1. a) Ida liña wasubudiruni hesefurúba lan meha lumutuniña Bungiu tídangiñe Babilónia to Wéiriboun? b) Kaba burí álügüdahani wóunaba?

LIDAN arütíkulu le lubaragiñebei le arihatiwa redei hamá meha kristiánugu ha úaraguabaña lábugiñe tubafu Babilónia to Wéiriboun. Chülüti san dan lun hesefurún? Anha, ladüga ruti Bungiu gumadi houn lumutuniña tidan Bíbülia lun háfuridun tídangiñe Babilónia to Wéiriboun (aliiha huméi Arufudúni 18:4). Arufudati le hesefurúba lan meha kristiánugu lídangiñe relihión mama inarüniti. Ídaba meha san lasusereda lira? Lun wasubudiruni, furumiñe mosu wóunabuni álügüdahani burí le: Ka meha desidírü habéi Aturiahatiña Bíbülia hadügün tibügürü Babilónia to Wéiriboun lúmagiñe lubaragiñe irumu 1914? Apurichihatiña san íbirigu lau ubebeni lidan lidaani Furumiñeti Wuribu Wéiriti? Lábugiñeñanu meha san tubafu Babilónia lidan sun dan ligía ladüga megei hamá lererehóun houn?

2. Ka desidírü habéi Aturiahatiña Bíbülia hadügün íbini lubaragiñe Furumiñeti Wuribu Wéiriti?

² Susereti Furumiñeti Wuribu Wéiriti labadinagua irumu 1914  luma 1918. Saragu irumu lubaragiñe, ariha laali meha Charles Taze Russell hama amu Aturiahatiña Bíbülia luagu marufudahóun lan inarüni le tídanbei Bíbülia lidan relihión mama inarüniti. Ligía desidírü habéi hadisedun luéi relihión mama inarüniti. Lidan irumu 1879, ariñawagúaali meha tidan garüdia to lidan inglesi sun lan ligilisi to ariñagatu tuougua ladari tan Kristu ani dáguatu tungua hamoun gumadimatiña tídangiñetu lan Babilónia to Wéiriboun, to uáguboun tayanuha Bíbülia keisi aban horu (aliiha huméi Arufudúni 17:1, 2).

3. Ka hadügübei Aturiahatiña Bíbülia lun harufuduni furihaña lan lídangiñe relihión mama inarüniti? (Ariha humóun iyawaü lidan lagumeseha arütíkulu).

³ Subudi hamuti meha kristiánugu úaraguatiña ha awinwandubaña lidan dan ligía mabinirun lubaña lan Bungiu ánhaña máfuridun lídangiñe relihión mama inarüniti. Ligía hóunahanbei saragu hádangiñe aban gárada tidoun haligilisin to ídanboun hariñaga mámaaña lan tílana ligilisi tuguya. Añahein hádangiñe aliiha hamutu gárada tuguya ligilisirugu hagibugiñe sun ha ñéinbaña. Lidan fulasu le ñein lubéi siñá lan hadügüni, óunahatiña aban gárada lun kada tílana ligilisi. Ígira hamuti Aturiahatiña Bíbülia furangu mabusenrun hamá ni kata luma relihión mama inarüniti. Fiú irumu lubaragiñe dan ligía, gayarati hamuga meha hounwen luagu katei ligía. Gama lumoun, lídounbei irumu 1870 maweirin haali meha hídehan lurúeitegu saragu ageiraü tuma ligilisi kei meha luagu aban dan. Ligíati, gayarahali meha hayanuhan furangu tuagu Bíbülia ani gayarati meha íbini hariñagun magundan hamá lau le tarufudahabei haligilisin.

4. Ka meha gunfuranda habéi Aturiahatiña Bíbülia tibügürü Babilónia to Wéiriboun lidan lidaani Furumiñeti Wuribu Wéiriti ani ka hadügübei?

