1, 2. Ka gayaraabei hídehan lun gayaraabei lan labadiseirun aban aturiahati Bíbülia?

“HÍNSIÑETI meha le nafurendeirubei tídangiñe Bíbülia nun”, liña tariñagun Amy, to awinwanduboun Fiyi. Ani ábaya tariñagun: “Subudi numuti meha ligía lan inarünibei, gama lumoun, madügüntina meha asansiruni. Le meha íderagubalina lun nadügün asansiruni luma lun nabadiseirun, gamadagua nan hama íbirigu”. Arufudahati tikesin Amy aban katei súdiniti woun: ménrenguntimati lawanserun aban aturiahati Bíbülia ani badisei ligía ánhaña ídeha sun lílana damuriguaü.

² Sun íbirigu gayaraati hídehan lun lawanserun damuriguaü (Efe. 4:16). Ariñagatu aban prekursora vanuatuna gíritu Leilani: “Anihein aban ariñawagúni le ariñagubei mégeiwatiña lan saragu gürigia lun lagüriarún aban irahü. Afiñetina ligiaméme lan asuseredubei lidan hadügǘn disipulugu: libe-agei dan, mégeiwati hídehan sun lílana damuriguaü lun gayara lan lánharun aban gürigia lun inarüni”. Lidan lagüriarún aban irahü mégeiwati hídehan iduheñu, umadagu hama máisturugu, lugundun súngubei hagía rútiña erei lun ani arufudahatiña katei súdiniti lun. Ítarameme, gayaraati giñe hídehan sun lílana damuriguaü lun gayara lan lachülürün aban gürigia lidoun badisei lau híchugun adundehani luma dǘgüdaguaü lun, luma lau lubuidun hani hénpulu (Ari. 15:22).

3. Ka wafurendeirubei lídangiñe le tariñagubei Ana, Leilani luma le lariñagubei Dorín?

³ Anhein wíchuguña lubéi aturiahani tídangiñeti Bíbülia, ka uagu lunti lubéi wánharun lun ídemuei le gayaraabei híchuguni íbirigu lun aturiahati ligía? Ariha waméi le tariñagubei Ana, aban prekursora espechalitu to lídanboun ageiraü le gíribei Moldavia: “Gíbeti lemegeirun aban aturiahati, ani hénrengubei lun lumaisturun lun letenirun lun sun le lemegeirubei aturiahati ligía”.  Afuranguagüdati ábanya prekursoru espechaliti lídangiñeti ligiaméme ageiraü le gíribei Dorian: “Libe-agei dan, ariñagatiña amu íbirigu somu katei le adagarubei tidoun lanigi aturiahati, aban katei le meha masaminarungubei numuti”. Ariñagayatu Leilani ámuya katei le arufudubei buidu lan wánharun wibihin ídemuei: “Ínsiñeni le leresibirubei aturiahati gayaraati líderaguni lun líchugun fe luagu anihán lan lóundarubei Heowá” (Huan 13:35).

4. Kaba wariha lidan aturiahani le?

⁴ Másiñati wálügüdagun woungua: “Ka gayaraabei nadügüni lun níderagun aban aturiahati Bíbülia anhein mama lubéi au íchugubei aturiahani lun?”. Lidan aturiahani le, warihiba ka lan gayaraabei wadügüni danme le lagunbirahaniwa aban íbiri lun woudin luma íchiga aban aturiahani luma dan le lagumeserun aban aturiahati abasiiha lidoun adamuridaguni. Warihiba giñe ka lan gayaraabei hadügüni wéiyaaña lidan afiñeni lun híderaguniña aturiahatiña lun habadiseirun.

5. Ka lunbei wadügüni dan le lagunbirahaniwa aban íbiri íchiga aturiahani tídangiñeti Bíbülia?

⁵ Lidan aban aturiahani, le íchugubalin aturiahani ligía lunbei líderaguni aturiahati lun gunfuranda lanu Lererun Bungiu. Ánhawa lamisuraha íbiri ligía lun woudin luma, haritagua waméi awanhán lan ñein lun wíderaguni (Apu. 4:9, 10). Ligíati, ka lunbei wadügüni lun wagunfulirun tau wagaradan?

