1. Ka uagu lamuriaha Hesusu luma Heowá lun lóunigiruniña lánigu disipulugu?

LIDAN lagumuhóun guñoun le laubei Hesusu ya ubouagu saminati luagu lénrengunga le lunbei hagagibudagun lani disipulugu luma. Keiti le hínsiñe habéi lun, aba lamuriaha luma Lúguchi lun lóunigiruniña luéi Mafia (Huan 17:14, 15). Subudi lumuti danme lan le lagiribudun sielun ladügübei lan Mafia sun liyaraati lun meseriwidun hamá lun Heowá. Ligíati furanguti warihini lau megei hamá lubúeingu Bungiu lun hounigirún.

2. Ka uagu wachoururei lóunabubei lan Heowá wafurieidun?

² Óunaba lumuti Heowá lafurieidun Lisaani ladüga ínsiñe le lasandirubei luagu. Ánhawa áfaagua saragu lun wagundaaragüdüni Heowá hínsiñe baadiwa giñe lun, ani laganbubadiwa danme le wamuriahan luma lun líderaguniwa luma lun lóunigiruniwa. Keiti le aban lubéi úguchili hínsiñehabuti súnwandan lóunigiruniña lisaanigu. Ligíati lun hamuga madügün lani lawiyeduñein hamuga liri.

3. Ka uagu megei wabéi lun lóunigiruniwa Heowá?

³ Sügǘ luéi amu dan mégeitiwa lun lóunigiruniwa Heowá. Bugawaali Mafia siélugiñe ani láfaraali “óunwenbu igañi” (Aruf. 12:12). Adügaali lun hafiñerun gürigia dan le lan héibaahaniwa, “[h]eseriwiduña lan lun Bungiu lau lira” (Huan 16:2). Añahein amu mafiñentiña luagu Bungiu ani éibaaha hamutiwa ladüga mígiraguagüdün wamá woungua lun wáyeihani ligaburi ubóu. Manufudeduntiwa, ladüga ariñagatu Bíbülia: “Gúnfuliti Bungiu, ani líchuguba erei hun, areidalaünme luéi [Mafia]” (2 Tesa. 3:3). Ariha wamá bián katei le ñein lubéi lóunigiruniwa Heowá.

4. Según Éfesuna 6:13-17, ka líchuguboun Heowá woun lun wóunigiragun woungua?

⁴ Ruti Heowá aban daüguaü woun lun wóunigiragun woungua  luéi lagayuahan Mafia (aliiha huméi Éfesuna 6:13-17). Héretu daüguaü to ani gayaraati tóunigiruniwa buidu. Gama lumoun mosu wadaürünu súngubei súnwandan lun gayara lan tóunigiruniwa. Ani guentó wariha ka lan mini lubéi kada tumegegun daüguaü to líchuguboun Heowá woun.

5. Ka mini lubéi béliti lánina inarüni ani ka uagu lunti lubéi wadaürüni?

⁵ Mini lan béliti lánina inarüni, sun inarüni le adarirúbei tidan Lererun Bungiu, to Bíbülia. Kati uagu mosu lubéi wadaürüni béliti le? Ladüga Mafia, “ligía lúguchibei iyeeni” (Huan 8:44). Barühali saragu milu irumu eyeedei “sun ubóu”, ani buiti lidin lun tau sádara to (Aruf. 12:9). Góunigi lumutiwa inarüni le tídanbei Bíbülia luéi weyeedúniwa. Ida lubati wadaürüni béliti lánina inarüni? Lau wafurendeiruni inarüni luáguti Heowá, luma lau wáhuduragun lun lau sífiri luma inarüni, luma lau buidu lan wóuserun lidan sun katei (Huan 4:24; Efe. 4:25; Ebü. 13:18).

