1, 2. Kei larufuduni Adügaü 8:27-31, 35, 36, 38, ka uagu labadiseira úfisi etiopíana?

BUSENTÜN san lun habadiseirun luma lun aban humá lani Kristu disipulu? Adügaali ínsiñeni luma eteingiruni le hasandirubei saragu gürigia luagu Bungiu lun hadügüni. Samina humá luagu lani aban úfisi le eseriwidubei tun lurúeite Etiopía hénpulu.

² Lárigiñebei gunfuranda lani wügüri ligía lau tídehan Lererun Bungiu mosu lan buga labadiseirun, aban ladügüni (aliiha huméi Adügaü 8:27-31, 35, 36, 38). Ka uagu ladügei? Chóuruti gebegi tan meha Lererun Bungiu lun, ani lidan anihán lan tidan likarün aweiyasuha, aba lidin aliiheina aban fánreinti tídangiñeti liliburun Isaíasi. Ani dan le lafuranguagüdübalin Felipe lun, le adüga láalibei Hesusu luagu, aba lasandirun óunwenbu eteingiruni. Lanwoun lira, subudi wamuti hínsiñe lan meha Heowá lun, lugundun aweiyasuhati Herusaléun lun láhuduragun lun. Genegeti ígira laali lan meha binadu lani relihión ani guentó lílana haalime ábanrügü néchani le deregeguaalibei lungua lun leseriwidun lun Bungiu inarüniti. Ínchaha lumuti Ínsiñeni le lasandirubei luagu Heowá lun ladügün aban katei súdiniti, labadiseirun luma lun aban lan lani Kristu disipulu (Mat. 28:19).

3. Ka katei gayaraabei leredehani aban gürigia lun labadiseirun? (Ariha huméi rekuáduru “ Ka múa úmabei genegegua tan banigi?”)

³ Gayaraati ladügün ínsiñeni le hasandirubei luagu Heowá lun busén humá habadiseirun. Gama lumoun, gayaraati giñe ladügün ínsiñeni lun madügün humani. Ida? Ariha humá fiu hénpulu, másiñati weiri lan hínsiñe hiduheñu hama  humadagu ha mama Gefentiña hun ani saminatün ánhadün lan abadiseira ábame lan mínsiñehadün lan houn (Mat. 10:37). O másiñati rágüñü hiña lan luagu somu échuni le subuditi hun mínsiñeti lan lun Bungiu ani háfuga hénrengu lan hun lun hígiruni échuni ligía (Sal. 97:10). O háfuga lúmagiñe lan hiñüraü efeduha humá somu fedu le aubei magundan lan Heowá, le tánina relihión mama inarünitu, le uágubei haritagua lau ínsiñehabuni, ligíati hénrengu lubéi hun hígiruni lefeduhóun (1 Ko. 10:20, 21). Ligíati, mosu hálügüdagun hungua: “Ka san hínsiñetimabei nun?”

4. Kátima ínchahabalin aban gürigia lun labadiseirun?

⁴ Chóuruti anihein lan saragu katei le hínsiñeti ani gebegi ligía hun, maribanti katei le. Kei hénpulu, háfuga weiri lan meha tínsiñe Bíbülia hun lubaragiñe haturiahan hama gefentiña luagu Heowá. Háfuga giñe sandí humá ínsiñeni luagu Hesusu. Ani guentó lau subudi humaaña lan Gefentiña, másiñati hínsiñe lan hun hásügürün dan hama. Lau sun lira, másiñati mínchahan lubadün lan katei le lun busén humá hederegeruni hibagari lun Heowá luma lun habadiseirun. Ínsiñeni luagu Bungiu ligíatima ínchahabalin aban gürigia lun labadiseirun. Danme le línsiñedun hun sügǘ lau furumiñeguarügü amu katei, úabei ni kata eredehatün lun heseriwidun lun. Ligíati ínchaha lumutiwa ínsiñeni luagu Heowá mámarügü lun wabadiseirun, íderagua lumutiwa giñe arufuda úaraguni lun Heowá lárigiñe wabadiseirun.

