“Aganba bumuti afurieiduni! Ñǘbuintiña sun gürigia bumoun” (Sálumu 65:2).

Añahein gürigia furíeitiña ladüga adüga lan lira lun hasandiragun houngua buidu, lau sun samina hamá ua lan aganbutiña. Ani mámarügüñein lun wasandiragun woungua buidu dan le gaturobulin wamá lahuuda furíei. Chóurugüda tumuti Bíbülia woun yarafa lan Heowá * “houn ha agúahatiña luagu lau hanarün [...]; dan hamuriahan luma lun líderaguniña, aganba lumutiña” (Sálumu 145:18, 19).

Ligía gayara lubéi wachoururuni aganba lani Heowá hafurieidun lumutuniña. Ariñagati woun lau ínsiñehabuni: “Ábameti hagúahanina, afurieida huguyame nun ábame naganbunün” (Heremíasi 29:12).

“Furíei humá [...] súnwandan” (Rómana 12:12).

Ínchaha tumutiwa Lererun Bungiu lun wafurieidun súnwandan. Furanguti busén lan Heowá lun wafurieidun lun (Matéu 26:41; Éfesuna 6:18).

Ka uagu busén lubéi Bungiu lun hafurieidun lun? Samina humá luagun le: ka úguchili magundaarunbei dan le lariñagun lisaani lun: “Gayaraati san bíderagunina, núguchi?”. Lau sun háfuga lan subudi laali úguchili ka lan lasandirubei lisaani luma ka lan lemegeirubei, dan le laganbuni liyumulugugiñe, ruti fe afiñe lan lisaani luagu ani hínsiñe lan lun. Ítarameme, dan le wafurieidun lun Heowá, arufuda wamuti lun afiñe wamá luagu ani busén wamá wayarafadun lun (Ariñawagúni 15:8; Santiagu 4:8).

“Ígira huméi sun katei lun Bungiu, lugundun lóunigiruñadün le tímatimaati” (1 Féduru 5:7).

Busenti Bungiu lun wafurieidun lun ladüga hínsiñe wamá lun ani bereseti wau. Ariha lumuti waturobulin ani busenti líderaguniwa.

Lidan meha sun libagari urúei Dawidi, amuriaha lumuti lídehan Heowá ani abahüdagua lumuti lisaminan luma le lasandirubei lun (Sálumu 23:1-6). Ka méhati lasandirubei Bungiu luagu Dawidi? Wéiriti meha línsiñe lun. Ani aganba lumuti meha Bungiu saragu furíei le ladügübei Dawidi lun (Adügaü 13:22). Ítarameme, aganba lumuti giñe Bungiu wafurieidun ani bereseti wau.

Darí wamuti dimurei le lidan aban lídangiñe sálumu le tídanbei Bíbülia. Chouru lumuti meha le abürüdübalin aganba lani Heowá lafurieidun, ani adügati lira lun lasandiragun lungua buidu. Yarafati meha lasandiragun lungua lun Bungiu ani ibihati erei lun lagagibudagun luma turobuli le úmabei ladunragua lidan libagari (Sálumu 116:1-9).

Anhein chouru wabalin aganba lani Bungiu wafurieidun, wasigiruba adügei. Ariha waméi le asuseredubei lun aban wügüri gíriti Pedro, le awinwandubei lidan aban fulasu luagun nórute libiti Esüpáña. Hilati lisaani le disinéfubei irumu lau lidan aban danaguaü tidan karü. Laganagua ligarigu Pedro, aba labahüdaguni le lasandirubei lun Bungiu ani amuriahati saragu wéiyaasu luma lun líderaguni luma lun líchugun awalidaguni lun. Ka asuseredubei? Ariñagati Pedro: “Óunaba lumuti Heowá nafurieidun. Yúsuti amu kristiánugu lun líchugun ídemuei luma gurasu nun luma tun nani weiriou”.

Lau sun madügün lan lafurieidun Pedro lunya labagaridun lisaani, íderagua lumuti furíei hau sun liduheñu. Ariñagatu María del Carmen, to lani weiriou: “Íderagua lumutina nafurieidun lun nawanduni nigarigu. Subudi numuti meha gunfuranda lánina Heowá. Dan meha nayanuhan luma, sanditina meha darangilaü”.

Furanguti tarufuduni Bíbülia, luma le winwan hamaalibei saragu gürigia, aganba lani Bungiu wafurieidun. Íbini ítara, anihein furíei le móunabun lumuti. Ka uagu anihein lubéi furíei le óunaba lumuti Bungiu ani anihein amu le móunabun lumuti?