1. Ka uagu hínsiñe habéi gürigia ha gaguraasunbaña hun?

 SUN wagía, hínsiñetiña gürigia ha gaguraasunbaña woun. Ka funa san uagu? Kei hénpulu, inebetiña gürigia ha gagurabaguadibaña woun. Gebegiti giñe woun dan le gaguraasun hamá amu wabá dan le wachararun. Lanwoun lira, teinki wamutiña gürigia ha meha íchugubaña aturiahani tídangiñeti Bíbülia woun ladüga gaguraasun hamá meha wabá dan le hénrengu lubéi woun gunfuranda wamani le wafurendeirubei, wánharun lun o wawinwanduni. Wéiriti giñe weteingiruni Heowá ladüga gaguraasun lan wabá! (Rom. 2:4).

2. Ka burí sügǘ ídanbei hénrengu lan woun gaguraasun wamá?

² Lau sun hínsiñe hamá gürigia ha gaguraasunbaña woun, gayaraati hénrengu lan woun gaguraasun wamá habá amu. Kei hénpulu, másiñati weferidiruni waguraasun dan le hürügü tiña lan wagune ǘmadarugu, dántima le dárühali lan. Másiñati gayara lan wagañidun dan le lañawarihóun woun. Ani anihein dan, másiñati wasaminarun ladarasaruña lan lachülürün iseri ubóu le füramase lubéi Heowá. Ma hínsiñeti hamuga woun lun gaguraasuntima wamá? Lidan aturiahani le, warihubei ka lan mini lubéi igaburi le luma ka lan uagu súdini lubéi. Wakutihaba giñe fiu adundehani le lunbei líderaguniwa lúntima gaguraasun wamá.

3. Ida liña lóunabun aban gürigia le gaguraasunti dan le lañawarihóun lun?

³ Ariha wamá gádürü igaburi le larufudubei gürigia le gaguraasunbei. Furumiñe, magañidunti lau lóufudagun. Áfaaguati lun darangilu lan dan le gaturobulin lan ani máguyuguagüdünti wuribani luagu wuribani dan le lañawarihóun lun. Fuati lanichigu gaguraasuni tidan Bíbülia luagu furumiñeti wéiyaasu dan le layanuhóun  luagu Heowá, ariñagati Heowá lidan bérusu le luougua: “Gudemehabutina, gaguraasuntina, [o hamarutina lun nagañidun] wéiritina lidan ínsiñeni luma inarüni!” (Afu. 34:6).

4. Ida liña lóunabun aban gürigia gaguraasunti dan le mosu lan lagurabahan?

⁴ Libiaman, gagurabaguaditi gürigia le gaguraasunbei. Meferidirun lumuti luguraasun, magañidun ligía dan le ladarasaragun somu katei le lagurabubei (Mat. 18:26, 27). Gíbeti sügǘ le ídanti mégeiwa lan lun wagurabahan meferidirunga waguraasun. Kéiburi dan le labahüdahaña lan somu gürigia aban katei woun, lunti waganbuni lau gurasu sin wadüraaguni (Hob. 36:2). Mégeitiwa giñe gaguraasun wamá dan le wíderagun aban aturiahati lun gunfuranda lan somu arufudahani tídangiñeti Bíbülia o lun lígirun somu luriban échuni.

5. Lidan ka amu igaburi warufudei gaguraasun wamá?

⁵ Lǘrüwan, gürigia le gaguraasunbei, samina lumuti katei lubaragiñe ladügüni. Inarüni ñeinbei lan dan mosu lan wadügüni katei lau lóufudagun. Gama lumoun, dan le mosu lan ladügǘn aban dasi súdiniti, méibaagunti gürigia le gaguraasunbei óufudaha lun lagumeseruni dasi ligía ni lun lagumuchuni. Lubaragiñe lira, díreiti saragu dan lun lasaminarun buidu luagu le lunbei ladügüni ani lárigiñe, ragǘ lumuti giñe dan le lemegeirubei lun ladügüni dasi ligía buidu.

6. Ida liña lóunabun aban gürigia le gaguraasunti dan le lagagibudagun luma óuchawaguni o luma lénrengunga?

⁶ Ligadürün, gürigia le gaguraasunbei, áfaaguati lun lawanduni óuchawaguni mekeharunga. Ligíati, úarati gaguraasuni luma awanduni. Inarüni mariban lan wabahüdahani lun aban wamada le uágubei wafiñera ida liña lan wasandiragun woungua dan le wásügürüña lan lídangiñe lénrengunga. Gama lumoun, gürigia le gaguraasunbei, adüga lumuti sun liyaraati lun lakipurun aban lubuidun igaburi luma lun lasigirun eseriwida lun Heowá lau ugundani (Kol. 1:11). Wagía kristiánugu, mosu warufudun gaguraasuni lidan ámuñegueinarügü igaburi. Ka uagu? Ariha wamá fiu resun.