6. Ka mini lubéi lidáü aniguagu le lánina irichaü ani ka uagu lunti lubéi wadaürüni?

⁶ Lidáü aniguagu le lánina irichaü, mini lubéi lugumadin Bungiu le richabei. Kati uagu lunti lubéi wadaürüni? Ladüga ítara kei lóunigirunu aban lidáü aniguagu lanigi aban súdara gayaraati giñe lóunigiruniwa lugumadin Bungiu le richabei luéi lagadeiruni luriban ubóu le wagaburi (Ari. 4:23). Ariñagati Heowá lun hínsiñe lan woun luma lun weseriwidun lun tau sun wanigi (Mat. 22:36, 37). Ligíati lálugubei Mafia lun lafareinraguagüdünu wanigi lau ladügün lun hínsiñe lan katei le lánina ubóu woun, katei le iyereegubei lun Heowá (Sant. 4:4; 1 Huan 2:15, 16). Anhein mibihin lan lun maganbadi wama lun lilurudun Heowá ladügübei sun liyaraati lun wéiguadun.

7. Ida liña wadaürüni lidáü aniguagu le lánina irichaü?

⁷ Daü wamuti lidáü aniguagu le lánina irichaü dan wánharun lun wawinwandun según le lariñagubei Heowá buidu lan o wuriba lan (Sal. 97:10). Gayaraati hasaminarun fiu gürigia adüga lan lilurudun Heowá lun madügün wamani le wabusenrubei wadügün. Gama lumoun, ánhawa ígiraguagüda woungua lun tadundehaniwa Bíbülia, ítara waba kei aban súdara le magidarun lumutu lidáü laniguagu laganagua aban wuribu ladügarügü lasaminarun hürü tan. Aban hamuga libidiounigan aau lira! Houn ha hínsiñebei Heowá houn “ménrengunti lagunfulirúniwa lugumadin” ladüga sefu lumuti habagari (1 Huan 5:3).

8. Ka mini lubéi aranseñu wamá lun wapurichihani uganu buiti ítara kei laranserunu súdara lisabadun?

⁸ Ariñagati giñe Pábulu lunti lan aranseñu wamá lun wapurichihani uganu le íchugubei darangilaü keisi laranserunu súdara lisabadun. Mini lan le mosu lan aranseñu wamá súnwandan lun wapurichihan luagu Larúeihan Bungiu. Dan wayanuhan luagu uganu le tídanbei Bíbülia héregüda lumuti wafiñen. Ínchaha lumutiwa lun warihini háfaagun sun lubúeingu Bungiu lidan sun ubóu lun hayanuhan luagu uganu buiti. Kei burí, apurichihatiña lidan hawadigimari, tidan leskuela, lidan guririguaü, tidan burí muna, dan le houdin agañeiha, dan le houdin arihaña haduheñu ha mama Gefentiña o dan le hayanuhan hama furumiñeguarügü gürigia, íbini dan le siñá lan háfuridun hábiñegiñe. Ánhawa ígirei wapurichihan ladüga wanufude, gayaraati mabuidunbei lan lidin woun. Ítara waba hamuga kei aban súdara le agidarubarun lisabadun laganagua wuribu: labuleseiruba hamuga, hénrengutimabei lun lóunigiragun lungua ani hénrengubei giñe lun lafalaruni lugumadin lábuti.

9. Ka uagu lunti lubéi wanügüni idaüdinaü lánina afiñeni?

⁹ Mini lan idaüdinaü lánina afiñeni, wafiñen luagu Heowá. Afiñetiwa lagunfulirubei lan sun le füramase lubéi. Íderagua lumutiwa afiñeni le lun ‘wararamunu sun gimara durunguatu to lachüühaboun Mafia wawagun’. Lunti wanügüni  idaüdinaü ligía ladüga góunigi lumutiwa luéi arufudahani mama inarüniti le hámagiñebei gürigia ha agarabaagunbaña luagun Heowá, góunigi lumutiwa giñe luéi bula luma luéi hayanuhan gürigia wuriba wawagu, katei burí le adügübei lun lábürühan warüna. Anhein mafiñen wabéi mérebadiwa giñe lun gaganbadi wamá lun Heowá dan le hadügüdarun amu wawagu lun wadüraaguni lugumadin. Luagu le aban oubaü, sagü wayanuhan luagu wafiñen lidan wawadigimari luma tidan leskuela, ábatima léredun idaüdinaü lánina afiñeni le óunigirubaliwa (1 Fe. 3:15). Sagü wamahadun lun aban wadagimanu le fáyeiti, le mígirunbei lun wíchuguni sun wayaraati lun Heowá, lóunigiruñadiwa idaüdinaü lánina afiñeni (Ebü. 13:5, 6). Ani sagü úaragua wamá dan le wéibaahouniwa, aba giñe lóunigiruniwa idaüdinaü lánina afiñeni (1 Tesa. 2:2).

