1, 2. Según Matéu 5:11, ka igaburi lunbei warufuduni dan le wagagibudagun luma óuchawaguni?

FÜRAMASETI Hesusu houn lani disipulugu gúndaabaña lan le tímatimaati. Ariñagati giñe houn hagagibudaguba lan ha hínsiñehabubaña lun luma turobuli (Mat. 10:22, 23; Luk. 6:20-23). Gúndaatiwa lau hádangiñetiwa lan lani Kristu disipulugu. Íbini ítara, másiñati wasandirun saragu idiheri ladüga mabusenrun hamá waduheñu weseriwidun lun Heowá, ladüga héibaahaniwa gumadimatiña o ladüga hadügüdarun wánigu paaná lidan wadagimanu o leskuelarugu wawagu lun wadügün katei le mínsiñebei lun Heowá.

² Úati agundaaruti lau éibaahouni. Íbini ítara, ariñagatu Bíbülia woun lun wasandirun ugundani dan le wéibaahoun. Ariñagati Santiagu lubaragiñe lan lábürühan warüna dan le wagagibudagun luma óuchawaguni, lunti lan gunda wamá (Sant. 1:2, 12). Ani ariñagati giñe Hesusu lunti lan wagundaarun dan le wéibaahoun (aliiha huméi Matéu 5:11). Ligíati, ida luba wagundaarun laganagua turobuli? Gayaraati wafurendeirun saragu katei tídangiñe gárada to labürühaboun Santiagu houn furumiñetiña kristiánugu. Furumiñe, ariha waméi ka lan turobuli úmabei hagagibudagua.

3. Ka asuseredubei murusun dan lárigiñe aban lan lani Hesusu disipulu Santiagu?

³ Murusun dan lárigiñe disipulu lan Santiagu le lamulen Hesusu, aba hagumeserun kristiánugu ha Herusalénbaña éibaahoua (Adü. 1:14; 5:17, 18). Ani dan le lafarúnbei disipulu Esütéban hilagubei, aba hanurahan saragu kristiánugu Herusaléngiñe ani aba  houdin “lidoun burí lirahüñü fulasu Hudéa luma Samaria”. Chülütiña fiu hádangiñe Chípüre luma Antiokía (Adü. 7:58–8:1; 11:19). Gayaraati wasaminarun luagun lénrengunga le úmabei hagagibudagua disipulugu ha. Íbini ítara, apurichiha hamuti uganu buiti lau ubebeni lidan fulasu le ñein lubéi hadagara, ani adügǘwati damuriguaü lidan sun fulasu le lábugiñebei lagumadihan Roma (1 Fe. 1:1). Gama lumoun, mama ya lagumucha haturobulin furumiñetiña kristiánugu.

4. Ka amu turobuli hawandubei kristiánugu lánina furumiñeti sígulu?

⁴ Mosu meha hawandun furumiñetiña kristiánugu saragu turobuli. Kéiburi, lidan irumu 50, aba líchugun urúei Külaudiu gumadi lun háfuridun sun huríu Rómagiñe. Ligíati, sun huríu ha meha adügagubaña houngua kristiánugume mosu meha hígirunu haban lun houdin awinwanda lidan amu ageiraü (Adü. 18:1-3). Kéiburi lidan irumu 61, abürühati apostolu Pábulu luagu anabúa hamá líbirigu, dawa hagía furisunrugun ani gidawa ligía hamegen hawéi (Ebü. 10:32-34). Ani ítara kei amu gürigia, mosu meha hawandun kristiánugu gudemei luma sandi (Rom. 15:26; Fili. 2:25-27).

5. Kaba burí álügüdahani wóunaba?

⁵ Dan le labürüdünbarun Santiagu ligaradan lubaragiñe irumu 62, subudi lumuti meha buidu ka lan turobuli úmabei hagagibudagua líbirigu. Adundeha lumuti meha Heowá Santiagu lun labürühan houn kristiánugu lun líchugun dǘgüdaguaü houn, le gayaraabei líderaguniña lun gúndaameme hamá íbini laganagua turobuli. Wakutiharu ligaradan Santiagu ani wóunabaali álügüdahani burí le: Ka san luwuyeri ugundani uágubei layanuha Santiagu? Ka turobuli gayaraabei lagidaruni lugundan aban kristiánu? Ani ida luba líderaguniwa lichú aau, afiñeni luma ganigi lun gunda wamá meberesenga ka lan turobuli úmabei wagagibudagua?

