1. a) Ka burí turóbuli úmabei wagagibudagua? b) Ka uagu panta lubéi Heowá hau lubúeingu ha úaraguabaña? (Ariha humóun iyawaü burí to lídanboun lagumeseha arütíkulu).

KEI wasubudiruni, buin liña ubóu le lau turóbuli. Saragu hídangiñe, hugía íbirigu hínsiñewatiña, hasufuriruña sandi wéinamuti. Añahein amu hóunigiruñanu haduheñu ha wéiyougaaña, íbini derebuguhadün lan giñe. Añahein amu háfaaguña lun híchuguni le hemegeirubei haduheñu houn. Ani subudi wamuti giñe añahein lan hídangiñe hasufuriruña saragu lídangiñe turóbuli burí le, mámarügü aban lídangiñe. Adügati sun le lun hírudun gürigia luma lun hagastarun saragu dan luma seinsu. Íbini ítara, kiputün aban afiñeni le héreti luagu füramasei lubéi Bungiu luagu aban ibagari buídutimati ámuñegü. Chóuruti panta lan Heowá hau súngubei hugía.

2. a) Ida liña líchugun Isaíasi 40:29 gurasu woun? b) Ka charati wéiriti gayaraabei hamuga wéiguadun lidoun?

² Íbini ítara, anihein san dan hasandirun ladügüña lan turóbuli lun heferidiruni here? Anhein ítara liña lubéi, mámarügüñadün huguya asandiragua hungua ítara. Ayanuhatu Bíbülia hawagu fiú lubúeingu Bungiu ha lánina binadu dan ha asaminarubaña siñati lan hasigirun habaruaguóun (1 Uru. 19:4; Hob. 7:7). Gama lumoun, sigitiña áfaagua, ani amuriahatiña luma Heowá lun líchugun erei  houn. Ani ru lumuti houn, ladüga “ruti erei lun le buchaalibei uagu” (Isa. 40:29). Híruti añahein lan lubúeingu Bungiu uguñe weyu ha asaminarutiña mosu lan hemeraagun luéi inarüni lun gayara lan hagagibudagun luma turóbuli, aba harihini heseriwidun lun Heowá kei aban ihürügu lubaragiñe harihini kei aban abinirúni. Ligía aba lubéi hígiruni haliihanu Bíbülia, houdin adamuridagua luma apurichiha, íchiga ugundani lun Satanási.

3. a) Ida luba wadüraaguni áfaaguni le ladügübei Satanási lun ledebilidagüdüniwa? b) Kaba wakutiha lidan arütíkulu le?

³ Subudi lumuti Mafia buidu here lan wafiñen dan le beresegu wamá saragu lidan wabagari keisi kristiánugu. Ani mabusenrunti lun here wamá. Ligíati, danme le hasandirun buchá lan huagu ani méreedün lan, madiseda humá luéi Heowá. Lubaragiñe lira, yarafatima humá lun. Haritagua huméi ariñaga tan Bíbülia ladügüba lan Bungiu lun herederun “deregüdagu lidan hafiñen, héreñu ani chóuruñu” (1 Fe. 5:10; Sant. 4:8). Lidan arütíkulu le, warihiba bián katei le gayaraabei ladügün lun murusunrügü lan wadügün lidan weseriwidun lun Bungiu. Wayanuhaba giñe luagu ida liña lan líderaguniwa adundehani le tídanbei Bíbülia lun wawandun. Gama lumoun, furumiñe teni wamá lun le lariñagubei Isaíasi 40:26-31, le arufudubalin ida liña lan líchugun Heowá erei woun.

