñe Heowá, subudi lumuti buidu lan lun wíchugun lun lídangiñe katei gebegiti le wámabei.

7, 8. a) Ida liña meha hídehan lubúeingu Heowá ha lánina binadu dan lun ladügǘn somu wadagimanu? b) Ida liña hídehan lubúeingu Heowá lun lawanserun láhudurawagun lun?

⁷ Daritiwa hénpulu tidan Bíbülia le arufudubalin rútiña lan meha lubúeingu Heowá lídangiñe katei le hámabei. Anihein meha dan hídehan lun somu wadagimanu. Kéiburi Moisesi, ínchaha lumutiña meha ísüraelina lun híchugun budagia lun tadügǘn tawernákulu, ani adüga lumuti giñe Dawidi ligiaméme lubá tábunawagun ténpulu (Afu. 35:5; 1 Kro. 29:5-9). Lidan meha lidaani urúei Hoasi, aranse hamutu fádirigu luban Heowá  lau seinsu le híchugubei lílana fulasu (2 Uru. 12:4, 5). Lidan furumiñeti sígulu, aba meha híchugun kristiánugu fe megei hamá híbirigu ídemuei ladüga anihein lan meha lanarime ümi Hudéa. Ariñagatu Bíbülia ídeha hamá súngubei según hámati (Adü. 11:27-30).

⁸ Lidan amu kesi, rútiña lubúeingu Bungiu budagia lun híderaguniña ha alidihabalin áhuduraguni lun Heowá. Según lilurudun Moisesi, mibihintiña meha lewita alagan, kei hibihin lílana amu türibu. Ligía meha híchugunbalin ha híbiri türibu diisi lídangiñe kada san katei le hámabei houn. Ídehati meha katei le lun hetenirun lewitagu lun hawadigimari tidan tawernákulu (1 Lur. 18:21). Saragu irumu lárigiñe, ibihati giñe Hesusu hama lani apostolugu ídemuei ítarati hámagiñe würiña “ha íderagubaliña lau le hámati” (Luk. 8:1-3).

9. Halíagiñe meha sanliabin budagia le híchugubei lubúeingu Bungiu lidan binadu dan?

⁹ Lídangiñe meha ámuñegueinarügü fulasu liabin budagia burí ligía. Kéiburi dan le tadügǘnbei tawernákulu lidan fulasu mageirawati, rútiña meha ísüraelina budagia, ani háfuga rútiña lan meha lídangiñe katei le hanügübei Ehiptugiñe (Afu. 3:21, 22; 35:22-24). Lidan furumiñeti sígulu, añahein meha hádangiñe kristiánugu alugura hamuti hemegen, kéiburi hachari o haban, adüga hamuti ani aba hanügüni seinsu houn apostolugu. Ábati hafanreinhani apostolugu seinsu ligía hadan ha mégeibaña (Adü. 4:34, 35). Añahein amu díreitiña meha seinsu ani aba híchugun budagia lun lawanserun áhuduraguni lun Bungiu (1 Ko. 16:2). Ligíati, hámagiñe kristiánugu ha rísitimabaña chülǘ hamoun ha gudemetimabaña, súngubei ídehatiña lau le hayaraati (Luk. 21:1-4).

10, 11. a) Ida luba wáyeihani gíchigadi le harufudubei lubúeingu Heowá ha lánina tidaani Bíbülia? b) Ida liña hasandiragun hungua lau gayara lan hídehan lun lawanserun Larúeihan Bungiu?

¹⁰ Uguñe weyu, gayaraati lemegeirúniwa budagia lun ladügǘn somu wadagimanu. Háfuga lasaminaruña lan wani damuriguaü luagun taransehóun Luban Adamuridaguni o tadügǘn aban iseri. O háfuga lariñawagún woun mégeiwa lan seinsu lun taranserawagun sukursáli, lun lafayeirúniwa sun le mégeiwabei lun ladügǘn adamurini le ñeinba lubéi woudin o lun híderawagun íbirigu lárigiñe aban liñawan dan. Seriwiti giñe wani budagia lun hanuriahóun misionerugu, prekursorugu espechalitiña, óunigirutiña sirkuitu hama íbirigu ha nadagimeinbaña tidan sukursáli to Merigaboun tuma to lídanboun amu burí ageiraü. Ani chóuruti desidírühali lan wani damuriguaü lóunahan seinsu sagü hati lun tábunawagun Luban Adamuridaguni tuma muna lun Adamurini wéinamuti, to ahuuduboun houn wíbirigu lidan sun ubóu.

