1. a) Ka uagu gayara lubéi lererehan somu gürigia woun? b) Ka uagu súdini lubéi lun waganbuni ererehóuni?

 SUN wagía anihein dan megei wamá lun lererehóun woun. Anihein dan wagía amuriahabei adundehani hama gürigia ha inebebaña woun. Lidan amu kesi, gayaraati ladiheridun aban íbiri wawagu ani aba lasubudiragüdüni woun genege lan wabürühan lan “lidoun figóu”, mini lan le, wayarafaduña lan lun wadügün somu katei le gayaraabei wasakürihan lárigiñe (Gal. 6:1). O másiñati lererehóun woun lárigiñe héiguaadiwa lan lidoun aban figóu wéiriti. Meberesenga ka lan gádanbaliwa lunti waganbuni ererehóuni, ladüga lun wabuidun guánarügü ani gayaraati lesefuruni wabagari (Ari. 6:23).

2. Según Ariñawagúni 12:15, ka uagu lunti lubéi waganbuni ererehóuni?

² Ínchaha lumutiwa bérusu le ídangiñebei lasagarúa aturiahani le lun waganbuni “le hariñagubei ha chúbaña aau” (Ari. 22:17). Úati gürigia le subudi hábuti lun sun katei; gama lumoun, súnwandan anihein lan somu gürigia le gíbeti lisubudin o le wínwanhali sügǘ wau (aliiha huméi Ariñawagúni 12:15). Ligíati, dan wíchugun arigei lun ererehóuni warufuduñein ǘnabugu wamá luma luagu subudi lan woun ka lan wayaraabei adüga lumoun le siñá wabéi, ani rútiwa giñe fe megei wamá ídemuei lun wibihini le wabusenrubei wibihin lidan wabagari. Lau lídehan Heowá bürǘ lumuti urúei Salomón dimurei burí le: “Según hibe eweridihatiña labuidura aransehani” (Ari. 15:22).

3. Ida liña gayara lan líderaguniwa ererehóuni?

³ Anihein ererehóuni furanguti ani anihein giñe ererehóuni lábugiñegua. Ka wabusenrubei wariñagun dan le wayanuhan luagu ererehóuni lábugiñegua? Wayanuhaña luagu adundehani le weresibirubei dan le waliihan somu ariñahani tidan Bíbülia o tidan wani agumeiraguagüdüni le adügübei lun wasaminarun luagu ida  liña lan wadügüni katei ani ínchaha lawa adügei asansiruni le mégeiwabei (Ebü. 4:12). Kati ererehóuni furangubei? Gayaraati le lan líchugubei aban wéiyaali lidan afiñeni o furumiñeguarügü amu íbiri le derebuguti lafiñen, dan le líchugun fe mosu lan wabuiduragüdüni somu igaburi le wuribabei wawagu. Anhein erereha aban íbiri woun hínsiñerügü waña lun saragu. Ligíati arufuda wamá geteingiradi lau waganbuni íbiri le ani falá waméi adundehani le líchugubei woun.

4. Según Apurichihati 7:9, ka igaburi lunbei magaburi wamani dan le lererehóun woun?

⁴ Le linarün katei, ererehóuni le furanguti, ligía hénrengubei woun, anihein dan wuribati wasandiragun woungua dan le lariñawagún woun. Ka uagu? Maturobulintiwa lau wasubudiruni chará wamá. Gama lumoun, dan le lariñagun somu gürigia woun chará wamá o anihán lan wadüga, másiñati hénrengu lan woun lun wánharun lun wachara (aliiha huméi Apurichihati 7:9). Háfuga wáluahan lébuna le wadügübei, o wálügüdagun woungua ka lan uagu lariñagei dimurei le woun o wasandiragun woungua wuriba luagu ligaburi lariñaguni. O wasaminarun: “Marichati lun liabin erereha nun? Íbini ligía charati giñe!”. Ani lanwoun lira anhein magundan wabéi lau ererehóuni gayaraati lasuseredun woun lun meberesen wamá lau le ariñawagúbei woun o wayanuha luma amu gürigia agurabañu lun lariñaguni woun le wabusenrubei waganbun.

5. Kaba wariha lidan aturiahani le?

⁵ Lidan aturiahani le, wakutihabei hani fiu gürigia hénpulu ha lánina tidaani Bíbülia ha amaharubaña lun ererehóuni, luagu le aban oubaü, warihibei le hani ha ánharubaña lun ererehóuni. Warihibei giñe ka lan gayaraabei líderaguniwa lun wánharun lun ererehóuni lúmati ida luba lan lidin woun anhein wafalara.

