Lidan aturiahani ligía furendeitiwa ábanrügüñein lan katei le úmabei hagagibudagua dandu gürigia kei ánheligu: lun inebewalá liri Heowá. Mini lan liricha Heowá lun larúeiha —ligía lan arúeihani buídutimabei— ligía aban lídangiñe katei le lunbei lafuranguagüdüniwa. Ámuya katei le súdinitimabei ani le wéiritimaabei le gánibei luma larumadahóun liri Bungiu anhein úaraguabaña lubéi gürigia lun Heowá.

Gama lumoun, ka uagu wariñaga le lan súdinitimabei ani le lan wéiritimabei liri lan Heowá luma larumadahóun? Ariha wamá ǘrüwa resun.

Furumiñe, lidan fuluri-agei Edén, wíyeda lumuti Satanási liri Heowá ani ayanuhati wuriba luagu. Álügüdahani le ladügübei Satanási tun Ewa lau sumadi, adügati lun lasaminarúniwa hangi lan Heowá ani siñabei lan hagunfulirun lau katei le lamuriahabei hama. Lárigiñe, aba lariñagun furangu iyeeni lan dimurei le lariñagubei Heowá, ítarati, adügati lun larihín Heowá kei aban yeeti. Lau ladügüni Satanási katei le, aba lawiyeduni liri Heowá. Aba ladügagun lungua “Máfiame”, mini lan “yeeti” (Huan 8:44). Kei tafiñerun Ewa lun iyeeni le lariñagubei Satanási, ítarati aba tagarabaagun luagu ligaburi larúeiha Heowá (Agu. 3:1-6). Uguñe weyu, anihaguameme Satanási awiyedei liri Bungiu lau burí iyeeni le lariñagunbei luagu, adügati lira lun lasaminarúniwa wuriba luagu Heowá. Chóuruti gürigia lan ha afiñerubaña lun iyeeni burí le maganbaditiña lun Heowá. Chóuruti, le lan katei le gáritimabei houn lubúeingu Bungiu harihini layanuhóuniwa iyeeni luagu liri Bungiu le sándubei. Ligía lébunabei sun asufuriruni luma wuribani le lídanbei ubóu le.

Libiaman, lun lubuidun guánarügü sun le ladügübei Heowá, larumadahabei liri sunsuinagubei. Úati amu katei súdinitimati lun luéi katei le. Ligía lariñagubei: “Narufudaali […] luagu haruma lan óunwenbu niri” (Ese. 36:23). Lidan furíei le larufudahabei Hesusu ariñagati: “Inebewalá biri”. Ítarati larufuduni kátima lan katei súdinitimabei lun gayaraabei lan hafurieidun lubúeingu Heowá luagu (Mat. 6:9). Ariñaga tumuti Bíbülia saragu wéiyaasu súdiniti lan lun wíchugun uéiriguni lun liri Heowá. Ariha wamá fiu hénpulu. “Ru huméi uéiriguni le ladünabei” liri Heowá lun (1 Kro. 16:29; Sal. 96:8). “Wa humá uremu lun” liri Heowá le wéirigubei (Sal. 66:2). “Níchuguba uéiriguni lun biri lun súnwandan” (Sal. 86:12). Luagu aban dan, ayanuhati Heowá siélugiñe dan meha le tídanñein lubéi ténpulu Hesusu Herusalén ani aba lamuriaha luma Lúguchi: “Rualá uéiriguni lun biri”. Ábati lounabún Heowá: “Rúaali uéiriguni lun niri […], ani lichugúayaba” (Huan 12:28). a

Lǘrüwan, le lisuunibei Heowá lun lalawahóuniwa liri le sándubei lun súnwandan. Samina wamá luágume lueirin lisudinin liri Heowá lárigiñe Arúeihani le lánina Milu Irumu le lani Kristu danme le sügühali lagumuhóun óuchawaguni. Kaba hasaminara gürigia hama ánheligu luagu liri Heowá lídanme dan ligía? Lun wasubudiruni mosu gabaroun wamani bián katei le gádanbalin sügǘ le: úaraguni le harufudubei  gürigia luma liricha Bungiu lun larúeiha. Luagu aban oubaü, móuchawagun haalime úaraguni le lunbei harufuduni gürigia. Ka uagu? Ladüga mafigounhañame ani sügǘ hamaalime lagumuhóun óuchawaguni. Gayaraahalime hawinwandun lun súnwandan. Ani kábati asusereda lun liricha Heowá lun larúeihan? Manügün haalime katei le fánreinguaü. Ka uagu? Ladüga furanguhalime lun súnwandan ligaburi lan larúeihan Heowá ligía lan buídutimabei. Lídanme dan ligía, úaraguabaña dandu gürigia kei ánheligu ani hánharuba lun larúeihan Heowá lau sun hagundan. Gama lumoun, kaba asusereda lun liri Heowá?

Lídanme dan ligía, harumalime liri Heowá sunsuinagubei, ani úaalime ni aban iyeeni le lun lawiyeduni iri le. Súdinimemebei liri Heowá houn lubúeingu dandu ha siélubaña kei ha ubouagubaña. Ka uagu? Ladüga harihubei lasigiruba lan Heowá adügei katei le aweiridagüdübarun anigi. Kei lóuseruba lan Hesusu lau ǘnabuguni ani lagiribudagüdübei sun ubafu lun Lúguchi, lun Búngiurügüba lan “sun katei hadan súngubei” (1 Ko. 15:28). Lárigiñeme katei le, ha lúnbaña hawinwandun ya Ubouagu hagundaaruba lan lau gafanranbaña lan “lidan haweirigun lirahüñü Bungiu” (Rom. 8:21). Ani lagunfulirubei Heowá lisuuni sunsuinagubei lun lóundaruniña lirahüñü dandu ha siélubaña keime ha yáabaña Ubouagu (Efe. 1:10).

Danme le lasuseredun katei le, ida luba hasandiragun lirahüñü Heowá houngua dandu ha siélubaña keime ha lúnbaña ya hama ubouagu? Chóuruti wasandiruba lan aban óunwenbu ayumahani lun wasigirun alawahei lubuidun liri Heowá. Ariñagati Dawidi aban hádangiñe abürühati sálumu: Alawahoualá Heowá Bungiu ani “biniwalá luéirigun liri súnwandan” (Sal. 72:18, 19). Lidan sun wabagari wadariruba iseri burí resun buíduburiti lun walawahani liri Heowá.

Arufuda lumuti liri Heowá ka lan luwuyeri Bungiu ligía. Ligíati, dan le wasaminarun luagu liri Heowá, aba wasaminarun luagu lueirin línsiñehabu (1 Huan 4:8). Súnwandan waritagubei lan ladüga lan ínsiñeni ladügünbaliwa Heowá ani derege lumuti libagari liráü lun lesefuruniwa ladüga ínsiñeni le lasandirubei wawagu ani ínsiñeni ínchahabalin lun larufuduni aban lan urúei richati ligía. Ani wasigiruba arihei larufuduni Heowá ínsiñeni le lasandirubei wawagu lun súnwandan. Lidan sun wabagari wadariruba chansi lúntima wayarafadun lun Wáguchi le siélubei luma lun walawahani luéirigun liri lau uremu (Sal. 73:28).