Barühali Jack tuma Marie-Line saragu dan eseriwida lidan dan dayarüti lúmagiñe irumu 1988. Subudiwatiña ladüga ménrengun lan houn lun burí héchudun lidan aban fulasu ani ánharaña heseriwidun lidan saragu dasi kei lidan ageiraü Guadalupe luma Guayana Faransuna, ageiraü le aubei tariha sukursáli to Faransuboun guentó. Wadüga fiu álügüdahani houn.

Ka uagu heseriwidunbei lidan dan dayarüti?

Marie-Line: Guadalupe naweirida ani héchutina meha apurichiha sagü weyu tuma núguchu, aban meha Gefentu to apurichihaboun lau ubebeni. Keiti le hínsiñe habéi gürigia nun, kei nagumuchuni naturiahan kolehiurugu lidan irumu 1985, aba nagumeserun eseriwida kei prekursora.

Jack: Dan meha le nibureingidina, súnwandan hama nan meha íbirigu ha eseriwidubaña lidan dan dayarüti ani hínsiñeti meha apurichihani houn. Seriwitina meha kei prekursoru ídehati lidan lidaani bakechanu leskuelarugu. Anihein burí dan samudi luma dimaasu, ragütiwa busu lun woudin apurichiha sun weyu hama burí prekursorugu. Lárigiñe meha apurichihani ábaha woudin béyabu. Ma meha lubuidun!

Maríeitina au tuma Marie-Line lidan irumu 1988. Fiu dan lárigiñe, aba nasaminarun: “Ka uagu magawoundagüdünwabalin weseriwidun, úati ni kata le gayaraabei leredehaniwa?”. Ligíati aba nagumeserun eseriwida lidan dan dayarüti ítara kei Marie-Line. Aban irumu lárigiñe, lárigiñe woudin tidan leskuela houn prekursorugu, aba wounahóun eseriwida kei prekursorugu espechalitiña. Seriwitiwa lau saragu ugundani lidan saragu fulasu Guadalupe, lárigiñe, aba wounahóun eseriwida Guayana Faransuna.

Luagu saragu irumu seriwihadün lidan saragu dasi. Ka burí katei íderagubadün lun héchudun?

Marie-Line: Subudi hamuti meha íbirigu ha tídanbaña Beteli Guayana Faransuna bérusu lan le hínsiñetimabei woun, Isaíasi 6:8. Ligíati, dan meha le hagúarun woun luéigiñe gágamuru, saragu wéiyaasu ábaha hagumeserun ariñaga lau siñagei: “Haritagua humagili san bérusu le hínsiñetimabei hun?” Subudi wamaali meha mini lan lira lasansira lan wadasin. Ábati wariñagun: “Awahán! Óunahabawa!”.

Mínsiñeti woun wagoubaguagüdüni iseri wadasin lumoun le binadu, lugundun adügati le lun mebegi lan iseri woun. Lanwoun lira, áfaaguatiwa lun wadügün umadagu hama íbirigu ha lídanbaña fulasu le ñein lubéi weseriwida.

 Jack: Luagu aban dan, añahein meha wamadagu ha buiti haritagun áfaaguatiña meha lun héredun wawagu lun máguyun wamá, busentiña meha lun yarafañu wamá houn. Gama lumoun dan le wáguyubein Guadalupegiñe, aba layanuhan aban íbiri woun luagu le lariñagubei Hesusu lidan Matéu 13:38: “Múa ligía uboubei”. Ligíati, dan le woudin lidoun amu fulasu, aba waritaguni awanhamémegua lan eseriwida lun Heowá, meberesenga halía lan. Le linarün katei, le súdinibei gürigia ha lídanbaña fulasu le ñein lubéi wapurichiha.

Dan le wachülürün lidoun aban iseri fulasu, arihatiwa gunda hamá gürigia ha lídanbaña fulasu ligía. Ábati wáfaagun lun wawinwandun kei hagía. Háfuga amu lan éigini ñein, íbini ítara hou wamuti libe le héigibei, lau duari lun wóunigiruni wátuadi. Áfaaguatiwa lun wayanuhan buidu luagu burí dasi le ídanbei weseriwida.

