1. Ka san turobuli úmabei wagagibudagua wagía lubúeingu Heowá?

WÁSÜGÜRÜÑA san lídangiñe somu óuchawaguni le hénrenguti? Másiñati adügaali lan aban íbiri wuribani woun (Sant. 3:2). O másiñati adüga hamá wánigu paaná leskuelarugu o wánigu paaná lidan wadagimanu bula wau ladüga weseriwiduña lan lun Heowá (1 Fe. 4:3, 4). Ánheinti háluguña lubéi waduheñu lun hararamuniwa luéi woudin adamuridagua o luéi wayanuha luagu wafiñen hama amu? (Mat. 10:35, 36). Anhein anihán lubéi turobuli asufuriragüdawa saragu, másiñati wasandiragun woungua busén wamá wígiruni weseriwidun lun Bungiu. Gama lumoun, gayaraati wachoururuni meberesenga ka lan waturobulinbei, líchuguba Heowá dandu lichú aau kei erei woun lun gayara lan wagagibudagun luma turobuli.

2. Según Rómana 15:4, ka gayaraabei gani lani taliihóun Lererun Bungiu wawagu?

² Afuranguagüdati Heowá tidan Lererun ida liña lan hagagibudagun gürigia charatiña luma sügǘ hénrenguti. Afuranguagüda lumuti lun wafurendeirun lídangiñe. Ligía lariñagubei apostolu Pábulu lau lídehan Bungiu lidan Rómana 15:4 (aliiha huméi). Gayaraati líchugun gurasu luma emenigini woun waliihani abahüdaguni burí le. Lun lira, úati buídurügü lan waliihanu Bíbülia. Lunti ladügün le waliihabei lun lasansirun wasaminan luma lun lachülürün tidoun wanigi. Danme le wemegeirun ídemuei lun wasubudiruni ida luba lan wahandilihan somu turobuli, gayaraati wasigiruni adundehani le: 1) furíei, 2) wadiraruni lidan wasaminan le waliihabei, 3) wararamagun asaminara luma 4) wawinwanduni lidan wabagari le wafurendeirubei. Guentó, wakutihaali ka lan mini lubéi gádürü katei le. * Lárigiñeme ábame wayusuruni katei burí le  lun wafurendeirun lídangiñe bián abahüdaguni tídangiñeti Bíbülia: le furumiñeti luagu Dawidi, le aban luagu apostolu Pábulu.

3. Lubaragiñe wagumeserun aliihoun Bíbülia, ka lunbei wadügüni, ani ka uagu?

³ 1) Furíei. Lubaragiñe wagumeserun aliihoun Bíbülia amuriaha wamá ídemuei luma Heowá lun wasagarun buiti lídangiñe le waliihabei. Kéiburi, anhein wáluahaña lubéi adundehani lun waranseha aban turobuli, amuriaha wamá luma Bungiu lun líderaguniwa adarira tidan Lererun adundehani le gayaraabei líderaguniwa (Fili. 4:6, 7; Sant. 1:5).

4. Ka gayaraabei líderaguniwa íchiga ibagari lun le waliihabei tídangiñeti Bíbülia?

⁴ 2) Wadiraruni lidan wasaminan le waliihabei. Aban lubuidun idewesei lúmagiñeti Heowá gayara lan ladiraruni gürigia lidan lisaminan le laliihabei. Lun líchugun gürigia ibagari lun le laliihabei tídangiñe Bíbülia samina wamá ñéinñadiwa lan, aríagua wamá woungua lidan fulasu le ñein lubéi gürigia le uágubei waliiha. Áfaagua wamá warihini le larihibei luma lun wasandiruni le lasandirubei.

