1. Kátima san katei espechaliti adügübei lun gunda wamá?

GÚNDAATIWA wasubudiruni aganwoundeina haña lan lumutuniña Heowá. Arufudati le hadunranguagüdüñein lan lilanpun inarüni. Lau irumu lügüra, aturiahatiña hóugiñe diisi míñunu gürigia wama. Ani chülütiña saragu míñunu gürigia lidoun Aritaguagülei ani furendeitiña luagu ínsiñeni le larufudubei Bungiu lau líchuguni Liráü lun lesefuruniwa (1 Huan 4:9).

2, 3. a) Ka katei madügünbei lun madunranguagüdün wamani lilanpun inarüni? b) Kaba wariha lidan arütíkulu le?

² Ayanuhóuati saragu iñeñei hadan lumutuniña Heowá. Madügünti le lun lásiñarun walawahani Wáguchi le siélubei lidan aban (Aruf. 7:9). Meberesenga ka lan iñeñei wayanuhabei o halía lan weredera, gayaraati warugoungadagüdün “haganagua gürigia kei waruguma ubouagu” (Fili. 2:15).

³ Íderagua lumutiwa wasubudiruni aganwoundeina waña lan, lidan wamá aban luma wetenirun lun wapurichihan lun wíchugun uéiriguni lun Heowá luma lun hayarafadun gürigia lun inarüni. Lidan arütíkulu le, warihuba ida luba lan wadunranguagüdüni lilanpun inarüni lidan  ǘrüwa igaburi le (aliiha huméi Matéu 5:14-16).

4, 5. a) Bóugudin luéi wapurichihan, ida luba wadügün lun ladunrangun lilanpun inarüni? b) Ka buiti asagarúbei dan le warufudun ínsiñehabuni? (Ariha humoun iyawaü to lídanboun lagumeseha arütíkulu).

⁴ Tidan garüdia Awisahatu lidan inglesi to lánina 1 lidan sisi-hati, irumu 1925, ariñawagúati lidan arütíkulu “Lanpu lidan luburiga”: “Úati ni aban lun úaragua lan lun Wabureme lidan lagumuhóun weyu le [...] ánheingubeirügü meferidirun lan chansi lun ladügün lun ladunrangun lilanpun inarüni”. Ani ariñagatu giñe: “Lunti hadügüni lira lau hanügüni uganu buiti houn sun gürigia ha Ubouagubaña luma lun hawinwanduni lilurudun Heowá le richabei”. Furanguti lau lan wapurichihani uganu luáguti Larúeihan Bungiu luma wadügün disipulugu ligía lan aban igaburi lun wadügün lun ladunrangun lilanpun inarüni (Mat. 28:19, 20). Huuti giñe ligaburi wóuserun keisi kristiánugu lun wíchugun uéiriguni lun Heowá. Dan le wapurichihan ténitiña gürigia lun ligaburi wóuserun. Adügati wáhayachun hawagun gürigia luma wabusuragun houn lun hadimurehan buiti wawagu luma luagu Bungiu le unbei weseriwida.

⁵ Ariñagati Hesusu houn lani disipulugu: “Danme hebelurun tidoun aban muna, ábame habusurun” (Mat. 10:12). Lidan meha fulasu le ñein lubéi hapurichiha kamaniti meha hebelaagüdüniña gürigia chülüdügütiña hábiñoun íbini ibidiñe hamá houn. Másiñati mechun hamá gürigia lau igaburi le lidan fulasu le ñein lubéi wapurichiha. Hanufudetiña o aba burí hagañidun dan le harihin gürigia ibidiñetiña houn habenari. Ánhawa arufuda ínsiñehabuni houn ani busugua wagía lau aban áhayachuni háfuga hasandiraguba houngua lau darangilaü. Liibe-agei dan, buídutimati aban áhayachuni. Ligiaméme asuseredubei dan le wapurichihan lidan guririguaü tau kareta. Ha apurichihabaña lidan guririguaü chóuruti ariha hamani buidu lan hóunabun saragu gürigia dan le háhayachun íbirigu lidan habusuragun houn. Añahein hádangiñe darí lun hayarafadun lun hárügüdün aban agumeiraguagüdüni o lun hayanuhan wama.

