1, 2. a) Ka uagu hénrengu lubéi houn saragu hafiñerun hawagu ha gabafubaña? b) Kaba wariha lidan aturiahani le?

 UGUÑE WEYU, hénrenguhaali houn saragu gürigia hafiñerun hawagu ha láubaña ubafu. Ka uagu? Ladüga ariha hamani luéigiñetima lan hóubadina rísitiña hama gabafutiña lidin lúrudu luma burí polítika, ánhañati ha gudemebaña, wuribati houserúniwa. Ligía tariñagunbei Bíbülia: “Ubafu le luágubei gürigia lun ladügün damichi lun gürigia líledi” (Apur. 8:9). Lanwoun lira, adügaali giñe luriban hagaburi tábutigu relihión lun añahein hamá gürigia ígiruti hafiñen luagu Bungiu. Ligíati, mosu lubéi wíderaguniña gürigia ha aturiahabaña Bíbülia wama afiñera luagu Bungiu luma hawagu ha líridubaña lun hadundehaniwa ya ubouagu.

² Mámarügüñanu ha aturiahabarun Bíbülia wama lúnbaña hafiñerun luagu Heowá luma tuagu lóundarun. Wagía le barühalibei saragu irumu lidan inarüni lunti giñe wasigirun afiñera igaburi lan le aubei ladügei Heowá katei ligía lan buídutimabei, ladüga gayaraati ladügün somu sügǘ lun lóuchawagun wafiñen. Wayanuhaba luagu ǘrüwa lídangiñe lidan aturiahani le. Furumiñe, dan le waliiha somu burí abahüdaguni tídangiñeti Bíbülia. Libiaman, dan le weresibirun adundehani túmagiñe lóundarun Heowá. Ani lǘrüwan, danme le wagagibudagun luma óuchawaguni túteme.

3. Ka uagu gayara lubéi ladügün somu burí abahüdaguni tídangiñe Bíbülia lun lóuchawagun wafiñen luagu Heowá?

 ³ Dan le waliihanu Bíbülia, másiñati álügüdagua wamá woungua ka lan uagu lóuseraña Heowá fiu gürigia lidan ítaga igaburi  o ka lan uagu ladüga ítaga katei. Kei hénpulu, tidan líburu to gíriboun Furumiñetu Lúrudu aliihatiwa siadi lani Heowá aban ísüraelina lun lounwen ladüga labudahan watu lidan luéyuri emeraaguni. Ánheinti tidan Tibiaman Liliburun Samueli aliihatiwa luagu le asuseredubei fiu sígulu lárigiñe, le ídanbei feruduna lani Heowá urúei Dawidi luagu lagabarahan tuma aban würi óunaha ligía áfaragüdei tani weiriei (1 Lur. 15:32, 35; 2 Sam. 12:9, 13). Másiñati álügüdagua wamá woungua: “Ka san uagu feruduna lubalin Heowá Dawidi luagu aban figóu wéiriti ani siádilei aban wügüri lun lounwen luágurügü aban katei le menegeti weiri lan luriban?”. Ariha wamá ǘrüwa resun le lunbei gabaroun wamani dan le waliihanu Bíbülia?

4. Ida liña líderaguniwa Agumesehani 18:20, 21 luma 2 Lúrudu 10:17 lun wafiñerun luagu le ladügübei Heowá?

⁴ Mafuranguagüdün tumuti Bíbülia sun lácharagun katei. Kei hénpulu, subudi wamuti asaküriha lan Dawidi tídangiñe sun lanigi luagu sun katei wuribati le ladügübei (Sal. 51:2-4). Ati wügüri le adüraagubalin lúrudu luáguti luéyuri emeraaguni, asakürihati meha san luagu le ladügübei? Dürügua laali meha san lugumadin Heowá luagu aban dan? Meberesegúnti meha san lau leweridirúniwa, maha ligía laganbuni? Mariñagun tumuti Bíbülia. Gama lumoun, gayaraati wachoururuni “madügün lan Heowá marichaü” (2 Lur. 32:4). Liibe-agei dan, charatiwa lidan le wasaminarubei ladüga wígiraguagüdün woungua lun le hasaminarubei amu o ladüga warabachun luágurügü aban oubaü. Mítaranti Heowá, gabaroun lumuti sun le asuseredubei (aliiha huméi Agumesehani 18:20, 21; 2 Lúrudu 10:17). Eibu wasubudiruni Heowá luma lilurudun, afiñetima báadiwa luagu le ladügübei. Ligíati, dan le waliihanu Bíbülia ani aba burí liabin álügüdahani wachügüwagun le siñabei wóunabuni guentó, le subudi wamaalibei luagu Heowá buídurügüti lun wafiñerun “richá lan lidan sun lémeri” o le ladügübei (Sal. 145:17).