5. Ka mini lubéi wararamagun asaminara, ani kaba íderaguawa lun wadügüni?

⁵ 3) Wararamagun asaminara. Mini lan, lararamagun gürigia asaminara buidu luagu le laliihabei luma le gayara lubéi afurendeira lídangiñe le laliihabei. Íderagua lumutiwa lun wóundaragun saminaü luma lun gunfuranda wamani le waliihabei buidu. Dan le waliihanu Bíbülia masaminarunga, ítara liña kamá hamuga aban ábouguti, anhein míchugun lan sun lagana éigini lidoun lábougun mesemebei éigini ligía. Dan le lasaminarun gürigia, ítara liña kamá líchuguñein gürigia lubuña lábougun. Aban katei le gayaraabei líderaguniwa asaminara hulili lau wáluahani óunabagülei lun álügüdahani burí le: “Ka ladügübei le uágubei waliiha lun laransehani liturobulin? Ida liña líderaguni Heowá? Ida luba nayusuruni le nafurendeirubei lun líderagunina awanda óuchawaguni?”.

6. Ka uéigiñe lunti lubéi wawinwanduni lidan wabagari le wafurendeirubei?

⁶ 4) Wawinwanduni lidan wabagari le wafurendeirubei. Ariñagati Hesusu ánhawa lan míchugun wamá lidan wabagari le wafurendeirubei, ítara waña kei aban wügüri le ábunagubarun luban lidan sagoun. Nadagimeinti saragu, gama lumoun lun ni kata. Ka uagu? Lugundun danme liabin luriban dan iñura ligía duna ábame tábürühan luban (Mat. 7:24-27). Ítarameme, anhein furíei wabéi, dirá wameí lidan wasaminan le waliihabei, ani ráramagua wagía asaminara luagu le wafurendeirubei, lau sun lira mawinwandun wamuti le wafurendeirubei meseriwínbei wáfaagun lun ni kata. Danme le lachülürün óuchawaguni o éibaahouni mederebugunbei wafiñen saragu lun wawanduni. Luagu le aban oubaü, ánhawa aturiaha buidu ani winwan wameime le wafurendeirubei, buídubei le lunbei wanúadiruni, lídanbadiwa giñe darangilaü ani derebugu luba giñe wafiñen (Isa. 48:17, 18). Falá waméi gádürü adundehani le lun warihini ka lan gayaraabei wafurendeiruni lídangiñe le abahüdawagúbei luagu urúei Dawidi.

7. Kaba abahüdaguni tídangiñeti Bíbülia wakutiha?

⁷ Garabaguaali san somu wamada o aban hádangiñe waduheñu wawagun? Anhein ítara liña lubéi lahuuduba woun wakutihani abahüdaguni luáguti Abüsalón, le liráü urúei Dawidi. Ka asuseredubei? Aba lagarabaagun Abüsalón luagu lúguchi ani aba lálugun lun lagidaruni arúeihani luéi (2 Sam. 15:5-14, 31; 18:6-14).

8. Kaba wadüga lun líderaguniwa Heowá?

⁸ 1) Furíei. Lau wasaminarun luagu abahüdaguni, abahüdagua waméi lun Heowá lidan furíei ida liña lan wasandiragun woungua ladüga luriban wouserúniwa (Sal. 6:6-9). Ani lárigiñe amuriaha wamá luma lun líderaguniwa adarira adundehani tídangiñeti Lererun le arufuduti woun kaba lan wadüga.

