1, 2. a) Abahüdagua huméi abahüdaguni luáguti labureme ichari. b) Ida liña lafuranguagüdüni abahüdaguni le mini lubéi íchigadi luma areini?

ANIHEIN meha aban wügüri gachariti. Luagu aban weyu aba láfuridun binaafingiua mágidurugun áluaha nadagimeintiña. Aba lariñaguni houn átiribei lan lafayeiruniña ani aba hánharun. Lárigiñe, aba larihin gürigia ligía megei lan hanwoun nadagimeintiña. Ligía aba lubéi labasiihan saragu wéiyaasu áluaha hanwoun nadagimeintiña. Ani ligiaméme fáyeiti füramase lubéi houn súngubei. Dan le lagumuchun weyu ligía, aba lóundaraguniña sun nadagimeintiña lun lafayeiruniña. Fiú hádangiñe nadagimeinhaaña sun weyu, ani añahein amu ábanrügüñein oura hawadigimaridun. Gama lumoun, aba lafayeiruni weyu dayarügü houn súngubei. Ábati hekeherun ha nadagimeinbaña sun weyu. Aba lariñagun labureme yabu houn hagía lan ánharubaña hawadigimaridun luagu seinsu ligía. Ani ariñagati giñe houn garicha lan lun líchuguni seinsu le labusenrun houn ha nadagimeinbaña luma. Lárigiñe, aba lálügüdüniña anhein gimuga habéi ladüga  areida lan hama ha híbiri (Matéu 20:1-15).

² Labahüdagunbalin Hesusu katei le houn lun larufudahan aban katei súdiniti luagu “lareini” Bungiu (aliiha huméi 2 Korintuna 6:1) ^[1] (ariha huméi abürüdǘni lidan lagumuha arütíkulu). Gayarati hasaminarun fiú yuuti lan yebe lun gíbetima lan seinsu habihin ha nadagimeinbaña lúmagiñe binaafin. Gama lumoun, aba larufudun labureme ichari areini houn ha nadagimeinbaña murusun dan. Ariñagati aban sásaamu le lan dimurei le ásügürawagüdübei tidan Bíbülia kei “areini” layanuhaña luagu “aban katei le wibihibei sin wafayeihan luagu o sin yu lan woun” o aban lan “katei le ichugúti lun somu gürigia, ani magañeirun lágili ani madügün ligía ni kata lun libihini”.

3, 4. a) Ka uagu larufuda Heowá areini houn sun gürigia ubouagu? b) Ida liña ladügüni?

³ Ariñagatu Bíbülia ítara liña lan lareini Bungiu keisi aban idewesei “le líchugubei [woun]” (Éfesuna 3:7). Kei le mabafu wabéi lun gaganbadi wamá lun Heowá lidan sun katei, madünatiwa lun larufuduni lareini woun. Óunweni wadünabei. Ariñagati urúei Salomón: “Úati ni aban gürigia úaraguati ubouagu le adügüti buiti súnwandan lun mafigouhanbei lan” (Apurichihati 7:20). Dan lárigiñe, ariñagati apostolu Pábulu: “Ladüga afigouhaaña sun gürigia ani díseeña luéi luéirigun Bungiu”. Ariñagati giñe: “Óunweni lafayeihabei figóu” (Rómana 3:23; 6:23a).

⁴ Wéiriti hínsiñe sun gürigia lun Bungiu. Ligía lóunahanbalin ábanrügü Liráü lun lounwen wawagu. Ítara liña larufuduni lueirin lareini (Huan 3:16). Ariñagati apostolu Pábulu ‘daügu liña lan Hesusu lau uéiriguni luma inebesei luagu óunweni le lasufurirubei’. Ani hilati lan hawagu súngubei ladüga ‘lueirin línsiñehabu Bungiu woun’ (Ebüréu 2:9). Ligíati, “ibagari magumuchaditi lidan Wabureme Hesukrístu” ledewehabei Bungiu woun (Rómana 6:23b).

5, 6. a) Ka resultóu lanügübei figóu dan le ligía lan agumadirawa? b) Ka resultóubei dan le lareini lan Bungiu agumadirawa?

