“IDA HIÑA?”

Chóuruti busuguadün lan ítara saragu wéiyaasu, másiñati ariñaga humuti lan úara luma híchuguni húhabu houn gürigia o lau hóuburuniña. Íbini sansi lan dimurei le ariñawagúbei lidan abusuraguni lidan ámuñegueinarügü fulasu luma hechun gürigia, luaguméme aban katei hadügei. Gayaraati larihín mabusuradi lan gürigia o móunabadi lan lun abusuraguni kei mínsiñehabuni o maleskuela lan.

Añahein gürigia hénrenguti houn habusuragun. Añahein hádangiñe manítiña o machourunti hasandiragun houngua ani ligía hénrengu lubéi houn habusuragun houn amu. Ha híbiri, güreweiti houn habusuragun houn lílana amu rasa, houn gürigia ha lídangiñebaña amu échuni luma houn ha ámubei habara. Gama lumoun, íbini mariñagun wamá saragu lun gürigia dan le wabusuragun lun gayaraati lasandiragun lungua buidu.

Álügüdagua humá hungua: “Ka gayaraabei nibihin lau nabusuragun houn amu? Ka tariñagubei Bíbülia luagu abusuraguni?”.

“Úati [...] himei lan Bungiu aban gürigia luéi aban” (Adü. 10:34). Anihán dimurei le lariñagubei apostolu Féduru dan le líchugunbalin buiti achülürüni lun Korunéliu lidoun damuriguaü kristiánu, furumiñeti gürigia mama huríu le adügagubei lungua kristiánume. Dan lárigiñe, aba labürühan Féduru busén lan Bungiu “lun hasakürihan sun gürigia” (2 Fed. 3:9). Másiñati samina wamá hawagun ha aturiahabarun Bíbülia wama dan le waliihani bérusu le. Gama lumoun, ariñagati giñe Féduru houn kristiánugu: “Inebe hamá sun gürigia hun keisi lubudubu; hínsiñe hamá hiduheñu luéigiñe Hesukrístu hun” (1 Fed. 2:17). Kei aubei warihei, wadügüña aban katei buiti lau wabusuragun houn amu meberesenga halíana hamá, ka lan harasanbei o hechun. Ligía aban igaburi le buídubei lun warufudun inebesei houn amu luma lun warufuduni hínsiñe hamá woun.

Ariñagati apostolu Pábulu houn kristiánugu: “Resibigua humá lubeiti húniwagua kei giñe leresibiruniwa Kristu” (Rom. 15:7). Írida lumutiña Pábulu íbirigu ha ítarabaña lun “kei aban óunwenbu dǘgüdaguaü” lidan aban igaburi espechaliti. Uguñe weyu, súdinitimahali lun wíchugun dǘgüdaguaü houn wíbirigu sügǘ luéi amu dan lugundun lagayuahaña Satanási hawagu lumutuniña Bungiu lau saragu igañi (Kol. 4:11; Aruf. 12:12, 17).

Arufuda tumuti Bíbülia mámarügüñein lan lun wíchugun buiti achülürüni houn amu hu lan abusuraguni. Ariha wamá fiu hénpulu.

Lubaragiñebei líchuguni Heowá libagari Lisaani turageirugun María, óunahati aban ánheli lun ladimurehan tuma. Aba lariñagun tun: “Fuleseiwatibu, María! Anihein Aburemei buma”. Úati gunfuranda tani María ka lan uagu layanuha aban ánheli tuma, ligía aba lubéi tadiheridun saragu. Kei aba lubéi larihinu lau idiheri, aba lariñagun tun: “Manufudedabá María, fulesei láadibu Bungiu”. Aba lafuranguagüdüni tun luagu busén lan Heowá lun tuguya lan lúguchu Mesíasi. Aba darangilu lan tasandiragun María tungua, aba tánharun lun tadügüni lugundan Bungiu ariñageina: “Lidamun Nabureme Bungiu nuguya; adügaléi le bariñagubei nau” (Luk. 1:26-38).

Aban meha lubuidun chansi lun ánheli ligía lóunagüle lan Heowá. Gama lumoun, masaminarunti lǘnabuguagüdüña lan lungua lau layanuhan hama gürigia gafigountiña. Furumiñeti katei le ladügübei, labusuragun tun María. Ka wafurendeirubei lídangiñe le ladügübei? Lunti lan aranseñu wamá lun wabusuragun luma lun wíchugun dǘgüdaguaü houn amu. Láurügü fiu dimurei gayaraati wíderaguniña wíbirigu luma lun wadügün lun hasandiragun houngua gebegi hamá tidan lóundarun Heowá.