6. Según Lúkasi 6:22, 23, ka uagu gayara lubéi lagundaarun aban kristiánu dan le lagagibudagun luma óuchawaguni?

⁶ Saminatiña saragu gürigia gayara lan gunda hamá ánheingubeirügü buidu lubéi hátuadi o ánheingubeirügü gaseinsun habéi ani gunda hagía haduheñu. Gama lumoun, layanuhaña meha Santiagu luagu aban lídangiñe igaburi le líchugubei sífiri. Ligíati, gayaraati wagundaarun meberesenga ka lan asuseredubei lidan wabagari (Gal. 5:22). Wagía kristiánugu, gúndaatiwa dan le wasubudiruni wagundaragüdüñein lan Heowá ani wáyeihañein lan Hesusu (aliiha huméi Lúkasi 6:22, 23; Kol. 1:10, 11). Ítara kei aban igemeri durungu lidan aban lanpu le herigini, le ñein lubéi siñá lan lebelurun ni garabali ni huya, durungu liña giñe ugundani tidan hanigi kristiánugu. Méñeguchun lubéi maseinsuni o luriban átuadi. Ani méñeguchunbei giñe dan le hadügün amu bula wau o dan le maha hamá waduheñu o amu gürigia lun weseriwidun lun Heowá. Sagü hálugun gürigia lun hagidaruni wagundan ábatima laganwoundun ugundani le wasandirubei. Chóurugüda lumuti sun turobuli le úmabei wagagibudagua ladüga wafiñen lani lan Kristu disipulugu ha inarünitiña wagía (Mat. 10:22; 24:9; Huan 15:20). Ligía gayara lubéi meha lariñagun Santiagu: “Niduheñu, lunti gunda humá dan le hasufurirun furumiñeguarügü óuchawaguni” (Sant. 1:2).

7, 8. Ka uagu derebugutima lubéi wafiñen dan le wóuchawagun?

⁷ Ariñagati giñe Santiagu ámuya katei le uágubei aranseñu hamá kristiánugu lun hásügürün lídangiñe lanarime burí óuchawaguni. Ariñagati: “Dan le lóuchawagun hafiñen, furendeitimatün gaguraasuni” (Sant. 1:3). Gayaraati lagoubawaguagüdün óuchawaguni luma watu le ayusurúbei lun tadügǘn aban eféin lautu gürabu. Dan le tásüdün aban eféin ani lárigiñe aba tadilirún ábatima léredun gürabu. Ítarameme, dan le wagagibudagun luma lénrengunga, ábatima léredun wafiñen. Ligía gayara lubéi meha lariñagun Santiagu: “Lunti lanügünün gurasu ligía darí lébeha üma, gayara láamuga labuidurun higaburi ani úaragua huguyame” (Sant. 1:4). Dan le warihini derebugugüda lumuti lan óuchawaguni wafiñen, gayaraabei wawanduni lau ugundani.

⁸ Tidan ligaradan Santiagu, ayanuhati luagu fiu lídangiñe turobuli le gayaraabei lagidaruni wagundan. Katei san turobuli burí ligía, ani ida luba waransehani?

9. Ka uagu megei wabéi lichú aau?

⁹ Turobuli: ibidiñe lan woun kaba lan wadüga. Danme le wásügürün lídangiñe óuchawaguni, busentiwa wamuriahan luma Heowá lun líderaguniwa anúadira wadügüni le aubei lagundaara, lun giñe líderaguniwa anúadira le gayaraabei lahuudun houn wíbirigu luma le gayaraabei líderaguniwa lun úaragua wamá (Her. 10:23). Mégeitiwa  lichú aau lun wasubudiruni kaba lan émeri wafalara luma lun wayanuhan houn ha éibaahabaliwa. Dan le ibidiñe lan woun kaba lan wadüga, gayaraabei lábürühan warüna ani gayaraabei giñe weferidiruni wagundan lau lóufudagun.

10. Según Santiagu 1:5, ka lunbei wadügüni anhein megei wabéi lichú aau?

¹⁰ Le láranibei: wamuriahan lichú aau luma Heowá. Lun wawandun óuchawaguni meferidirunga waméi wagundan, mosu wafurieidun lun Heowá furumiñe lun wamuriahan luma lun líchuguni lichú aau le wemegeirubei woun lun gayara lan wanúadahan buidu (aliiha huméi Santiagu 1:5). Ka lunbei wadügüni anhein genege lubéi woun móunabun lani Heowá wafurieidun lau lóufudagun? Ariñagati Santiagu lun gabügürügua lan wafurieidun lun Bungiu. Magañidunbei Heowá wama ladüga wamuriahan luma saragu wéiyaasu lun líchugun lichú aau woun lun wawanduni óuchawaguni. Lubaragiñe lira, líchugubei Wáguchi le siélubei le wamuriahabei luma woun lau areini (Sal. 25:12, 13). Ariha lumuti le wásügürübei, gudemehabuti woun ani busenti líderaguniwa. Ma adügati katei le lun wagundaarun? Ida liñati líchugun Heowá lichú aau woun?

