Furendei hamuti nagübürigu inarüni lidan burí irumu 20 lubaragiñe hamarieidun. Ingülatéra, nágurahoua lidan lagumeseha irumu 1939. Abasiihatina meha hama nagübürigu lidoun adamuridaguni ani hínsiñeti meha Leskuela Kristiánu lánina Apurichihani nun. Haritagua nágili furumiñeti yanu le níchugubei. Kei sisi lubéi meha irumu nau, mosu meha nararamun tigibuagu aban gafu lun gayara lan narihin lóugiñe plataforma. Aba nasandirun anufudei dan le narihin buin tiña lan Luban Adamuridaguni hau saragu íbirigu derebuguhaña.

Lun napurichihan, aba labürüdüni núguchi le lunbei nariñaguni tuagu aban tiraüraü gárada. Widü meha irumu nau dan le náfuridunbei apurichiha nábugua luagu furumiñeti wéiyaasu. Ma nugundan dan le laliihanbalin tabureme muna le abürüdǘbei tuagu tiraüraü gárada tuguya ani aba lánharun tun líburu “Sea Dios veraz”. Aba néibaagun ariñagei lun núguchi. Gúndaagüda lumutina meha apurichihani luma adamuridaguni ani íderagua lumutina lun busén nan neseriwidun lun Heowá lidan dan dayarüti.

Ábatima lachülürün inarüni tídangiñeti Bíbülia tidoun nanigi dan le lamuriahanbei núguchi lun nagumeserun eresibiroun Garüdia Awisahatu. Kei meha tachülürün kada garüdia, ábaha nagumeserun aliihoun. Ábati laganwoundun nafiñen luagu Heowá, ligíati, lau lásügürün dan, aba nederegeruni nibagari lun.

Lidan irumu 1950, aba wagunbirahóun au hama nagübürigu lun woudin Newayóru lidoun adamurini “Aumento de la Teocracia”. “Día del misionero” líribei programa lun weyu luagu-gádürü 3 lidan widü-hati. Íbiri Carey Barber íchugubalin yanu lánina badisei weyu ligía. Lau lásügürün dan, aba hádangiñehaali lan lílana Musu Úaraguati. Lárigiñe ladügüni íbiri Barber biama álügüdahani lánina badisei houn ha lúnbaña habadiseirun, aba nararamun ani aba nóunabun lau umalali héreti “anha!”. Lau sun unsu  lan meha irumu nau, subudi numuti meha luagu nadügüña lan meha aban katei súdiniti. Íbini ítara, hanufudetina meha lun nebelurun lidoun duna ladüga máfuli nan. Ábati lidin niyaurite numa lurugabu pisina, aba lariñagun nun buídubei lan lasalirun sun katei. Le lufuresen lasuseredun sun katei, madagati nugudi guribini. Aba lásügüragüdünina aban íbiri lumoun le lunbei labadiseirunina. Lúmagiñe weyu súdiniti ligía, anihagua Heowá anügana lídangiñe üma le surubei.

Busentina meha lun prekursoru nan lárigiñe nagumuchuni naturiahan. Aba méhati hadügüdarun numaisturungu nuagu lun naturiahan tidan luban furendei íñuti ani aba nadügüni le habusenrubei. Málüti, aba níchugun fe siñabei lan nerederun deregüdagu lidan inarüni sun anaha lan aturiaha. Aba nafurieidun lun Heowá, ani aba nabürühan aban gárada houn numaisturungu ani lau saragu inebesei, aba nafuranguagüdüni houn nígiraali lan naturiahan danme le lagumuchun irumu ligía. Lau saragu afiñeni luagu Heowá, aba nagumeserun eseriwida kei prekursoru.

Gumesetina eseriwida lidan dan dayarüti lidan sedü-hati, irumu 1957 lidan uburugu Wellingborough. Aba nálügüdüniña íbirigu ha tídanbaña Beteli to Alunduboun anhein subudi habéi somu íbiri le barühali saragu dan eseriwida kei prekursoru lun gayara lan neseriwidun úara luma. Arufudahati meha íbiri Bert Vaisey saragu katei nun. Aban meha íbiri le apurichihabei lau saragu ubebeni ani íderagua lumutina adüga aban lubuidun programa lun apurichihani. Ha meha lílanabaña damuriguaü au, íbiri Vaisey hama sisi íbirigu würiña ha derebuguhaña. Lunti meha naranserun lubá adamuridaguni luma lun níchuguni nóunabagüle. Ruti le saragu chansi nun lun nederebudagüdüni nafiñen luagu Heowá luma lun narufuduni nafiñen luagu.