5. Ka lánibei figóu lidan luáguti warihini liricha katei? (Ariha huméi rekuáduru “ Adügati figóu lun marihin wamani liricha katei”).

⁵ Adügati figóu lun marihin wamani liricha katei. Kei lenege guánarügü lan Bungiu ladügawa, mínsiñeti marichaü woun (Agu. 1:26). Ligíati, kei le gafigoun wabéi, charatiwa lidan ligaburi wasaminan, íbini anhein afiñe wabéi anihein lan sun ariñahani wama. Haritagua waméi le  asuseredubei lun Honasi. Aba lagañidun saragu dan le larufudunbei Heowá gudemehabu houn lílana Níniwe (Hon. 3:10–4:1). Gama lumoun seremei le ladügübei Heowá, séfutiña 120,000 níniwena. Lagumuhóun, le achararubei Honasi, mama Heowá.

6. Ka uagu mama lubéi mosu lafuranguagüdüni Heowá woun sun le ladügübei luma le lunbei ladügüni?

⁶ Mama mosu lafuranguagüdüni Heowá sun katei woun. Inarüni lidan meha binadu dan ígirati meha Heowá lun hariñaguni fiu lubúeingu le hasaminarubei luagu le ladügübei luma le lunbei ladügüni (Agu. 18:25; Hon. 4:2, 3). Anihein meha dan, afuranguagüda lumuti ka lan uagu ladüga ítaga katei (Hon. 4:10, 11). Lau sun lira, mama mosu lafuranguagüdüni sun ariñahani woun. Ligía Adügübaliwa, memegeirun lumuti wariñaguni lun ka lan buídubei lumoun le wuribabei ni lubaragiñe ladügün aban katei, ni lárigiñe (Isa. 40:13, 14; 55:9).

7. Kátaña san gürigia ha uágubei gayara lan mafiñen wamá, ani ka uagu?

⁷ Másiñati chouru wamani súnwandan lan ladügüni Heowá le buídubei. Lau sun lira, másiñati giñe gürewei lan woun lun wafiñerun hawagu ha líridubaña ya ubouagu lun hadundehaniwa. Gayaraati álügüdagua wamá woungua anhein hadügüñein lubéi katei kei labusenruni Heowá o kei habusenruni. Háfuga aniha lan le asuseredubei houn hádangiñe gürigia ha lídanbaña tidaani Bíbülia. Samina wamá luagu hénpulu le lídanbei  párafu 3. Háfuga giñe álügüdagua lan aban hádangiñe liduheñu wügüri le adüraagubalin lúrudu luáguti luéyuri emeraaguni anhein álügüda lubalin Moisesi Heowá lubaragiñe lasiadiruni wügüri ligía lun lounwen. Másiñati ligía lan giñe asuseredubei lun aban lumada Uríasi le étüna. Agabarahaali meha Dawidi tuma lani Uríasi weiriou, ani háfuga álügüdagua lan lumada Uríasi lungua anhein layusuruñein lubéi Dawidi lubafu keisi urúei lun lesefurun lídangiñe abeichúni le yebe yuubei lun. Le inarünibei: siñati wariñagun afiñe wamá luagu Heowá anhein mafiñen wabéi hawagu ha líridubaña ya ubouagu lun hadundehaniwa, ha uágubaña lafiñera.