5. Kaba álügüdahani wóunaba?

⁵ Ariñagati Hesusu lunti lan línsiñedun Heowá woun tau sun wanigi, wawani, wasaminan luma lau sun were (Mar. 12:30). Ida luba hasandiruni ínsiñeni luma inebesei le luagu Heowá? Lau hasaminarun luagu ínsiñeni le lasandirubei wawagu (1 Huan 4:19). Danme le hasandiruni ínsiñeni súdiniti le, kaba amu katei ménrengunbei lun hasandiruni luma lun hadügüni? * Ariha waméi.

6. Según Rómana 1:20, ka aban lídangiñe igaburi ídehabei lun lafurendeirúniwa luagu Heowá?

⁶ Furendei humá luagu Heowá lau hararamagun asaminara luagu burí katei le ladügübei (aliiha huméi Rómana 1:20; Aruf. 4:11). Samina humá luagu lichú aau le arihúbei lidan ligaburi tadügǘn nadü hama animaalugu. Akutiha humá murusunraü luagu lanarime lubuidun ladügǘn hágubu gürigia (Sal. 139:14). Ani ráramagua humá asaminara luagu sun erei le líchugubei Heowá lidoun Weyu, mabulieidagunga aban lan hádangiñe milu míñunu waruguma Weyu (Isa. 40:26). * Danme le hadügüni, inebetimabei Heowá hun. Lau gunfuranda humani weiri lan lichú lau luma lubafu Heowá ligía aban lídangiñe lébuna gamadagua humá luma. Lun línsiñedun hun tídangiñe sun hanigi, lunti hasigirun afurendeira saragu katei luagu.

7. Lun línsiñedun Heowá hun tau sun hanigi, ka katei megei hubéi lun hachoururuni?

⁷ Mégeiwati lun hachoururuni berese lan Heowá hau. Hénrenguti san hun lun hafiñerun berese lan Bungiu, le Adügübalin sielu luma Ubóu hau ani hínsiñe humá lun? Anhein ítara liña lubéi hisaminan, mabulieida huméi “madise lan [Heowá] luéi kada aban wádangiñe” (Adü. 17:26-28). Kei lariñaguni Dawidi lun Salomón “ariha lumuti Bungiu sun aritaguni” ani füramaseti anhein lan háluaha hadarirubei lan (1 Kro. 28:9). Le linarün katei, anhein haturiahañoun lubéi Bíbülia, ladügarügü  liña achawaha laadün lan “Bungiu Úguchili” luouguoun (Huan 6:44). Eibu gunfurandatima humani le adüga láalibei Heowá huagu, hínsiñetimabei hun.

8. Ida luba harufuduni teinki humani Heowá luagu línsiñehabu?

⁸ Aban katei le ídanbei harufudei hínsiñe lan Heowá hun, lau hafurieidun lun. Laganwounduba ínsiñeni le hasandirubei luagu Heowá lau habahüdaguni hidiheri lun, ru huguyame seremei lun luagu sun katei le ladügübei huagu. Derebugutimaabei humadagua luma danme le harihini ida liña lan lóunabuni hafurieidun (Sal. 116:1). Hachoururubei gunfuranda lanün Heowá. Lun yarafatima humá lun Heowá, mosu gunfuranda humani ligaburi lisaminan luma le lagurabahabei húmagiñe. Lun hibihini lira, mosu haturiahanu Bíbülia, to Lererun.

9. Ida luba harufuduni gebegi tan Bíbülia hun?

⁹ Furendei humá arufuda gebegi tan Lererun Bungiu hun. Tídanrügüñein Bíbülia ladarirúa inarüni luagu Heowá luma le labusenrunbei hun. Ida luba harufuduni gebegi tan hun? Lau haliihanu, lau haranserun lubá kada aturiahani tídangiñeti Bíbülia le heresibirubei luma lau hawinwanduni le hafurendeirubei (Sal. 119:97, 99; Huan 17:17). Hafalaruñein san programa lánina taliihóun Bíbülia sagü weyu?

