1, 2. Ka lafurendeirubei aban wéiyaali lidan afiñeni le íchugubei adundehani tun aban íbiri?

 ÁTIRI irumu guentó, aba houdin bián wéiyaaña lidan afiñeni arihoun aban íbiri to lüha madamuridagun tan. Aban hádangiñe aba laliihan saragu bérusu tun luagu lunti lan tadamuridagun. Saminati íbiri le íderagua lanu bisida ligía íbiri to, dan le héibuga lan aba tariñagun houn: “Ibidiñegubeiti hun ka lan násügürübei”. Rúhaña meha íbirigu adundehani tun sin hálügüdünün ka lan titurobulinbei. Ligíati masandiruntu íbiri luagu íderagua hamaaru lan.

² Haritagua láagili wéiyaali lidan afiñeni le aliihabalin bérusu le asuseredubei: “Oura ligía aba nasaminarun luagu menebenehabu tan. Dan le nasaminarun buidu buidu, lubaragiñe hamuga naliihan saragu bérusu tun, lunti hamuga meha nadügün álügüdahani tun kéiburi ‘ida biña?’, ‘ida liña basandiragun bungua?’, ‘ka ida babusenra lun wíderagunibu?’”. Furendeiti wéiyaali lidan afiñeni le aban katei súdiniti, ani guentó ábanhali wéiyaali le íderagubaliña amu lau ínsiñehabuni.

3. Kátaña gayaraabei híchugun adundehani o eweridihani lidan damuriguaü?

 ³ Wéiyaaña lidan afiñeni ha óunigirubaliña lubúeingu Heowá gánibalin buligasion lun híchugun adundehani houn ha emegeirubalin o lun hererehan houn. Anihein burí dan mégeiwa hamá amu íbirigu ha lídanbaña damuriguaü lun híchugun adundehani o ererehóuni. Kei hénpulu, másiñati anihein lan somu íbiri lunti líchugun eweridihani lun aban lumada tau Bíbülia. (Sal.  141:5; Ari. 25:12). Gayaraati giñe tíchugun aban íbiri derebuguharu adundehani tun aban nibureingiru lau tayusuruni adundehani le iridúbei tidan gárada lun Titu 2:3-5. Kábati wariñaga houn agübürigu? Mosu giñe hererehan houn hasaanigu ani adundeha hamañame súnwandan. Íbini houn lan wéiyaaña laranserúa aturiahani le, sun wagía wasagaruba buiti lau wasubudiruni ida luba lan wíchugun adundehani o eweridihani le buiti ani le huuti “lun tagundaarun anigi” (Ari. 27:9).

4. Kaba álügüdahani ounabúa lidan aturiahani le?

⁴ Lidan aturiahani le, wóunabuba gádürü álügüdahani luáguti lichugúniwa adundehani o eweridihani: kátima san lébunabei?, mégeiwati san?, kátaña lúnbaña híchuguni?, ida luba wíchuguni lun buidu lan léiguadun?

5. Ka uagu chouru lubéi lánharuba lan aban gürigia lun ererehóuni anhein ichugúa lun lau ínsiñehabuni? (1 Korintuna 13:4, 7).

⁵ Hínsiñetiña íbirigu houn wéiyaaña lidan afiñeni. Anihein dan arufuda hamuti ínsiñeni ligía dan le hererehan lun aban íbiri le genegebei lárügüda lan aban luriban üma (Gal. 6:1). Guentó, dan le lererehan lan aban wéiyaali lun aban íbiri, lunti lasaminarun luagu fiu igaburi lánina ínsiñeni le uágubei layanuha apostolu Pábulu: “Le hínsiñehabubei gaguraasunti, areidati. […] Súfuri lumuti le hínsiñehabubei sun katei; afiñe lumuti sun katei; aguraba lumuti sun katei; ani awanda lumuti giñe sun katei” (aliiha huméi 1 Korintuna 13:4, 7). Lau lararamagun wéiyaali lidan afiñeni asaminara luagu bérusu burí le, líderagubei lun larihini anhein ínsiñeni lubéi lébunabei lererehan. Chóuruti lánharuba lan aban gürigia lun ererehóuni dan le lasandiruni aban lan gürigia le nidiheribei luagu ererehabei lun (Rom. 12:10).