⁴ Aba gunfuranda hamani Aturiahatiña Bíbülia ua lan buídurügü lan hariñagun houn haduheñu, hamadagu luma houn tílana haligilisin furihaña lan lídangiñe relihión mama inarüniti. Busentiña meha hariñaguni lun sun ubóu aban lan horu Babilónia to Wéiriboun. Ligíati lúmagiñe duusu-hati lidan irumu 1917 darí lagumeseha irumu 1918, lau ubebeni afanreinhatiña fiuraü milu Aturiahatiña Bíbülia ha lídanbaña dan ligía 10 míñunu tratadu to meha ídanboun láfurida arütíkulu le gíribei “La caída de Babilonia”. Tidan tratadu tuguya ayanuhatiña meha manufudeuga luagu katei burí mabuidunti le ladügübei relihión mama inarüniti. Aba hasafaragun lábutigu relihión. Gama lumoun, mararamun lumutiña katei le Aturiahatiña Bíbülia. Desidírühaña meha hasigirun apurichiha lun ‘haganbuni le lariñagubei Bungiu lubaragiñe le hariñagubei wügüriña’ (Adügaü 5:29). Sun katei le arufudati magumeserun hamá kristiánugu eredera lábugiñe tubafu Babilónia lidan lidaani Furumiñeti Wuribu Wéiriti. Le linarün katei, hesefuraguña meha houngua lídangiñe relihión mama inarüniti ani híderaguña meha amu adügei ligiaméme.

5. Ida liña wasubudiruni apurichiha hamá íbirigu lau ubebeni lidan lidaani Furumiñeti Wuribu Wéiriti?

⁵ Lidan binadu dan ariñagatiwa meha féridi hamani lubúeingu Bungiu lufulesein lidan lidaani Furumiñeti Wuribu Wéiriti ladüga mapurichihan hamá lau ubebeni. Saminatiwa meha ligía lan lígirunbei Heowá lun herederun lábugiñe tubafu Babilónia to Wéiriboun luagu fiú dan. Gama lumoun ariñagatiña íbirigu wügüriña hama würiña úaraguatiña ha meha eseriwidubaña lun Bungiu labadinagua irumu 1914 luma 1918 luagu áfaagua hamá keisi sétanu lun hadügüni sun hayaraati lun hasigirun apurichiha. Dan le gunfuranda wamani buidu sun le asuseredubei houn Aturiahatiña Bíbülia lidan irumu burí ligía, gayarati buídutima lan gunfuranda wamani fiú sügǘ le uágubei tayanuha Bíbülia.

6, 7. a) Ka haturóbulinbei Aturiahatiña Bíbülia lidan lidaani Furumiñeti Wuribu Wéiriti? b) Ka arufudubalin weiri lan ubebeni le meha hawagubei Aturiahatiña Bíbülia?

⁶ Beresegutiña meha Aturiahatiña Bíbülia lidan apurichihani lidan lidaani wuribu. Gama lumoun gagibuguatiña giñe luma fiú turóbuli. Ariha wamá biama lídangiñe. Furumiñe ladüga meha siñagua hamá houngua lun hapurichihan táurügü Bíbülia. Héchuhaña meha lun ígirarügü hamá somu agumeiraguagüdüni lun tuguya lan afuranguagüdei inarüni tídangiñeti Bíbülia. Líburu The Finished Mystery (Lagumuchun libidiñewa inarüni) aban tídangiñe. Ligía hénrengu lubéi meha apurichihani houn besafu íbirigu dan le hamahadunbei gumadimatiña lun tayusurún líburu to lidan lagumeseha irumu 1918. Le libiaman turóbuli susereti ladüga lídanmeme lan irumu ligía lagumesera aban sandi le meha subudiwabei kei gripe española. Kei weiri lubéi meha lalugurahadi sandi ligía, hénrenguti meha houn íbirigu  haweiyasuhan lun houdin apurichiha. Íbini ítara, adüga hamuti meha Aturiahatiña Bíbülia sun hayaraati lun hasigirun apurichiha.

⁷ Fiuraü íbirigu ha meha añaheinbaña lidan irumu 1914 hagía arufudubalin “Foto-Drama de la Creación”. Lidan programa ligía anihein meha dibuhu lau pelikula luma amuri, wéiriti meha lubuidun programa ligía lidan dan ligía. Abahüdaguati meha luagu habagari gürigia lúmagiñe ladügǘn Adán darí lumoun lagumuchun milu irumu lánina larúeihan Kristu. Lidan furumiñeti irumu le láfuridunbei, ariha hamuti hóugiñe nefu-míñunu gürigia. Lóugiñe hanumerun gefentiña luagu Heowá ha añaheinbaña uguñe weyu ubouagu. Arufudati amu ariñahani luagu chülǘ hamá hóugiñe 809,000 gürigia lidoun adamuridaguni Meriga lidan irumu 1916. Ani lidan irumu 1918 chülütiña hóugiñe 950,000 gürigia lidoun adamuridaguni. Chóuruti weiri lan meha ubebeni le hawagubei Aturiahatiña Bíbülia.

