• “Sandiguatina meha nungua kamá hamuga lagabarahañadina nani weiriei saragu wéiyaasu”.

• “Wuribati meha nasandiragun nungua, sandiguatina meha nungua ua lan magadiñegu nan ani kamá hamuga mebegitina ni kata”.

• “Nasufuriruña meha lau námanichun. Siñati meha nayanuhan houn amu luagu le násügürübei”.

• “Aba nasaminarun meberesen lan Heowá lau le násügürübei”.

Arufudati dimurei burí le weiri lan tasufurirun aban würi dan le laríagun tani weiriei bidéu o iyawaü lánina agamariduni. Ani anhein ladügüñein lubéi katei le aramudaguarügü, luagu saragu hati o luagu saragu irumu, másiñati sandigua tan tungua siñaali lan tafiñerun luagu. Ariñagatu aban würi: “Sódini, ámuhali meha narihini nani weiriei. Álügüdaguatina nungua ka lan amu katei laramudahabei nuéi”.

Héiguaali san hani weiriei tidoun sádara lánina taríawagun iyawaü o bidéu lánina agamariduni? a Adügǘwati ariñahani le houn íbirigu würiña kei huguya. Lakutihóuba ariñahani tídangiñeti Bíbülia lidan ariñahani le, le lunbei líchugun gurasu hun ani lachoururagüdübei hun luagu berese lan Heowá hau ani líderagubadün giñe lun hiñuragun lídangiñe sügǘ le luma lun hayarafadun lun. b

Inarüni siñá lan habuguruni sun le ladügübei hani weiriei, gama lumoun, gayaraati hadügün fiu katei lun darangilu lan ligaburi hasandiragun hungua. Anihán fiu katei le gayaraabei hadügüni.

Míchiga huméi duru huouguoun. Másiñati sandigua tan aban würi tungua tidurun lan laríagunbei tani weiriei iyawaü lánina agamariduni. Kei hénpulu, afiñetu meha aban würi maríeitu gíritu Alice c tuguya lan gadurunboun, ani álügüdaguatu tungua: “Ka funa san uagu hínsiñe lubéi lun nani weiriei laríagun amu hiñariñu lubaragiñe hamuga nuguya lan laríagua?”. Añahein würiña, aba híchuguni duru hawouguoun lau hasaminarun hadüga lan laganwoundunbei turobuli ladüga ligaburi hóunabun. Ariñagatu Daniela: “Adügati lasigirun nani weiriei aríagua iyawaü lánina agamariduni lun nagañidun saragu. Ábati nabuinchun lau  magundani ani adügati katei le lun nasandirun ladüga lan nagañidun lasigirubei nani weiriei aríagua katei lánina agamariduni”.

Anhein ítara liña lubéi hasandiragun hungua, haritagua huméi michu lani Heowá duru huagu ladüga le ladügübei hani weiriei. Ariñagati Santiagu 1:14: “Dan le lachawahani luriban layumahan gürigia, ligía lábürühan lidoun ladügǘn le wuribabei” (Rom. 14:12; Fili. 2:12). Ligíati, míchugun lumuti Heowá duru huagu. Lubaragiñe lira, wéiriti lebegi úaraguni le harufudubei lun (2 Kro. 16:9).

Masaminara humá ladüga lan laríagun hani weiriei iyawaü lánina agamariduni huguya lan turobulibei. Wéiribei líderagunün gunfuranda humani katei le. Ariñagatiña subudihabútiña luáguti katei le adügati lan taríawagun iyawaü lánina agamariduni lúntima laganwoundun hayumahan gürigia ha aríagubarun hagamaridun, aban ayumahani le siñati hagunfuliruni ni aban.

Madiherida humá saragu. Ariñagatu Catherine wéyuagu áriebu lan tau asaminara luagu turobuli le lánibei tani weiriei lau laríagun iyawaü lánina agamariduni. Sun oura tau asaminara luagu turobuli le. Ariñagatu Frances: “Sagü ibidiñe lan nun halíañein lan nani weiriei, ábatima nadiheridun”. Ariñagatiña amu würiña maríeitiña sandí hamá busiganu dan le añahán lan hama íbirigu ha subudihabúbaña lun liturobulin hani weiriei. Añahein giñe würiña maríeitiña ariñagutiña sandigua hamá houngua hábugua ladüga samina hamá úabei lan gunfuranda hamani amu le gádanbaliña.