6. Ida luba wafalaruni le lariñagubei Ariñawagúni 20:18 dan le woudin luma aban íbiri íchiga aturiahani tídangiñeti Bíbülia?

⁶ Aranse wamá buidu. Furumiñe, amuriaha wamá luma íbiri ligía lun layanuhan woun murusun luagu aturiahati (aliiha huméi Ariñawagúni 20:18). Gayaraati wálügüdüni ka lan gádanbalin aturiahati, kaba lan fánreinti haturiaha ani ka lan labusenrubei libihin lidan aturiahani ligía. Gayaraati giñe wálügüdüni anhein anihein lubéi somu katei le labusenrubei wariñaguni o le lunti mariñagun wamani o le lunti madügün wamani, luma ka lan gayaraabei wadügüni lun wíderaguni aturiahati lun lawanserun. Furanguti mabahüdagunbei lan íbiri ligía woun luagu libagari aturiahati, gama lumoun, lahuuduba furumiñeguarügü katei le lunbei lariñagun woun luagu aturiahati. Ariñagatu aban misionéra gíritu Joy, ayanuha tan luagu katei burí le hama ha ñǘdünbaña tuma íchiga aturiahani. Ariñagatu: “Íderagua lumutu katei le íbiri to ñǘdünboun numa lun tebereserun hau aturiahatiña luma lun tasubudiruni kaba lan tariñaga lidan aturiahani”.

7. Ka uagu súdini lubéi lun waranserun buidu?

⁷ Dan le woudin hama íbirigu íchiga aturiahani tídangiñeti Bíbülia, buiti lun waranserun lubaragiñe woudin (Ésüd. 7:10). Afuranguagüdati Dorín, le buga uágubei wayanuha lidan párafu 3: “Gúndaatina dan le aranseñu liña lan íbiri le ñǘdünbei íchiga aturiahani úara numa.  Lugundun ítara gayaraabei lariñagun somu katei le gayaraati leseriwidun lun aturiahati”. Líchuguba giñe aban hénpulu buiti lun aturiahati, lugundun líchuguba aturiahati fe aranse wamá biángubei wagía. Íbini anhein siñá lubéi wakutihani fánreinti ligía buidu, áfaagua wamá lun wadariruni arufudahani le súdinitimabei.

8. Kaba íderaguawa lun wasubudiruni kaba lan wariñaga dan le wafurieidun lidan aban aturiahani tídangiñeti Bíbülia?

⁸ Súdiniti furíei lidan lichugún aturiahani tídangiñeti Bíbülia, ligíati, samina wamá kaba lan wariñaga anhein amuriahóua wamá lun wafurieidun. Ítara subudi wamaalime kaba lan wamuriaha lidan furíei (Sal. 141:2). Ariñagatu aban íbiri haponna gíritu Hanae, haritagua tágili lan furíei le burí meha tadügübei aban íbiri to ñǘdünboun tuma íbiri to íchuguboun aturiahani tun. Ariñagatu: “Rútina meha fe luagu lubuidun tumadagua luma Heowá, ani busentina meha ítara nan kei tuguya. Ani dan le meha tíriduni niri lidan furíei, sánditina meha hínsiñe nan houn”.

9. Según Santiagu 1:19, ida luba aban wamá paaná buiti lidan lichugún aturiahani?

⁹ Íderagua waméi le íchugubei aturiahani. Ariñagatu aban prekursora espechalitu niheriana gíritu Omamuyovbi: “Aban paaná le buiti ruti arigei lidan aban aturiahani. Ruti ariñahani le buiti gama lumoun, mayanuhanti saragu, lugundun subudi lumuti íbiri lan le íchugubalin aturiahani lunbei lalidihani aturiahani”. Ligíati, kaba dan wayanuha ani kaba wariñaga? (Ari. 25:11). Aganba waméi dandu le lariñagubei íbiri le íchugubalin aturiahani kei le lariñagubei aturiahati (aliiha huméi Santiagu 1:19). Ítararügübei gayara lan aranseñu wamá lun wídehan dan le mégeiwa lan. Súdiniti lun mayanuhan wamá saragu, lun madüraagun wamani íbiri le íchugubalin aturiahani dan le lafuranguagüdüña lan somu katei o lun madireirun wamá luéi puntu le aturiahóubei. Gama lumoun, gayaraati wariñagun fiu dimurei, aban hénpulu o aban álügüdahani lun lafuranguagüdüniwa puntu le akutihóubei. Anihein dan gayaraati genege lan woun siñati lan wídehan saragu lidan aturiahani. Gama lumoun, láurügü wariñagun lun gürigia buidu lan ladüga ani arufuda wagía berese wamá lau, wíderagubei lun lawanserun.