10. Ka katei adügübei lun espechali tan Bíbülia?

¹⁰ Aban katei le adügübei lun espechali tan Bíbülia, anihein lan abahüdaguni tidan hámagiñeti gürigia ha arihibalin Hesusu lau hagu guánarügü. Ani tuguya líburu to afuranguagüdübalin buidu buidu le adüga láalibei huagu. Danme le furendei humaali le ladügübei Hesusu luma le lariñagubei, busenbadün lun gamadagua humá luma.

11. Kaba íderaguaün lun línsiñedun Heowá hun?

¹¹ Furendei humá arufuda ínsiñeni luagu Hesusu, ábame línsiñeduntima Heowá hun. Ida? Ladüga arufuda lumuti Hesusu ligaburi lúguchi buidu (Huan 14:9). Ligíati eibu hafurendeirun luagu Hesusu, gunfurandatima hubéi ida liña lan ligaburi Heowá ani hínsiñetimaabei hun. Samina humá luagu gudemehabu le larufudubei Hesusu houn ha mínsiñegubaña  kei burí gudemetiña, sánditiña hama ha débilibaña. Samina humá giñe luagu lubuidun adundehani le líchugubei hun ani aban labuidurun hibagari dan le gaganbadi humá lun (Mat. 5:1-11; 7:24-27).

12. Danme le hafurendeirun luagu Hesusu, kaba hadüga?

¹² Chóuruti laganwounduba lan ínsiñeni le hasandirubei luagu Hesusu danme hasaminarun hulili luagu sákürifisiu le ladügübei lun gayara lan ferudunawa lan wafigoun (Mat. 20:28). Danme le gunfuranda humaali aranseñu liña lan meha lun lounwen huagu, másiñati hasandiragun hungua lun hasaküriha luma lun háluahan ferudun luma Heowá (Adu. 3:19, 20; 1 Huan 1:9). Eibu línsiñedun Heowá luma Hesusu hun, éibume giñe habusenrun herederun hama gürigia ha asandirubalin ligiaméme kei huguya.

13. Ka ru laalibei Heowá hun?

¹³ Furendei humá asandira ínsiñeni hawagu gürigia ha hínsiñebei Heowá houn. Másiñati ua lan gunfuranda hamani hiduheñu ha mama Gefentiña hama binadu humadagu ka lan uagu busén hubéi lun hederegeruni hibagari lun Bungiu, másiñati hagañidun huma. Líderagubadün Heowá lau ladügün lun aban hamá iduheñu íbirigu hun. Ánhadün eredera yarafa houn iduheñu ha, heresibirubei ínsiñeni luma ídemuei le hemegeirubei (Mar. 10:29, 30; Ebü. 10:24, 25). Háfuga lachülürün aban weyu lunme heseriwidun hiduheñu lun Heowá ani winwan hagíame lau lilurudun (1 Fe. 2:12).

14. Según 1 Huan 5:3, ka asansiruni ariha humaalibei lau hafalaruni ladundehan Heowá?

¹⁴ Furendei humá arufuda gebegi lan lilurudun Heowá hun ani gaganbadi huma lun. Lubaragiñe hasubudiruni Heowá, háfuga aba lan hadügüni le lariñagubei hisaminan hun, ani guentó rúhadün fe buídutima lan lilurudun Heowá (Sal. 1:1-3; aliiha huméi 1 Huan 5:3). Samina humá luagu adundehani le tíchugubei Bíbülia houn wügüriña maríeitiña, houn würiña maríeitiña, houn agübürigu luma houn isaanigu (Efe. 5:22–6:4). Ariha humuti san buídutima lan hibagari keisi iduheñu dan le hawinwanduni le tariñagubei Bíbülia? Ídehaali san hafalaruni adundehani hawaguti umadagu lun buídutima lan higaburi? Gúndaatimahali san hasandiragun hungua? (Ari. 13:20; 1 Ko. 15:33). Másiñati hóunabun anha lan.