6. Ka hadügübei aban feru maríeitiña ha derebuguhaña lun haganwoundagüdüni hani ministeriu?

⁶ Hénrenguti houn aban feru maríeitiña derebuguhaña ha awinwandubaña Ingülatéra hapurichihan tidan burí muna ladüga luriban hátuadi. Gama lumoun, kei busén hamá haganwoundagüdüni hani ministeriu gumeseeña apurichiha tigibugiñe haban. Aba híchugun aban dábula tau ámuñegueinarügü agumeiraguagüdüni lidan oura le hásügürün agübürigu anügaña hasaanigu leskuelarugugiñe. Adügati busén hamá ásügürütiña hasubudirun ka lan luágubei dábula lun hayarafadun saragu hádangiñe luagun luma lun hanügünu líburu Los jóvenes preguntan bolumen 1 luma 2, tuma amu burí garüdia. Aba tagumeserun aban prekursora to lídangiñetu hani íbirigu ha damuriguaü apurichiha ñein úara hama. Seremei ínsiñehabuni le tarufudubei íbiri to luma áfaaguni le hadügübei feru maríeitiña ha, aba lagumeserun aban úguchili aturiahoun Bíbülia.

7. Ida luba wíderaguniña gürigia ha anurahabaña lidoun ageiraü le ñein wabéi?

⁷ Lidan burí lagumuhóun irumu, anurahaaña saragu gürigia lidoun saragu ageiraü. Ida luba wíderaguniña gürigia ha lun hasubudiruni Heowá luma lisuuni? Le furumiñeti katei le gayaraabei wadügüni wafurendeirun abusuragua houn lidan hañeñe. Másiñati gayara lan leseriwidun programa JW Language woun. Gayaraati wafurendeirun fiu dimurei le gayaraabei lachawahani haritagun. Lárigiñe, gayaraabei wayanuhan luagu páhina jw.org houn luma warufuduni bidéu tuma agumeiraguagüdüni to lídanboun hañeñe (2 Lur. 10:19).

8, 9. a) Ka ídemuei weresibirubei lidan adamuridaguni le adügǘbei labadinagua dimaasu? b) Ida luba híderaguniña agübürigu hasaanigu lun hóunabahan lidan adamuridaguni?

⁸ Ru laali Heowá damuriguaü Habagari Kristiánugu luma Heseriwidun lun gapurichihadi wamá. Íderagua lumutiwa lubuidun adundehani le weresibirubei  ñein lúntima chouru lan wasandiragun woungua lidan wagiribudun bisidaña gürigia luma lidan warufudahan houn tídangiñe Bíbülia.

⁹ Saragu gürigia ha achülürübaña tidoun Luban Wadamuridagun aba taweiridun hanigi lau harihiniña irahüñü íchigei hóunabagüle lidan adamuridaguni. Ligíati, lun gayara lan hadunranguagüdüni irahüñü lilanpun inarüni, buídubei hadüga agübürigu lau harufudahan houn mámarügü lun haliihani óunabagülei tídangiñe agumeiraguagüdüni o háguyuguagüdüni le ariñawagúbei houn lun hariñaguni. Anihein dan adügati líchugun aban irahü óunabagülei tídangiñe sun lanigi lun híchugun gürigia ha busenbaña hafurendeiruni inarüni fe darí hamaali lan inarüni (1 Kor. 14:25).

10. Ida liña lahuudun láhudurawagun hadan iduheñu lun derebugu lan úarani le hádanbei?

¹⁰ Wederebudagüdüni úarani le hádanbei iduheñu luma le lídanbei damuriguaü ligía ábaya igaburi lun waganwoundagüdüni wani ministeriu. Súdiniti lun ladügǘn áhuduraguni hadan iduheñu sagü dimaasu. Saragu iduheñu yusu hamuti programa le áfuridubei sagü hati le lánina JW Broadcasting. Lárigiñe harihini, súdiniti lun hayanuhan súngubei hagía luagu ida luba lan hawinwanduni le hafurendeirubei. Gama lumoun, dan le halidihani agübürigu áhuduraguni hadan iduheñu lunti haritaguni ámuñegueinarügü lan le hemegeirubei irahüñü luma le hemegeirubei nibureintiña. Ligíati lunti hachoururuni agübürigu háluahan ariñahani le gayaraabei lahuudun houn sun tílana haban (Sal. 148:12, 13).

11-13. Ida luba wadüga lun wederebudagüdüni úarani le lídanbei damuriguaü luma lun wíderaguniña amu lun haganwoundagüdüni hani ministeriu?