11. Ka amu katei lunbei wadügüni lun wibihin lichú aau?

¹¹ Ruti Heowá lichú aau woun tídangiñe Lererun (Ari. 2:6). Ligíati, lun wibihin lichú aau, mosu waturiahanu Lererun Bungiu tuma agumeiraguagüdüni tídangiñetu Bíbülia. Gama lumoun, úati buídurügü lan waturiahanu Bíbülia. Mosu wafalaruni adundehani le líchugubei Heowá woun lidan wabagari. Ariñagati Santiagu: “Adüga huméi le tariñagubei Lererun Bungiu, mama lun aganbarügü humani” (Sant. 1:22). Dan le wafalaruni ladundehan Heowá, aba gürigia wamá ha gálumatiña, gaganbaditiña ani gudemehabutiña (Sant. 3:17). Gayaraati líderaguniwa igaburi burí le lun wagagibudagun luma furumiñeguarügü turobuli meferidirunga waméi wagundan.

12. Ka uagu súdini lubéi wasubudirunu Bíbülia buidu?

 ¹² Ítara tiña Lererun Bungiu kei aban isubusei ani íderagua tumutiwa asubudirei ka lan lunbei wasansiruni luma ida luba lan wadügüni (Sant. 1:23-25). Kéiburi lárigiñe waturiahanu Lererun Bungiu, másiñati aba lan wíchugun fe mosu lan wárügüdagun woungua dan le wagañidun. Lau lídehan Heowá, gayaraati wafurendeirun lun gáluma wamá dan le hadügün gürigia o somu turobuli lun wasafaragun. Ligíati, dan le gáluma wamá, aransetimatiwa lun wagagibudagun luma lénrengunga le lanügübei ibagari. Gayaraatimabei wasaminarun buidu ani buídutimabei le lunbei wanúadiruni (Sant. 3:13). Súdiniti lun wasubudirunu Bíbülia buidu!

13. Ka uagu lunti lubéi wakutihani le gayaraabei wafurendeiruni hámagiñe lubúeingu Heowá ha úaraguabaña?

¹³ Anihein dan furendeitiwa lídangiñe wachara lárigiñe le súfuri wamaalibei. Mabuidunti lafurendeirun gürigia ítara, buídutimati lafurendeirun lídangiñe buiti luma wuribati le adüga hamaalibei amu. Ligía línchahanbaliwa Santiagu lun wakutihani le gayaraabei wafurendeiruni lúmagiñe Abüraámü, Hobu, Elíasi tuma Raabü (Sant. 2:21-26; 5:10, 11, 17, 18). Gagibuguatiña meha lubúeingu Heowá úaraguatiña ha luma óuchawaguni le meha gayaraabei lagidaruni hagundan. Furendeitiwa hámagiñe gayara lan giñe wawandun lau lídehan Heowá.

14, 15. Ka uagu mosu lubéi wadariruni láranina machouruni?

¹⁴ Turobuli: machouruni. Háfuga aniheinbei lan dan hénrengu lan woun gunfuranda wamá somu katei le waliihabei tidan Bíbülia. O háfuga móunabun lani Heowá wafurieidun kei aubei wagurabei. Gayaraati ladügün le lun lebelurun machouruni woun. Ánhawa metenirun lun machouruni le wasandirubei, gayaraabei ledebilidagüdüni wafiñen ani gayaraabei giñe lagadeiruni wamadagua luma Heowá (Sant. 1:7, 8). Ani gayaraabei giñe ladügün lun weferidiruni wemenigin lubá ámuñegü.

¹⁵ Góubaguagüda lumuti apostolu Pábulu wemenigin luma aban óunguru (Ebü. 6:19). Ágüdaha lumutu óunguru waporu lidan liñawan dan luéi tidin abugucha luagu dübü. Gama lumoun, lahuuduba óunguru ánheingubeirügü mátumuragun güringüri le ágüdahabalin. Ítara kei gayara lan ledebilidun güringüri dan le lagahüdün, gayaraati giñe ledebilidagüdüni machouruni wafiñen. Dan le lagagibudagun aban gürigia le machourunti luma lénrengunga, gayaraati leferidiruni lafiñen luagu lagunfulirubei lan Heowá le füramase láalibei. Ani úati emenigini anhein ua lubéi afiñeni. Kei lariñaguni Santiagu, “le lougua tafiñen, ítara liña kei aban lugudi barana le lanügübei garabali luéigiñe aban oubaü luagun aban” (Sant. 1:6). Chóuruti magundanbei lan aban gürigia le asandiragubei lungua ítara?