4. Ka gayaraabei wafurendeiruni lídangiñe Isaíasi 40:26?

⁴ (Aliiha huméi Isaíasi 40:26). Úagili ni aban gayaraati labahüdüniña waruguma ha siélubaña. Saminatiña aturiahatiña siensia anuhein lan kéiburi 400 milu míñunu waruguma tidan wani galaxia. Ani ruti Heowá tiri kada aban tídangiñe. Ka wafurendeirubei lídangiñe katei le? Anhein nidiheri lubéi Bungiu luagu katei mabagariti le ladügübei, nidiheritimati huagu, huguya le eseriwidubei lun ladüga hínsiñe lan hun, mama ladüga aranse laadün lan kei aban máhina lun hadügüni (Sal. 19:1, 3, 14). Subuditün lun Wáguchi buidu. Ariñagati Hesusu: “Íbini ídiburi le hábulugubei, abahüdǘwati aban aban” (Mat. 10:30). Ariñagati aban hádangiñe ha abürühabalin sálumu lau ichouruni: “Góunigi lumutiña Aburemei ha harumabaña abagaridun” (Sal. 37:18). Lidan amu dimurei, subudi lumuti óuchawaguni le hasufurirubei ani gayaraati líchugun erei hun lun hawanduni.

5. Ka uagu gayara lubéi wachoururuni gayara lan líchuguni Heowá erei le wemegeirubei woun?

⁵ (Aliiha huméi Isaíasi 40:28). Lúmagiñe Heowá liabin erei. Saminarügü humá luagun erei le líchugubei Bungiu lun Weyu. Ariñagati David Bodanis, aban abürühati luagu katei lánina siensia, luagu sagü lan segundu lasuseredun aban aduuruni lidan Weyu le ítarabei kei taduurun saragu milu míñunu bomba atómika. Ariñagati amu aturiahati siensia lidan lan ábanrügü segundu ru lan Weyu saragu erei le buídurügüti lun hawinwandun sun gürigia ha ubouagubaña luagu 200 milu irumu”. Anhein ru lubéi Heowá erei lun Weyu, chóuruti gayara lan giñe líchuguni erei le wemegeirubei woun lun wagagibudagun luma furumiñeguarügü turóbuli.

6. a) Ka uagu lariñaga Hesusu huáliti lan anügüni le líchugubei? b) Ka lánibei wasubudiruni katei le efekütu wawagu?

⁶ (Aliiha huméi Isaíasi 40:29). Barüti eseriwidúni lun Heowá saragu ugundani. Ariñagati Hesusu houn lani disipulugu: “Resibi huméi narufudahan”. Lárigiñe ábaya lariñagun: “Ábame hadarirun emeraaguni tun huani. Ménrengunti lun heseriwidun nun, huáliti giñe anügüni le níchugubei hun lun hanügüni” (Mat. 11:28-30). Inarüniti dimurei burí le! Anihein dan buchá lan wawagu dan le woudin adamuridagua o apurichiha. Gama lumoun, ma inarüni dan le lan wagiribudun  héretimahali lan wasandiragun woungua ani aransetimatiwa lun wawanduni turóbuli? Chóuruti huáliti lan anügüni le líchugubei Hesusu woun ani ménrengunti wanügüni.

7. Abahüdagua humá aban sügǘ le arufudubalin inarüniti lan dimurei burí le lídanbei Matéu 11:28-30.

⁷ Ariha waméi tikesin aban íbiri to asufuriruboun aban sandi le adügübei lun hanarime lan labuchadun tuagu, anihein giñe lanarime íruni tuagu luma ligari ichügü. Gunfurandawati anihein lan dan hénrengu lan tun tidin adamuridagua. Gama lumoun, aban weyu, lárigiñe táfaagun saragu lun tidin lidan Adamuridaguni le lánina dimaasu, abürühatu: “Luagu heferidiruni gürigia haguraasun layanuhóua lidan yanu ligía. Ru lumuti íbiri ligía yanu lau saragu gudemehabu darí lun nayahun. Aba níchugun fe lunti lan lidan nan adamuridaguni”. Gúndaatu íbiri to saragu ladüga táfaagun lun tidin adamuridagua.

8, 9. Ka labusenrubei Pábulu lariñagun lau dimurei “dántima le débili nan, ábatima néredun”?