7. Según Santiagu 5:7, 8, ka uagu súdiniti lubéi gaguraasuni? (Ariha huméi giñe dibuhu).

⁷ Mégeitiwa gaguraasuni lun wasalbarun. Ítara kei lubúeingu Bungiu ha meha úaraguabaña lidan binadu dan, mosu wagurabahan lau gurasu lun lagunfuliruni Bungiu le füramase lubéi (Ebü. 6:11, 12). Agoubaguagüda tumutiwa Bíbülia luma aban ábunaguti (aliiha huméi Santiagu 5:7, 8). Lau sun nadagimein lan aban ábunaguti saragu ábunagua ilaü luma áturaguei, ibidiñeti lun ídaba lan láhücha. Ligíati lagurabahanbei lau gurasu ani chouru lumuti lalubahaba lan. Ligiaméme hadügübei kristiánugu: nadagimeintiña lun Heowá lau sun here íbini ʻibidiñe lan houn kaba lan oura liabin Habureme’ (Mat. 24:42). Ítara liña, agurabahatiwa lau gurasu luma lau ichouruni lagunfulirubei lan Heowá le füramase lubéi lidan lidaani. Anhein weferidira waguraasun, gayaraabei labuchadun wawagu agurabaha ani gayaraabei ladügün katei le lun wadisedun luéi inarüni murusun murusun. Lanwoun lira, gayaraabei hamuga wagumeserun etenira lun katei le lunbei líchugun ugundani woun luágurügü murusun dan. Ánhawati gaguraasun, wawanduba darí lagumuhóun ani wesefuruba (Mik. 7:7; Mat. 24:13).

8. Ida luba líderaguniwa gaguraasuni lun buidu lan wanaagun woungua hama amu? (Kolosana 3:12, 13).

⁸ Íderagua lumutiwa gaguraasuni lun buidu lan wanaagun woungua hama amu. Ánhawa gaguraasun, waganbubei ani weteniruba lun le hariñagubei amu dan le hayanuhan (Sant. 1:19). Wídehaba giñe lun ñein lan darangilaü. Móuserunbadiwa lau irofuni ani mariñagunbadiwa giñe dimurei le gayaraabei lagaridagüdünu hanigi amu, íbini dan le wásügürün lídangiñe lénrengunga. Lanwoun lira, ánhawa ouserúa wuriba, magañidunbadiwa lau lóufudagun ani mafayeihanbadiwa wuribani luagu wuribani. Lubaragiñe lira, wasigiruba arufuda gaguraasuni wabaruagua ferudunagua wagíame wámagua (aliiha huméi Kolosana 3:12, 13).

9. Ida liña líderaguniwa gaguraasuni dan le wanúadiruni kaba lan wadüga? (Ariñawagúni 21:5).

⁹ Íderagua lumutiwa giñe gaguraasuni lun wanúadirun buidu. Lubaragiñe wafuresehan adüga aban katei o masaminarun wamá lubá wadügüni, direi wamá dan lun wakutihani ámuñegueinarügü saminaü buidu lun warihini ka lan buídutimabei lídangiñe (aliiha huméi Ariñawagúni 21:5). Kei hénpulu, anhein wáluahaña laubei wadagimanu, háfuga wánharun lun furumiñeti wadagimanu le wadarirun, íbini ladügüba lan lun weferidirun adamuridaguni o lun mapurichihan wamá saragu. Ánhawati gaguraasun, wasaminaruba anhein buídubei lubéi fulasu le ñeinba lubéi wawadigimarida, ka lan lóuratebei, ida luba lan hasandiragun waduheñu houngua ani anhein lañawarihabei lubéi luma wamadagua luma Heowá. Líderagubadiwa giñe gaguraasuni lun buidu lan le lunbei wanúadiruni.