Maribanti hasandiragun hungua ítara, gama lumoun, ánhadün asigira asaminara luagu turobuli le, wéiritimabei higarigu. Buídutimabei hetenirun lun humadagua luma Heowá ladüga líchuguba katei le erei hun lun hasigirun hubaruaguóun (Sal. 62:2; Efe. 6:10).

Ida luba líderagunün haliihanu Bíbülia luma hararamagun asaminara luagu le haliihabei? Tidan Bíbülia, anihein abahüdaguni hawagu würiña ha ásügürübaña lídangiñe sügǘ hénrenguti ani lárigiñe hadaarunu hanigi lun Heowá lidan furíei, aba buíduhali lan hasandiragun houngua. Íbini mama lan súnwandan lagidaruni Heowá haturobulin, ruti darangilaü houn. Samina wamá luagu le asuseredubei tun Ana, aba tafurieidun “tídangiñe sun tanigi ayahuaheina lau igarigu”. Ani “keiti tílübei Ana afurieida lun Wabureme”, aba darangilu tan íbini ibidiñe lan tun ida luba lan laranserun katei (1 Sam. 1:10, 12, 18; 2 Ko. 1:3, 4).

Amuriaha humá ídemuei hama wéiyaaña lidan afiñeni ha lídanbaña damuriguaü le ñein hubéi. Ítara haba hun “kei aramudaguagülei luéi garabali luma luéi luriban dan” (Isa. 32:2). Gayaraati hariñagun hun lun hayanuhan tuma aban íbiri to gayaraabei tíchugun dǘgüdaguaü hun ani to úmaboun gayara lan hayanuhan lau sun hafiñen (Ari. 17:17).

Másiñati hálügüdagun hungua anhein gayaraabei lubéi híderaguni hani weiriei lun lígiruni luriban échuni lánina taríawagun iyawaü lánina agamariduni.  Gayaraabei híderaguni. Ariñagatu Bíbülia dan lan le waransehan aban turobuli o dan lan le wageindagun luma aban ágani “buítimatiña biama luéi aban” (Apur. 4:9-12). Anihein aturiahani le arufudubei ménrenguntima lan ligirún luriban échuni lánina taríawagun iyawaü lánina agamariduni luma lunya hafiñerun maríeitiña hawougua dan le hawadigimaridun úara lun hibihini.

Aban katei súdiniti le lunbei gabaroun humani anhein le lunbei lúgubu busén lan hani weiriei lígiruni taríawagun iyawaü wíyetu ani anhein láfaaguña lubéi lun lígiruni échuni le sunsuinagubei. Subudi humuti san anhein ayumuraguaali lubéi lun Heowá lun líchuguni erei le lemegeirubei lun ani áluahaali ídemuei hama wéiyaaña lidan afiñeni? (2 Ko. 4:7; Sant. 5:14, 15). Ladügüñein san liyaraati lun ladisedun luéi luriban échuni le? Kei hénpulu, góunigi laali san layusuruni gágamuru o tablet ani áfaaguati san lun ladisedun luéi katei le gayaraabei ladügün lun léiguadun lidoun óuchawaguni le? (Ari. 27:12). Aranseñu liña san lun lánharun lun ídemuei le híchugubei lun ani ariñaga lumuti sun inarüni hun? Anhein ítara liña lubéi, háfuga gayaraabei lan híderaguni.

Ida luba híderaguni? Teni humá lun le tadügübei Felicia. Maríeitu luma Ethan, le meha héchubei aríagua iyawaü wíyetu lúmagiñe liñüraü. Adüga tumuti Felicia sun tiyaraati lun ménrengun lan lun tani weiriei layanuhan tuma dan le busén lan larihin iyawaü lánina agamariduni. Ariñagati Ethan: “Gayaraati nayanuhan tuma nani weiriou furangu. Óusera tumutina lau saragu ínsiñeni. Íderagua tumutina lun nadisedun luéi óuchawaguni le, ani ayanuhatu giñe numa lun tasubudiruni ida liña lan lidin nun. Íderagua tumutina giñe lun góunigi nani nayusurunu Internet”. Lau sun lira, gáriti tun Felicia tarihin hínsiñe lan taríawagun iyawaü lánina agamariduni lun tani weiriei. Ariñagatu: “Íbini weiri lan nigañi luma igarigu le nasandirubei, subudi numuti míderagun lubéi lan igaburi burí le lun lígiruni luriban échuni le. Furumiñe, ayanuhatiwa luagu le gádanbalin, lárigiñeti lira, gayaraali wetenirun ida luba lan nahandilihani nigarigu”.