⁸ (Aliiha huméi Isaíasi 40:30). Meberesenga lichú aau le wawagubei luma katei le gayara wabéi adüga, gébehati katei le gayaraabei wadügüni lau wabafu guánarügü. Lunti wasubudiruni sun wagía katei le. Samina wamá san luagun apostolu Pábulu. Íbini meha aban lan wügüri gabafuti, siñati meha ladügüni sun le labusenrubei. Dan le lariñagunbalin sun lidiheri lun Bungiu, aba lariñagun Bungiu lun: “Buítimati larihín nubafu buagu dan le débili ban”. Gunfuranda lumuti Pábulu ariñahani le ani aba lariñagun: “Dántima le débili nan, ábatima néredun” (2 Ko. 12:7-10). Ka meha sanuagu layanuha?

⁹ Subudi lumuti meha Pábulu siñati lan ladügün ni kata anhein mibihin ídemuei le wéiritimati. Gayaraati meha líchugun sífiri sandu erei lun dan le débili lan. Gayaraati meha giñe líderaguni lun ladügün katei le lásiñarubei adüga lau lubafu guánarügü. Ligiaméme asuseredubei woun. Chóuruti hérebadiwa lan lau lubafu Bungiu.

10. Ida liña meha líderaguni Heowá Dawidi agagibudagua luma turóbuli?

¹⁰ Sandí lumuti Dawidi, le abürühabalin sálumu, lubafu lani Bungiu sífiri sandu saragu wéiyaasu. Abürühati: “Nageindaguba luma nágani lau bídehan, násügürüba luéigiñe lubarieirun luburugute” (Sal. 18:29). Anihein turóbuli ítara liña kei baríeiru le siñati wahiñuraguni wábuguarügü. Megei wamuti lídehan Heowá.

11. Ida liña líderaguniwa sífiri sandu agagibudagua luma turóbuli?

¹¹ (Aliiha huméi Isaíasi 40:31). Dan le háhamahan ágila dise, mama lau here guánarügü hadügei. Ádaha lumutiña garabali lun gayara lan hawanserun ani adügati lun gayara lan hareiduni here. Ligíati, danme le hagagibudagun luma aban turóbuli hénrenguti, haritagua humá hawagun ágila. Ayumuragua humá lun Heowá lun líchuguni erei le hemegeirubei hun lau lídehan sífiri sandu (Huan 14:26). Ani haritagua humá gayaraati lan hamuriahani luma sagü hemegeiruni, wein-gádürü oura luagu weyu. Samina wamá luagun aban sügǘ le ídanbei megei wamá wamuriahan ídemuei luma Heowá: dan le gaturobulin wamá luma aban íbiri. Ka uagu gayara lubéi lasuseredun katei le?

12, 13. a) Ka uagu anihein lubéi dan lasuseredun turóbuli hadan íbirigu? b) Ka larufudahabei abahüdaguni luáguti libagari Hosé woun luagu Heowá?

¹² Susereti turóbuli hadan íbirigu ladüga sun wagía gafigountiwa. Ligía anihein lubéi dan hariñagun o hadügün íbirigu somu katei le adügüti lun wasafaragun, ani anihein giñe dan adügatiwa lun hasandiragun houngua wuriba. Gayaraati aban lan óunwenbu óuchawaguni katei le. Ítara kei lidan amu burí kesi, ígirati Heowá lun warufudun úaraguni luma lun wafurendeirun nadagimein lidan úarani hama lubúeingu ha deregeguaaña houngua lun ani ha hínsiñebaña lun lau sun chará hamá.

 ¹³ Madügünti Heowá lun masufurirun hamá lubúeingu óuchawaguni, kei wafurendeiruni lidan libagari Hosé. Dan le meha nibureingili, aba lanügǘn Ehiptun ladüga haluguruni líbirigu keisi idamuni ladüga hagimugan lun (Agu. 37:28). Chóuruti gari lan meha lun Bungiu larihini luriban louserúniwa Hosé le lumada, aban wügüri richaguati. Gama lumoun, madügünti Heowá ni kata. Ani madügünti giñe ni kata dan le lichugúnbei duru luagun Hosé luagu áluga lan láguragunu lani Potifárü weiriou ani aban ladaürǘn. Gama lumoun, fui lumuti san Bungiu Hosé? Uá. Ariñagatu Bíbülia adüga lan Bungiu “lun lasalirun sun katei lun buidu” (Agu. 39:21-23).