6. Ka wafurendeirubei lídangiñe le ladügübei Roboamü?

⁶ Ariha waméi lani Roboamü hénpulu. Dan le lañuurubei luagu lálana arúeihani Ísüraeli, aba hamuriaha gürigia luma lun lahualidaguagüdüniña lídangiñe ihürügu le líchugubei Salomón le lúguchi hawagu. Adügati Roboamü aban katei buiti: aba lamuriahan ídemuei hama wéiyaaña mutu ha ísüraelibaña. Aba hariñagun lun, anhein lan ladüga le hariñagubei lílana ageiraü híderagubei lan súnwandan (1 Uru. 12:3-7). Kei le aubei warihei genegeti mínsiñe lan adundehani le lun Roboamü ladüga aba lidin amuriaha adundehani hama wügüriña ha liseisin. Wügüriña meha hagía chóuruti lóugiñe lan 40 irumu hau ani subudi hali meha murusun luáguti ibagari houn (2 Kro. 12:13). Ítara liña lubeiti, aba híchugun aban adundehani mabuidunti lun Roboamü dan ligía: aba hariñagun lun lun lan lederaagüdün houn lílana ageiraü (1 Uru. 12:8-11). Resibiti Roboamü bián adundehani. Gayaraati hamuga meha lafurieidun Roboamü lun lálügüdahan luma Heowá kaba lan lídangiñe bián adundehani le lafalara, gama lumoun, madügün lumuti ítara. Aba lánharun lun adundehani le hínsiñetimabei lun: le híchugubei wügüriña ha liseisingu. Ani wuribati le asuseredubei dandu lun kei houn lílana ageiraü. Lidan wakesin gayaraati mama lan súnwandan gúndaabadiwa lan lau adundehani le ichugúbei woun. Ánheinti tídangiñeti lubéi Bíbülia lunti wánharun lun.

7. Ka wafurendeirubei lídangiñe le asuseredubei lun Osiasi?

⁷ Máhati meha giñe urúei Osiasi lun ererehóuni. Aba lebelurun lidoun aban fánreinti tidan ténpulu lun lágudaha kupali, ani fádirigurügüñanu yebe lunbei hebelurun ñeinhin. Aba hariñagun lun Osiasi: “Urúei Osiasi, úati yu lan bun lun bágudahan kupali lun Wabureme, fádirigu ha ladügawagun Aarón ha anuadirúaañabaña lun hadügüni, houn yu lan lun hadügüni”. Ka ladügübei Osiasi? Ariñagatu Bíbülia “aba lagañidun”. Ka san uagu lamahada lun ererehóuni? Chóuruti samina lan kei lan urúei lan, gayara lan ladügüni le labusenrun.  Gama lumoun, mama ítara liña larihini Heowá. Lun hamuga ǘnabugu lan Osiasi, lánharuña hamuga lun ererehóuni aba hamugati láfuridun ténpulurugugiñe lau lóufudagun, másiñati feruduna lubéi lan hamuga Heowá. Ladüga lawügürihóun aba labeichuni Heowá lau lépüra, rédeiti sandi le luagu “darí weyu le lóunwenbei” (2 Kro. 26:16-21). Ka wafurendeirubei lídangiñe le asuseredubei lun Osiasi? Ánhawa lan amahada lun ererehóuni le tídangiñeti Bíbülia weferidirubei lugundan Heowá meberesenga kátawa lan.

8. Ida liña lóunabun Hobu dan le lererehóubei lun?

⁸ Daritiwa tidan Bíbülia hénpulu hani gürigia ha ánharubaña lun ererehóuni, ani biní lumutiña Bungiu. Ariha waméi likesin Hobu. Íbini chará lan meha Hobu busenti meha lagundaaragüdüni Bungiu. Dan le meha ladügüdarunbei luagu ariñagati meha dimurei le moun lumuti. Ligía lererehanbei dandu Eliú kei Heowá lun furangu. Ida liña lóunabun Hobu lun ererehóuni? Ǘnabuguti ani ánhati lun ererehóuni. Ariñagati: “Nadimurehaña […] luagu burí katei le úati gunfuranda nani”. Ani ariñagayati: “Ligía nasakürihanbei, ñun lidan kaliki luma baligi”. Biní lumuti Heowá Hobu ladüga ǘnabugu lan (Hob. 42:3-6, 12-17).

