1. Según Matéu 24:9 ka uagu maweiriduntu lubéi wanigi ladüga iyereegu wamá lun ubóu?

ADÜGA lumutiwa Heowá lun hínsiñehabu wamá luma lun harufudun amu ínsiñeni woun. Ligía gari lubéi woun ani másiñati wuriba lan wasandiragun woungua dan le iyereegu wamá houn amu. Kei hénpulu ariñagatu aban íbiri yuropana gíritu Georgina: “Iyereegutina meha tun núguchu ladüga neseriwidun lun Heowá. Katorusu meha irumu nau, sanditina meha mínsiñewa nan, ábati nagumeserun álügüdagua nungua anhein aban nubéi gürigia wuribati tigaburi nuguya”. * Abürühati aban íbiri gíriti Danilo: “Dan hagayuahanbei súdaragu nuagu anaba hamana ani siadi hamana ladüga gefentina lan luagu Heowá, aba lebelurun anufudei nun ani ǘnabugüda hamutina”. Íbini gari lan woun, maweiriduntu wanigi lugundun ariñaga laali meha Hesusu lasusereduba lan (aliiha huméi Matéu 24:9).

2, 3. Ka uagu iyereegu wabéi lun ubóu?

² Ítara kei meha leyereegudun Hesusu lun ubóu, ítara liña giñe iyereegu wamá lun ubóu ladüga ‘mámaadiwa lan ubouaguna’ (Huan 15:17-19). Íbini inebe hamá gumadimatiña woun máhuduraguntiwa houn ni lun hani sínbolu. Lúnrügüñein Heowá wáhuduragua. Ayanuhatiwa luagu liricha Bungiu lun larúeihaniña gürigia; ánheinti Satanási hama ha afalarubalin ebedaguarügütiña lun (Agu. 3:1-5, 15). Apurichihatiwa Larúeihanrügüñein lan Bungiu gayara laransehani haturobulin gürigia ani yarafa madise lagumuchuba hau sun láganigu (Dan. 2:44; Aruf. 19:19-21). Ñunsu buiti houn gürigia ha ǘnabugubaña, gama lumoun ñunsu wuribati houn salufuritiña (Sal. 37:10, 11).

³ Iyereegutiwa giñe lun ubóu ladüga wadügüni le lariñagubei Bungiu woun lun wadügüni ani mídinti le luma le lasaminarunbei  ubóu buidu lan. Kéiburi, uguñe weyu saragu gürigia ariha hamuti magíaguni kei katei buiti, katei le meha lébunabei lagünrinchaguni Bungiu Sodoma luma Gomora (Hud. 7). Adügatiña saragu gürigia bula wau ani ariñaga hagía wawagu maha wamá lun katei le ladüga wasigiruni lúrudu le tídanbei Bíbülia libügürü katei le (1 Fe. 4:3, 4).

4. Ka burí igaburi gayaraabei líderaguniwa lun wawanduni hiyereehabu gürigia?

⁴ Ka gayaraabei líderaguniwa lun wawanduni iyereehabúni luma hanabaguniwa amu? Mégeitiwa aban afiñeni derebuguti luagu líderagubadiwa lan Heowá. Ítara liña afiñeni kei aban idaüdinaü “lun hararamunu sun gimara durunguatu to lachüühaboun Mafia huagun” (Efe. 6:16). Amu luéi afiñeni mégeitiwa giñe ínsiñeni. Ka uagu? Ladüga magañidunti ínsiñeni ani awanda lumuti sun le adügübei lun wasufurirun (1 Ko. 13:4-7, 13). Ariha wamá ida liña lan líderaguniwa ínsiñeni luagu Heowá hawagu wíbirigu luma hawagu wáganiñu lun hawanduni iyereehabúni.