6. Ka hénpulu buiti líchugubei Pábulu lidan lererehan?

⁶ Aban hénpulu buiti apostolu Pábulu houn wéiyaaña lidan afiñeni. Kei hénpulu, madarasahanti lun lererehan houn íbirigu ha Tesalónikabaña dan le hemegeirunbalin. Tidan ligaradan ariñagati houn furumiñe buidu lan hadüga ladüga úaragua hamá lidan dasi le hadügübei lau ínsiñehabuni luma lau awanduni. Saminati giñe luagu le gádanbaliña ani ariñagati houn subudi lan lun hawanduña lan lénrengunga luma éibaahouni (1 Tesa. 1:3; 2 Tesa. 1:4). Ani ariñagati giñe houn aban lan hénpulu hagía houn amu kristiánugu (1 Tesa. 1:8, 9). Ma funa hagundan dan le heresibirubei saragu dǘgüdaguaü! Chouru hamuti meha hínsiñe hamá lun Pábulu. Ligíati ererehóuni le líchugubei houn tidan bián gárada to lóunahaboun houn buiti heresibiruni (1 Tesa. 4:1, 3-5, 11; 2 Tesa. 3:11, 12).

7. Ka uagu añahein lubéi gürigia wuribati lábürühan ererehóuni houn?

⁷ Ánhawa erereha lidan aban igaburi le mabuidunti, gayaraabei lasuseredun le lariñagubei aban wéiyaali lidan afiñeni le subudihali saragu: “Añahein hagía wuribati léiguadun ererehóuni houn, mama ladüga wuriba lan le ariñawagúbei, le turobulibei ladüga mariñawagún lan lau ínsiñeni”. Ka wafurendeirubei? Ménrengunti lun lánharun gürigia lun ererehóuni dan le ínsiñeni lan lébunabei, mama igañi.

8. Ka álügüdahani gayaraabei ladügüni aban wéiyaali lidan afiñeni lúniwagua lubaragiñe lererehan lun aban íbiri?

⁸ Moun lumuti hóufudahan wéiyaaña lidan afiñeni lun hererehan. Lubaragiñe lererehan aban wéiyaali lun aban íbiri, lunti lálügüdagun lungua: “Megei lumuti san ererehóuni le? Chouru numuti san ladügüña lan katei wuribati? Ladügüña san aban katei le uágubei tariñaga Bíbülia mabuidun lan o ladügüña aban katei le mígirun lumutina nisaminan lun nadügüni?”. Aban wéiyaali lidan afiñeni le chuti lau móufudahanti erereha (Ari. 29:20). Anhein  machourun lubalin ka lan anügübei fulasu, gayaraati layanuhan luma amu wéiyaali lun larihini anhein anihein lubéi resun tídangiñeti Bíbülia lun hererehan lun íbiri ligía (2 Tim. 3:16, 17).

9. Ida luba háyeihani wéiyaaña lidan afiñeni Pábulu dan le hererehan lun aban íbiri luagu ligaburi ladaüragun luma laranseragun lungua? (1 Timotéu 2:9, 10).

⁹ Ariha wamá aban hénpulu. Samina wamá nidiheri lan aban wéiyaali luagu ligaburi lasansiragun o laranseragun aban íbiri lungua. Gayaraabei lálügüdagun lungua: “Anihein san resun tídangiñe Bíbülia lun níchugun eweridihani lun?”. Kei mabusenrun lan wéiyaali lidan afiñeni lun lidin lau le lasaminarubei, gayaraati lamuriahan ídemuei luma amu wéiyaali o luma aban íbiri le derebuguti lafiñen. Biángubei hagía gayaraabei hakutihani le lariñagubei apostolu Pábulu tuáguti daüguaü luma luagu laranseragun gürigia lungua (aliiha huméi 1 Timotéu 2:9, 10). Míchuti Pábulu aban lísüta luagu le gayara lubéi gürigia adüga lumoun le siñá lubéi adüga. Ayanuharügüti luagu adundehani tídangiñeti Bíbülia libügürü lasansiragun gürigia keisi lubudubu, lau lubuidun igaburi luma lau lichú au. Subudi lumuti lunti lan hanúadirun kristiánugu ida luba lan hasansiragun luma haranseragun houngua, marabachunrügaaña ligía luagu le uágubei tariñaga Bíbülia mabuidun lan. Lidan hasaminaruña lan wéiyaaña anhein lunti lubéi hererehan lun aban íbiri, lunti hakutihani anhein arufuda lubéi íbiri ligía lubuidun igaburi luma lichú au.