9. Ida luba hamuga habahüdaguni lásügürün Dawidi lidan murusun dimurei?

 ⁹ 2) Wadiraruni lidan wasaminan le waliihabei. Samina wamá luagu le asuseredubei lun urúei Dawidi ani ráramagua wamá asaminara ida liña lan lasandiragun lungua. Áfaaguati Abüsalón luagu saragu irumu lun lagañeiruni hínsiñehabu gürigia (2 Sam. 15:7). Dan le lasaminarunbei dánhali lan lun larúeiha óunahati aríaahatiña lidoun sun Ísüraeli lun laranseruniña gürigia lun hánharun lun keisi urúei. Ani lárigiñe adügati lun loundarún Aitoféli lumoun le meha besi lumada Dawidi ani ligía meha íchugubei adundehani lun Dawidi. Ábati ladügagun Abüsalón lungua urúeime áluga ligía lárügüdüni urúei Dawidi lun láfaruni hilagubei, másiñati sándiñein lan meha Dawidi lidan dan ligía (Sal. 41:1-9). Dan le líchugubei Dawidi fe luagu sun le, aba lanurahan Herusaléngiñe. Lagumuhóun aba hawuribuhan lisudaranigu Abüsalón hama lisudaranigu Dawidi ha úaraguabaña. Aba heferidiruni súdaragu hagía wuribu, ani aba lafarún Abüsalón hilagubei.

10. Ka hamuga gayaraabei ladügüni urúei Dawidi?

¹⁰ Guentó samina wamá ida liña lan lasandiragun Dawidi lungua. Hínsiñeti meha Abüsalón lun ani afiñeti meha giñe luagu Aitoféli. Íbini ítara garabaguatiña biángubei hagía luagu. Barütiña saragu igarigu lun Dawidi ani áluga hagía háfaruni hilagubei. Másiñati samina lan Dawidi óundaraguaña lan ha híbiri lumadagu lumoun Abüsalón ani siñaali lan lafiñerun hawagu. Gayaraati hamuga meha letenirun lun le lasandirubei luma lun lanurahan ligía lábugua lidoun amu ageiraü. O, lígirun lun lábürühan larüna. Madügün lumuti lira. Iñuraguarügüti lídangiñe óuchawaguni hénrenguti le. Ida liña ladügüni?

11. Ka ladügübei urúei Dawidi lidan sügǘ hénrenguti le?

¹¹ 3) Wararamagun asaminara. Ka adundehani tídangiñeti Bíbülia gayaraabei wafurendeirun lídangiñe abahüdaguni le? Gayaraati wálügüdagun woungua: “Ka ladügübei Dawidi lun líderagun lúniwagua?”. Mígirunti lun lararamuni anufudei ani móufudahanti anúadira adüga somu katei masaminarunga, le ladügübei aba lafurieidun lun Heowá lun lamuriahan ídemuei luma. Amuriahati giñe ídemuei hama lumadagu. Ani dan le lanuadirún ladügün somu katei adüga lumuti lau lóufudagun mígirun lumuti lubá amu dan. Lau sun gari lan sun le asuseredubei lun masandirunti igarihabu. Ni machouruni hawagu amu sigiti afiñera luagu Heowá luma hawagu lumadagu.

12. Ida liña líderaguni Heowá Dawidi?

¹² Ida liña líderaguni Heowá Dawidi? Ánhawa akutiha murusun, wafurendeiruba ru lani Heowá erei le lemegeirubei Dawidi lun, lun lawanduni óuchawaguni (Sal. 3:1-8). Biní lumuti giñe Heowá le lanúadirubei Dawidi lanwoun lira, íderagua lumutiña lumadagu Dawidi ha úaraguabaña lau háfaagun hóunigiruni.

13. Ida luba wafalaruni lani Dawidi hénpulu anhein acharara somu gürigia woun? (Matéu 18:15-17).

¹³ 4) Wawinwanduni lidan wabagari le wafurendeirubei. Álügüdagua wamá woungua: “Ida luba nafalaruni lani Dawidi hénpulu?”. Lau náfaagun lun madarasaha nan naranserun somu turobuli. Según gádantiwa, gayaraati wafalaruni adundehani lúmagiñeti Hesusu le wadarirubei lidan Matéu kapítulu 18 (aliiha huméi Matéu 18:15-17). Lau sun lira mama mosu wéibaagun adüga somu katei lau lóufudagun. Amuriaha wamá luma Heowá lun líchugun gálumaü luma lichú aau woun lun wagagibudagun luma sügǘ hénrenguti. Afiñe wamá hawagu wamadagu ani anha wamá lun híderaguniwa (Ari. 17:17). Ani le súdinitimabei falá waméi ladundehan Heowá le tídanbei Lererun (Ari. 3:5, 6).