¹¹ Sun wagía gayaraati wídehan lidan wadagimanu le ladügübei Heowá lidan lagumuhóun dan le. Libe-agei ibidiñewati ka lan íchugubalin budagia, ladüga ru wamuti tidoun gafu burí to tídanboun Luban Adamuridaguni marihinga haméi ha híbiri o aba wóunahani lidan jw.org. Gayaraati genege lan woun mahuudun lan murusun budagia le wíchugunbei lun saragu katei. Gama lumoun, mama lídangiñe fiuraü budagia le wéinamuti libe-agei budagia le ibihúbei, lídangiñeti saragu lirahüñü budagia liabin. Sun íbirigu, íbini ha gudemebaña, ítara haña kei kristiánugu masedóniana lidan furumiñeti sígulu. “Lau sun gudeme hamá” ayumuraguatiña lun lichugún chansi houn lun hídehan, ani adüga hamuti lau areini (2 Ko. 8:1-4).

12. Ka tadügübei wóundarun lun tayusuruni budagia buidu?

¹² Áfaaguati Sétanu le Arihibei lau Hawadigimari Gefentiña luagu Heowá lidan sun ubóu lun hayusuruni tiseinsun lóundarun Heowá lau úaraguni luma duari (Mat. 24:45). Furíeitiña íbirigu ha ani samina haméi lau duari ida luba lan hayusuruni (Luk. 14:28). Lidan meha tidaani Bíbülia, rúati meha wadagimanu houn wügüriña úaraguatiña lun hetenirun lun tiseinsun óundaruni. Chouru hamuti meha wügüriña hagía lúnrügü lan áhuduraguni lun Heowá layusurúa. Kei  hénpulu, aban weyu, aba lagiribudun Ésüdürasi Herusaléun lau budagia le líchugubei lurúeite Pérüsia, anihein meha golu lidan, pülata luma amu burí katei le gayaraabei gebegi lan lóugiñe 100 míñunu dólarü guentó. Ariha lumuti meha Ésüdürasi irisini ligía keisi aban budagia lun Heowá, ligía líchugunbei adundehani lun lounigirúniwa luéi denchaü ǘmada (Ésüd. 8:24-34). Saragu irumu lárigiñe, óundaraguati apostolu Pábulu seinsu lun líderaguniña íbirigu ha Hudéabaña ani áluahati gürigia ha óuserutiña “lau arumani, mámarügü ligibugiñe Wabureme, hagibugiñe giñe gürigia” lun hagía lan afanreinhei (aliiha huméi 2 Korintuna 8:18-21). Uguñe weyu, falá tumuti wóundarun le ladügübei Ésüdürasi luma Pábulu. Ligía tíchugunbei adundehani furanguti luagu ida luba lan lahandilihóun luma layusurún budagia.

13. Ka uagu adügaaru lubéi lóundarun Heowá fiú asansiruni lidan lagumuhóun dan?

¹³ Anihein dan mosu lan hadügün iduheñu asansiruni lidan ligaburi hahandilihani haseinsun lun magastarun hamá lóugiñe le hagañeirubei. O háluaha lun mibe lan hamegen lun haganwoundagüdüni heseriwidun lun Heowá. Ligiaméme asuseredubei tidan lóundarun Heowá. Lidan lagumuhóun burí irumu, susereeli saragu katei súdiniti. Adügati katei le lun mayusurúa lan lóugiñe seinsu le eresibirúabei. Ligía táluahabei lóundarun Heowá lun mayusurun tan saragu seinsu ani áluaha tuguya lun mibe lan katei ayusurúti lun wadagimanu. Ítara, buídutimabei layusurún budagia le wíchugubei.

14-16. a) Ka san un layusurúa budagia le wíchugubei lau saragu ínsiñeni? b) Ida liña hasagarun buiti lídangiñe idewesei le ru táalibei lóundarun Heowá woun?

¹⁴ Ariñagatiña saragu íbirigu ha barühaña saragu irumu eseriwida lun Heowá mibihinñahagiña lan saragu idewesei túmagiñe lóundarun Heowá kei guentó. Ani richati le hariñagubei. Kei hénpulu, lidan lagumuhóun burí irumu adügǘwati páhina lidan Internet jw.org luma JW Broadcasting. Ani anuheinharu giñe Traducción del Nuevo Mundo de las Santas Escrituras lidan saragu amu iñeñein sügǘ lau furumiñe. Luagu amu oubaü, lidan irumu 2014 luma 2015 adügǘwati adamurini le ídanbei hóundaragua íbirigu ha lídangiñetiña saragu ageiraü “Sigí wamá áluahei Larúeihan Bungiu furumiñe” líribei adamurini ligía ani adügǘwati lidan táhureragüle bali le wéinamutimabei lidan 14 uburugu ubouagu. Sun ha ñǘdünbaña gúndaatiña saragu.