¹¹ Sun wagía, íbini nibureintiña, gayaraati wederebudagüdüni úarani le lídanbei damuriguaü ani ítara, wínchahabaña wíbirigu lun haganwoundagüdüni hani ministeriu. Gayaraati háfaagun nibureintiña lun hebereserun hau íbirigu ha derebuguhaña. Gayaraati giñe hamuriahan hama lun habahüdahan houn luagu sügǘ le winwan hamaalibei lidan heseriwidun lun Heowá. Dandu nibureintiña kei íbirigu derebuguhaña, hasandiraguba houngua buidu ani línchahabaña katei le lun hadunranguagüdüni lilanpun inarüni. Luagu amu oubaü, sun wagía gayaraati wáfaagun lun wíchugun buiti achülürüni houn ha achülürütiña tidoun Luban Wadamuridagun. Gayaraati weresibiruniña lau wáhayachun hawagun lau ínsiñehabuni, wíderaguniña adarira halíaba lan hañuura luma lun warufuduniña houn amu íbirigu. Ani ítara, hasandiraguba houngua buidu.

¹² Anhein rúaali lubéi dasi hun lun halidihani  adamuridaguni lubá apurichihani gayaraati hídehan lun hasigirun íbirigu derebuguhaña aganwoundagüdei hani ministeriu. Lun lira, mosu hachoururuni íbirigu ha alidihabalin apurichihani híchugun somu fulasu le ménrengubei houn íbirigu derebuguhaña lun hapurichihan ñein. Anihein kesi mosu lan hamuriahan hama ha nibureintimagiñabaña lun háfuridun hama íbirigu ha luma lun híderaguniña. Lunti giñe gunfuranda hamaniña ha siñabei hapurichihan saragu ladüga luriban hátuadi o ladüga amu burí turobuli. Ánhaña gudemehabu nibureintiña, íbirigu derebuguhaña, íbirigu iserigiña o ha barühañabaña saragu irumu lidan inarüni houn sun íbirigu hídehaba lun hapurichihan lau ubebeni (Fad. 19:32).

¹³ Ariñagati aban hádangiñe abürühati Sálumu: “Ariha humá ida liña lan lubuidun lun haganóun íbirigu lidan aban hámagua!” (aliiha huméi Sálumu 133:1, 2). Sagatiña meha ísüraelina buiti lídangiñe háhuduragun lun Heowá úara. Ariñagati abürühati sálumu ítara liña lan úarani le wádanbei kei ibiñein le buiti le meha eserúnbei luagu aban anuadirúaali. Uguñe weyu, ka uagu máfaagun wabéi lun wadügün buiti lidan damuriguaü lun wederebudagüdüni úarani le lídanbei? Anhein wadügüñein lubéi lira buiti wadüga. Gama lumoun, gayaraati san wadügün lóugiñe lira luma lun wasubudiruniña wábirigu buidu? (2 Kor. 6:11-13).

14. Ka gayaraabei wadügün lun ladunrangun lilanpun inarüni lidan fulasu le ñein lubéi wawinwanda?

¹⁴ Gayaraati san waganwoundagüdüni wáfaagun lun ladunrangun lilanpun inarüni lidan fulasu le ñein lubéi wawinwanda? Ánhawa arufuda ínsiñehabuni houn wabesinanigu, másiñati busenbaña lan hasubudiruni inarüni. Álügüdagua wamá woungua: “Ka san hasaminarubei nubesinanigu nuagu? Harumatu san nuban luma sun le geyegubei tau? Adügati san lira lun buidu lan tariawagún taganagua muna burí to lídanboun fulasu le ñein lubéi nawinwanda? Álugatina san níderaguniña amu?”. Danme le wayanuhan hama wábirigu álügüdagua wamaña ida liña gani lan lubuidun hagaburi hawagu habesinanigu, ítara kei hawagu haduheñu hama hánigu paaná leskuelarugu o lidan wadagimanu. Chóuruti habahüdahaba lan sügǘ buíduburiti woun (Efe. 5:9).

15. Ka uagu súdini lubéi lun agagudúañu wamá?

¹⁵ Anhein busén wabéi lun meferidirun wamani ubebeni lidan wani ministeriu lunti gabaroun wamani wawinwanduña lan lidan lagumuhóun dan. Ariñagati Hesusu houn lani disipulugu lóugiñe aban wéiyaasu: “Agagudúañu humá” (Mat. 24:42; 25:13; 26:41). Ánhawa asaminara aniheingua lan saragu dan lubá liabin “saragu asufuriruni” ani marihin wabéi lan masandirunbadiwa lunti lan wetenirun lun wapurichihan (Mat. 24:21). Ábame eferidireina wamani ubebeni ani gayaraabei weferidiruni sunsuinagubei.

16, 17. Ka gayaraabei wadügüni lun agagudúañu wamá?