14. Ka ida sügǘ gayaraabei líderaguniwa waliihani 2 Tim. 1:12-16 luma 4:6-11, 17-22?

¹⁴ Eredeha hamutiwa san waduheñu luéi weseriwidun lun Heowá? O wawinwanduña lidan aban ageiraü le ñein lubéi máhawa lan  lun wapurichihan? Anhein ítara liña lubéi, gayaraabei líderaguniwa waliihani 2 Tim. 1:12-16 luma 4:6-11, 17-22. * Abürüha lumuti Pábulu fánreinti tídangiñeti Bíbülia le dan meha le furisunrugu lubéi.

15. Ka gayaraabei wamuriahan luma Heowá?

¹⁵ 1) Furíei. Lubaragiñe waliihani bérusu burí le, abahüdaha waméi waturobulin lun Heowá lidan furíei luma ida liña lan wasandiragun woungua. Ani amuriaha wamá luma Heowá lun líderaguniwa adarira adundehani tídangiñeti Lererun lidan abahüdaguni luáguti louchawagún Pábulu le lunbei ladundehaniwa lidan wakesin.

16. Ka meha gádanbalin Pábulu?

¹⁶ 2) Wadiraruni lidan wasaminan le waliihabei. Rugua wamá woungua lidoun lilugaarun Pábulu. Ladaürǘña meha uburugu Roma. Íbini dáüwañahaali lan meha luagu aban dan, lidan kesi le lafarúa meha hilagubei. Ígira hamaali meha fiu hádangiñe lani panaagu, ani buchá meha luagu (2 Tim. 1:15).

17. Ka katei gayaraabei hamuga meha ladügüni Pábulu?

¹⁷ Gayaraati hamuga lasaminarun Pábulu luagu dan le sügühalibei, luma lun lasaminarun lun hamuga meha amu lan katei lanúadirubei madaürǘnbei lan hamuga. Gayaraati hamuga meha lasandirun igarihabu hawagu íbirigu ha lóubawagubaña Asia ha meha ígirubalin, luma lun machourun lan hamuga meha hawagu ha híbiri lumadagu, lau sun lira madügünti ni kata ítarati. Ka uagu lasigira afiñera hawagu lumadagu luma luagu Heowá?

18. Ka ladügünbei Pábulu dan le lagagibudagunbei luma turobuli?

¹⁸ 3) Wararamagun asaminara. Álügüdagua wamá woungua: “Ka ladügübei Pábulu lun líderagun lúniwagua?”. Subudiga lun yarafaali lan lun lafarún hilagubei, súnwandan ladügüni le súdinitimabei, líchugun uéiriguni lun Heowá. Lau lira áluahati lun líchugun gurasu houn amu ani furíeiti lun Heowá lau afiñeni (2 Tim. 1:3). Merederunti asaminara luagu ígira hamaali lan lumadagua, lubaragiñe lira arufuda lumuti línsiñehabu luma leteingiradi luagu híderaguni lumadagu ha úaraguabaña. Ani sigiti giñe aturiahoun Lererun Bungiu (2 Tim. 3:16, 17; 4:13). Chouru lumuti luagu hínsiñe lan lun Heowá luma lun Hesusu, mígirun hamuti meha ani híchuguba lafayeiruaha luagu úaragua lan.

19. Ida liña líderaguni Heowá Pábulu?

¹⁹ Ariñagaali meha Heowá lun Pábulu luagu léibaahouba lan ladüga kristiánu lan (Adü. 21:11-13). Ida liña líderaguni Heowá Pábulu? Lau lóunabuni lafurieidun, ani aba íchigeina lan erei lun (2 Tim. 4:17). Chóurugüda lumuti giñe Heowá lun Pábulu leresibiruba lan afayeiruahaü luagu láfaagun. Ínchaha lumutiña Heowá lumadagu Pábulu ha úaraguabaña lun híderaguni.