8. Ida liña genegegua lan le ariñawagúbei lidan Adügaü 16:4, 5 luma ligaburi léibugun katei lidan damuriguaü uguñe weyu?

⁸ Uguñe weyu, yusu lumuti Heowá “musu úaraguati ani gunfuranda ligía” lun labuguruni fánreinti tani lóundarun to ubouaguboun (Mat. 24:45). Ítara kei sétanu le arihibei lau apurichihani lidan furumiñeti sígulu, ladundehañein giñe Musu Úaraguati dasi lánina apurichihani lidan sun ubóu, ru ligía adundehani houn wéiyaaña lidan afiñeni ha lídanbaña burí damuriguaü (aliiha huméi Adügaü 16:4, 5). Áfaaguatiña wéiyaaña lidan afiñeni lun lafalarúniwa adundehani le lidan damuriguaü. Ánhawa afalarei adundehani le tíchugubei lóundarun Heowá luma le híchugubei wéiyaaña, warufudubei afiñe wamá luagu ligaburi ladügüni Heowá katei.

9. Ka burí idan sügǘ ídanbei hénrengu lan woun wídehan lidan le hanúadirubei wéiyaaña lidan afiñeni, ani ka uagu?

⁹ Anihein dan hénrengu lan woun lun wídehan luma le hanúadirubei wéiyaaña lidan afiñeni. Kei hénpulu, lidan lagumuhóun burí irumu le, adügǘwaali saragu burí asansiruni lidan saragu damuriguaü luma giñe lidan sirkuitu. Anihein burí kesi, lun gayara lan tayusurúniwa Luban Adamuridaguni buidu, amuriahatiña wéiyaaña lidan afiñeni hama íbirigu lun háguyun lidoun amu damuriguaü. Anhein hamuga asusereda le woun, gayaraabei hénrengu lan woun lun wígiruniña waduheñu hama wamadagu. Ariñaga lumuti san Heowá houn wéiyaaña lidan afiñeni haliñounba lan hóunahaña kada íbirigu? Uá. Ani gayaraati ladügün katei burí le  lun hénrengu lan woun wafalaruni adundehani le híchugubei woun. Ligíati, afiñeti Heowá luagu le hanúadirubei, lunti giñe wadügüni ligiaméme. *

10. Según lariñaguni Ebüréu 13:17, ka uagu lunti lubéi wídehan hama wéiyaaña lidan afiñeni?

¹⁰ Ka uagu lunti lubéi wídehan lidan le hanúadirubei wéiyaaña lidan afiñeni íbini anhein mínsiñe lubéi woun? Lugundun dan le wadügüni, ídehatiwa lun ñein lan úarani hadan lumutiña Bungiu (Efe. 4:2, 3). Lanwoun lira, ibihatiña sun lílana damuriguaü buiti dan le ǘnabugu wamá sun wagía ánhara wagía lun le hanúadirubei wéiyaaña lidan afiñeni (aliiha huméi Ebüréu 13:17). Le súdinitimabei arufuda wamuti afiñe wamá luagu Heowá, ladüga ligía íridubaliña wéiyaaña lidan afiñeni lun hóunigiruniwa (Adü. 20:28).

11. Kaba íderaguawa afiñera luagu hadundehan wéiyaaña lidan afiñeni?

¹¹ Kaba íderaguawa lúntima wafiñerun luagu hadundehan wéiyaaña lidan afiñeni? Waritaguni amuriaha hamá sífiri sandu luma Heowá dan burí le hanúadira lan somu katei le gániti luma damuriguaü. Gabaroun hamuti giñe adundehani le tídanbei Bíbülia luma tadundehan lóundarun Heowá. Ayumahatiña tídangiñe sun hanigi lun hagundaaragüdüni Heowá luma lun hóunigiruniña íbirigu buidu buidu. Subudi hamuti wügüriña úaraguatiña ha hararamuba lan ligibugiñe Heowá luagu ligaburi hadügüni hadasin (1 Fe. 5:2, 3). Samina wamá luagu le: lidan aban ubóu le ídanbei anihein lan fánreinguaü ladüga burí ámuñegueinarügü rasa, relihión, luma polítika; ánheinti wagía lídanñadiwa úarani eseriwida lun ábanrügü Bungiu le inarüniti. Furanguti larufuduni le labiniruñoun lan Heowá lóundarun.

12. Ka burí álügüdahani lunbei hadügüni wéiyaaña lidan afiñeni houngua lun harihini anhein asakürihaali lubéi aban gürigia?