16. Ka lunbei wadügüni anhein adagara machouruni wawagu?

¹⁶ Le láranibei: wagidaruni machouruni wawariua luma wederebudagüdüni wafiñen. Másuha humá. Lidan meha lidaani profeta Elíasi, machouruntiña meha lubúeingu Heowá luagu hafiñen. Ligía lariñagunbei Elíasi houn: “Ídaba san hígirei huraraü biánguati le? Anhein Aburemei lubéi Búngiubei le tímatimaati, falá huméi, anhein Baali lubéi, ligialá hafalara!” (1 Uru. 18:21). Gayaraati lasuseredun le uguñe weyu. Ligía lunti lubéi wakutihan buidu lun wachoururuni woungua Heowá lan Búngiubei le inarüniti, Lererun lan Bíbülia ani lubúeingu lan gefentiña luagu Heowá (1 Tesa. 5:21). Lau wadügüni le, wagumuchuba lau machouruni le wasandirubei ani wederebudagüdübei wafiñen. Anhein megei wabéi ídemuei lun wagidaruni machouruni wawariua, gayaraati wamuriahan hama wéiyaaña lidan afiñeni lun híderaguniwa. Lun wasigirun eseriwida lun Heowá lau ugundani, mosu wadügüni le hariñagubei woun lau lóufudagun.

17. Ka gayaraabei lasuseredun anhein weferidira ganigi le wawagubei?

¹⁷ Turobuli: lábürühan warüna. Ariñagatu Bíbülia:  “Anhein ábürüha barüna dan le lidan ban lénrengunga, lóuguarügü liña bere” (Ari. 24:10). Dimurei Ebüréu le ásügürawagüdübei ya kei “lábürühan arünaü” gayaraati mini lan “leferidirúniwa ganigi”. Anhein weferidira ganigi wamá, weferidirubei giñe wagundan.

18. Ka mini lubéi awanduni?

¹⁸ Le láranibei: wafiñerun líchuguba lan Heowá ganigi woun lun wawandun óuchawaguni. Mégeitiwa ganigi lun wawanduni óuchawaguni (Sant. 5:11). Dimurei le layusurubei Santiagu le ásügürawagüdübei kei “awanduni” adügati lun wasaminarun luagun aban gürigia le araramubei lidan aban fulasu sin lánhingichun. Másiñati adüga lan giñe lun wasaminarun luagun aban súdara le ganigiti le awandubalin lagayuahan lágani luagu sin lagiribudun lárigoun ni murusun.

19. Ka gayaraabei wafurendeiruni lúmagiñe apostolu Pábulu?

¹⁹ Aban meha lubuidun hénpulu lánina ganigi luma awanduni apostolu Pábulu. Anihein meha dan débili lan lasandiragun lungua, íbini ítara, awandati ladüga afiñeti meha luagu líchugubei lan Heowá erei le lemegeirubei lun (2 Ko. 12:8-10; Fili. 4:13). Gayaraati giñe wibihini luwuyeri erei luma ganigi le ánhawa ánhara lau ǘnabuguni luagu megei wamani lídehan Heowá (Sant. 4:10).

20, 21. Ka katei lunbei wachoururuni?

²⁰ Chouru wamuti mama lan abeichúni lúmagiñeti Heowá óuchawaguni le úmabei wagagibudagua. Ariñagati Santiagu woun lau ichouruni: “Dan le lebelurun lun aban gürigia lun ladügün katei wuribati, maritagualá luagu Bungiu lan ádarubalin katei ligía lidoun; ladüga mebeluti lidoun Bungiu lun ladügün wuribani, mada lumuti giñe hadoun gürigia lun hadügüni” (Sant. 1:13). Anhein chouru wabalin luagu ítara liña lan, wayarafadatimaba lun Wáguchi le siélubei le hínsiñehabubei (Sant. 4:8).

²¹ “Úati sánsiguaü lidan” Heowá (Sant. 1:17). Ítara kei líderaguniña kristiánugu ha lánina furumiñeti sígulu awanda óuchawaguni, líderagubadiwa giñe kada aban wádangiñe awanda uguñe weyu. Ayumuragua wamá lun Heowá lun líchugun lichú aau, afiñeni luma ganigi woun. Lóunabubei wafurieidun. Chouru waméi líderagubadiwa lan lun gúndaameme wamá íbini dan le wagagibudagun luma óuchawaguni.