5. Ka meha gayara lubéi Hesusu adüga seremei ínsiñeni le lasandirubei luagu Lúguchi?

⁵ Guñoun lubaragiñebei háfaruni láganiñu Hesusu, ariñagati houn lani disipulugu: “Lun lasubudiruni ubóu luagu hínsiñe lan Núguchi nun, ani adüga nani le lubeibei nun” (Huan 14:31). Ínsiñeni le lasandirubei Hesusu luagu Heowá ligía íchugubei erei lun lun lagagibudagun luma óuchawaguni le lunbei meha liabin. Gayaraati ladügüni ínsiñeni le wasandirubei luagu Heowá ligiaméme.

6. Según Rómana 5:3-5, ida liña hasandiragun lubúeingu Heowá houngua dan le iyereegu hamá lun ubóu?

⁶ Súnwandan líderaguniña ínsiñeni luagu Bungiu lubúeingu lun hawandun éibaahouni. Kéiburi, dan le líchugubei liñún agei lúrudu huríu le gabafubei gumadi houn apostolugu lun mapurichihan hamá, aba línchahaniña ínsiñeni luagu Bungiu lun haganbuni “Bungiu lun [h]adügüni le lariñagubei lubaragiñe le hariñagubei wügüriña” (Adü. 5:29; 1 Huan 5:3). Ínsiñenimeme ligía luagu Bungiu, íderagua lumutiña wíbirigu ha héibaahabaña gumadimatiña ha gabafubaña ani furundetiña. Dan le iyereegu wamá lun ubóu mábürühanti warüna, gúndaarügütiwa (Adü 5:41; aliiha huméi Rómana 5:3-5).

7. Kaba wadüga danme le hamahadun waduheñu lun weseriwidun lun Heowá?

⁷ Háfuga aban lan lídangiñe óuchawaguni le hénrengutimabei, hamahadun waduheñu lun weseriwidun lun Bungiu. Dan le híchugun fe busén wamá wafurendeirun luagu Heowá, másiñati hafiñerun weyeedúña lan o lǘlühali lan wau (ariha huméi giñe Márükosu 3:21). Másiñati hagañidun wamá darí lun busén hamá hagayuahan wawagu. Íbini ítara, moun lumuti taweiridun wanigi lau le, lugundun ariñagati Hesusu: “Lagaganiraguba kada aban hama liduheñu” (Mat. 10:36). Kei ítara liña lubéi, meberesenga ida liña lan harihiniwa maweiyasunbadiwa asandira iyereehabúni hawagu waduheñu. Eibu laganwoundun ínsiñeni le wasandirubei luagu Heowá laganwounduba giñe ínsiñeni le wasandirubei hawagu amu (Mat. 22:37-39). Maweiyasunbadiwa lun maganbadi wamá lun lúrudu le tídanbei Bíbülia lúnrügü wagundaaragüdüni aban gürigia.

8, 9. Ka íderagubarun aban íbiri lun úaraguameme tan dan le tagagibudagunbei luma aban lanarime éibaahouni?

⁸ Georgina, to buga uáguboun wayanuha lidan párafu 1, úaraguamemetu lun Heowá dan le tamahadubei túguchu lun teseriwidun lun Heowá. Ariñagatu Georgina: “Biángubei wagía gumesetiwa aturiahoun Bíbülia úara hama gefentiña luagu Heowá. Gama lumoun, sisi hati lárigiñe, dan le nabusenrubei nidin adamuridagua aba lasansirun tigaburi. Aba níchugun fe tayanuhaña lan burí hama gürigia ha agarabaagubaña houngua luagu Bungiu ani tayusuruñein meha ligiaméme dimurei le hayusurubei dan le tayanuhan numa. Anaba tumutina meha, chawaguatei  nídiburi, ragǘ tana luéigiñe nigiina ani fuitou burí agumeiraguagüdüni lidoun lagei ifei. Dan le nagunfulirubei keinsi irumu aba nabadiseirun. Lun teredehani neseriwidun lun Heowá aba tóunahanina tidoun leskuela to ñein habéi irahüñü mabuchahatiña. Añahein hádangiñe yúsutiña düroga ani adügatiña katei mabuidunti. Hénrengutimati bagagibudagun luma óuchawaguni da liabin hámagiñe gürigia ha yebe lúnbaña hínsiñehabu hamá bun ani góunigi hamabu”.