10. Ida liña gayara lan líderaguniña aturiahatiña le wásügürübei lidan wabagari?

¹⁰ Ayanuha wamá luagu le winwan wamaalibei. Anhein mégeiwa lubéi, gayaraati wabahüdaguni lun aturiahati ida liña lan wafurendeiruni inarüni, ida liña lan wiñuragun lídangiñe somu lénrengunga o ida liña lan warihini lúhabu Heowá lidan wabagari (Sal. 78: 4, 7). Háfuga ligía lan lemegeirubei aturiahati laganbun. Háfuga lederebudagüdüni katei le lafiñen o línchahani lun ladügüni le mégeiwabei lun gayara lan labadiseirun ani íderagualeime arihei ida luba lan liñuragun lídangiñe somu turobuli (1 Fe. 5:9). Haritagua lágili Gabriel, aban prekursoru le awinwandubei Bürasíli ka lan íderagubalin dan le laturiahanbarun Bíbülia: “Arufudahati sügǘ burí le  habahüdagubei íbirigu nun luagu subudi lani Heowá ka lan waturobulinbei. Anhein iñuragua habéi lídangiñe, gayaraati giñe niñuragun”.

11, 12. Ka uagu lunti lubéi weresibiruniña lau ínsiñeni aturiahatiña ha achülürübaña adamuridagua?

¹¹ Lun gayara lan lawanserun aban aturiahati ani badisei ligía, lunti labasiihan lidoun adamuridaguni ani sagá ligíame buiti lídangiñe (Ebü. 10:24, 25). Másiñati chülüti lan aturiahati adamuridagua luagu furumiñeti wéiyaasu ladüga lagunbirahani íbiri le íchugubei aturiahani lun. Súngubeiti wagía gayaraati wínchahani lun lasigirun abasiiha adamuridagua. Ida luba wadügüni?

¹² Resibi waméi aturiahati Bíbülia lau ínsiñeni (Rom. 15:7). Ánhawa adüga lun buidu lan lasandiragun aturiahati Bíbülia lungua tidan Luban Wadamuridagun, chóuruti busenbei lan lasigirun adamuridagua. Busugua wamá lun lau ínsiñehabuni ani barǘ waméi lun lasubudirun amu íbirigu sin wadügün lun lasandiragun lungua wuriba. Mafuresehan wamá asaminara leteniruña lan somu íbiri lun, lugundun másiñati machülügili lan íbiri le íchugubei aturiahani lun o bereseguñein lan etenira lun somu dasi lidan damuriguaü. Aganba waméi le lariñagubei aturiahati woun ani arufuda wamá berese wamá lau. Ka buiti gayaraabei lanügün heresibiruniña aturiahatiña Bíbülia lau ínsiñehabuni? Ariha waméi le lariñagubei Dimitri, le abadiseirúbei fiu irumu guentó, ani leseriwiduña kei ídehati lidan damuriguaü. Dan le laritaguni furumiñeti wéiyaasu lidin adamuridagua, ariñagati: “Aba nerederun bóugudi tun Luban adamuridaguni lau anufudei. Aba larihinina aban íbiri ani lau saragu ínsiñeni, aba lebelaagüdünina múnadoun. Aba taweiridun nanigi lau hayarafadun saragu íbirigu abusuragua nun. Ma lueirin nugundan darí lun busén nan sagü lan hamuga weyu adamuridaguni. Masandirunñahagiidina meha aban katei ítarati”.