⁵ Ka uagu wafigouha ani hilá wagía? Ariñagatu Bíbülia ladüga lan lafigouhan Adán aba lubéi ‘larúeihan óunweni’. Kei le lídangiñe lubéi Adán wayabin sun wagía, afigouhatiwa ani hilá wagía (Rómana 5:12, 14, 17). Íbini ítara, gayarati desidírü wamá lun magumadirun lániwa figóu. Ida luba wadüga? Mosu warufuduni wafiñen luagu lani Kristu sákürifisiu. Ítara liña wígirun lun lagumadiruniwa lareini Heowá. Ariñagatu Bíbülia: “Danbei laganwoundun figóu, ábatima laweiridun lareini Bungiu. Ítarati keisi gabafu lan meha figóu lun lanügüni óunweni, ítara liña giñe gabafu lan lareini Bungiu lun laricharaguagüdüniña gürigia, luma lun líchugun ibagari magumuchaditi houn lídangiñe Wabureme Hesukrístu” (Rómana 5:20, 21).

⁶ Lau sun gafigoungidiwa lan, mama mosu wígirun lun lagumadiruniwa figóu. Ligíati, dan le wadügün aban katei le mabuidunti, aba wamuriahan ferudun luma Heowá. Ariñagati Pábulu: “Mabafuhalime figóu huagu, lugundun mámaadün lábugiñe lúrudu, lábugiñehaadün lareini Bungiu” (Rómana 6:14). Ánhawa ígira lun ladundehaniwa lareini Bungiu, kaba buiti  wibiha? Ariñagati Pábulu lun lan wígiruni “wuribani luma igaburi lánina ubóu, lun wabagaridun aban ibagari le buiti lidan dan le” (Titu 2:11, 12).

7, 8. Ka mini lubéi larufuduni Heowá lareini lidan ámuñegueinarügü igaburi? (Ariha humóun iyawaü burí to lídanboun lagumeseha arütíkulu).

⁷ Ariñagati apostolu Féduru lunti lan wayusuruni le líchugubei Bungiu woun lun weseriwidun wóuniwagua. Ariñagati: “Keisi óunigirutiña buítiña, buidulá hóuseruni luwuyerigu idewesei le heresibirubei lúmagiñe Bungiu” (1 Féduru 4:10). Kati mini lubéi dimurei burí le? Mini lan luagu meberesenga lan ka lan waturóbulinbei, ru lumuti Heowá sun le wemegeirubei woun lun wawandun (1 Féduru 1:6). Súnwandan líchuguni le wemegeirubei woun lun wawandun kada turóbuli.

⁸ Kei aubei warihei, arufuda lumuti Heowá lareini lidan ámuñegueinarügü igaburi. Abürühati apostolu Huan: “Sun wagía ibihaadiwa saragu abiniruni lídangiñe lueirin lirisin” (Huan 1:16). Kei le ámuñegueinarügü lubéi ligaburi larufuduni Heowá lareini woun, ibihatiwa saragu abinirúni. Ariha wamá fiú lídangiñe.

9. a) Ka buiti weresibirubei lídangiñe lareini Bungiu? b) Ida liña warufuduni weteingiradi?

⁹ Feruduna lumuti Heowá wafigoun. Feruduna lumuti Heowá wafigoun ladüga lueirin lareini. Gama lumoun, ánhawagubeirügü asaküriha ani áfaagua wagía lun wagidaruni luriban ayumahani wawariua ligíarügübei feruduna lániwa (aliiha huméi 1 Huan 1:8, 9). Afuranguagüda lumuti Pábulu houn kristiánugu ha lídanbaña lidaani ida liña lan feruduna lani Heowá figóu. Ariñagati: “Sefu lumutiwa Bungiu lídangiñe lubafu luburiga, aba líchuguniwa lidoun larúeihan Liráü le hínsiñebei lun, le asalbarubaliwa lau lounwen, chibalei wafigoun” (Kolosana 1:13, 14). Anhein teinki wabalin Bungiu luagu le ladügübei wawagu, walawahabei lun warufuduni weteingiradi. Ani kei le feruduna lubalin wafigoun, gayarati weresibirun saragu amu abinirúni le buiti.

10. Ka wibihibei seremei lareini Bungiu?

¹⁰ Gayarati wagundaarun lau darangilaü luma Bungiu ani gamadagua wagíame luma. Kei le gafigoun wabéi, lúmagiñe nasirua wamá láganiñadiwa Bungiu. Íbini ítara, ariñagati apostolu Pábulu: “Arandaragüda [lumutiwa] Bungiu lúmagua lau lounwen Liráü dan meha le láganigidiwa” (Rómana 5:10). Seremei lani Hesusu sákürifisiu gayara lubéi warandarun luma Bungiu. Mini lan le gayara lan lidan wamá darangilaü luma ani lumadagu wagíame. Gama lumoun, ka lánibei le luma lareini Bungiu? Afuranguagüda lumuti Pábulu katei le dan le lariñagunbei houn kristiánugu anuadirúaaña: “Kéisiti richaguagüda láadiwa lubéi Bungiu lau wafiñerun luagu, resibihadiwa darangilaü luma Bungiu, lídangiñe Wabureme Hesukrístu.  Ladüga luéigiñe Kristu, gayara lubéi wayarafadun lun Bungiu lau wafiñerun, lun wadeiruni lufulesein” (Rómana 5:1, 2). Lunti geteingiradi wamá luagu lídanñadiwa lan darangilaü luma Heowá luma luagu lumadagu wamá.