¹² Rúhali Heowá aban buligasion súdiniti houn wéiyaaña lidan afiñeni lun hakipuruni damuriguaü harumañu. Ligíati, anhein adüga aban kristiánu aban figóu wéiriti, agurabati Heowá lun hanúadirun wéiyaaña lidan afiñeni anhein gayaraagili lubéi lasigirun kristiánu ligía keisi lílana damuriguaü. Mosu harihini anhein asakürihaali lubéi gürigia ligía tídangiñe sun lanigi. Lunti hadügüni álügüdahani burí hóuniwagua: íbini ariñagaali lan gürigia ligía asakürihaali lan, le san lúgubu iyereegu lan figóu le ladügübei lun? Le san lúgubu aranseñu liña lan lun méiguadun lan lidoun ligiaméme figóu? Anhein hagübüri lubéi umadagu adügübei lun léiguadun lidoun figóu ligía, aranseñu liña san lun ladüraaguni lumadagua hama? Furíeitiña wéiyaaña lidan afiñeni lun Heowá, akutiha haméi katei según le tariñagubei Bíbülia ani gabaroun hamuti giñe igaburi le larufudubei gürigia luagu le ladügübei. Ábati hanúadirun anhein gayara lubéi lasigirun keisi lílana damuriguaü o siñá lan. Según kesi, másiñati mosu lan labugún afigouhati ligía lídangiñe damuriguaü (1 Ko. 5:11-13).

13. Ka gayaraabei ladiheridagüdüniwa anhein abugúa aban waduhe o aban wamada lídangiñe damuriguaü?

¹³ Anhein abugúa aban gürigia lídangiñe damuriguaü le mama wamada ni waduhe, másiñati wánharuba lan lau lumenrengun lun le hanúadirubei wéiyaaña lidan afiñeni. Ánheinti aba lubéi gürigia le úmabei buidu lan wanaagua woungua? Gayaraabei hamuga ladügün katei le lun lóuchawaguniwa wafiñen hawagu wéiyaaña lidan afiñeni. Másiñati wasaminarun makutihan hamani sun katei buidu o maguseragüdün hamá kei lariñaguni Heowá. Kaba íderaguawa arihei le hanúadirubei wéiyaaña lidan afiñeni lau aban lubuidun igaburi?

14. Ka lunbei waritaguni anhein hanúadira wéiyaaña lidan afiñeni lun labugún aban waduhe o aban wamada lídangiñe damuriguaü?

 ¹⁴ Lunti waritaguni aban lan aransehani lúmagiñeti Heowá abugúni lun lubuidun guánarügü damuriguaü luma lun giñe lubuidun guánarügü gürigia le afigouhabei. Anhein hamuga igirúa aban gürigia lidan damuriguaü le masakürihanti, ábanbei hamuga luriban hénpulu lun damuriguaü (Gal. 5:9). Lanwoun lira, másiñati míchubei lan hamuga fe luagu luriban figóu le ladügübei ani mosu lan giñe lasansiruni ligaburi lisaminan luma lóuserun lun labuiduragüdüni lumadagua luma Heowá (Apur. 8:11). Lunti wachoururuni ariha hamani wéiyaaña lidan afiñeni hani buligasion kei aban katei sériuti lau hanúadirun anhein mosu lubéi labugún aban gürigia lídangiñe damuriguaü o mama lan mosu. Ítara kei binadu aguseragüdütiña Ísüraeli, subudi hamuti “mámaba lidan hiri wügüriña haguseragüda, lídanba liri Wabungiute” (2 Kro. 19:6, 7).

15. Ka uagu megei wabéi wafiñerun luagu ladundehan Heowá uguñe weyu sügǘ lau amu dan?

¹⁵ Yarafatimarügaali lagumuchagüle ubóu le. Ligía lunti lubéi wafiñerun luagu ligaburi ladügüni Heowá katei uguñe weyu. Lídanme óunwenbu asufuriruni másiñati weresibiruba lan adundehani le genegeti woun amu lan, mabuidun lan, meseriwín ligía. Chóuruti mayanuhanbei lan Heowá wama gagibugu. Chóuruti layusurubaña lan ha líridubaña uguñe weyu ubouagu lun hadundehaniwa lun híchugun adundehani woun. Mámame anihán lun liabin machouruni woun lun wálügüdagun woungua anhein lúmagiñeti lubéi Heowá adundehani ligía o anhein hadügüñein lubéi íbirigu hagía katei kei le aubei habusenra. Wafiñeruba san luagu Heowá luma tuagu lóundarun lidan dan súdiniti le? Líderagubadiwa ligaburi wóunabun lun adundehani le tíchugubei lóundarun Heowá woun uguñe weyu lun wasubudiruni óunabagülei. Anhein afiñe wabéi luagu adundehani le weresibirubei uguñe weyu ani gaganbadi wagía lun lau lóufudagun, chóuruti wadügübei lan ligiaméme lídanme óunwenbu asufuriruni (Luk. 16:10).

