Añahein meha lewitagu ha mama fádirigu ténitiña meha lun saragu katei tidan ténpulu, kéiburi óunigiha. Le meha tábutibei ténpulu arihibei lau hawadigimari. Afuranguagüda lumuti aban abürühati huríu le gíribei Filón ka lan meha hawadigimaribei: “Rédeitiña meha fiu yarafa lun tubenari ténpulu óunigirei ebelaagülei; híbiri óunigihatiña, múnadañanu yarafa lun fulasu le sándutimabei, óunigirei luéi hebelurun gürigia ha moun lumuti hebelurun lidoun fulasu ligía; amu óunigihatiña lídanñanu tibürürün ténpulu ani geyegua hamuti wéyuagu áriebu, según oura le atokarubei houn”.

Sun óunigihatiña ha lábugiñeñanu meha haríaahan Liñun-agei lúrudu huríu. Hóunrügüñein meha huríu ha líchiga gumadan rómana üma lun tau hamá áruma.

Afuranguagüdati aban sásaamu gíriti Joachim Jeremias, dan lan le hárügüdünbalin óunigirutiña ha Hesusu, álügüda lumutiña ka lan uagu márügüdün habalin dan le larufudahabei tidan ténpulu. Madügün lubéi hamuga Hesusu álügüdahani le houn lun hamuga mama lan tidan ténpulu heseriwida (Mat. 26:55). Ariñagati ligiaméme abürühati hagiaméme lan óunigihatiña ha tánina ténpulu álugubaña hárügüdüni Hesusu fiu dan lubaragiñe le (Huan 7:32, 45, 46). Dan lárigiñe, rúwati gumadi dandu lun hábuti óunigihatiña kei houn óunigihatiña lun hanügüniña lani Hesusu disipulugu ligibugiñoun Liñun-agei lúrudu huríu. Másiñati giñe hagía lan meha óunigihatiña ha adurugudubalin Pábulu bóugudi tuéi ténpulu (Adü. 4:1-3; 5:17-27; 21:27-30).