20. Ida luba gayara lan wáyeihani lafiñen Pábulu ítara kei larufuduni Rómana 8:38, 39?

²⁰ 4) Wawinwanduni lidan wabagari le wafurendeirubei. Álügüdagua wamá woungua: “Ida luba wáyeihani Pábulu?”. Ítara kei Pábulu subudi wamuti wéibaahouba lan luagu wafiñen (Mar. 10:29, 30). Lun úaragua wamá laganagua lénrengunga mosu wafurieidun lun Heowá ani hechu wagíame aturiahoun Bíbülia. Moun lumuti wabulieiduni aban lan lídangiñe katei le súdinitimabei lun wadügüni, wíchuguni uéiriguni lun Heowá. Gayaraati wachoururuni maweiyasunbei lan Heowá ígirawa ani úati lan lunti ladügün lun mínsiñe báadiwa lan lun Heowá (aliiha huméi Rómana 8:38, 39; Ebü. 13:5, 6).

21. Ka íderagubarun Aya luma Hector agagibudagua luma turobuli?

²¹ Meberesenga gádantiwa gayaraati líderaguniwa hénpulu le tídanbei Bíbülia. Kei hénpulu, ariñagatu Aya aban prekursora Hapóna, íderagua lanu abahüdaguni luáguti Honasi lun manufudedun  tan lidan apurichihani lidan guririguaü. Ariñagati Hector, aban íbiri indonésiana le eseriwidubei lun Heowá íbini mama lan Gefentiña lagübürigu, íderagua lani tani Rudu hénpulu lun labusenrun lafurendeirun luagu Heowá luma lun lasigirun eseriwida lun.

22. Ida luba wasagarun buiti lídangiñe bidéu, ariñahani tídangiñeti Bíbülia le aganbahóuarügüti luma “Hénpulu lánina burí afiñeni”?

²² Halíaba wadarira abahüdaguni hawaguti gürigia ha lídangiñetiña tidaani Bíbülia le gayaraati líchugun derebugu lun wafiñen? Ruti bidéu, ariñahani le tídangiñeti Bíbülia le aganbahóuarügüti, luma burí “Hénpulu lánina burí afiñeni” ibagari lun aliihani tídangiñeti Bíbülia. * Lubaragiñe warihini, waganbahani o waliihani ariñahani amuriaha wamá luma Heowá lun líderaguniwa adarirei ariñahani le gayaraabei líderaguniwa lidan wabagari. Rugua wamá woungua lidoun halugaarun gürigia ha uágubaña labahüdawagúa. Ráramagua wamá asaminara luagu le hadügübei luma luagu ida liña lan líderaguniña Heowá lubúeingu úaraguabaña ha agagibudagua luma turobuli. Lárigiñe winwan waméi lidan wabagari le wafurendeirubei. Lagumuhóun teinki waméi Heowá luagu líderaguniwa ani arufuda waméi weteingiradi lau wíchugun gurasu houn amu luma lau wíderaguniña.

23. Ka füramase lubéi Heowá woun lidan Isaíasi 41:10, 13?

²³ Gayaraati hénrengu lan ibagari woun lidan ubóu le lábugiñebei lubafu Satanási ani anihein burí dan ibidiñe lan woun kaba lan wadüga (2 Tim. 3:1). Gama lumoun, mama mosu wadiheridun ni lun wanufudedun ladüga subudi lumuti Heowá ka lan wásügürübei. Dan le wemegeirun ídemuei, füramaseti líderagubadiwa lan lau lúhabu le gagañeiradibei (aliiha huméi Isaíasi 41:10, 13). Chouru wamuti líderagubadiwa lan Heowá, ani tíderagubadiwa Bíbülia lun wárügüdün erei lun wawandun furumiñeguarügü lénrengunga.