15. Ka lunbei hadügüni anhein busén hubéi ídemuei lun hawinwanduni adundehani le tídanbei Bíbülia?

¹⁵ Másiñati anihein lan dan ibidiñe lan hun ida luba lan hawinwanduni adundehani le tídanbei Bíbülia. Ligía líchugubei Heowá ariñahani tídangiñeti Bíbülia woun lau layusurunu lóundarun lun líderaguniwa asubudirei le buídubei lumoun le wuribabei (Ebü. 5:13, 14). Danme le haliihani ani aturiaha humeime ariñahani le, harihibei hu lan ani súdini ligía, ani chóurubei busenbadün lan lun tílana humá lóundarun Heowá.

16. Ida liña lóundaraguniña Heowá lumutuniña?

¹⁶ Furendei humá asandira ínsiñeni tuagu lóundarun Bungiu ani ru huméi hídeha tun. Óundaragua laaña Heowá lumutuniña lidan burí damuriguaü, ani Hesusu le lisaani ligía lichügüdinabei sun damuriguaü (Efe. 1:22; 5:23). Ani íridaali Hesusu fiu wügüriña kristiánugu anuadirúaaña lun hawadigimaridun lidan dasi le adügǘbei uguñe weyu. Wati Hesusu houn kristiánugu ha “musu úaraguati ani gunfuranda ligía”, ani sériuti hanügüni buligasion le lun híchugun ariñahani luma lun hóunigirunün lidan humadagua luma Bungiu (Mat. 24:45-47). Aban lídangiñe igaburi ida liña lan lóunigirunün musu úaraguati lau líridun wügüriña ha afiñerúati hawagu lidan damuriguaü (Isa. 32:1, 2; Ebü. 13:17; 1 Fe. 5:2, 3). Aranseñu haña lun hadügüni sun hayaraati  huagu lun híchugun dǘgüdaguaü hun luma lun híderagunün lúntima hayarafadun lun Heowá. Aba lídangiñe katei súdiniti le gayaraabei hadügüni huagu, híderagunün lun harufudahan luagu Heowá houn amu gürigia (Efe. 4:11-13).

17. Según Rómana 10:10, 13, 14, ka uagu wayanuha luagu Heowá houn gürigia?

¹⁷ Íderagua humaña amu afurendeira luagu Heowá. Ariñagati Hesusu houn lani disipulu lun harufudahan houn amu luagu Bungiu (Mat. 28:19, 20). Gayaraati lagunfulirún gumadi le ladüga hasandiragun hungua mosu lan hadügüni. Gama lumoun, anhein eibu lubéi dan hínsiñetima lan Heowá hun hasandiraguba hungua kei apostolu Féduru luma Huan, ha ariñagubaña: “Wagía, siñati wámanichun lau katei le ariha wamaalibei luma le aganba wamaalibei” (Adü. 4:20). Lídangiñe fiu katei le íchuguti saragu ugundani, wíderagun somu gürigia lun línsiñedun Heowá lun. Gayaraati san hasaminarun luagu saragu ugundani le lasandirubei Felipe dan le líderagunbalin etiopíana lun lafurendeiruni inarüni le tídanbei Lererun Bungiu luma lun labadiseirun? Danme le háyeihani Felipe ani gaganbadi huguyame lun lugumadin Hesusu lun hapurichiha, harufudubei luagu busén humá lun aban humá gefenti luagu Heowá (aliiha huméi Rómana 10:10, 13, 14). Másiñati hadügüni ligíameme álügüdahani libe le ladügübei etiopíana: “Siñati san nabadiseirun?” (Adü. 8:36).

18. Kaba wariha lidan leweñegua arütíkulu?

¹⁸ Danme le aranseedün lun habadiseirun, hadügüñeinme katei le súdinitimabei lidan hibagari. Kei súdini lubéi le lunbei hadügüni, lunti hasaminarun buidu luagu sun le lanügübei badisei. Guentoti, ka lunbei hasubudiruni luagu badisei? Ka lunbei hadügüni lubaragiñe luma lárigiñe habadiseirun? Lóunabuba álügüdahani le lidan leweñegua arütíkulu.