Lárigiñe násügürün murusun dan furisunrugu ladüga mabusenrun nan nasudarahan, aba nasubudirun aban prekursora espechalitu gíritu Barbara. Aba wamarieidun lidan irumu 1959 ani aranseñu waña meha lun weseriwidun lidan furumiñeguarügü fulasu le ñeinhin lumuti wounahóua. Furumiñe, aba wounahóun Lancashire, le luágunbei nórute oubaü le ñeinhin lubéi lálüda Weyu libiti Ingülatéra. Lárigiñe, lidan eneru irumu 1961, aba nagunbirahóun tidoun Leskuela houn Wéiyaaña hama Ídehatiña le adügǘbei tidan Beteli to Alunduboun, ábanñein hati lidura arufudahani le. Aba taweiridun nanigi dan le niridúnbei kei óunigiruti sirkuitu dan le lagumuchunbei waturiahan tidan leskuela to. Sügütina bián dimaasu uburugu Birmingham lun larufudahan aban óunigiruti sirkuitu nun, le meha barühalibei saragu dan kei óunigiruti sirkuitu, ani ígiratiña lun tidin Barbara numa. Ñéingiñe, aba wagiribudun eseriwida Lancashire luma Cheshire.

Lidan widü-hati, irumu 1962, lidan awanhán lan meha asariñaha, aba weresibirun aban gárada tídangiñe sukursáli. Aban meha gárada lun wabuinchagüdünu lun woudin tidan Leskuela Galaadü! Au tuma Barbara, aba wafurieidun lun Heowá ani aba wabuinchagüdünu gárada tuguya lau lóufudagun ani aba wóunahanu tárigoun tidoun sukursáli. Seingü hati lárigiñe, aba wáfayarun uburugun Brooklyn (Newayóru) lun woudin lidoun külase tánina  Galaadü númeru 38, aban arufudahani le adurarubei diisi hati.

Tidan Leskuela Galaadü, furendeitiwa saragu katei tuáguti Lererun Bungiu, tuáguti lóundarun luma hawagu wíbirigu ha lídanbaña sun Ubóu. Magunfulirungidiwa meha ni 25 irumu, ligíati furendeitiwa saragu hámagiñe ha híbiri aturiahatiña ha tídanbaña leskuela. Sanditina aban lan lubuidun chansi nibihibei lau nagunfulirun sagü weyu lau aban dasi úara luma íbiri Fred Rusk, aban hádangiñe arufudahatiña. Aban katei súdiniti le nafurendeirubei lúmagiñe, lunti lan tídangiñe lan Bíbülia sun adundehani le lunbei líchuguni gürigia. Hádangiñe íbirigu ha meha arufudahabaña tidan Leskuela Galaadü, añahein meha íbirigu ha lǘhaña lidan inarüni, kéiburi Nathan Knorr, Frederick Franz luma Karl Klein. Furendeitiwa saragu lídangiñe ǘnabugu lan íbiri Alexander Macmillan. Ruti aban yanu le íderagubaliwa lun gunfuranda wamani adundeha lániña Heowá lumutuniña lidan lidaani lénrengunga le hawinwandubei lúmagiñe irumu 1914 darí lagumeseha irumu 1919.

Murusun dan lubaragiñe tagumuchun leskuela, aba lariñagun íbiri Knorr woun, au tuma Barbara, wounahóua lan lidoun aban fulasu Áfürika gíriti Burundi. Aba wéibaagun áluaha tidan Anuario átiriñanu lan apurichihatiña Burundi lidan dan ligía. Gama lumoun madaritiwa meha ariñahani luagu ageiraü ligía. Wéibuga meha eseriwida lidan aban ageiraü le ídanbei mapurichihóungili lan, ani lóuguati meha wasubudin luagu. Sanditiwa meha saragu anufudei, íbini ítara, ruti meha wafurieidun darangilaü woun.

Ámuti meha sun katei lidan iseri wadasin: dan, échuni, íbini iñeñein. Mosu meha wafurendeirun faransu. Lanwoun lira, mosu meha wadarirun aban muna lun waganóun ñein. Bián weyu lárigiñe wachülürün Burundi, aba labisidahaniwa Harry Arnott, aban íbiri le meha wámabei tidan Leskuela Galaadü, léibuga meha eseriwida Sanbia ani aba líderaguniwa adarira aban muna. Tuguya meha furumiñetuboun haban misionerugu to ídanboun wawinwanda. Málüti, aba hamahadun gumadimatiña lun wasigirun apurichiha, ani ibidiñeti meha ni kata hawaguti gefentiña luagu Heowá houn. Gumeseediwa yebe échuda luagu lubuidun dasi le dan le hariñagunbei gumadimatiña woun siñá lan werederun ñein anhein ua tubéi gárada lánina wadagimanu wama. Siñá meha wadügün amu katei luéidigia woudin lidoun amu ageiraü, Uganda.