10. Ka lunbei ladügüni aban kristiánu lun lasigirun arufuda gaguraasuni?

¹⁰ Amuriaha wamá luma Heowá lun líderaguniwa lúntima gaguraasun wamá. Gaguraasuni, ligía aban lídangiñe igaburi le líchugubei sífiri (Gal. 5:22, 23). Ligíati, gayaraati wamuriahan luma Heowá lun líchugun sífiri sandu woun luma lun líderaguniwa lun gagaburi wamani igaburi le líchugubei sífiri. Anhein wásügürüña lubéi lídangiñe somu sügǘ le ñein lubéi hénrengu lan woun gaguraasun wamá, lunti wasigirun amuriaha sífiri sandu (Luk. 11:9, 13). Gayaraati giñe wamuriahan luma Heowá lun líderaguniwa arihei katei kei le aubei larihei. Ani lárigiñe wafurieidun, adüga waméi sun wayaraati lun warufudun gaguraasuni sagü  weyu. Ánhawa amuriaha luma Heowá ani áfaagua wagíame lun warufuduni igaburi le, warihubei aganwoundeina luba lan waguraasun murusun murusun.

11, 12. Ida liña larufuduni Heowá gaguraasun lan?

¹¹ Ráramagua wamá asaminara luagu burí hénpulu le tídanbei Bíbülia. Daritiwa saragu hénpulu tidan Bíbülia hawagu gürigia ha arufudubaña gaguraasuni. Ánhawa araramagua asaminara luagu burí hénpulu le, gayaraabei líderaguniwa arufudei lubuidun igaburi le. Wakutihaba fiu lídangiñe hénpulu burí le, gama lumoun, lubaragiñe wakutihani, teni wamá lun Heowá Bungiu létima gaguraasuntimabei.

¹² Lidan fuluri-agei Edén, wíyeda lumuti Satanási liri Heowá ani adügati lun mafiñerúniwa lan aban lan urúei richati ani hínsiñehabuti Heowá. Gama lumoun, lubaragiñe lagumuchun Heowá lau yeeti le, arufudati gaguraasun lan ani ragügua lan lungua, ladüga subudi lumuti meha mégeiwa lan dan lun larufuduni ligaburi lan larúeihan ligía lan buídutimabei. Ani sun aniha lan Heowá agurabaha, awanda lumuti hasigirun amu awiyedei liri. Luéigiñe le aban oubaü, kei gaguraasun lan Heowá, subudi hamaali míñunu gürigia ani gachansinhaaña lun hawinwandun lun súnwandan (2 Fe. 3:9, 15). Ánhawa asaminara luagu sun katei buiti le ibihúaalibei seremei luguraasun Heowá, ménrenguntimabei woun wagurabuni lachülürün dan le direi láalibei lun lanügüni lagumuchagüle ubóu.

13. Ida liña láyeihani Hesusu luguraasun Lúguchi buidu buidu dan meha le ya lubéi Ubouagu? (Ariha humóun giñe iyawaü).

¹³ Áyeiha lumuti Hesusu luguraasun Lúguchi buidu buidu ani furanguti larihín dan meha le ya lubéi Ubouagu. Chóuruti mama lan súnwandan ménrengun lan lun Hesusu larufudun gaguraasuni, dántima meha le layanuhan hama arufudahatiña lilurudun Moisesi luma hama  fariséugu, ha meha biánguabaña igibu (Huan 8:25-27). Gama lumoun, ítara kei Lúguchi, magañidunti meha Hesusu lau lóufudagun. Móunabunti lau bulagiadi ani manabagun lumutiña giñe láganigu dan le hañawarihan lun (1 Fe. 2:23). Lubaragiñe lira, awanda lumuti óuchawaguni lau gurasu mekeharunga. Ligía tíchugunbalin Bíbülia adundehani le woun: “Samina humá lubeiti luagun lani Hesusu hénpulu, luagu lawanduni saragu súfuri hámagiñe gafigountiña” (Ebü. 12:2, 3). Lau lídehan Heowá, gayaraati giñe wawandun lau gurasu furumiñeguarügü óuchawaguni le ñǘbuinti.