Íderagua lumuti tani weiriei hayanuhan luagu katei le lun ladisedun luéi taríawagun iyawaü lánina agamariduni. Íderagua lumutu giñe katei le lani weiriou lunya tafiñerun luagu. Dan le maramudun lani aban wügüri lidebilin tuéi lani weiriou ni le ladügübei ni halíañein lan aba lagidarun mafiñeni tuéi.

Afiñetün san gayara lan hadügün aban katei libe le lun híderaguni hani weiriei? Anhein hariha gayara lan, gayaraabei haliihani ariñahani le ani akutiha humeime úara. Ka hamuga katei gayaraabei ladügüni hani weiriei? Lígiruni taríawagun iyawaü lánina agamariduni luma lun láfaagun lunya hafiñerun luagu. Lubaragiñe lagañidun hani weiriei ladüga busén humá hayanuha luagu katei le, lunti láfaagun lun gunfurandalani ida liña lan hasandiragun hungua ladüga turobuli le. Lidan hikesin kei würi maríeitu, ka lunbei hadügüni? Lunti híderaguni lidan áfaaguni le ladügübei luma híchugun chansi lun lunya gayara lan hafiñerun luagu. Súdiniti lun hakutihani biángubei huguya ka lan adügübei  lun haríagun gürigia iyawaü lánina agamariduni luma ka lan gayaraabei ladügǘn lun lígirun luriban échuni le. d

Anhein afiñen hubéi hénrengubei lan hun hayanuhan luagu katei le magañidunga, gayaraabei ñein lan aban wéiyaali lidan afiñeni danme le hayanuhan luagu turobuli le, lun ladundehani yanu. Lidan kesi le, anúadira humá úara luma hani weiriei aban wéiyaali lidan afiñeni le úmabei buidu lan hasandiragun hungua. Gabaroun huméi íbini lan lígiruni hani weiriei taríawagun iyawaü lánina agamariduni sunsuinagubei, háfuga lásügürüba lan saragu dan lunya hafiñerun luagu. Mábürühala harüna. Ariha huméi katei le abuidureinabei lidan hibagari keisi maríeitiña. Meferidira huméi hemenigi, lau lásügürün dan luma gaguraasuni gayaraayabei lederebugudun hibagari keisi maríeitiña (Apur. 7:8; 1 Ko. 13:4).

Ánheinti abürühaya hani weiriei, mini lan san le masakürihan lan o mígirun lubéi lan luriban échuni le? Mítaranti. Ani anhein aban lubéi échuni háfuga mosu lan lageindagun luma lidan sun libagari. Másiñati léiguadunya lidoun luriban échuni le íbini sügühali lan saragu irumu lúmagiñe madügün lani. Lunya méiguadun lan, mosu láfaagun saragu lunya madügüdüguya lani íbini genege lan ígira laali lan luriban échuni le (Ari. 28:14; Mat. 5:29; 1 Ko. 10:12). Mosu lasansiruni ligaburi lisaminan ani furendei ligíame lun “iyereegulá wuribani” lun; kéiburi taríawagun iyawaü lánina agamariduni luma furumiñeguarügü échuni wíyeti kéiburi, amulidaaguni unguaü (Efe. 4:23; Sal. 97:10; Rom. 12:9). Aranseñu liña san hani weiriei lun ladügüni asansiruni le? Anhein ítara liña lubéi, anihein emenigini. e

Ánheinti mabusenrun lubéi hani weiriei ladügün ni kata lun lígiruni luriban échuni le? Lidan kesi le, maribanti anhaün asandira íruni, igañi luma igarigu kamá hamuga garabaguwa huagun ladüga turobuli le. Abahüdagua huméi sun hidiheri lun Heowá ani líderagubadün katei le lun darangilaü humá (1 Fe. 5:7). Sigiméme humá aturiaha, afurieida lun Heowá luma lun haramagun asaminara luagu le haliihabei ani líderagubadün katei le lúntima hayarafadun lun Heowá ani harihubei layarafaduba lan hun. Ariñagatu Bíbülia: “Yarafati Aburemei lun lesefuruniña ha gáribei hasandirunu hanigi” ani busenti lagiribudagüdüni ugundani hun (Sal. 34:18). Adüga huméi sun hiyati lun aban humá kristiána buitu, áluaha humá ídemuei hamá wéiyaaña lidan afiñeni ani meferidira huméi hemenigi gayaraabei lan lígiruni hani weiriei igaburi le (Rom. 2:4; 2 Fe. 3:9).