8. Ka meha hadügübei Aturiahatiña Bíbülia ha arihibaña lau wadagimanu lánina apurichihani lun híchugun erei houn íbirigu lidan lidaani Furumiñeti Wuribu Wéiriti?

⁸ Lidan lidaani Furumiñeti Wuribu Wéiriti, áfaaguatiña íbirigu ha arihibaña lau wadagimanu lánina apurichihani lun híchugun agumeiraguagüdüni luma gurasu houn sun Aturiahatiña Bíbülia. Seremei hínsiñehabu luma hídehan, ibihatiña íbirigu erei lun hasigirun apurichiha. Apurichihati meha íbiri Richard Barber lau ubebeni lidan irumu burí ligía. Ariñagati: “Ibihatiwa lun hasigirun fiú óunigirutiña sirkuitu lau hawadigimari, ani sigiti giñe tafanreinhóun garüdia The Watch Tower. Íbini lun meha óunaha wamá tídangiñe lidoun ageiraü le gíribei Kanadá, ñein lubéi meha máhawa lan tun”. Ani ariñagati: “Gachansintina meha lun nóunahan fiú líburu The Finished Mystery to ñǘbüritu houn fiú íbirigu ha meha uéibaña tagidarúa hani. Amuriahati meha íbiri Rutherford wama lun wadügün adamurini wéinamuti lidan saragu ageiraü Meriga luma lun wóunahan íchugutiña yanu íchiga gurasu houn íbirigu”.

9. a) Ka uagu megei habéi meha lubúeingu Bungiu hadügün asansiruni labadinagua irumu 1914 luma 1919? b) Íbini mosu lan meha hasansirun lubúeingu Bungiu fiú katei, ka lunbei masaminarun wamani?

⁹ Aniheingua meha katei lunti hasansiruni Aturiahatiña Bíbülia. Úati meha gunfuranda hamani buidu ka lan mini lubéi gumadi tídangiñeti Bíbülia luáguti lunti lan gaganbadi wamá houn gumadimatiña (Rómana 13:1). Ligía meha makipurun habéi úaraguni lidan lidaani wuribu. Kéiburi dan le lamuriahanbei lurúeite Meriga hama gürigia lun lan hafurieidun luagu darangilaü weyu 30 lidan seingü-hati lidan irumu 1918. Ínchaha tumutiña meha garüdia to lidan inglesi Aturiahatiña Bíbülia lun hadügüni. Añahein meha íbirigu íchugutiña seinsu lun hídehan  lidan wuribu, ani añahein amu asudarahatiña ñüdün hagía awuribuha. Kei aubei warihei, mégeitiña meha hasansirun. Gama lumoun moun lumuti wasaminarun lábugiñeñanu lan meha tubafu Babilónia ladüga hadügüni katei burí le. Le linarün katei, lidan lidaani Furumiñeti Wuribu Wéiriti hagumuchuñein meha háfuridun lídangiñe relihión mama inarüniti (aliiha huméi Lúkasi 12:47, 48).

10. Ida liña meha harufuduni Aturiahatiña Bíbülia inebe lan ibagari houn?

¹⁰ Inarüni úati lan meha gunfuranda hamani Aturiahatiña Bíbülia buidu ka lan mini lubéi mádaragun hamá houngua lidoun luáguti ubóu. Gama lumoun gunfuranda hamuti meha wuriba lan áfarahani. Ligía íbini lubéi meha ha asudarahabaña mayusurun hamutu hárumate lun háfarun somu gürigia. Ligía meha ounahóua habéi fiú hádangiñe ligibugiñoun wuribu lun hafarún.

11. Ida liña meha hóunabun gumadimatiña dan le maha habéi Aturiahatiña Bíbülia houdin awuribuha?

¹¹ Gáñiti meha Mafia ladüga úaragua hamá íbirigu lun Bungiu. Ligía meha layusurunbaliña lúrudugu lun ladügün dañu houn (Sálumu 94:20). Kei hénpulu, ariñagati aban hábuti súdaragu merigana lun íbiri Rutherford luma lun Van Amburgh áluga hamá yebe gumadimatiña lun ladügǘn aban lúrudu lun hasiadirúniwa sun ha máhabaña houdin awuribuha lun hounwen. Hawagutima meha Aturiahatiña Bíbülia layanuha hábuti súdaragu ligía. Ariñagati lau óunwenbu igañi lun íbiri Rutherford máhawa lan lun lúrudu ligía ladüga maha lan lurúeite ageiraü. Lárigiñe aba lariñagun: “Lau sun luwuyeri subudi wamuti ida luba lan wárügüdünün, ani wadügübei!”.