14. Ka buiti lanügübei wagidaruni igañi wawariua dandu lun wátuadi kei lun wamadagua luma Heowá?

¹⁴ Ariha wamá ábanya kesi. Míbetiña gürigia asufuriruti le lasufurirubei Dawidi, ábanya lumada Bungiu. Gama lumoun, mígirunti lun labuinchun igarihabu tidan lanigi. Abürühati: “Ígirabei igañi; magañidabá ladüga gádeirügü lumutitima agañiduni sun katei” (Sal. 37:8). Lunti wagidaruni igañi wawariua lun wáyeihani Heowá ladüga “mabeichun lumutiwa Bungiu keisi le wadünabei” (Sal. 103:10). Ani ídehati giñe magañidun wamá lun buidu lan wátuadi. Adügati igañi lun hasandirun gürigia lau liñun hitaü, turóbuli lun hawaragun, sandí tuagu habana, harageirugu luma amu burí sandi. Dan le wagañidun, masaminaruntiwa buidu. Ani lárigiñe aban lanarime igañi gayaraati ladagarun lanarime íruni wawagu. Luagu amu oubaü, ariñagatu Bíbülia: “Ichügü darangilati ibagaribei lun úgubu” (Ari. 14:30). Ligíati, dan le ladügün somu íbiri aban katei le mínsiñeti woun, kaba íderaguawa aransehei turóbuli luma? Wafalaruni adundehani le tídanbei Bíbülia.

15, 16. Ka gayaraabei wadügüni anhein adüga o ariñaga aban gürigia somu katei le gáriti woun?

¹⁵ (Aliiha huméi Éfesuna 4:26). Maweiriduntu wanigi dan le hóuseruniwa gürigia ubouaguna wuriba. Gama lumoun, dan le aban lan íbiri o aban lan waduhe adüga o ariñaga somu katei le gáriti woun, gayaraati weferidiruni wagundan. Lun hamugati siñagua wamá woungua lun wabulieiduni le asuseredubei, wareidubei san igarihabu ligía luagu saragu irumu? O wafalarubei adundehani le tídanbei Bíbülia lun waransehani turóbuli lau lóufudagun? Eibu wígirun lun lásügürün saragu dan, hénrengutimabei woun waransehani turóbuli.

¹⁶ Samina humá lun hamuga adügaali lan aban íbiri somu katei le gáriti hun ani siñati habulieiduni le asuseredubei. Kaba íderaguaün lun haransehani katei? Furumiñe, furíei humá lun Heowá tídangiñe sun hanigi ani amuriaha humá luma lun líderagunün lun hayanuhan buidu luma íbiri ligía. Haritagua huméi lumada lan giñe Bungiu íbiri ligía ani hínsiñeti lan lun (Sal. 25:14). Óusera lumutiña  Heowá lumadagu lau ínsiñeni ani agurabati lun wadügüni ligiaméme (Ari. 15:23; Mat. 7:12; Kol. 4:6). Samina huméi buidu kaba lan hariñaga. Masaminara humá labusenrun lan íbiri ligía ladügünbei dañu hun. Ani samina humá gayaraati lan hugía lan adügübei lun lasuseredun turóbuli ligía. Gayaraati hagumeseruni yanu lau hariñagun: “Gayaraati nuguya lan débilibei, gama lumoun, dan le bayanuhanbei numa wurinouga, aban nasandiragun nungua ítara”. Anhein masuseredun katei kei hagurabuni, áluaha humá amu chansi lun hayanuhan. Lidan háluahani chansi ligía, amuriaha humá luma Heowá lun labiniruni íbiri ligía. Ani amuriaha humá giñe lun líderagunün etenira lun igaburi buiti le luágubei gürigia le achararubei hun. Meberesenga le asusereduti, gayaraati hachoururuni gunda lan Heowá lau áfaaguni le hadügüni lun habuidurun luma híbiri, le giñe gamadaguabei luma Heowá.