10. Ka mini lubéi bunidi lánina asalbaruni ani ka uagu lunti lubéi wadaürüni?

¹⁰ Mini lan Bunidi lánina asalbaruni emenigini le líchugubei Heowá woun, emenigini le lunbei lesefuruniwa luéi óunweni ani líchuguba afayeiruahaü houn ha adügübalin lugundan (1 Tesa. 5:8; 1 Tim. 4:10; Titu 1:1, 2). Ítara kei lóunigiruni bunidi lichügü aban súdara, ítara liña giñe lóunigiruni emenigini lánina asalbaruni ligaburi wasaminan. Ida? Íderagua lumutiwa lau wetenirun lun füramasei le ladügübei Bungiu luma lau warihini turobuli lidan aban lubuidun igaburi.  Ida luba wadaürüni bunidi lánina asalbaruni? Lau wáfaagun lun wasaminarun kei Heowá. Kei hénpulu, míchugun wamuti wemenigin “luagu irisini machourunti”, luagu Bungiu wíchigei wemenigin (Sal. 26:2; 104:34; 1 Tim. 6:17).

11. Katoun san eféin to líchuguboun sífiri, ani ka uagu mosu lubéi wayusurunu?

¹¹ Eféin to líchuguboun sífiri mini tan Lererun Bungiu. Eféin to gabafutu lun gayara lan tasubudiragüdün furumiñeguarügü iyeeni luma lun tadügün lun hesefurun gürigia luéi arufudahani le iyeeniti luma luéi luriban échuni (2 Ko. 10:4, 5; 2 Tim. 3:16, 17; Ebü. 4:12). Furendeitiwa ayusuroun buidu lau waturiahan wábuguarügü luma lau arufudahani le tíchugubei lóundarun Heowá woun (2 Tim. 2:15). Amu tuéi daüguaü to líchuguboun Heowá woun lun wóunigiragun woungua, ruti giñe Heowá ámuya katei woun lun wóunigiragun woungua. Ariha wamá katoun lan?

12. Ka amu katei wemegeirubei ani ka uagu?

¹² Aban súdara le awuribuhañahaali subudi lumuti magañeinrubei lan lábugua; megei lumuti hídehan lánigu paaná. Ítarameme, siñabei wagañeiruni Mafia ni ha lúmagiñebaña wagía wábuguarügü; megei wamuti hídehan wíbirigu. Rúhali Heowá íbirigu woun ha lídangiñetiña sun ubóu lun híderaguniwa (1 Fe. 2:17).

13. Según Ebüréu 10:24, 25, ida luba líderaguniwa woudin adamuridagua?

¹³ Aban lídangiñe ídemuei le weresibirubei hámagiñe íbirigu, lau wabasihan adamuridagua (aliiha huméi Ebüréu 10:24, 25). Sun wagía anihein dan dagá lan maguraasuni wawagu. Lau sun lira, ma dan le burí woudin adamuridagua aban buidu lan wasandiragun woungua, adián? Lubuidun burí dimurei le hariñagubei wíbirigu lidan hóunabagüle, sügǘ le burí adügǘbei lidan plataforma luma yanu tídangiñeti Bíbülia, íderagua lumutiwa lun derebugu lan wafiñen luma lun wasigirun eseriwida lun Heowá. Lanwoun lira, adügati giñe wayanuhan hama íbirigu dandu lubaragiñe luma lárigiñe adamuridaguni lun wárügüdün erei (1 Tesa. 5:14). Adügati giñe damuriguaü lun gayara lan wíderagun amu, ani adügati katei le lun gunda wamá (Adü. 20:35; Rom. 1:11, 12). Mámarügüñein le wafurendeira. Furendeitiwa giñe ida luba lan wapurichihan luma lun garufudahadi wamá. Kei hénpulu, arufudahóuaali woun lun gayusuradi wamá tun wani agumeiraguagüdüni, luma burí bidéu le wayusurubei lun warufudahan. Ligíati aranse wamá buidu lubá adamuridaguni, ru wamá arigei lun le ariñawagúbei ani falá waméi. Ánhawa adügei sun le, aranseñu waba kada aban wádangiñe lun wawuribuhan, ani aban baadiwa “lisudaran Hesukrístu le buiti” (2 Tim. 2:3).