¹⁶ Eibu laganwoundun turobuli lidan lagumuhóun dan le lunti agagudúañu wamá. Chóuruti lagumuchaguba lan Heowá lau ubóu le lidan dan le aranse laalibei lun ladügüni (Mat. 24:42-44). Lidan wagurabahaña lan lunti gaguraasun wamá ani agagudúañu wagíame sun dan. Aliiha wamóun Lererun Bungiu sagü weyu ani deregegua wagíame woungua lun afurieidúni (1 Fed. 4:7). Teni wamá lun lubuidun burí hani wíbirigu hénpulu ha seriwihañabaña lun Heowá luagu saragu irumu. Gayaraati giñe wáluahan tidan wani agumeiraguagüdüni abahüdaguni luáguti habagari wíbirigu.

¹⁷ Redei wamá bereseguñu lidan weseriwidun lun Heowá, adüga wamá katei buiti hawagu amu ani sügǘ wama dan hama wíbirigu. Ítara luba gunda wamá ani furesebei wasandiruni lásügürün dan (Efe. 5:16). Sügühali aban sígulu lúmagiñe hadügüni wíbirigu sun hayaraati lidan heseriwidun lun Bungiu. Ani uguñe weyu, adügati iseri adundehani le líchugubei Heowá woun lun libihín lóugiñe le adügǘbei dan lügüra. Ladunranguña lilanpun inarüni lau erei hadan gürigia.

18, 19. Ida luba hídehan wéiyaaña lidan afiñeni lun agagudúañu wamá luma lun beresegu wamá lidan weseriwidun? Ru humá aban hénpulu.

 ¹⁸ Íbini chará wamá, ígirati Heowá lun wasigirun eseriwida lun. Írida lumutiña wéiyaaña lidan afiñeni lun líderaguniwa lun agagudúañu wamá beresegu wagíame lidan weseriwidun (aliiha huméi Éfesuna 4:8, 11, 12). Ligíati, danme le labisidahaniwa aban wéiyaali lidan afiñeni, sagá wamá buiti lídangiñe lubuidun adundehani le líchugubei woun lau lichú au.

¹⁹ Amuriahatiña aban feru maríeitiña Ingülatéra ídemuei hama wéiyaaña lidan afiñeni ladüga anihein lan fiu turobuli hadan. Aba tariñagun würi sandigua tan tungua kamá le lídanñoun aban “yugu le múaranti” lidan hamadagua luma Bungiu. Ani ariñagati wügüri subudi lan lun mama lan aban máisturu buiti ligía ani madügün lani áhuduraguni hadan iduheñu sagü dimaasu. Aba hayanuhan wéiyaaña lidan afiñeni hama luagu Hesusu, luagu góunigi lumutiña lan meha lani disipulugu ani gabarounléi ka lan hemegeirubei. Ani aba hariñagun wéiyaaña lun wügüri lun lan láyeihani ligaburi Hesusu, ani ariñaga hagía tun lani weiriou lunti lan gaguraasun tan lubá. Rútiña giñe fiu adundehani houn luáguti ida luba lan hadüga lun hadügüni áhuduraguni hadan iduheñu úara hama hasaanigu (Efe. 5:21-29). Dan lárigiñe, aba hariñagun wéiyaaña lidan afiñeni lun wügüri ligía buidu lan ladüga, ladüga láfaagun lun lakipuruni hamadagua liduheñu luma Heowá. Ani ínchaha hamuti lun lasigirun adügei katei le luma lun lafiñerun líderagubei lan sífiri sandu lun aban lan ichügüdinaü buiti. Ídehaali hebereserun wéiyaaña hau iduheñu ha luma ínsiñeni le harufudubei houn lunya ladunrangun lilanpun inarüni hadan.

20. Kaba wibiha ánhawa adunranguagüdei lilanpun inarüni hadan gürigia?

²⁰ Ariñagati Sálumu 128:1: “Fuleseiwatibu, buguya le inebahabubei lun Aburemei gaganbadi buguya lun”. Arihaadiwa lidan arütíkulu le ámuñegueinarügü igaburi lun wadunranguagüdüni lilanpun inarüni hadan gürigia: wagunbirahaniña amu gürigia lun heseriwidun lun Bungiu, wadügüni sun wayaraati lun wederebudagüdüni úarani le wádanbei luma lau agagudúañu wamá. Ánhawa adügei sun le gúndaatimabadiwa, harihibei amu buiti le wadügübei ani busenbaña saragu gürigia híchugun uéiriguni lun Wáguchi le siélubei (Mat. 5:16).