Marie-Line: Furendeitiwa giñe saragu hámagiñe íbirigu ha lídanbaña fulasu le ñein lubéi weseriwida. Haritagua nágili le asuseredubei nun murusun dan lúmagiñe wachülürün Guayana Faransuna. Láhuyuña meha huya saragu dan ligía, ábati wasaminarun mosu lan wagurabun lararamun láhuyun lun woudin apurichiha. Aba tariñagun aban íbiri nun: “Aranseedün san lun woudin apurichiha?”. Lau tueirin anigi, aba nálügüdünün: “Ida lubati le?”. Aba tariñagun nun lun nátuleraguni nufarusun ani lun lan woudin tidan beiki. Ítara liña nafurendeirun abugaha beiki lau farusu. Lun hamuga madügün nani, afiñetina siñabei lan hamuga yebe náfuridun apurichiha lidan burí lidaani huya.

Ma águyadün kéiburi 15 wéiyaasu adián? Anihein san somu adundehani le gayaraabei híchuguni libügürü katei le?

Marie-Line: Dan le láguyun gürigia gayaraati hénrengu lan. Lau sun lira, súdiniti lun ñein lan aban fulasu lun lañuurun gürigia emeraagua lárigiñe lagiribudun lídangiñe lapurichihan.

Jack: Súnwandan dan le wáguyun, héchutiwa efeindihei turageirugu muna lau wagaburi. Liibe-agei dan subudi hamuti meha íbirigu ha tídanbaña sukursáli málübadiwa lan eseriwida lidan somu fulasu, ábati hariñagun woun: “Jack, madiheridabá mefendihabá”.

Subuditi luáguti lapakühóun ílagu tun Marie-Line. Aba burí tapakühani ílagu tidan burí gafu, aba tabürühan tuagu ka lan burí ílagu tídanbei kada gafu, kei burí “Tumegegun kumú”, “Lumegegun sónburu” o “Tumegegun gusina”. Ítarati dan le wachülürün le ñeinba lubéi weredera subudi wamaali halíabei lan lubara kada ílagu. Lun furesetima lan wadariruni le wemegeirubei, aba burí tadügün aban lísüta luagu burí katei le tídanbei kada gafu.

 Marie-Line: Kei furendeihadiwa lan apaküha ílagu, fureseti wagumeseruni weseriwidun.

Ida liña haransehani hóurate lun gayaraabei lan hagunfulirun lau hani ministeriu sunsuinagubei? (2 Tim. 4:5).

Marie-Line: Emeraaguatiwa leindi ani aranse wagía lubá adamuridaguni. Le líbiri weyu lidan dimaasu apurichiha.

Jack: Inarüni mosu lan wagunfulirun lau oura le amuriahóubei lun wadügüni, gama lumoun mama lun lira wetenira. Le súdinitimabei woun lidan wabagari, wapurichihan. Lúmagiñe wáfuridun wábiñegiñe darí wagiribudun, adüga wamuti sun wayaraati lun wayanuhan hama sun gürigia ha wadarirun.

Marie-Line: Kei hénpulu, súnwandan dan le woudin asariñaha, barütina fiu tratadu númagua. Añahein gürigia aba burí hayarafadun woun lun hamuriahan agumeiraguagüdüni wama, íbini mariñagun wamá houn gefentiña lan luagu Heowá wagía. Ligía wóunigirubalin ligaburi wasansiragun luma wóuserun, lugundun ténitiña gürigia lun burí katei le.

Jack: Ídehatiwa giñe lun lasubudiruniwa Heowá lau buidu wamá hama wabesinanigu. Héchutina abudahoun gárada, nasagaruni ifei luma arumadahei fuluri-agei lidan fulasu le ñein lubéi weredera. Ariha hamuti besinagu katei le ani anihein dan aban hálügüdünina: “Anuhein san aban Bíbülia buma ñein lun bíchugunu nun?”.

Liibe-agei dan ma ñǘdüntün apurichiha lidoun burí fulasu díseti? Haritaguagidün luagu aban le espechaliti?