10. Ka lunbei waritaguni libügürü le hanúadirubei kada gürigia?

¹⁰ Haritagua waméi gayara lan ámuñegueinarügü lan hasaminan bián íbirigu ha derebuguti hafiñen luáguti ítaga katei. Úati mini lan le wuriba lan le lasaminarubei le aban ani buidu lan le lasaminarubei le aban. Ligíati, madügüdara wamá luagu ni aban lun hadügüni le wasaminarubei luagu ka lan buídubei luma ka lan wuribabei (Rom. 14:10).

11, 12. Anhein mégeiwa lubéi lun lererehóun lun aban íbiri, ka lunbei lálügüdagun aban wéiyaali lidan afiñeni lungua, ani ka uagu?

¹¹ Anhein chouru wabalin lunti lan lererehóun lun aban íbiri, kátaña san lúnbaña hadügüni? Kei hénpulu, lubaragiñe lererehóun tun aban íbiri to maríeiharu o lun aban irahü le hábiñegili, lunti layanuha aban wéiyaali lidan afiñeni furumiñe luma tichügüdina muna. Másiñati busenbei lan tichügüdina muna lun ligía lan erereha houn tílana luban o lun ñein lan danme le lererehan aban wéiyaali lidan afiñeni. * Anhein aban lubéi íbiri nibureingiru, másiñati buídubei lan lun aban lan íbiri to derebuguharu erereha tun, ítara kei lariñawagúa lidan  párafu 3.

¹² Anihein ámuya álügüdahani le lunbei hadügüni wéiyaaña lidan afiñeni: “Au funá san buídubei lun níchuguni eweridihani le, o anihein  amu íbiri buítimati lun líchuguni?”. Kei hénpulu, aban gürigia to asandiraguboun tungua ni kata tan, másiñati buídubei lan lun aban lan wéiyaali le sandiguañahaali lungua ítara íderaguoun, lugundun lóuseruboun lau ínsiñeni. Inarüni sun wéiyaaña lidan afiñeni gani hamuti buligasion lun hínchahaniña íbirigu lun hadügüni asansiruni le mégeiwabei según le tariñagubei Bíbülia. Anhein anihein lubéi gürigia mégeiti lun lererehóun lun, le súdinitimabei lun lererehóuniwa lun.

13, 14. Ka uagu súdini lubéi lun híchugun wéiyaaña arigei?

¹³ Gichigadibá arigei. Dan le laranserun aban wéiyaali lidan afiñeni lun lererehan, lunti lálügüdagun lungua: “Subuditi san nun ka lan gádanbalin íbiri ligía? Subuditi san nun ka lan asuseredubei lun? Lagagibudaguña san luma aban turobuli le ibidiñeti nun? Kátima san lemegeirubei guentó?”.

¹⁴ Adundehani le lídanbei Santiagu 1:19 hounti ha ererehabaña o íchugutiña adundehani. Abürühati Santiagu: “Kada aban hídangiñe lunti aranseñu lan lun laganbun, gama lumoun lunti hámaru lan lun ladimurehan luma lun lagañidun”. Moun lumuti lasaminarun aban wéiyaali lidan afiñeni subudi lan lun sun le gádanbalin íbiri le unbei mosu lan lererehan. Haritaguagüda lumutiwa Ariñawagúni 18:13, le ariñagubei: “Libidiounigan aau ani nibusigarídünati giñe hóunabun gürigia lubaragiñe haganbun”. Le buídubei lalügüdǘniwa gürigia ligía, lun lira mégeiwati lichugúniwa arigei. Ligía lafurendeirubei wéiyaali lidan afiñeni le buga uágubei wayanuha lidan lagumeseha aturiahani le. Aba líchugun fe lubaragiñe lan hamuga lagumeserun lau ariñahani le aranse láalibei, lunti lan hamuga yebe ladügün álügüdahani tun íbiri, kéiburi le: “Ida hiña?, ida liña hasandiragun hungua?, ka idan megei humá ídemuei?”. Ánhaña áfaagua wéiyaaña lidan afiñeni lun hasubudiruni ka lan gádanbaliña íbirigu, chóuruti hasubudirubei lan ida luba lan híderaguniña íbirigu luma híchugun gurasu houn.

15. Ida luba hafalaruni wéiyaaña adundehani le lídanbei Ariñawagúni 27:23?

¹⁵ Subudi humaña lumutuniña Bungiu buidu. Kei buga warihini, lun buidu lan lidin woun lidan wíchugun adundehani lun somu íbiri, úati buídurügü lan waliihan fiu bérusu lun ni fiu adundehani. Mégeitiña íbirigu harihini nidiheri wamá hawagu, gunfuranda wamaniña ani busén wamá wíderaguniña (aliiha huméi Ariñawagúni 27:23). Lunti háfaagun wéiyaaña lidan afiñeni lun gamadoun hamá hama íbirigu.