14. Ka amu ídemuei wámabei?

¹⁴ Íderagua hamutiwa giñe saragu míñunu ánheligu ha gabafutiña. Anhein subudi wabalin ka lan gayaraabei ladügüni ábanrügü ánheli, samina wamá giñe luagu le gayaraabei hadügüni saragu míñunu ánheligu (Isa. 37:36). Úati wügüri ni máfianu gabafutimatiña hawéi lisudaranigu Heowá ha siélubaña. Luagu aban dan, ariñawagúati lau sun lan wábuguarügüñadiwa lan, anhein anihein lubéi Heowá wama, gíbetimatiña ha wámagiñebaña (Ali. 6:16). Inarüni lira! Samina wamá luagu katei le dan le wasandirun lábürühan warüna luagu le lariñagubei o le ladügübei somu wapaaná lidan wadagimanu o leskuelarugu o aban waduhe le mama Gefenti. Haritagua wamá mama lan wábuguarügüñadiwa; wafalaruñein ladundehan Heowá.

15. Según le lariñagubei Isaíasi 54:15, 17, ka uagu maweiyasunbaña lubéi lubúeingu Heowá ámanicha?

¹⁵ Ubóu le lábugiñebei lubafu Satanási, gébunati lun lasandirun iyereehabúni wawagu. Ladüga mídintiwa luéigiñe lóubadina ni aban gumadimati ani mídintiwa giñe awuribuha. Subudigüda wamuti liri Bungiu  ani apurichihatiwa giñe Larúeihanrügübei lan anüga darangilaü ani gaganbaditiwa giñe lun lugumadin. Arufudahatiwa houn gürigia marasualugu lan Satanási gáfarahadi ligía (Huan 8:44). Subudigüda wamuti giñe málühali lan Bungiu agumucha lau ubóu le lábugiñebei lubafu Mafia. Siñati lámanichagüdüniwa Satanási hama lánigu. Lubaragiñe lira, wayusuruñein sun wámati lun walawahani Heowá. Lau sun gabafu lan Satanási, madügüngili lun machülürün lan uganu luáguti Larúeihan Bungiu lidan sun ubóu. Mabafu lubéi Mafia lun ladügüni lira ladüga lóunigiruñadiwa lan Heowá (aliiha huméi Isaíasi 54:15, 17).

16. Ida luba lesefuruniña Heowá lubúeingu lídanme óunwenbu asufuriruni?

¹⁶ Kaba asusereda ámuñegü? Lídanme lidaani óunwenbu asufuriruni, lesefurubadiwa Heowá lidan bián igaburi le lunbei laweiridagüdünu wanigi. Furumiñe, lesefurubaña lubúeingu danme le ladügün lun hábürühan urúeigu ha ubouagubaña tuagun Babilónia to wéiriboun, sun relihión mama inarünitu to ubouaguboun (Aruf. 17:16-18; 18:2, 4). Ani libiaman, lesefurubaña Heowá lubúeingu danme le lagumuchun lau ubóu le lábugiñebei lubafu Satanási lídanme Arümahedón (Aruf. 7:9, 10; 16:14, 16).

17. Ida luba wibihin buiti lau werederun yarafañu lun Heowá?

¹⁷ Dan le werederun yarafañu lun Heowá, madügünbei Satanási wuribani woun le gayaraabei ladurarun lun súnwandan. Le linarün katei, Satanásirügüba agünrinchawagúa lun súnwandan (Rom. 16:20). Ligíati daü wamóun sun daüguaü lánina asudarahani to óunigirubaliwa ani maweiyasun wamá agidaroun. Máfaagua wamá lun wageindaguni wuribu le wábuguarügü, íderagua wamaña wábirigu ani falá waméi giñe ladundehan Heowá. Anhein wadüga lira, chouru waméi líchuguba lan Wáguchi hínsiñehabuti le siélubei erei woun góunigi láwame (Isa. 41:10).