Jack: Anihein burí fulasu Guayana Faransuna le ñein lubéi gürewei lan lun lachülürǘniwa. Liibe-agei dan aweiyasuhatiwa kéiburi 600 kilometuru (370 maili) lídangiñe luriban üma. Haritaguagidina aban sügǘ dan le wóudinbei bisida Saint Élie, Amazonia. Lun wachülürün ñeinhin aweiyasuhatiwa saragu oura tidan aban karü to gayaraati táfayahan lidan luriban üma, lárigiñe aba waweiyasuhan tidan aban guríara. Hiibe-agei gürigia ha awinwandubaña lidan fulasu ligía nadagimeintiña áluaha life golu. Le lueirin heteingiradi tuagu agumeiraguagüdüni to wíchuguboun houn, añahein hádangiñe rútiña burí life golu woun kei budagia. Guñoun aba wíchugun aban burí bidéu le tadügün lóundarun Heowá ani chülütiña burí saragu gürigia.

Marie-Line: Lüha meha lamuriahóuniwa luma Jack lun lidin íchiga aban yanu lánina Aritaguagülei lidan aban aüdü le gíribei Kamopi. Aweiyasuhatiwa kéiburi gádürü oura tidan guríara luéigiñe duna le gíribei Oyapock lun wachülürün ñeinhin. Ma meha lubuidun!

Jack: Le ñein lubéi lougua lan luhuliliga, hanarimeti léibaagun duna ani denchati. Gayaraati nachoururuni buiti lan larihíniwa ayarafadeina wamá lun fulasu le ñein lubéi léibaagua duna lau lere. Gürigia le abugahabarun guríara lunti subudi lan luáguti luadigimari lun. Gama lumoun, aban meha lubuidun wéiyaasu. Lau sun meha sísirügüñanu lan Gefentiña lidan Aritaguagülei, chülütiña kéiburi dimí-san gürigia, wárounu haganagua.

Marie-Line: Sügǘ buíduburiti kei le, ligía burí gayaraabei hawinwanduni nibureintiña ha busenbaña haganwoundagüdüni heseriwidun lun Heowá. Lidan burí kesi ítarati, mosu lafiñerúniwa luagu Heowá ani adügati katei le lun derebugu lan afiñeni. Lidan saragu dan ariha wamuti ida liña lan líderaguniwa Heowá.

Ma furendeihadün saragu iñeñein adián, ladüga funa san ménrengun lan hun?

Jack: Uá, mítaranti. Furendei numuti iñeñein burí ligía ladüga meha mégeiwa lan. Kei hénpulu, mosu meha nadügüni talidihóun Garüdia Awisahatu lidan iñeñein sranangtongo * íbini lubaragiñe latokarun nun naliihan tídangiñeti Bíbülia. Álügüda numuti aban íbiri anhein gunfuranda habalina, ábati lariñagun nun: “Anihein burí dimurei le úati gunfuranda wamani, íbini ítara, buiti badügüni”. Íderagua hamutina irahüñü saragu. Kei mítaran habéi irahüñü kei gürigia wéinamuhaña ariñaga hamuti meha nichara nun furangu. Furendeitina saragu hámagiñe nibureintiña hagía.

Marie-Line: Lidan aban fulasu, rútina meha aturiahani tídangiñeti Bíbülia lidan faransu, portugési luma sranangtongo. Aba tariñagun aban íbiri nun lun níchugun aturiahani furumiñe lidan portugési iñeñein le hénrengutimabei nun, lárigiñe lidan le ménrenguntimabei nun. Dan lárigiñe, aban narihini buidu lan adundehani ligía.

Luagu aban weyu, mosu meha nidin íchiga bián aturiahani tídangiñeti Bíbülia aban lidan iñeñein sranangtongo  ani le aban lidan portugési. Dan le nagumeserunbei íchigei libiaman aturiahani, aba tariñagun íbiri to ñǘdünboun numa nun: “Marie-Line, úati gunfuranda tanibu gürigia to”. Aba níchugun fe níchuguña lan meha aturiahani lidan sranangtongo tun aban hiñaru bürasílina ani mama lidan portugési.