12, 13. a) Ka meha uagu hasiadirúa 8 íbirigu lun hásügürün saragu irumu furisunrugu? b) Adügatu san furisun lun maganbadi hamá íbirigu lun Heowá? Afuranguagüda huméi.

¹² Daritiña meha gumadimatiña ida luba lan hasufuriragüdüniña Aturiahatiña Bíbülia. Aba hanügüni íbiri Rutherford luma Van Amburgh adaürǘwa úara hama 6 íbirigu ha giñe ubaraübaña tidan Óundaruni Watch Tower. Ariñagati aguseragüdüti le arihibei lau hakesin peligurutima hamá íbirigu hagía sügǘ hau aban sétanu súdaragu yámanina. Ariñagati anabagua hamaniña gumadimatiña, súdaragu tuma sun ligilisi ani ligía lan mosu lubéi hafayeirawagüdün saragu luagu le hadügübei ^[1] (ariha huméi abürüdǘni lidan lagumuha arütíkulu). Ligía aba lubéi hasiadirúniwa 8 íbirigu hagía lun hásügürün saragu irumu furisunrugu Atlanta (Georgia, Meriga). Gama lumoun, dan le lagumuchunbei wuribu, aba hígirawagüdün ani aba lagidarún hadurun.

¹³ Íbini furisunruguñanu lan meha widü íbirigu ha, subudi hamuti meha furangu  mosu lan gaganbadi hamá lun lilurudun Bungiu. Ida liña wasubudiruni? Ladüga abürüha hamá lun lurúeite Meriga amuriaha luma lun lígiragüdüniña. Afuranguagüdatiña tidan gárada tuguya siñati lan háfarun ni aban gürigia ani madügün habéi lan ladüga ariñaga tan Bíbülia moun lumuti lan wáfarahan. Ariñagatiña giñe furumiñeguarügü lan gürigia le derege laali libagari lun Bungiu ani aba desidírü lan maganbadi lan leferidirubei lan línsiñehabu Bungiu ani lagünrinchawaguba lan. Ganigitiña meha íbirigu ha! Chóuruti desidírühaña lan meha hasigirun arufuda gaganbadi lun Heowá.

14. Afuranguagüda huméi tau Bíbülia ka lan asuseredubei lúmagiñe irumu 1914 darí 1919.

¹⁴ Afuranguagüda tumuti Lererun Bungiu le asuseredubei houn Aturiahatiña Bíbülia lúmagiñe lidan irumu 1914 darí lagumeseha irumu 1919 lidan Malakíasi 3:1-3 (aliiha huméi). Lidan bérusu burí le ayanuhóuati luagu “Aburemei Suntigabafu” Heowá luma luagu “óunagülei lánina daradu” Hesukrístu. Hagía ñǘbuinbaña arumadagüdaña “ladügawagun Lewí”, ha kristiánugu anuadirúaaña. Lárigiñebei larumadahaniña Heowá kristiánugu anuadirúaaña, aba aranseeña lan lun heresibirun iseri wadagimanu. Lidan irumu 1919, aba líridun Hesusu aban “musu úaraguati” lun harufudahan houn lumutuniña Bungiu luma lun hadundehaniña (Matéu 24:45). Chülüdüga meha oura lun hesefurun lubúeingu Bungiu tuéi Babilónia to Wéiriboun. Lúmagiñe dan ligía añaheingua afurendeirei ka lan lugundanbei Bungiu ani gánwountimarügaali ínsiñeni le hasandirubei luagu. Ma lueirin heteingiradi luagu labiniruniña Heowá! ^[2] (Ariha huméi abürüdǘni lidan lagumuha arütíkulu).

15. Ida luba warufuduni weteingiradi luagu wesefurún tídangiñe Babilónia to Wéiriboun?

¹⁵ Wéiriti weteingiruni Heowá luagu lesefuruniwa tídangiñe Babilónia to Wéiriboun. Wuribati lidin lun Satanási lidan lálugun lagumuchaguagüdüni áhuduraguni inarüniti. Gama lumoun lunti waritaguni ka lan uagu lesefurawa Heowá. Busenti lun hesefurun sun gürigia (2 Korintuna 6:1). Añaheingua saragu míñunu gürigia haruma tanigi lábugiñe lubafu relihión mama inarüniti ani mégeitiña wíderaguniña. Adüga waméi sun wayaraati lun wáyeihaniña íbirigu úaraguatiña ha lánina binadu dan ani íderagua wamaña gürigia lun háfuridun lídangiñe relihión mama inarüniti.