14. Ka wafurendeirubei lídangiñe luguraasun Abürámü? (Ebüréu 6:15; ariha humóun giñe iyawaü).

¹⁴ Kaba íderaguawa lun wasigirun agurabaha lau gurasu lun liabin lagumuchagüle ubóu? Háfuga aguraba wamá yebe chülühali lan hamuga lagumuchagüle ubóu lumoun dan le, ani gayaraati samina wamá marihin wabéi lan lasuseredun. Ligíati, teni wamá lun lani Abürámü hénpulu. Dan le füramase lubéi Heowá lun Abürámü “nadügüba aban óunwenbu néchani hau badügawagun”, ǘrüwa-wéinhali meha keinsi irumu lau Abürámü ani masaanigili meha (Agu. 12:1-4). Ariha lumuti san Abüraámü lagunfulirun füramase le? Ábanrügüñein fánreinti lídangiñe lariha. Lun lira, mosu meha lagurabahan 25 irumu lárigiñe lánhiñuraguni duna Éufüratesi. Ábati garáü lani Abüraámü Isaakü lau lídehan aban milaguru. Ani 60 irumu lárigiñe, aba hagüriahóun Esaú luma Hakobu, ha libañan (aliiha huméi Ebüréu 6:15). Lau sun meha marihin lani Abüraámü hagibedagun ladügawagun lun aban hamá óunwenbu néchani ni heresibiruni Fulasu le Füramasewabei houn, buiti meha lumadagua wügüri úaraguati le luma Bungiu le adügübalin (Sant. 2:23). Gayaraati san hasaminarun luagun óunwenbu  ugundani le lunbei lasandiruni Abürámü danme le láguyugun? Lasubudirubei seremei lan lafiñen luma luguraasun biniwa hamá sun néchanigu ubouagu (Agu. 22:18). Ka wafurendeirubei? Furendeitiwa gayaraabei lan marihin wamani lagunfulirun sun le füramasei lubéi Heowá lidan wadaani. Íbini ítara, ánhawa gaguraasun kei meha Abürámü, gayaraabei wachoururuni labinirubadiwa lan Heowá guentó ani labiniratimaabadiwa lan lidan iseri ubóu (Mar. 10:29, 30).

15. Ka katei gayaraabei wakutihani dan le waturiahan wábuguarügü?

¹⁵ Ayanuhatu Bíbülia hawagu saragu amu gürigia ha arufudubaña gaguraasuni (Sant. 5:10). Ka uagu madügün hubéi aransehani lun haturiahani abahüdaguni burí le? b Kei hénpulu, nibureingili meha Dawidi dan le lanuadirúnbei lun ligíaba lan urúei Ísüraeli, gama lumoun mosu meha lagurabahan luagu saragu irumu lubá meha larúeihan. Seriwiti meha Simeón tuma Ana lau úaraguni lun Heowá sun añaha lan agurabahei Mesíasi le füramasewaalibei (Luk. 2:25, 36-38). Danme le haturiahani sügǘ burí le álügüdagua humá hungua: “Ka íderagubaliña gürigia ha lun gaguraasun hamá? Ka buiti hibihubei lau harufuduni lubuidun igaburi le? Ida luba gayara lan náyeihaniña?”. Gayaraabei giñe hafurendeirun saragu katei hámagiñe ha arufudubaña maguraasun hamá (1 Sam. 13:8-14). Gayaraabei hálügüdagun hungua: “Ka funa san uagu maguraasun habéi? Ka katei wuribati lanügübei maguraasuni houn?”.

16. Írida humá fiu buiti le asagarúbei dan le gaguraasun lan gürigia.

¹⁶ Samina wamá luagun buiti le ibihúbei dan le gaguraasun wamá. Íderagua lumutiwa gaguraasuni lun gunda wamá luma lun darangilu wamá. Ligíati gayara lubéi wariñagun buidu lan gaguraasuni lun wátuadi luma lun wasaminan. Líderagubadiwa giñe lun buidu lan wanaagun woungua hama amu luma lun ñein lan úarani lidan damuriguaü. Ánhawa magañidun lau lóufudagun dan le ladügün somu gürigia aban katei le mínsiñeti woun, lídehaba gaguraasuni lun maribaduntima lan katei (Sal. 37:8; Ari. 14:29). Ligíati dántima le gaguraasun wamá wáyeihañein Wáguchi le siélubei ani adügati katei le lúntima wayarafadun lun.

17. Ka lunbei aranseñu wamá lun wadügüni?

¹⁷ Kei le aubei warihei, aban igaburi buiti gaguraasuni le anügübei saragu buiti woun. Íbini mama lan súnwandan gaguraasun wamá, líderagubadiwa Heowá lun wasigirun arufudei lubuidun igaburi le. Ani sun awanha lan agurabaha lau gurasu lun lachülürün iseri ubóu, gayaraati wachoururuni góunigi lániña Heowá “ha íchugubaña inebesei lun ani afiñe hagía luagu línsiñehabu súnwandan” (Sal. 33:18, 22). Ligíati, sun wagía, lunti wáfaagun lun wasigirun arufuda gaguraasuni.