13. Ida liña gayara lan líderaguniña wagaburi aturiahatiña?

¹³ Ru wamá aban hénpulu buiti. Gayaraati ladügün wagaburi lun lachoururuni aban aturiahati luagu darí laali lan inarüni (Mat. 5:16). Abahüdahati Vitali, aban prekursoru le awinwandubei Moldavia: “Dan le narihini ida liña lan hawinwandun, hasaminarun luma hóuserun íbirigu ha lídanbaña damuriguaü, aba nachoururuni gefentiña lan luagu Heowá relihión le inarünibei”.

14. Ida luba líderaguniña wani hénpulu amu lun hasigirun awansera?

¹⁴ Anhein busén lubéi aban aturiahati Bíbülia labadiseirun, lunti lawinwanduni le lafurendeirubei. Anihein dan hénrengu lan katei le. Gama lumoun, danme le larihini ida liña lahuudun woun wawinwanduni le tariñagubei Bíbülia, gayaraati lánhingichunu lanigi lun lafalaruni wani hénpulu (1 Ko. 11:1). Ariha waméi tikesin Hanae, to buga uáguboun wayanuha lidan párafu 8. Ariñagatu: “Ariha numuti le nafurendeirubei lidan habagari íbirigu. Lau narihiniña, aba nafurendeirun íchiga gurasu houn amu, lun feruduna nániña luma  lun narufudun ínsiñeni. Súnwandan meha anihein lan katei buiti lun hariñaguni hawagu amu. Busentina meha ítara nan kei hagía”.

15. Según Ariñawagúni 27:17, ka uagu lunti lubéi wadügün umadaguaü hama aturiahatiña ha abasiihabaña adamuridagua?

¹⁵ Gamadagua wamá luma aturiahati. Sagü lachülürün aban aturiahati lidoun adamuridaguni, arufuda wamá berese wamá lau (Fili. 2:4). Moun lumuti wádaragun woungua lidoun libagari, gama lumoun, gayaraati wouchun wasubudiruni buidu lau wálügüdüni ida haña lan liduheñu, ida liña lan lidin lun lidan luadigimari o luagu ida liña lan lidin lun lidan laturiahanu Bíbülia. Gayaraati giñe wariñagun lun buidu lan ladüga luagu furumiñeguarügü asansiruni le warihibei ladügün. Ítara gayaraabei wadügün umadaguaü luma lun wíderaguni awansera darí lun labadiseirun (aliiha huméi Ariñawagúni 27:17). Afuranguagüda tumuti Hanae, to eseriwiduboun kei prekursora guentó, ida liña lan tasandiragun tungua dan le tagumeserunbei aturiahoun Bíbülia. Ariñagatu: “Eibu meha gamadagu nan lidan damuriguaü, busentimatina meha nidin adamuridagua. Meferidirun numuti meha adamuridaguni íbini dan le buchá lan nuagu. Gúndaatina meha násügürün dan hama iseri numadagu, ani íderagua lumutina meha katei le lun nadüraaguni numadagua hama gürigia ha ámubei hafiñen nuéi. Kei le busén nubéi meha nerederun yarafa lun Heowá luma houn íbirigu, aba nanúadirun nabadiseirun”.

16. Ka amu katei gayaraabei wadügüni lun buidu lan lasandiragun aturiahati lungua lidan damuriguaü?

¹⁶ Éibume lawanserun aturiahati, adüga wamá lun lasandiragun lungua keisi lílana damuriguaü. Lun wadügüni lunti wagunbirahani wábiñoun (Ebü. 13:2). Denís, aban íbiri le awinwandubei Moldavia, haritagua lumuti dan le laturiahanbarun Bíbülia, ani ariñagati: “Gíbeti meha wéiyaasu hagunbirahanina íbirigu hábiñoun tau sun nani weiriou lun wásügürün dan hama. Ruti meha gurasu woun waganbuniña abahüdaguei woun ida liña lan líderaguniña Heowá lidan habagari. Íderagua lumutiwa meha dan ligía lun wachoururuni busén wamá weseriwidun lun Heowá ani lagurabahañadiwa lan aban ibagari le buídutimati”. Dan le lagumeserun aban aturiahati Bíbülia apurichiha úara luma damuriguaü, gayaraati wagunbirahani lun lapurichihan wama. Ariñagati aban íbiri bürasilína gíriti Diegu: “Gíbetiña meha íbirigu agunbirihatina lun napurichihan hama. Anihán meha igaburi le buídutimabei lun nasubudiruniña buidu. Ítara liña meha nafurendeirun saragu, ani ábatima nayarafadun lun Heowá luma lun Hesusu”.