⁹ Abahüdaha tumuti Georgina ka lan íderagubarun awanda, tariñaga: “Weyuméme le tagarabaagunbei núguchu nuagu ligía weyu ligía nagumuchuni naliihanu sun Bíbülia. Chouru naali meha darina lan inarüni ani gabügürüguati meha nafurieidun lun Heowá ani sandiguatina meha nungua yarafa lun. Lidan anaha lan awinwanda tidan leskuela tuguya amisuraha tumutina aban íbiri túbiñoun, ani aturiaha wamutu Bíbülia úara. Adügatiña lun nasandiragun nungua kei aban hádangiñe. Arihatina héretima lan Heowá sügǘ hau wáganiñu meberesenga kátañanu lan”.

10. Ka gayaraabei wachoururuni?

¹⁰ Abürühati apostolu Pábulu ua lan ni kata lun “lafanreinraguniwa luéi línsiñehabu [Bungiu] le larufudubei woun lidan Wabureme Hesukrístu” (Rom. 8:38, 39). Íbini wasufurirun mígirun lubadiwa Heowá. Súnwandan líchuguba lan dǘgüdaguaü woun luma erei. Ítara kei larufuduni tásügürün íbiri Georgina, layusurubaña wábirigu lun líderaguniwa.

11. Ida luba meha líderaguniña disipulugu ínsiñeni le lafuranguagüdübei Hesusu lidan Huan 15:12, 13? Ru huma aban hénpulu.

¹¹ Guñounbei lubaragiñe lounwen Hesusu haritaguagüda lumutiña lani disipulugu lun hínsiñegua hamá hámagua (aliiha huméi Huan 15:12, 13). Subudi lumuti luagu líderagubaña lan katei le lun lidan hamá aban luma lun hawanduni iyereehabúni le ubouagubei. Samina wamá hawagu íbirigu ha lídanbaña damuriguaü le Tesalonikabei, ha meha éibaahoubaña lúmagiñe hagumeserun. Aba meha hénpulu kristiánugu hagía lánina ínsiñeni luma awanduni (1 Tesa. 1:3, 6, 7). Ínchaha lumutiña Pábulu lun “laganwoundun hínsiñehabu” (1 Tesa. 4:9, 10). Línchahabaña meha ínsiñeni lun híchugun dǘgüdaguaü houn ha hírubaña luma lun híderaguniña ha débilibaña (1 Tesa. 5:14). Adüga hamuti le ariñawagúbei houn, lugundun ariñagati Pábulu houn bián irumu lárigiñe tidan tibiaman ligaradan: “Ínsiñeni le hídanbei hubaruagua aweirideinatima liña súnwandan” (2 Tesa. 1: 3-5). Íderagua lumutiña hínsiñehabu lun gayara lan hawanduni turobuli luma éibaahouni.

12. Ida liña harufudun fiu íbirigu lídangiñetiña amu ageiraü ínsiñeni hámagua?

¹² Ariha waméi le asuseredubei lun Danilo luma tun lani weiriou, Danilo le buga uágubei wayanuhan lidan furumiñeti párafu. Dan le laduurunbei wuribu lidan ageiraü le ñein lubéi meha hawinwanda sigitiña abasiiha adamuridagua, adüga hamuti sun hayaraati lidan apurichihani ani afanreinha hamuti éigini le hámabei hama hábirigu. Aban weyu aba hachülaagun súdaragu tau hárumate lúbiñoun Danilo. Ariñagati Danilo: “Aba hariñagun nun lun nígiruni nafiñen. Kei le maha nubéi, aba hagayuahan nuagu ani aba hafamurun hadura lan nuagu, gama lumoun, aba hadurun lóugiñe nichügü. Lubaragiñe houdin aba hasiadirunina hagiribuduba lan lun haguragunun nani weiriou. Lau lóufudagun aba hóunahaniwa wábirigu tidan íngiini lidoun amu uburugu. Maweiyasunbadiwa abulieidei ínsiñeni le harufudubei wábirigu woun. Dan le wachülürünbei rútiña íbirigu ha lídanbaña iseri uburugu éigini woun ani íderagua hamutina giñe adarira wadagimanu tuma muna. Adügati lira, lun gayara lan wíderagun amu íbirigu ha anurahabaña ladüga wuribu”. Sügǘ libe burí le arufudati gayara lan líderaguniwa ínsiñeni kristiánu lun wawanduni iyereehabúni.