9. Ida liña lóunabun Moisesi dan le lererehanbei Heowá lun, ani ka uagu aban lubéi hénpulu buiti woun?

⁹ Aban meha hénpulu buiti Moisesi le ánharubei lun ererehóuni lárigiñebei ladügün aban óunwenbu charati. Luagu aban dan, aba lígiraguagüdün lungua lun igañi ani míchuti uéiriguni lun Heowá. Ligía mebelurun lubéi lidoun Fulasu Füramasewati (1 Lur. 20:1-13). Dan le lariñagunbalin Moisesi lun Heowá wuriba lan lasandiragun lungua ladüga le asuseredubei, aba lariñagun Heowá lun: “Hebé! Hebé badimurehan nun luagu katei le” (2 Lur. 3:23-27). Lubaragiñe lerederun Moisesi lau íruni ánhati lun le ariñaga laalibei Heowá ani sigiti Heowá ayusurei kei ábuti lun néchani Ísüraeli (2 Lur. 4:1). Dandu Hobu kei Moisesi aban hénpulu buítiña hagía woun. Sansi lumuti Hobu larihini katei ani málugunti líchuguni duru hawagu amu. Lidan likesin Moisesi ánhati lun ererehóuni lúmagiñeti Heowá ani seriwiti lau úaraguni íbini lárigiñe leferidirun aban katei le wéiribei lebegi lun.

10. a) Según Ariñawagúni 4:10-13, ida liña lahuudun wánharun lun ererehóuni? b) Ka lubuidun igaburi harufudubei fiu íbirigu?

¹⁰ Ánhawa áyeihaña wügüriña úaraguatiña ha kei burí Hobu luma Moisesi buídubei lidin woun (aliiha huméi Ariñawagúni 4:10-13). Saragu gürigia adüga hamaali katei le. Kei burí Emmanuel, aban íbiri le awinwandubei Republika Demokrátiku lani Kongo, resibiti adundehani hámagiñe fiu íbirigu. Ariha waméi le asuseredubei: “Aba híchugun fiu íbirigu ha derebuguti hafiñen ha lídanbaña damuriguaü le ñein nubéi fe, larabahaña lan numadagua luma Heowá, aba híderagunina. Aba nafalaruni le hariñagubei nun, seremei nafalaruni le hariñagubei nun aba nadisedun luéi saragu turobuli”. * Ariñagatu aban prekursora to awinwanduboun Kanadá to gíriboun Megan: “Adundehani le ichugúbei nun mama burí súnwandan ligía lan nabusenrubei naganbun, lau sun lira megei numuti”. Ariñagati aban íbiri Kroasiana gíriti Marko: “Feriditina meha aban dasi, ligíati lubeiti, adundehani le meha ichugúbei nun íderagua lumutina lunya gamadagua nan luma Bungiu”.

11. Ka katei uágubei líchiga íbiri Karl Klein fe?

¹¹ Aban hénpulu, le lani íbiri Karl Klein, le meha asagarubei buiti lídangiñe ererehóuni, ani dan lárigiñe aban meha hádangiñe lílana Musu Úaraguati ligía. Abahüdahati lidan aban sügǘ luáguti libagari, luagu lan aban dan aba lan lererehan íbiri Joseph Rutherford lun furangu, aban meha besi lumada. Ariñagati íbiri Klein, dan le lan lererehanbei íbiri Rutherford  lun wuriba lan léiguadun le lariñagubei íbiri Rutherford lun. Afuranguagüdati Karl: “Dan le larihibalina íbiri Rutherford aba labusurun nun lau ugundani: ‘Ida biña Karl!’. Keiti anahagua lubéi lau magundani lárigiñe le lariñagubei nun, aba nóunabuni lau aban umalali hámaruti. Ábati lóunabun íbiri Rutherford: ‘Karl, góunigibatia! Busenti Mafia labürügüdünibu tidoun lisadara!’. Aba nasandirun busiganu, aba nóunabuni: ‘Aah, masuseredunti ni kata íbiri Rutherford’. Subudi lumuti luagu neyeedaguña lan, ligíati ábaya leweridirunina: ‘Okei, góunigiba. Busenti Mafia lábürügüdünibu tidoun lisadara’. Linarün meha! Lugundun dan le lareidahan gürigia igarihabu, lúntima aban gürigia le garichati lun lererehan woun [...] wígiraguagüdüña woungua lun wábürühan tidoun lisadaran Mafia” (Efe. 4:25-27). * Ánhati íbiri Klein, lun ererehóuni le líchugubei íbiri Rutherford lun, ani sigitiña gamadagua buidu buidu.

12. Ida liña líderaguniwa ǘnabuguni ánhara lun ererehóuni (Sálumu 141:5).

¹² Líderagubadiwa ǘnabuguni lun wánharun lun ererehóuni o lun adundehani. Adügati igaburi le lun waritaguni chará wamá luma anihein lan dan adüga wamá katei lau libidiounigan au. Kei le aubei warihei charati meha ligaburi lasaminarun Hobu ani dan lárigiñe aba lasansiruni ligaburi lisaminan. Ani arufudati Hobu ǘnabuguni ani ánhati lun lererehan Eliú lun íbini nibureingili lan Eliú luéi (Hobu 32:6, 7). Biní lumuti Heowá Hobu ladüga ǘnabugu lan. Íderagua lumutiwa giñe ǘnabuguni lun gaganbadi wamá lun ererehóuni íbini wasaminarun memegeirun wamani o dan le lan burí aban lan gürigia le nibureingili sügǘ wau ererehabei woun. Ariñagati aban wéiyaali lidan afiñeni kanadáana: “Maríaguntiwa woungua kei harihiniwa amu. Ligíati, ida luba wawanserun anhein ua ererehatiña woun?”. Ida luba san gagaburi wamani igaburi le líchugubei sífiri lun gayara lan wasigirun awansera kei máisturu? (Aliiha huméi Sálumu 141:5).