Chülüti dan lun lasubudirun Pábulu saragu íbirigu ha lídanbaña damuriguaü le lídanbei Liraüraü Asia luma le Yuropabei. Tidan gárada to labürühaboun, gíbeti mábuigaü lóunahan houn hádangiñe íbirigu ha ñéinbaña. Ariha wamuti katei le lidan kapítulu 16 tidan gárada to lóunahaboun  houn rómana. Kei hénpulu, írida lumutu Febe ani wati tun “waduhe luéigiñe Kristu”, ani ariñagati houn íbirigu tidan gárada tuguya: “Resibi humóun buidu lidan liri Wabureme, keisi lunti lan ladügǘn hadan iduheñu lidan afiñeni. Íderagua humounme lidan furumiñeguarügü katei le temegeirun”. Ani ariñagati giñe houn: “Mábuiga niña tun Pürisika luma lun Akila [...], teinki niña lubeiti houn; ani mámarügü au, sun giñe waduheñu ha tílana haligilisin ha mámabaña huríu, ru hamuti heteingirun houn”. Óunahati giñe mábuigaü houn kristiánugu ha lóuguabei wasubudirun hawagu. Ayanuhati lau saragu ínsiñeni luagu Epenétu, ani írida lumutu giñe “Türifena tuma Türifosa, ha nadagimeinbaña lidan luadigimari Wabureme”. Kei aubei warihei, aranseñu liña meha Pábulu lun lóunahan mábuigaü houn íbirigu, dandu houn wügüriña kei houn würiña (Rom. 16:1-16).

Samina wamá luagu ugundani le hasandirubei kristiánugu hagía dan le hasubudirunbalin haritagua lan Pábulu hawagu lau saragu ínsiñeni. Chóuruti aba lan laganwoundun ínsiñeni le hasandirubei luagu Pábulu luma hawagu íbirigu. Másiñati ru lan giñe gurasu houn amu kristiánugu haganbuni mábuigaü le óunahounbei lau saragu ínsiñeni ani íderagua lumutiña lun derebugu hamá lidan hafiñen. Ítara liña, arufudati mábuigaü le wóunahabei houn wíbirigu berese wamá hau, ani adügati lariñawagún houn luagu buiti le hadügübei lun derebugu lan wamadagua hama ani ídehati lun lidan wamá aban.

Dan le lachülürünbei Pábulu Posuoli ani aba lidin Roma, ñǘdüntiña íbirigu lubaroun. Dan le larihinbaliña dísegiñe “aba líchugun eteingiruni lun Bungiu, aba lárügüdün gurasu” (Adü. 28:13-15). Anihein dan, hayarügübadiwa lan luagu gürigia o wahurachagun lun lau wáhabu. Íbini aban katei ñǘraüti kei le, gayaraati líchugun dǘgüdaguaü lun somu gürigia, háfuga aban gürigia le híruti o aban le hanarimebei lirun.

Ariha waméi lani disipulu Santiagu hénpulu. Mosu meha lererehan houn fiu kristiánugu ha meha arufudubaña múaraguni lau gamadagua hamá luma ubóu (Santiagu 4:4). Ariha haméi ka lan lariñagubei furumiñe tidan ligaradan:

“Au Santiagu, eseriwiduti lun Bungiu luma lun Wabureme Hesukrístu au, mábuiga niña houn duusu lani Ísüraeli türibu ha chagagubaña lidan sun ubóu” (Sant. 1:1). Chóuruti, íderagua lániña dimurei le íbirigu lun hánharun lun ererehóuni ladüga arufudati masaminarun lan Santiagu íñutimati lan hawéi. Ligíati, lau wabusuragun lau ǘnabuguni gayaraati laransehani üma lun layanuhóun íbini luagu aban kesi sériuti.

Gayaraati chati lan aban abusuraguni, gama lumoun lun buidu lan léiguadun lun le eresibirubalin lunti wariñaguni tídangiñe sun wanigi ani arufudaléime hínsiñe lan gürigia ligía woun, íbini genege lan marihin hamani ni aban le wasandirubei (Mat. 22:39). Lidan aban ókaasion, aba tachülürün aban íbiri irlandana tidoun Luban Wadamuridagun dan le lagumesera lubéi adamuridaguni. Aba tebelurun furesegueina, ani aba ladigiragun aban íbiri tuagu, aba láhayachun tuagu, ábati lariñagun tun: “Gúndaatina lau narihinibu íbiri!”. Mariñagunga ni kata aban tañuurun.

Fiu dimaasu lárigiñe, aba tayarafadun lun íbiri aba tabahüdahan lun tagagibudaguña lan meha luma saragu lénrengunga hadan tiduheñu. Aba tariñagun lun: “Wéiriti nirun rábounweyu ligía ítagaraü yebe miabin nan adamuridagua. Maritagun numuti buidu buidu le ariñawagúbei lidan adamuridaguni, gama lumoun, haritagua nágili babusurun nun. Adügati lun buidu lan nasandiragun nungua oura ligía. Seremei íbiri”.

Ibidiñeti yebe lun íbiri ligía luagu ladügüba lan labusuragun buiti. Ariñagati: “Dan le tabahüdagubalin nun íderagua lanu liraüraü abusuruni ligía, aba nagundaarun luagu nabusuragun tun. Adügati katei ligía lun nasandiragun nungua buidu”.

Abürühati urúei Salomón: “Chüboun beigan fein dúnarugun; tagiribudayaba bun dan luagun dan” (Apur. 11:1). Ánhawa abusuragua houn amu gürigia súnwandan, hóuntima wíbirigu, dandu hagía kei wagía wibihiba gurasu. Ligíati, haritagua waméi súdini lan wabusuragun o wóunahan mábuigaü houn amu.