LIDAN meha tidaani Bíbülia, dan le hamarieida lan bián gadaraduntiña afayeihati meha adari tuagu ladari houn tagübürigu. Gayaraati meha lafayeihan lau ílagu le gebegiti, hau animaalugu o lau seinsu. Anihein burí giñe dan gayara lan lafayeihan lau wadagimanu, kei meha le asuseredubei lun Hakobu dan meha le lamarieida lan tuma Rakeli. Aba ladügün daradu luma límedi luagu lawadigimariduba lan sedü irumu tuagu (Agu. 29:17, 18, 20). Ka san uagu lasigirúa igaburi le lun lafayeihóuniwa tuagu adari?

Ariñagatu aban sásaamu to subudihabutu luagu ariñahani le tídanbei Bíbülia to gíriboun Carol Meyers: “Fáyeiti le, ligía aban lídangiñe fáyeiti le ichugúbei houn tagübürigu adari luagu wadagimanu le meha lunbei madügün taali lan hábiñe tagübürigu danme le tamarieidun. Súdiniti meha le houn iduheñu ha meha bunaguaü hafisiutebei”. Gayaraati giñe leseriwidun fáyeiti tuáguti adari, lun lóundaragun umadagu le hádanbei bián iduheñu ha. Ani lidan lidaani lénrengunga bián iduheñu ha gayaraati híderagun hámagua. Arufudati giñe lafayeirúniwa seinsu tuagu adari, gadaradunhaaru lan ani mámaaru lanme lábugiñe lererehan túguchi, lábugiñehaaru lanme lererehan tani weiriei ani ligíaali lanme óunigiroun.

Lau lafayeirun gürigia tebegi aban würi, úati mini lan lira lagañeinhañoun lan o taluguruña lan kamá hamuga le aban ílagu. Ariñagatu líburu Instituciones del Antiguo Testamento: “Mosu meha lederegerúniwa átiri seinsu o aban katei líbeina lira houn tagübürigu adari, genegeti meha houn binadu ísüraelina aba lan agañeihani maríei ligía. Mámatima […] liábiña igaburi le lun lafayeirúniwa tebegi aban würi, adügǘwati meha keisi aban idewesei houn tagübürigu würi”. *

Uguñe weyu, anihagua igaburi le lidan fiu ageiraü luáguti lafayeirúniwa tebegi adari. Anhein maweinamun lubéi hagu agübürigu kristiánugu mamuriahanbaña lóugiñe le lunbei lichugún tuagu adari (Fili. 4:5; 1 Ko. 10:32, 33). Ítara luba harufuduni maweinamun lan hagu luagu seinsu (2 Tim. 3:2). Ánhaña mamuriahan aban ebegi le íñuti, masansirun lubéi adari luéyuri maríei lúnrügü gayara lan libihin lanwoun seinsu le lunbei lafayeirún tuagu adari. Ánheinti prekursoru lubéi adari, mígirun lubéi leseriwidun kei prekursoru lun lidin awadigimarida dan dayarüti lun gayara lan libihini seinsu ligía.

Anihein burí ageiraü ubouagu góunigiwati átiribei lan amuriahóuti tuagu adari. Lidan burí fulasu le, inebeti lúrudu houn agübürigu kristiánugu. Ladüga agurabati Bungiu hámagiñe agübürigu kristiánugu lun “gaganbadi hamá houn gumadimatiña” luma lun gaganbadi hamá lun lúrudu le máhalachagun lumuti lilurudun ageiraü (Rom. 13:1; Adü. 5:29).