Hanufudetiwa meha webelurun ageiroun Uganda magaradanga, íbini ítara afiñetiwa luagu Heowá.  Aba lafuranguagüdüni aban íbiri kanadaana le gádanbaliwa lun aban úfisi le arihibei hau terencha ha ebelurubaña Ugandoun. Aba lariñagun úfisi ligía woun gayara lan werederun fiu hati darí wibihin gárada lun werederun lidan ageiraü. Ñein warihei lúhabu Heowá.

Ámuti meha weseriwidun Uganda luéi Burundi. Gumeseeli meha apurichihani Uganda, íbini wein-wídürügüñanu lan gefentiña luagu Heowá lidan sun ageiraü. Daritiwa meha saragu gürigia ha ayanuhabaña inglesi lidan fulasu le ñein lubéi wapurichiha. Lau sun lira, málüti aba wíchugun fe lun lan hawanserun aturiahatiña mosu wafurendeirun aban lídangiñe saragu iñeñein le ayanuhóubei ñein. Aba wagumeserun apurichiha lidan uburugu Kampala le ñein lubéi hayanuha hiibe-agei gürigia luganda, ligía aba lubéi wagumeserun afurendeira luganda. Lau sun lü wamá lubaragiñe wafurendeirun ayanuha luganda buidu, buiti meha lidin woun lidan wapurichihan lárigiñe wafurendeiruni iñeñein le. Aba wagumeserun gunfurandei kátima lan hemegeirubei aturiahatiña Bíbülia ani aba hadaarunu hanigi ariñaga woun ka lan hasaminarubei luagu le hafurendeirubei.

Ma meha wagundan dan le wíderaguniña gürigia ǘnabugutiña afurendeirei inarüni. Lárigiñe, ábaya weresibirun aban dasi le magurabun wamuti: neseriwidun kei óunigiruti sirkuitu lidan sun ageiroun Uganda. Aba tóunahaniwa Beteli to Kéniaboun áluaha fulasu burí le ñéintima lubéi hemegeirúa apurichihatiña lun hounahóun prekursorugu espechaliti ñeinhin. Lau sun mayanuhangiña lan meha lílana burí fulasu ligía hama gefentiña luagu Heowá, buiti heresibiruniwa hábiñe liibe-agei dan. Adügatiña meha lun buidu lan wasandiragun woungua hábiñe ani aransetiña meha éigini woun.

Ábaya naweiyasuhan. Aba náfayahan tidan íngiini luagu bián weyu lúmagiñe uburugugiñe Kampala darí Mombasa, potu le Kéniabei, lárigiñe lira, aba nasigirun áfayaha tidan waporu darí nachülürün ubouhun Séichelesi, le burí lídanbei barana Índiku. Dan lárigiñe lira, lidan irumu 1965 darí irumu 1972, aba tagumeserun Barbara áfayaha numa abisidahei burí ubouhu Séichelesi ani biámarügüñanu meha apurichihatiña lidan fulasu le. Lidan dan ligía, aba lagumeserun aban sétanu ñein, lárigiñe, aba ábanhali lan damuriguaü. Áweiyasuhatina giñe lidoun amu fulasu lun nabisidahaniña íbirigu Eritüréa, Etiopía luma Sudán.

Aba lasansirun katei Uganda, ladüga hagumeserun súdaragu agumadiha. Adügati anufudei le wásügürübei luagu saragu irumu lun nasaminarun luagu súdini lan lun gaganbadi wamá houn gumadimatiña (Mar. 12:17). Luagu meha aban dan, amuriahóuati hama sun terencha lun houdin abürüdǘwa tidan hani polisía áfisi tótima yarafaboun tun haban. Aba wadügüni lau lóufudagun. Fiu weyu lárigiñe, lidan anaha lan aweiyasuha úara luma amu misioneru uburugu Kampala, aba hararamuniwa polisía ha nadagimeinbaña aramudaguarügü. Aba tádühan wanigi le wanufude. Aba hariñagun woun weseriwiduña lan kei aríaahatiña fulasu ani aba hanügüniwa tidoun hani polisía áfisi to wéiritimaboun. Ñein, aba wafuranguagüdüni houn misionerugu lan wagía, gürigia lan buítiña wagía ani bürǘ wamaali lan wiri tidan áfisi to hani polisía to yarafaboun lun fulasu le ñein lubéi weredera. Íbini ítara, meberesentiña lau le wariñagubei. Aba hanügüniwa lúrudugu ha táubaña áruma tidoun áfisi to hani polisía tótima yarafatimaboun tun haban misionerugu. Aba wasandirun awalidaguni dan le lariñagunbei aban úfisi subudi lániwa ani bürǘ wamaali lan wiri, ariñaga ligía houn lun hígiragüdüniwa.