13. Ida luba warihini ererehóuni le wibihibei?

¹³ Ariha waméi ererehóuni kei aban katei le arufudubalin hínsiñe wamá lun Bungiu. Busén lumuti Heowá le buídubei woun (Ari. 4:20-22). Dan le líchugun adundehani woun tidan Lererun, tidan aban agumeiraguagülei o lúmagiñe lan aban íbiri le derebuguti lafiñen, larufuduña Heowá hínsiñe wamá lun. Ani kei lariñagun lidan Ebüréu 12:9, 10, adüga lumuti “lun wasagarun buiti lídangiñe”.

14. Kaba un wetenira danme le lererehóun woun o wadundehoun?

¹⁴ Teni wamá lun le ariñawagúbei woun, mama ida liña lan lariñawagún woun. Anihein dan genege lan woun, gürigia lan le ererehabei woun mariñagun lumuti lan dimurei lidan aban igaburi  buiti. Inarüni, gürigia le ererehabei lunti láfaagun lun lererehan lidan aban igaburi le ménrengunti lun lanharún lun lererehan (Gal. 6:1). * Anhein woun lubéi lererehóua, lunti wetenirun lun le ariñawagúbei woun, íbini wasaminarun mabuidun lan ligaburi lariñawagún woun. Gayaraati wálügüdagun woungua: “Íbini magundan nan lau ligaburi lariñaguni nun, linarün funa san le lariñagubei nun? Gayaraati san meberesen nan lau lichara ani sagá aume buiti lídangiñe le lariñagubei nun?”. Buídubei lun wasagarun buiti lídangiñe furumiñeguarügü ererehóuni o adundehani le íchugubei woun (Ari. 15:31).

15. Ka uagu buidu lubéi lun wamuriaha adundehani?

¹⁵ Ínchaha tumutiwa Bíbülia amuriaha ídemuei. Ariñagati Ariñawagúni 13:10: “Hámañein ha ǘnabugubaña lichú aau”. Ma inarüni lan dimurei le! Ha amuriahabaña adundehani lubaragiñe herederun agurabaha lichugún houn hagíatima awansetimabaña lidan hamadagua luma Bungiu. Ligíati, da waméi furumiñeti pasu ani amuriaha wamá adundehani.

16. Ka idan sügǘ gayara lan wamuriahan adundehani?

¹⁶ Ka idan sügǘ gayara lan wamuriahan ídemuei luma somu íbiri le lídangiñeti damuriguaü le ñein wabéi? Ariha wamá fiu lídangiñe. 1) Aban íbiri amuriaha tuma aban apurichihatu to lǘharu lidan inarüni lun tidin tuma íchiga aturiahani ani lárigiñe aba tálügüdünu ka lan idan lunti lan tabuiduragüdüni tíchugun aturiahani. 2) Aban íbiri mamarieidungiru busentu nagañeihan fiu galasun, ábati tamuriaha tuma aban íbiri derebuguti tafiñen lun tariñaguni tun ka lan tisaminanbei tuagu galasun to tabuserunboun tagañeihan. 3) Aban íbiri líchigaali furumiñeti liyanun lidan damuriguaü, ábati lamuriahan luma aban íbiri le subudihali, lun laganbuni, lun líchugun fiu adundehani lun lárigiñe. Íbini íbirigu ha barühaña saragu irumu íchiga yanu, buídubei hadüga lun hamuriahan ídemuei hama amu íbirigu luma lun hafalaruni adundehani le ichugúbei houn.

17. Ka lunbei wadügüni lun wasagarun buiti lídangiñe adundehani?

¹⁷ Chóuruti weresibiruba lan fiu ererehóuni o adundehani le furanguti o le lábugiñeguati yarafa madise. Danme le lasuseredun, haritagua waméi le wafurendeirubei lidan aturiahani le: ǘnabugu wamá, teni wamá lun le ariñawagúbei woun —mama ida liña lan lariñawagún woun— ani adüga waméi le ariñawagúbei woun. Úati ni aban agüriahóunti lau lichú aau. Íbini ítara, ánhawa íchiga arigei lun ererehóuni o lun eweridihani ani anha wagíame lun, haritagua waméi füramase tan Bíbülia lachuuduba lan wau (Ari. 19:20).