17. Ka gayaraabei hadügüni wéiyaaña lidan afiñeni hawagu aturiahatiña Bíbülia?

¹⁷ Hasagarun wéiyaaña lidan afiñeni dan houn aturiahatiña. Wéiyaaña lidan afiñeni, lau ínsiñeni le harufudubei luma lau berese humá hau aturiahatiña gayaraati híderaguniña lun habadiseirun.  Gayaraati san hetenirun houn murusun oura lidan kada adamuridaguni? Harihibei berese humá hau anhein haritagua hiri, dántima le hagumeserun íchiga óunabagülei lidan adamuridaguni. Gayaraati san hasagarun dan lun hidin luma somu íbiri íchiga aturiahani? Gayaraati líderaguni katei le aturiahati saragu. Abahüdaguatu Jackie, aban apurichihatu to awinwanduboun Niheria: “Wagatiña saragu aturiahatiña dan le híchugun fe wéiyaali lan lidan afiñeni íbiri le ñǘdünbei numa íchiga aturiahani. Ariñagatu aban aturiahatu nun: ‘Maweiyasunti le alidihabei tidan niligilisin adügei lira. Hábiñerügüñein rísitiña lidin ani anhein giñe hafayeira’”. Ani guentó tabasiihaña gürigia tuguya adamuridagua.

18. Ida luba hagunfulirun wéiyaaña lidan afiñeni lau buligasion le iridúbei lidan Adügaü 20:28?

¹⁸ Arufudaha humá ani ru humá gurasu lun íbiri le íchugubei aturiahani. Wéiyaaña lidan afiñeni, anihein aban buligasion súdiniti huma lun híderaguniña apurichihatiña lun gapurichihadi hamá ani garufudahadi hagíame (aliiha huméi Adügaü 20:28). Anhein hanufude habéi somu íbirigu harufudahan higibugiñe, ariñaga humá houn huguyaba lan íchigei aturiahani. Ariñagatu Jackie, to uáguboun wayanuha lidan párafu le lubaragiñebei le: “Súnwandan hálügüdünina wéiyaaña lidan afiñeni hawagu gürigia ha aturiahabarun Bíbülia numa. Dan le gaturobulin nan rútiña adundehani le buiti nun”. Gayaraati hadügün wéiyaaña lidan afiñeni saragu katei lun híchugun gurasu luma lun hínchahaniña ha íchugubaña aturiahani lun mábürühan lan harüna (1 Tesa. 5:11). Ariñagatu giñe Jackie: “Hínsiñeti nun híchugun wéiyaaña lidan afiñeni gurasu nun luma lun hariñagun nun gebegi lan áfaaguni le nadügübei houn. Ítara liña dimurei le hariñagubei nun kei aban weru duna diliti lidan lárouga. Adügati le hariñagubei nun lun nasandiragun nungua buidu luma lun gunda nan dan le níchugun aturiahani” (Ari. 25:25).

19. Ka ugundani gayaraabei wasandiruni súngubei wagía?

¹⁹ Íbini anhein mama lubéi wíchuguña aturiahani, gayaraati wíderagun somu gürigia lun laganwoundagüdüni lumadagua luma Bungiu. Sin wayanuhan saragu, gayaraati wíderaguni le íchugubei aturiahani lau dimurei le aranserúati buidu lidan awanha lan íchiga aturiahani. Gamadagua wamá hama aturiahatiña danme le houdin tidan Luban Wadamuridagun ani aban wamá hénpulu buiti houn. Gayaraati giñe híchugun wéiyaaña lidan afiñeni dǘgüdaguaü houn aturiahatiña lau hadireirun lídangiñe hadaani lun hetenirun houn, luma giñe lau harufudahan houn ha íchugubaña aturiahani, luma lau hariñagun houn buidu lan hadüga. Úati ugundani wéiritimati luéi wasubudiruni ídeha wamá murusun lun gayara lan línsiñedun Wáguchi Heowá lun aban gürigia ani seriwi ligía lun.