Aliiha humutu san tagumuhóun burí Garüdia Awisahatu to áfuriduboun? Houcha humá hóunabuni álügüdahani burí le:

Ka gádürü katei gayaraabei wadügüni lun buídutima lan weremuhan?

Seti waméi wágubu buidu ani iñura wamoun waliburun lánina uremu. Awaragua wamá hulili, dará waméi wayuma ani eremuha wamá lau umalali héreti. Ítara luba gayara lan wiñuruni wamalali dan le weremuhan (w17.11, páhina 5).

Ka wafurendeirubei luagu burí fulasu ñein lubéi meha uburugu aramudaguagülei Ísüraeli luma burí üma le anügübaliña gürigia ñeinhin?

Anihein meha sisi uburugu aramudaguagülei fánreinguañu lidan sun ageiraü ani buiti meha üma le anügübaliña anurahatiña ñeinhin. Ítara liña meha ménrenguraü lan lachülürün aban anurahati lidoun aban lídangiñe uburugu ligía furese ani sin turobuli (w17.11, páhina 14).

Ka uagu lafayeirún lubéi lebegi esefuruni idewesei buídutimabei le weresibirubei lúmagiñe Bungiu?

Ru lumuti le wabusenrubei luma le wemegeirubei woun: wayumahan wawinwandun lun súnwandan luma lun wesefurún luéi figóu luma óunweni. Kei hínsiñe habéi ladügawagun Adán lun Bungiu óunaha lumuti Hesusu lun lounwen wawagu lau sun meha gafigoungidiwa lan (wp17.3, páhina 7).

Ka uagu wariñaga ayanuha lan Sálumu 118:22 luagu láguyugun Hesusu?

Mabusenruntiña meha gürigia hánharun Hesusu lan Mesíasibei, ábati háfaruni hilagubei. Mosu meha láguyugun lun ligíaba lan “dübü le tímatimaati” (w17.12, páhina 9 luma 10).

Mosu meha san libihini aban gürigia irichaü keisi ibugañaü lun hádangiñe lan gürigia ha ídangiñebaña liabin Mesíasi?

Anihein meha dan hádangiñe lan ígiramaü hayabin ha ñéingiñeba lubéi liabin Mesíasi, gama lumoun, mítaranti meha súnwandan. Mama meha Dawidi furumiñetibei liráü Hesé, íbini ítara, hádangiñe ladügawagun Dawidi liabin Mesíasi (w17.12, páhina 14 luma 15).

Ka burí adundehani luáguti agaranihani wadarirubei tidan Bíbülia?

Ariñagati meha lúrudu le líchugubei Bungiu lun Moisesi mosu lan hadisedagüdün ha gawagubaña ítaga sandi luagu bián-wein weyu. Mosu meha hachibuni gürigia háhabu lárigiñe haguurun hilaaña. Lunti meha giñe hábununi gürigia hawiye. Ani mosu meha lichugún seini tuagu lóustarun aban irahü lidan liwidün weyu lárigiñe lágurahoun ladüga ligía meha dan lagumeserun lita aban irahü figigili éibaagua buidu (wp18.1, páhina 7).

Ka uagu mariban lubéi hínsiñegua lan gürigia lungua keisi lubudubu?

Mosu hínsiñe hamá gürigia wáledigu woun kei wínsiñegua woungua (Mar. 12:31). Ani mosu “tínsiñedun lúmari wügüri lun kei línsiñe lúgubu guánarügü lun” (Efe. 5:28). Gama lumoun, gayaraati laganwoundun ínsiñeni le lasandirubei gürigia luougua darí lun mabuidun lan (w18.01, páhina 23).

Ka gayaraabei wadügüni lun wederebudagüdüni wamadagua luma wafiñen luagu Bungiu?

Mosu waturiahanu Lererun Bungiu, ráramagua wagíame asaminara luagu le waliihabei ani winwan wameime le wafurendeirubei tídangiñe. Mosu giñe wafalaruni ladundehan sífiri sandu, arufuda wagíame eteingiruni lun ídemuei le híchugubei amu woun lau wánharun lun (w18.02, páhina 26).

Ka uagu moun lumuti lubéi wáfaagun lun wasubudiruni kaba lan asusereda ámuñegü lau waturiahanu waruguma luma wálügüdahan hama garíaahatiña?

Anihein saragu resun, gama lumoun, létima súdinitimabei siadi tumuti lan Bíbülia sun burí échuni le (wp18.2, páhina 4 luma 5).

Dan le ánharadiwa lan lun aban agunbirahani, ka igaburi lunbei gagaburi wamani?

Anhein ánharadiwa lubéi lun aban agunbirahani mosu wáfaagun lun wagunfulirun lau le wariñagubei (Sal. 15:4). Madüraagua waméi luagu amu katei le masudininti. Másiñati adügaali lan íbiri le agunbirahabaliwa saragu áfaaguni lun laransehani éigini (w18.03, páhina 18).

Ka gayaraabei hafurendeirun wügüriña ha anügübalin ubaraü lidan damuriguaü lídangiñe lani Timotéu hénpulu?

Bereseti meha Timotéu hau gürigia tau sun lanigi ani ru lumuti apurichihani lidan furumiñeti lúgaaru lidan libagari. Nadagimeinti saragu lun leseriwidun lun Heowá ani adüga lumuti le lafurendeirubei. Sigiti ederebudagüdei lafiñen luagu Bungiu ani afiñeti meha luagu ladundehan lani Heowá sífiri sandu. Dandu wéiyaaña lidan afiñe kei amu íbirigu gayaraati hafalaruni lani hénpulu (w18.04, páhina 13 luma 14).