11. Ida liña hanügüniña kristiánugu anuadirúaaña “amu mudún” lidoun üma le surubei?

¹¹ Gayarati richagua wamá ligibugiñe Bungiu. Abürühati profeta Danieli lidoun lanme lagumuhóun dan hanügübaña lan kristiánugu anuadirúaaña “saragu gürigia lidoun üma le surubei” (aliiha huméi Danieli 12:3). Ida liña hadügüni kristiánugu anuadirúaaña katei le? Apurichiha hamuti uganu luáguti Larúeihan Bungiu ani arufuda haméi lilurudun Heowá houn saragu míñunu “amu mudún” (Huan 10:16). Ítara liña híderaguniña gürigia hagía lun richagua hamá ligibugiñe Bungiu. Seremei lareini Bungiu ligía gayara lubéi lasuseredun le. Ariñagati Pábulu: “Lau lareini Bungiu, richaguaadiwa mafayeihanga ni kata ladüga afayeihaali Kristu” (Rómana 3:23, 24).

12. Ida liña úara lan lareini Bungiu luma furíei?

¹² Gayarati wayarafadun lun Bungiu lidan furíei. Seremei lareini Bungiu ligía gayara lubéi wafurieidun lun. Kei le lau lubéi areini larúeiha, ariñagati Pábulu ñun liña lan Heowá luagu “lálana larúeihan”, ani amisuraha lumutiwa lan lun wayarafadun lun “lau afiñeni” (Ebüréu 4:16a). Gayarati wafurieidun lun Heowá lidan liri Hesusu furumiñeguarügü oura. Wéiriti lubuidun chansi le. Ariñagati Pábulu: “Gayaraati wayarafadun lun Bungiu, lídangiñe Kristu, lau emenigini le líchugubei wafiñen luagu” (Éfesuna 3:12).

13. Ida liña líderaguniwa Bungiu lau lareini “lidan wemegeiruni”?

¹³ Gayarati wibihin ídemuei dan  le wemegeiruni. Ínchaha lumutiwa Pábulu lun wafurieidun lun Heowá dan le megei wamani, “lun gudemehabu lan woun, íderagua láwame lau lareini lidan wemegeirun” (Ebüréu 4:16b). Sagü gaturobulin wamá, gayarati wamuriahan ídemuei luma Heowá. Mama mosu lóunabuniwa, gama lumoun adüga lumuti. Súnwandan layusuruniña íbirigu ha lídanbaña damuriguaü lun líderaguniwa. Kei le óunaba lani wafurieidun, “gayaraati [...] wariñagun lau afiñeni: ‘Nabureme Bungiu íderagubalina; manufudebadina. Kábati gayara hamá gürigia adüga nau?’” (Ebüréu 13:6).

14. Ka amu katei weresibirubei seremei lareini Bungiu?

¹⁴ Gayarati wibihin gurasu. Lidan lanarime lareini Heowá ruti giñe dǘgüdaguaü woun dan wasufurirun ladüga somu turóbuli (Sálumu 51:17). Dan le meha héibaahouña lubéi kristiánugu ha Tesalónikabaña, abürühati Pábulu houn: “Wabureme guánarügü Hesukrístu luma Wáguchi Bungiu, le arufuda láalibei línsiñehabu woun lau lareini, ru ligía ámalihouni le magumuchaditi woun luma aban emenigini buiti, rula dǘgüdaguaü tun hanigi, derebugugüda laünme lun hariñaguni luma lun hadügüni sun le buídubei” (2 Tesalónikana 2:16, 17). Ma ruti dǘgüdaguaü woun wasubudiruni hínsiñe wamá lun Heowá ani góunigi lániwa ladüga lueirin lareini?