17. a) Anhein afigouhaadiwa lubéi, ka ídemuei líchugubei Heowá woun lun wiñuragun? b) Ka uagu lunti lubéi wánharun lun ídemuei ligía?

¹⁷ Añahein kristiánugu sanditiña madüna hamá heseriwidun lun Heowá ladüga adügaaña lan aban figóu wéiriti. Gayaraati ladügün igarigu le lídanbei hasaminan lun heferidiruni hadarangilan, hagundan luma here. Ariñagati Dawidi luagu áfaaguni le ladügübei kóntüra le lasandirubei: “Sun meha dan le naubei magufeserunga nifigoun, aba meha nayahuahan sagü weyu. Bei bumutina meha áriebu wéyuagu”. Gama lumoun, aba lararamun Dawidi lun turóbuli le keisi aban wügüri le eseriwiduti lun Bungiu, ítara kei lagurabuni Heowá. Abürühati: “Gama lumoun aba nagufeseruni nifigoun luma sun nuriban, maramudunga ni kata [...] buguyati, Nabureme, aba ferudunabánina” (Sal. 32:3-5). Anhein adügaadün lubéi aban figóu wéiriti, busenti Heowá líderagunün. Gama lumoun, mosu hánharun lun ídemuei le líchugubei lidan damuriguaü (Ari. 24:16; Sant. 5:13-15). Madarasaha humá lun hadügüni, ladüga lídangiñe katei le dipeni lan hawinwandun lun súnwandan. Gama lumoun, ka gayaraabei hadügüni anhein ua lubéi darangilu lan hisaminan íbini lüha lan feruduna lanün Bungiu?

18. Ida liña líderaguniña lani Pábulu hénpulu ha asandirubaña madüna hamá heseriwidun lun Bungiu?

¹⁸ Anihein meha dan lírudun Pábulu dan le laritaguni sun katei wuribati le meha ladügübei. Ariñagati: “Au [...] ni kátatimabei hadan apostolugu; madünatina ni lun nanügǘn keisi apostolu, lugundun éibaaha numutiña meha tílana liligilisin Bungiu. Gama lumoun ítara nubéi guentó lugundun areidati Bungiu numa” (1 Ko. 15:9, 10). Ánhati meha Heowá lun Pábulu íbini chará lan meha, ani busenti meha Heowá lun lachoururuni Pábulu katei le. Ligíati, anhein asakürihaadün lubéi tídangiñe sun hanigi luagu binadu hifigoun ani gúfese humaali lun Heowá luma houn wéiyaaña lidan afiñeni anhein mégeiwa lubéi, gayaraati hachoururuni gudemehabubei lan Bungiu hun. Ligíati, afiñe humá luagu feruduna láadün lan Heowá ani resibi huméi ferudun ligía (Isa. 55:6, 7).

19. Ariñaga huméi ka lan bérusubei lánina irumu 2018, luma ka lan uagu buidu lubéi?

¹⁹ Gayaraati wagurabahan laganwounduba lan turóbuli eibu lawanserun lagumuchagüle ubóu. Gama lumoun, chouru huméi gayara lan líchuguni Heowá ídemuei le hemegeirubei hun lun hasigirun hubaruaguóun, ladüga “ruti erei lun le buchaalibei uagu, ru ligía lanwoun lere le uánimabei” (Isa. 40:29; Sal. 55:22; 68:19). Lidan irumu 2018, waritagubei inarüni súdiniti le sagü woudin adamuridagua ani ábame warihini dimurei lánina bérusu lánina irumu tidan Luban Adamuridaguni: Ha hemenigibaña luagu Heowá, hibihuba iseri erei (Isa. 40:31).