13. Ida luba líderaguniwa sífiri sandu lun wasigirun eseriwida lun Heowá dan le iyereegu wamá houn gürigia?

¹³ Ariñagati Hesusu woun lunti lan hínsiñe hamá wáganiñu woun (Mat. 5:44, 45). Mama aban katei ménrenguti le, íbini ítara líderagubadiwa lani Bungiu sífiri sandu. Líderagubadiwa igaburi le líchugubei sífiri kei burí ínsiñeni, gaguraasuni, areiduni, lubuidun igaburi luma ragüguaü ungua lun wawanduni iyereehabúni (Gal. 5:22, 23). Saragu hádangiñe wáganiñu sansi hamaali hagaburi ladüga tarufuduni hani weiriou o larufuduni hani weiriei, hasaani o habesinan igaburi le. Saragu hádangiñe adügaguaña houngua Gefentiñame. Ligíati, anhein hénrengu lubéi woun lun hínsiñe hamá ha iyereehabúbaña woun ladüga wafiñen, amuriaha wamá luma Heowá sífiri sandu (Luk. 11:13). Ligíati chouru waméi súnwandan buídutima lan lun wadügüni le lamuriahabei Heowá wama (Ari. 3:5-7).

14, 15. Ida liña líderagunu Rómana 12:17-21 aba íbiri lun tarufudun ínsiñehabuni lun tani weiriei íbini ru lan lidere dan tun?

¹⁴ Ariha waméi le asuseredubei tun Yasmín, to awinwanduboun lidan aban fulasu le ñéingiñe lubéi laboucha weyu. Dan le tadügagunbei tungua gefentu luagu Heowá, aba lasaminarun  tani weiriei yeedawaru lan ani álugati yebe lun meseriwidun tan lun Bungiu. Anaba lumutu ani amuriaha ligía hama liduheñu luma hama tiduheñu, luma aban alidihati relihión, luma aban gabiñarahati lun hasiadirunu luma lun híchugun tidurun fánreinguagüda tániña iduheñu. Darí lun lidin lidan aban adamuridaguni agúaraha lau anarimeni houn íbirigu. Ayahuahatu Yasmín saragu ladüga luriban lóuserunu.

¹⁵ Lidan adamuridaguni rútiña íbirigu dǘgüdaguaü luma gurasu tun. Ayanuhatiña wéiyaaña lidan afiñeni tuma lun tadügüni le lariñagubei Rómana 12:17-21 (aliiha huméi). Abahüdahatu Yasmín: “Mama aban katei ménrengunti ladügǘn le tariñagubei Bíbülia, gama lumoun aba namuriahan luma Heowá lun líderagunina ani aba náfaagun saragu lun nadügüni. Ligíati dan le lawiyeduni nani weiriei turageirugun gusina lau lichú lau, aba burí narumadahani; dan le lanabunina, aba burí nóunabuni lau gálumaü, ani dan le lasandirun nuguya óunigirubalin”.

16, 17. Ka larufudahabei le tásügürübei Yásmín woun?