15. Ka emenigini wibihibei seremei lareini Bungiu?

¹⁵ Gemenigitiwa lun wawinwandun lun súnwandan. Kei le gafigoun wabéi, mibihinbadiwa yebe emenigini sin lídehan Heowá (aliiha huméi Sálumu 49:7, 8). Gama lumoun, rúhali aban lubuidun emenigini woun. Katei san emenigini ligía? Ariñagati Hesusu: “Le labusenrubei le óunahabalina, lun sun lan ha anügütina keisi Liráü Bungiu, afiñe hagía nuagu, lun gabagari hamá le magumuchaditi” (Huan 6:40). Ligíati, seremei lareini Heowá gemenigitiwa lun wawinwandun lun súnwandan. Ariñagati Pábulu: “Arufuda laali Bungiu lareini woun, le ídangiñebei gayara lan hasalbarun sun gürigia” (Titu 2:11).

16. Ida liña meha hayusuruni fiú kristiánugu ha lídanbaña furumiñeti sígulu lareini Bungiu wuriba?

¹⁶ Kei aubei warihei, seremei óunwenbu lareini Heowá ligía wibihinbei saragu abinirúni. Gama lumoun, moun lumuti wasaminarun gayara lan wadügüni le wabusenrun. Lidan amu dimurei, siñati wasaminarun gayara lan wafigouhan ladüga weiri lan lareini Bungiu. Lidan hadaani furumiñetiña kristiánugu, añahein meha fiú busentiña hadügün “furumiñeguarügü katei mabuidunti” ladügarügü weiri lan lareini Bungiu (Húdasi 4). Genegeti samina hamá meha kristiánugu múaraguntiña hagía gayara lan hafigouhan ani feruduna lubaña lan Heowá súnwandan. Hóuchatiña meha giñe hadügün lun hafigouhan ha híbiri kristiánugu. Furumiñeguarügü gürigia le adügüti katei le uguñe weyu lafuruduña menebenehabuni lun “[s]ífiri [s]andu” (Ebüréu 10:29).

17. Ka eweridihani dǘgüdati líchugubei Féduru?

¹⁷ Uguñe weyu, eyeeda laaña Satanási fiú kristiánugu lun hasaminarun gayara lan hafigouhan ani feruduna lubaña lan Bungiu sin hadügün ni kata. Inarüni aranseñu liña lan Bungiu lun feruduna lániña  ha asakürihabaña luagu hafigoun. Gama lumoun, agurabati giñe lun wáfaagun lun wagidaruni luriban ayumahani wawariua. Adügati meha Bungiu lun líchuguni apostolu Féduru eweridihani le: “Góunigigua humá hungua luéi heyeedunün gürigia wuribatiña, ígiragüdei arufudahani le inarüniti luáguti Bungiu hun. Houcha humá lúntima hasubudiruni Wabureme Hesukrístu le Wasalbaragüle, awanse huguyame lidan línsiñehabu” (2 Féduru 3:17, 18).

18. Kei le arufuda laali lubéi Heowá lareini woun, ka wánibei buligasion?

¹⁸ Anhein seremei wabalin Heowá luagu lareini, mosu wayusuruni katei burí le líchugubei woun lun wíchugun inebesei lun luma lun wíderagun amu gürigia. Ida luba san wadügüni katei le? Ariñagati Pábulu “rúhali [lan] Bungiu ámuñegueinarügü ubafu woun keisi labusenrun líchuguni lun kada aban”. Ariñagati anhein lan rúhali lubéi Bungiu “ubafu woun lun ladimurehan wayumulugugiñe, lunti wadügüni según afiñeni le wádanbei”. Ábaya lariñagun: “Le garufudahadibei, lunti líchaagun lungua lun arufudahani. Le gíchigaditi dǘgüdaguaü houn amu, lunti líchaagun lungua lun ladügüni”. Lárigiñe aba lariñagun: “Le íderaguti amu, lunti ladügüni lau ugundani” (Rómana 12:6-8). Ka mini lubéi sun le? Kei lan le arufudaali lubéi Heowá areini woun, mosu lan wadügüni sun wayaraati lidan apurichihani, lun warufudahan tuagu Bíbülia houn amu, wíchugun gurasu houn wíbirigu ani feruduna wamañame ha achararutiña woun.

19. Kaba wakutiha lidan le aban arütíkulu?

¹⁹ Kei le rúhali lubéi Heowá saragu abinirúni woun lidan lareini, mosu wáfaagun lun ‘wadimurehani uganu buiti luáguti línsiñehabu’ houn amu (Adügaü 20:24). Wakutihaba luagu buligasion le lidan leweñegua arütíkulu.