Gayarati espechali lan aban idewesei anhein ledewehan lubéi aban gürigia gabafuti o aban gürigia le uágubei taweirida wanigi. Háfuga anihein lan idewesei hínsiñetimati woun ladüga líchugun lan aban waduhe woun o aban wamada, íbini maserun lan. Ítara liña idewesei le líchugubei Russell lun Jordan le uágubei wayanuha lidan arütíkulu le lubaragiñebei le. Gama lumoun, ka lánibei le luma idewesei lánina esefuruni?

Furumiñe, ariñagatu Bíbülia: “Arufuda lumuti Bungiu wínsiñe lun lau lóunahani Liráü le ábanrügüti ubouagun gabagari wamaamuga lídangiñe” (1 Huan 4:9). Adügati katei le lun gebegitima lan idewesei le, lugundun úati gürigia íñutimati lilurudun luéi lilurudun Bungiu. Ariñagati aban ebüréu abürühati sálumu luagu Heowá: “Buguyarügüñein [...] le Íñugutimabei ligibuagu sun ubóu!” (Sálumu 83:18). Úati amu gürigia súdinitimati kei Heowá lun líchugun aban idewesei woun.

Libiaman, Bungiu “wáguchibei” (Isaíasi 63:16). Ka uagu wariñagei le? Lugundun ligía íchugubalin wabagari woun, góunigi lumutiwa ani nidiheriti wawagu kei ladiheridun aban úguchili hawagu lisaanigu. Dan layanuhanbei Bungiu hawagu fiú binadu lumutuniña ha únbaña lagúara Éfürain, ariñagati: “Ítara haña lumutuniña Éfürain nun kei aban isaani hínsiñeguti; ligía isaani le hínsiñetimabei nun. [...] Gudemehabutu nanigi lun”  (Heremíasi 31:20). Uguñe weyu, sandi lumuti giñe Bungiu ligiaméme hawagu ha áhuduragubaña lun. Ligía Bungiu Suntigabafu le adügübaliwa, Wáguchi giñe le hínsiñehabubei woun ani wamada. Ligíati, furumiñeguarügü idewesei le líchugun woun gebegiti ani espechaliti.

Anihein idewesei espechaliti ladüga lau lan ínsiñeni lichugúa, mama ladügarügü mosu lan lichugún. Aban gürigia gíchigaditi magurabunti leresibirun ni kata luagu le líchugubei.

Derege lumuti Bungiu Liráü luagu wafulesein ladüga hínsiñe wamá lun. Ariñagatu Bíbülia: “Arufuda lumuti Bungiu wínsiñe lun lau lóunahani Liráü le ábanrügüti ubouagun gabagari wamaamuga lídangiñe” (1 Huan 4:9). Mama yebe lani Bungiu buligasion ladügüni. “Gama lumoun lau lareini Bungiu, richaguaadiwa mafayeihanga ni kata ladüga afayeihaali Kristu” (Rómana 3:24).

Ka san uagu arufuda lubalin Bungiu “lareini” lau idewesei le? Ariñagatu Bíbülia: “Ánheinti Bungiu, arufuda lumuti lueirin línsiñehabu woun lau lóunahani Hesukrístu lun lounwen wawagu, lau sun meha gafigoungidiwa lan” (Rómana 5:8). Ladüga lueirin línsiñehabu, adügati Bungiu aban katei lun lesefuruniña gürigia débilitiña ha dísebaña luéi ani gafigoun hagía. Madüna wamuti yebe línsiñehabu ani siñá wabéi afayeira. Arufuda lumuti Bungiu lueirin wínsiñe lun lau idewesei le líchugubei woun.

Anihein burí idewesei gebegitimati ladüga lueirin sákürifisiu le ladügübei le edewehabalin. Dan le laranserun aban gürigia lun líchugun somu katei woun le wéiriti línsiñe lun, adügati sákürifisiu le ladügübei lun gebegitima lan idewesei ligía woun.

Óunaha lumuti Bungiu “Liráü le ábanrügüti” (Huan 3:16). Úati amu hínsiñetimati lun kei Liráü le lederegeruebei. Lidan sun milu míñunu burí irumu le laubei Bungiu adügei ubóu luma sun le geyegubei wau, ñeinñein Hesusu nadagimein liñúarü ani ligía “íchugubei ugundani lun sun dan” (Ariñawagúni 8:30). Hesusu ligía liráü le hínsiñetimabei lun ligíati: “Lidan Kristu larihíwa Bungiu le marihínwabei” (Kolosana 1:13-15). Úagiña bián gürigia ha úaratiña kei Hesusu luma Heowá.

Gama lumoun, aranseñu liña meha Heowá lun lederegeruni libagari Liráü (Rómana 8:32). Le linarün katei, aba líchuguni le hínsiñetimabei lun. Úagili aban idewesei gebegitimati lun Heowá kei le.

Anihein burí idewesei espechaliti ladüga ladouragun lau le wemegeirubei, háfuga aban katei le megei wamaali lau lóufudagun. Samina humá megei humá árani lun hesefuruni hibagari ani maseinsuntün lun hagañeihani, aba liabin somu gürigia aban lagañeihani árani ligía. Chóuruti heteingirubei lan saragu, adián?

“Ítara kei hóunwegun súngubei ladüga lídangiñe lan Adán hayabin, ítara luba giñe gabagariya hamá súngubei [...] ladüga lánigu hamá Kristu” (1 Korintuna 15:22). Wagía ladügawagun Adán wóunweguña, siñati wesefurun luéi sandi luma óunweni; siñati giñe warandarun luma Bungiu luma lun madurun wamá. Kei gürigia wabéi, siñati wesefurun ni aban gürigia luéi óunweni. Ariñagatu Bíbülia: Úati “ni aban gayaraati lesefuragun lungua ni lun lafayeiruni Bungiu lun lesefuruni libagari”, mabafutiwa lun wadügüni (Sálumu 49:7, 8). Mégeitiwa ídemuei lau lóufudagun, ladüga siñá wamuti lebegi esefuruni afayeira. Siñabei wadügün ni kata lau wabafu guánarügü.

Ínchaha lumuti ínsiñeni Heowá lun lafayeiruni “árani” le wemegeirubei lau sun lugundan lun gayara lan lesefuruni wabagari ani adüga lumuti lau lóunahani Hesusu. Ida liña ladügüni? “Chibá lumuti lita Hesukrístu sun wafigoun”. Lidan amu dimurei, wafiñerun luagu lita Hesusu le áwiyurubei adügati lun ferudunawa lan wafigoun luma lun gabagari wamá le magumuchaditi  (1 Huan 1:7; 5:13). Hasagaruba giñe waduheñu ha hilaguaañabaña buiti lídangiñe lebegi esefuruni, ariñagatu Bíbülia: “Ítara kei lídangiñe lan aban wügüri liabin óunweni ubouagun, ítara giñe, lídangiñe lan aban wügüri [Hesukrístu] liabin hásaarun hilaaña” (1 Korintuna 15:21). *

Sákürifisiu le ladügübei Hesusu ligía idewesei wéiritimati le ibiha wamaalibei ladüga Bungiu lan íchugubalin woun ladüga lueirin línsiñehabu. Úagili ni aban adügüti saragu sákürifisiu wawagu kei Heowá Bungiu. Úagili ni aban idewesei le mégeiwabei lau lóufudagun kei le lánina wesefurun luéi figóu luma óunweni. Ligíati, aba katei móubawati idewesei lani esefuruni.