¹⁵ Arufuda hamaali saragu hádangiñe heteingiradi  luagu katei buíduburiti le tíchugubei lóundarun Heowá woun. Kéiburi aban feru maríeitiña ha eseriwidubaña lidan aban liraüraü uburugu Asia ariñagatiña luagu JW Broadcasting: “Anihein dan wasandiragun woungua wábuguarügü ani ménrengunti wabulieiduni chülǘ lan luadigimari Heowá lidoun fulasu díseti. Gama lumoun, dan le warihini programa lani JW Broadcasting, aba waritaguni añahein lan wíbirigu lidan sun ubóu. Wéiriti hagundan íbirigu ya lau JW Broadcasting. Súnwandan waganbuniña ariñaga adüga lan programa hati-auti lun yarafa lan hasandiragun houngua houn lílana Sétanu le Arihibei lau wawadigimari lidan sun ubóu. Gúndaatimahaña guentó lau tílana hamá lóundarun Bungiu”.

¹⁶ Lidan sun ubóu, tábunawaguña o taransehouña kéiburi 2,500 Luban Adamuridaguni. Dan le hagumeserunbei lílana aban damuriguaü Indura ayusuroun iseri luban Adamuridaguni ariñagatiña tidan aban gárada: “Wéiriti wagundan lau hádangiñetiwa lan liduheñu Heowá ha lídanbaña sun ubóu luma lau gayara lan wagundaarun hama wíbirigu ha lídangiñetiña sun ubóu. Seremei houn gúnfulihali wayumahan lun wibihin aban muna lun wadamuridagun lidan fulasu le ñein lubéi wawinwanda”. Gíbetiña íbirigu ariñagutiña dimurei libe burí le dan le hibihinu Bíbülia tuma burí amu agumeiraguagüdüni lidan hañeñe, dan le heresibirun ídemuei lárigiñe lásügürün somu liñawan dan o dan le harihini buiti le lanügübei apurichihani lidan guririguaü luma lidan fulasu le ñéingiñe lubéi hásügüra bandi gürigia.

17. Ida liña wasubudiruni íderagua lanu Heowá lóundarun uguñe weyu?

¹⁷ Hénrenguti houn besafu gürigia ha mama gefentiña luagu Heowá hafiñerun gayara lan wadügün saragu katei láurügü budagia le híchugubei gürigia. Ñǘdünti aban wügüri íñuti lubara tidan aban óunwenbu kónpeni abisidaha lidan aban lídangiñe fulasu le ñein lubéi imprimírua tan wani agumeiraguagüdüni, ani aba taweiridun lanigi dan le líchugun fe mafayeirúniwa hamá ha nadagimeinbaña ñein, lau lan budagia lafayeirúa sun katei ani madügün wamá somu wadagimanu lun wóundaragun seinsu. Ariñagati aban lan katei hénrenguti le wadügübei. Ani inarüni. Subudi wamuti láurügüñein lan lídehan Heowá gayara lan lasuseredun le (Hob. 42:2).

18. a) Ka abinirúni wibihibei dan le wíchugun lun wídehan lidan Larúeihan Bungiu? b) Ida luba warufudahan houn irahüñü luma houn ha iserigiñabaña lidan inarüni lun híchugun budagia?

¹⁸ Ru lumuti Heowá chansi woun lun wídehan lidan wadagimanu lánina Larúeihan Bungiu lidan dan le. Chouru lumuti woun wibihiba lan abinirúni anhein wadüga (Mal. 3:10). Ani füramaseti giñe buídubei lan lidin houn gürigia ha mángitiña (aliiha huméi Ariñawagúni 11:24, 25). Ani gúndaabadiwa giñe, lugundun “fuleseiwatimati le íchugubei sügǘ lau le eresibirubei” (Adü. 20:35). Luagu amu oubaü, gachansintiwa lun warufudahan houn wasaanigu luma houn ha iserigiñabaña lidan inarüni dandu lau le wariñagubei kei lau le wadügübei gayaraati lan giñe híchugun budagia ani ábame hibihin saragu abinirúni.

19. Ida liña líderagunün arütíkulu le?

¹⁹ Sun le wámabei lúmagiñe Heowá liabin. Dan le wíchugun lun lídangiñe le wámabei arufudatiwa hínsiñe lan woun ani seremei wamani luagu sun le adüga láalibei wawagu (1 Kro. 29:17). Dan le híchugunbei ísüraelina budagia lun tábunawagun ténpulu, “aba hagundaarun gürigia luagu idewesei ligía, lugundun tau sun hanigi hedeweha lun Bungiu” (1 Kro. 29:9). Sigí wamá asandirei ugundani le lanügübei wíchugun lun Heowá lídangiñe le ru láalibei woun.