¹⁶ Afuranguagüdatu Yasmín buidu lan lidin tun lau tarufudun ínsiñeni lun tani weiriei, ariñagatu: “Aba lagumeserun afiñera nuagu saragu ladüga subuditi lun meyeeha nan. Aba lagumeserun aganbana lau inebesei dan le wayanuhan tuagu relihión ani úarati numa lun ñein lan darangilaü múnada. Ani guenlé ínchaha lumutina lun nidin adamuridagua. Buídutimahali wanügagun woungua ani aniheinhali darangilaü wadan. Hemenigitina lachülürüba lan dan lun lánharun lun inarüni lun gayara lan weseriwidun lun Heowá úara”.

¹⁷ Arufudati le tásügürübei Yásmin woun “súfuri lumuti [lan] le hínsiñehabubei sun katei [...] aguraba lumuti sun katei; ani awanda lumuti giñe sun katei” (1 Ko. 13:4, 7). Héreti iyereehabúni, gama lumoun héretimati ínsiñeni. Gayaraati ladügün iyereehabúni dañu woun ánheinti ínsiñeni gañei lumutu hanigi amu. Dan le warufudun ínsiñeni gúndaagüda wamutu lanigi Heowá. Ligíati, íbini hasigirun wáganiñu arufuda iyereehabúni woun; gayaraati wasigirun gúndaañu. Ariha waméi ida luba lan.

18. Ka uagu gayara lubéi gunda wamá íbini iyereegu wamá houn gürigia?

¹⁸ Ariñagati Hesusu: “Fuleseiwatün dan le iyereegu humá houn gürigia nuéigiñe” (Luk. 6:22). Máluahantiwa lun iyereegu wamá houn gürigia ni lun hafarúniwa. Ligíati, ida luba wagundaarun íbini iyereegu wamá houn gürigia? Ariha wamá ǘrüwa resun. Furumiñe, ladüga dan le wawandun wadügüña lun gunda lan Bungiu wau (1 Fe. 4:13, 14). Libiaman, ábatima lederebugudun wafiñen  ani aba laganwoundun (1 Fe. 1:7). Ani le lǘrüwan, ladüga weresibiruba aban afayeiruahaü le wéiriti lebegi: ibagari magumuchaditi (Rom. 2:6, 7).

19. Ka uagu gunda habéi apostolugu íbini dan le lagayuahóun hawagu?

¹⁹ Murusun dan lárigiñe láguyugun Hesusu sandí hamuti meha lani apostolugu ugundani le uágubei layanuhan houn. Lau sun agayuahóua lan hawagu ani ariñawagúa ligía houn lun mapurichihan hamá gúndaamemetiña “lau larihiniña Bungiu keisi gürigia gadünamatiña lun hasufurirun busiganu luagu liri Hesusu” (Adü. 5:40-42). Hínsiñeti meha Hayubudiri houn sügǘ luéi anufudei luéi iyereehabúni le hasandirubei háganiñu hawagu. Arufuda hamuti ínsiñeni le lau hapurichihani uganu buiti “mararamagunga”. Uguñe weyu saragu hádangiñe wíbirigu añahagua eseriwida lun Heowá lau úaraguni íbini laganagua lénrengunga. Subudi wamuti mabulieidun lubéi lan Heowá le hadügübei ni ínsiñeni le harufudubei luagu liri (Ebü. 6:10).

20. Kaba wariha lidan leweñegua aturiahani?

²⁰ Sunme anihagua lan ubóu le, wasigiruba awandei iyereehabúni le lídanbei (Huan 15:19). Gama lumoun, manufudeda wamá. Kei le lunbei warihini lidan leweñegua aturiahani, lóunigirubaña Heowá lubúeingu ha úaraguabaña lun ani ru ligíame erei houn (2 Tesa. 3:3). Ligíati sigí wamá arufuda ínsiñeni luagu Heowá, hawagu wíbirigu luma hawagu wáganiñu. Ánhawa adügei, lídanbadiwa aban ani derebugubei wamadagua luma Bungiu, wíchuguba uéiriguni lun Heowá ani warufuduba weiri lan lubafu ínsiñeni sügǘ luéi iyereehabúni.