Ladüga louserún lau lubuidun igaburi
LIDAN meha aban liraüraü aüdü Gujarat (India) hawinwanda liduheñu John. Lidan lagumuchun irumu burí 1950, aba labadiseirun lúguchi keisi gefenti luagu Heowá. Ánheinti John, lúguchu hama seingü líbirigu wügüriña hama würiña katoliku meha ani mínsiñeti meha lani háguchi relihión houn.
Aban weyu, aba lamuriahan lúguchi John luma lun lidin íchiga aban gárada lun aban lumada le lídanbei damuriguaü. Binaafinméme ligía aba líbuguni John lifinga lúhabu dan le ladaarun aban lata le lauti singi. Íbini ítara, kei busén lan meha gaganbadi lan lun lúguchi, aba lóuburaguni lifinga tau aban gamisa ani aba lidin éibugeina lúbiñoun lumada lúguchi.
Dan le lachülürünbei ñein, aba teresibirunu lani lumada lúguchi weiriou, to gefentu luagu Heowá, gárada tuguya. Dan le tarihini biti le luágubei John, aba tariñagun lun tíderaguaali lan. Aba tasagaruni lagei árani le hámabei hábiñe, aba tarumadahani biti ani aba tadouragun lau biti ligía. Lárigiñe, aba tadügün aban kopu bachati lun. Lidan sun dan ligía ayanuhatu lun tuagu Bíbülia lau aban lubuidun igaburi.
Aba lagumeserun mínsiñehabuni le lasandirubei John hawagu Gefentiña agidara. Aba ladügün fiú álügüdahani tun íbiri tuguya. Saminati yebe Hesusu lan Búngiubei ani mosu lan lafurieidúniwa tun María, gama lumoun, múaranti meha lisaminan lúguchi luma katei le. Kei le furendeiharu lubéi meha íbiri tuguya ayanuha gujarati, aba tadaarunu Bíbülia ani aba tafuranguagüdüni lun John lidan liñeñe ka lan tarufudahabei Bíbülia luagu bián katei le. Lárigiñe, aba tíchugunu garüdia “Estas buenas nuevas del reino” lun.
Dan le laliihanu John garüdia, aba líchugun fe ligía lan inarünibei. Aba lidin arihei fádiri le tídanbei liligilisin ani aba ladügüni álügüdahani burí le ladügübei tun íbiri tuguya lun fádiri. Aba lasafaragun fádiri, aba lachüürünu Bíbülia lun ani aba lagúaragun lun: “Máfiahadibu! Halía tariñaga Bíbülia mama lan Bungiu Hesusu? Halía lariñaga moun lumuti lan layumurawagun tun María? Halía!?”. Mafiñenti yebe John lóunabubei lan fádiri ítara, ani aba lariñagun lun: “Mebeludigiaadina tidoun aban ligilisi katóliku”. Ani ítara liña lasuseredun.
Aba lagumeserun John aturiahoun Bíbülia hama Gefentiña, aba lánharun lun inarüni ani aba lagumeserun eseriwida lun Heowá. Falá hamuti amu hádangiñe liduheñu lan hénpulu. Aniheingua lárigi biti ligía luagu lifinga lúhabu John le lóunwenren, ani dan le larihini, aba laritaguni katei buiti le adügǘbei lun ǘrüwa-wein irumu guentó le adügübei lun ladariruni áhuduraguni le inarünibei (2 Ko. 6:4, 6).