Wéiriti hínsiñe houn íbirigu ha lídanbaña fulasu le ñein lubéi meha heseriwida. Ida liña hadüga lun gamadagu humá hama íbirigu?

Jack: Ariñagati Ariñawagúni 11:25: “Ha gareinibaña, awansetiña”. Masaminaruntiwa bián wéiyaasu lubá wadügün somu katei hawagu amu. Dan le nídehan lidan tounigirúniwa Luban Adamuridaguni, añahein íbirigu ábaha hariñagun nun: “Ígirabei le lun hadügüni apurichihatiña”. Ábaha nóunabuniña: “Aba giñe apurichihati au. Anhein anihein lubéi wadagimanu le lunti ladügǘniwa, busentina nídehan”. Inarüni luagu sun lan wagía megei wamá burí dan lun wásügürüni wábuguarügü, gama lumoun dandu au kei nani weiriou mabusenruntiwa leredehaniwa katei le luéi wíderaguniña amu.

Marie-Line: Áfaaguatiwa lun webereserun hau kada íbirigu. Ítara liña wíchugun burí fe anhein busén habéi somu íbirigu lun hounigirúniwa hasaanigu habá o lun habudún hasaanigu leskuelarugugiñe. Aba burí wadügün aransehani lun wíderaguniña. Ítara liña gamadagua wamá hama luma lun aranseñu wamá lun wíchugun aban úhabu houn dan le hemegeiruni.

Ka burí abiniruni ibiha humaalibei lau heseriwidun lidan burí fulasu le ñein lubéi mégeiwa hamá apurichihatiña?

Jack: Adügaali weseriwidun lidan dan dayarüti lun gunda wamá. Liibe-agei dan, seriwitiwa lidan burí fulasu le ñein lubéi larihíwa ámuñegueinarügü katei le ladügübei Heowá le ídangiñebei wasagara saragu buiti. Íbini anihein lan burí lénrengunga, súnwandan darangilu lan wasaminan, lugundun subudi wamuti meberesenga lan le ñein lumuti weseriwida híderagubadiwa lan lumutuniña Bungiu.

Dan meha le nibureingidina, rédeitina dáüwañu Guayana Faransuna ladüga maha nan nasudaraha. Masaminaruntina meha nagiribuduba lan ñeinhin kei aban misioneru, ni luagu lichugúba lan üma nun kei aban minisi kristiánu lun napurichiha houn adaürǘtiña. Le lúgubu biní lániwa Heowá saragu.

Marie-Line: Níderaguniña amu ligíatima adügübei lun gunda nan. Hínsiñeti nun neseriwidun lun Heowá. Adügaali giñe katei le lun derebugu lan wabagari keisi maríeitiña. Anihein dan, aba lálügüdünina Jack anhein gayara lubéi wagunbirahan aban feru maríeitiña, ha féridi hamaali haguraasun, eiga wama. Saragu wéiyaasu ábaha nariñagun lun nasaminaruñein lan ligíameme. Gabügürüguati lasuseredun katei le woun.

Jack: Fiu irumu guentó, lúmagiñe lariñawagún nun anihein lan kánserü tuagu nani próstata. Íbini mínsiñe lan tun Marie-Line taganbun nariñaguni dimurei burí le, ábaha nariñagun tun: “Tagürürüga nanigi, ánhana hamuga ounwe haruga, mámaba ‘luagu aweiyaduni nounwen’. Lau sun lira, nóunweña hamuga gúndaañu lau nasubudiruni yusu nani nibagari eseriwida lun Heowá, aban katei le wéiriti lebegi” (Agu. 25:8).

Marie-Line: Dará laali Heowá bena wabá lidan aban igaburi le magurabun wamuti ani ígiraali lun burí wadügün katei le masaminarungubei wamuti wadügübei lan. Ibihaadiwa saragu abiniruni lidan wabagari. Wóudiba le ñeinhin lumuti tariñaga lóundarun Heowá woun lun woudin, ladüga afiñetiwa sunsuinagubei luagu Heowá.