ARIÑAGATI meha lúrudu le líchugubei Heowá lun Moisesi anha lan lun hadagaragüdüniwa dugurue hama unhun lun. Súnwandan meha ayanuhóua lan hawagu dunuru ha lidan lúrudu le ayanuhabei luagu adagaragüdüni. Gayaraati meha hadagaragüdün ísüraelina aban hádangiñe animaalu ha (Fad. 1:14; 12:8; 14:30). Buiti meha katei le lugundun mama meha súnwandan hadarirúniwa dugurue. Ariha waméi ka lan uagu.

Dariwatiña meha dugurue Ísüraeli lidan lidaani lárouga. Sagü lidan diisi-hati (múberugu), aba burí houdin animaalugu ha luagun suru, lidoun burí ageiraü le ñein lubéi saragu lárouga, lárigiñe aba hagiribudun Ísüraelin lidan lidaani lubachouga (Ure. 2:11, 12; Her. 8:7). Ligíati, lidan lidaani lidiliga hénrenguti meha houn ísüraelina lun hadarirun dugurue lun hadagaragüdün.

Ánhañati unhun, mídintiña meha ni halía, ani dariwatiña meha Ísüraeli furumiñeguarügü dan lidan irumu. Lanwoun lira, galügün hamutiña meha giñe gürigia (ariha huméi giñe Huan 2:14, 16). Según aban líburu, “héchutiña meha gürigia lidan sun aüdü luma lidan sun fulasu Palestína agüriaha unhun. Tidan sun muna anihein meha aban huyu luagu touba lun hawinwandun unhun ñein” (ariha huméi giñe Isaíasi 60:8).

Ka larufudahabei le woun luagu Heowá? Aban lan Bungiu hínsiñehabuti ligía ani gunfuranda lumutiña gürigia, lugundun ánhati meha lun hadagaragüdün ísüraelina animaalugu ha gayaraabei hadarirúniwa lidan sun irumu.