Lidan meha dan ligía, gabügürüguati meha hararamuniwa súdaragu ǘmada. Sanditiwa meha anufudei dántima le hararamuniwa súdaragu ha meha  bacharuaaña. Gama lumoun, súnwandan meha wafurieidun, sagü meha hígiruniwa lun wásügürün, aba meha wasandirun darangilaü. Híruti lidan lan irumu 1973, aba lichugún gumadi lun háfuridun sun misionerugu terenchana Ugandagiñe.

Ábaya wounahóun eseriwida lidan amu ageiraü; aba woudin Kosu Marüfíli, aban ageiraü Áfürika le luéigiñebei oubaü le ñéingiñe lubéi lálüda Weyu. Wéiriti meha asansiruni le woun ladüga mosu meha wéchudun luagu ámuya échuni, wagiribudun ayanuha faransu súnwandan, ani mosu meha wawinwandun hama misionerugu ha lídangiñetiña ámuñegueinarügü ageiraü. Lau sun lira, ariha wamuti lúhabu Heowá dan le hánharunbei saragu gürigia ǘnabugutiña ani haruma tanigi lun uganu buiti lau lóufudagun. Afiñetiwa meha luagu Heowá, ani sigiti anügawa luéigiñe üma le surubei.

Sódini, aba tasandirun Barbara lau kánserü. Lau sun aweiyasuha wamá lóubawagun Yuropa saragu wéiyaasu lun lagaranihóun tun ñein, aba lawosudun katei lidan irumu 1983, ligía mosu lubéi meha wígiruni weseriwidun Áfürika. Gárigüda lumutu meha katei le wanigi. Lidan awanha lan eseriwida tidan Beteli to Alunduboun, ábatima lawosudun tisandi Barbara ani aba tounwen. Ma meha lubuidun ligaburi híderagunina íbirigu. Íderagua hamutina aban feru mafiñentiña lidan náfaagun lun néchudun luagu iseri gádantina luma lun nasigirun afiñera luagu Heowá. Dan lárigiñe, aba nasubudirunu Ann, aban íbiri to meha abasihaboun eseriwida Betelirugu ani seriwiharu meha kei prekursora espechalitu luagu aban dan. Furanguti meha hínsiñe lan Heowá tun ani buidu ligía tumadagua luma. Ligíati, aba wamarieidun lidan irumu 1989, lúmagiñe dan ligía, weseriwiduña úara tidan Beteli to Alunduboun.

Lúmagiñe irumu 1995 darí 2018, ibiha numuti lubuidun chansi lun nabisidahan 60 ageiraü kei íbiri le lóunahabei Musu Úaraguati, (le meha subudiwabei kei óunigiruti le abisidahabarun sukursáli). Ruti le chansi nun lun narihini ida liña lan labiniruniña Heowá lubúeingu meberesenga le asuseredubei houn.

Lidan irumu 2017, ábaya nidin Áfürika lidan aban lídangiñe bisida le. Ma meha nugundan nanügünu Ann asubudirei Burundi luagu furumiñe wéiyaasu ani ma meha giñe wagundan lau ánharaaña lan saragu gürigia lun inarüni ñein. Lidan üma le meha ñein lubéi napurichiha lidan irumu 1964, guentó, anuheinharu aban tubuidun Beteli to eteniruboun houn hóugiñe 15,500 apurichihatiña.

Dan le neresibirunu programa lau liri sun ageiraü le lunbei nabisidahani lidan irumu 2018, aba meha nagundaarun lau narihini anihein lan liri Kosu Marüfíli tidan. Kei nachülürün Abiyán, uburugu le wéiritimabei Kosu Marüfíli, aba nasandiragun nungua kamá hamuga nageirañadina. Tidan Beteli, aba narihinu lísüta lau linumerun hagagamurun íbirigu ha awadigimaridubaña ñein, aba níchugun fe subudi lan Sossou nun, aban hádangiñe íbirigu ha ñéinbaña. Sun yebe naritagun aban lan meha íbiri le eseriwidubei kei óunigiruti sirkuitu Abiyán, dan meha le neseriwiduña lubéi ñein. Gama lumoun mama meha ligía; lisaani íbiri le meha nasubudirubei.

Gúnfuli laali Heowá lererun. Arufudahati lénrengunga le úmabei nagagibudagua nun dan le lan wafiñerun luagu Heowá, chóuruti lanügübadiwa lan luéigiñe üma le surubei. Guentó, busentiwa wasigirun afalarei üma harugoungati le anügübaliwa lidoun ibagari magumuchaditi (Ari. 4:18).