16. Ida luba lóuchawagun wafiñen yarafa madise luagu le lunbei ladügüni Heowá?

¹⁶ Anihein amu sügǘ le uágubei lunti lan wasaminarun: kaba lanme wadüga danme le laguseragüdüniña Heowá gürigia lídanme lagumuchagüle ubóu le. Guentó hemenigitiwa lun heseriwidun saragu gürigia lun Heowá, waduheñu haganagua, lubaragiñe lagumuchagüle ubóu. Ligíati lubeiti, lídanme Arümahedón layusurubei Heowá Hesusu lun harihin kaba lan hadüga hau (Mat. 25:31-33; 2 Tesa. 1:7-9).  Mama woun yu lan wanúadirun ka lan gayaraabei libihini lugudemehabu Heowá (Mat. 25:34, 41, 46). Wafiñeruba san luagu Heowá, o wíchugubei wanagan luagun ladüga magundan wamá lau le ladügübei? Furanguti: lunti wederebudagüdüni wafiñen luagu Heowá guentó lun gayaraabei lan wafiñerun luagu sunsuinagubei ámuñegü.

17. Kaba buiti lanüga le lunbei ladügüni Heowá danme le lagumuchun ubóu le?

¹⁷ Saminarügü humá ida luba lan wasandiragun woungua lídanme iseri ubóu danme le warihini buiti le lanügübei le ladügübei Heowá. Úaarume relihión mama inarünitu, ni laburiña bísinisi igaaduatiña, ni gumadimatiña ha asufuriragüdübaliña gürigia uguñe weyu. Dandu átuadi, aweiyaduni luma hóunwegun waduheñu labulieidúaba. Ladaürǘba Satanási hama lumafianu luagu 1,000 irumu. Sunme wuribani le ladügübei lebedaagun úaalime (Aruf. 20:2, 3). Ma lueirin ugundani le wasandirubei ladüga wafiñerun luagu ligaburi ladügüni Heowá katei!

18. Ka wafurendeirubei lídangiñe hani ísüraelina hénpulu le uágubei layanuhóua lidan 1 Lúrudu 11:4-6 luma 21:5?

¹⁸ Ñeinbei funa san sügǘ lidan iseri ubóu le óuchagubalin wafiñen luagu ligaburi ladügüni Heowá katei? Samina wamá luagu le asuseredubei lárigiñebei lesefuruniña Heowá ísüraelina lídangiñe amudirawaguni Ehiptu. Aba hagumeserun fiu hádangiñe ekehara ladüga meha áluga hamá luagu éigini buiti le meha héigibei ñein, arufuda hagía iyereegu tan maná to líchuguboun Heowá houn (aliiha huméi 1 Lúrudu 11:4-6; 21:5). Gayaraati san lasuseredun aban katei ítarati lárigiñeme óunwenbu asufuriruni? Ibidiñeti woun átiribei lan wadagimanu wadügün lun warumadahani Ubóu luma lun wadügüni ábanme paraísu. Háfuga ñeinbei lan saragu katei lun ladügǘniwa ani gürewei ligíame ibagari lidan lagumeseha. Wekeheruba san luagu le lunbei líchuguni Heowá woun lídanme dan ligía? Anhein geteingiradi wabéi luagu le líchugubei Heowá woun uguñe weyu chóuruti geteingiradi báadiwa lan ámuñegü.

19. Ida luba hariñaguni lidan murusun dimurei puntu súdiniti le lídanbei aturiahani le?

¹⁹ Súnwandan buidu lan ligaburi ladügüni Heowá katei. Ani lunti chouru wamani lira. Lunti giñe wafiñerun hawagu gürigia ha líridubaña lun hadundehaniwa. Maweiyasun wamá abulieidei le lariñagubei Heowá liyumulugugiñe profeta Isaíasi: “Lídanbei darangilaü luma emenigini here” (Isa. 30:15).