16. Ka lunbei hadügüni wéiyaaña lidan afiñeni lun buidu lan léiguadun ererehóuni le híchugubei?

¹⁶ Lunti háfaagun wéiyaaña lun masaminarun hamá íbirigu dánrügüñein lan hemegeirun íbirigu ererehóuni hayanuha hama. Lubaragiñe lira, lunti gagaburi hamani gayanuhadi hamá hama ani berese hagíame hau dan le hásügürün lídangiñe lénrengunga. Ariñagati aban wéiyaali le subudihali anhein lan hadüga wéiyaaña lidan afiñeni le, gamadaguabaña lan hama íbirigu buidu. Ariñagayati: “Danme le lemegeirun íbiri  ligía lun lererehóun lun, ménrenguntimabei houn wéiyaaña lun hadügüni”. Lanwoun lira, íbiri le unbei lererehóua ménrenguntimabei lun lánharun lun ererehóuni.

17. Ka sügǘ ídanbei súdini lan lun harufudun wéiyaaña gaguraasuni luma ínsiñehabuni?

¹⁷ Arufuda humá gaguraasuni luma ínsiñeni. Súdiniti lun larufudun gürigia gaguraasuni luma ínsiñehabuni dan le maha lan aban gürigia lun ererehóuni furumiñe, ni lun somu adundehani tídangiñeti Bíbülia o darasa lan lafalaruni le ariñawagúbei lun. Moun lumuti hagañidun wéiyaña dan le lasuseredun katei le. Lunti hafalaruni lani Hesusu hénpulu le uágubei lariñawagúa lidan aban profesía: “Gudemehabubei houn gürigia ha gudemebaña keisi aban maburu le baruguaali, luma houn ha débilibaña lidan hafiñen keisi aban lanpu le ñegumémeeli” (Mat. 12:20). Ligíati lunti lubéi lamuriahan wéiyaali lidan afiñeni luma Heowá lidan furíei lun líderaguni gürigia le emegeirubalin ererehóuni lun lafalaruni le ariñawagúbei lun. Másiñati megei lan dan lun lasaminarun luagu le ariñawagúbei lun. Anhein gaguraasun lubéi wéiyaali lidan afiñeni ani hínsiñehabu ligía, leteniruba gürigia lun le ariñawagúbei lun mama lun ligaburi lariñawagún. Súnwandan lunti tídangiñebei lan Bíbülia ererehóuni o adundehani le lunbei lichugúniwa.

18. a) Ka lunbei waritaguni dan le wererehan? b) Kei warihini tidan iyawaü luma lidan rekuáduru, ka lunbei hakutihani agübürigu lubaragiñe hererehan lun aban hasaani?

¹⁸ Furendei humá lídangiñe hichara. Kei le súngubei lan wagía charatiwa, siñati wafalaruni adundehani le lídanbei aturiahani le buidu buidu (Sant. 3:2). Wachararuba, lau sun lira, mosu wáfaagun lun wafurendeirun lídangiñe wachara. Anhein hariha íbirigu hínsiñe hamá woun ménrengunbei houn lun feruduna hamaniwa ánhawa adüga o ariñaga somu katei le adügübei lun wuriba lan hasandiragun houngua (ariha huméi giñe rekuáduru “ Ariñahani houn agübürigu”).

19. Ida luba wagundaaragüdünun hanigi wábirigu?

¹⁹ Kei warihini, mama aban katei ménrengunti lichugún adundehani o ererehóuni le buiti  léiguadun. Sun wagía gafigountiwa, dandu ha ererehabaña kei ha eresibirubalin. Ligíati haritagua waméi adundehani le wakutihabei lidan lagumeseha aturiahani le. Dan le wererehan lun aban íbiri adüga waméi lau aban lubuidun igaburi. Lanwoun lira, chouru waméi anhein mégeiwa lubéi lichugúniwa adundehani ligía ani ka lan gürigia buídubei lun líchuguni. Adüga wamá álügüdahani ani ru wamá arigei lun wasubudiruni ka lan gádanbalin gürigia. Áfaagua wamá lun wíchaagun woungua lidoun halugaarun. Óusera wamaña íbirigu lau ínsiñehabuni ani gamadagua wamá hama. Mabulieida waméi le wabusenrubei: wíchugun adundehani le buiti léiguadun luma lun wagundaaragüdünun anigi (Ari. 27:9).