ATURIAHANI 5
Kristu lichügüdinabei kada wügüri
“Kristu [...] lichügüdinabei kada wügüri” (1 KO. 11:3).
UREMU sjj 12 Heowá Bungiu le Wéirigubei
LE LUNBEI WATURIAHANI *
1. Ka ínchahabalin aban wügüri lidan ligaburi lóuserunu lani weiriou hama lisaanigu?
KA ÑǗBUINBEI hichügüwagu dan le haganbuni dimurei “hachügüdina tílana muna”? Añahein wügüriña ígiraguagüdatiña houngua lun hechu, lun harasan o lun igaburi le harihibei hadan haduheñu luáguti houserún würiña hama isaanigu. Ariñagatu Yanita, aban íbiri to awinwanduboun Yuropa: “Le ñein lubéi nawinwanda, afiñetiña gürigia lunti lan hanügǘn hiñaruñu ǘnabu hawéi eyeriñu ani lunti lan hanügǘn kei sarawanda”. Ariñagati giñe aban íbiri gíriti Luke, le awinwandubei Meriga: “Añahein agübürigu arufudahatiña houn hasaanigu ha wügüriña, sun lan le hariñagubei würiña mama lan aban katei súdiniti, ligíati moun lubéi hadügün wügüriña gasu lau le hariñagubei würiña”. Sun saminaü burí le múaranti luma le labusenrunbei Heowá luáguti ligaburi hóuseruniña wügüriña hani weiriou (ariha huméi giñe Márükosu 7:13). Ida luba lafurendeirun aban wügüri lun aban lan hachügüdina tílana muna le buiti?
2. Ka lunbei lasubudiruni hachügüdina tílana muna, ani ka uagu?
2 Lun aban lan hachügüdina tílana muna buiti aban wügüri, le lunbei ladügüni furumiñe, lun gunfuranda lani le lagurabubei Heowá lúmagiñe. Ani lunti lasubudiruni ka lan uagu líchigei Heowá ubafu le lun, ani ida luba láyeihani ligaburi Heowá luma ligaburi Hesusu. Ka uagu súdini lubéi lun lasubudiruni wügüri sun le? Rúhali Heowá ubafu houn hachügüdina tílana muna ani agurabati lun hayusuruni ubafu le buidu (Luk. 12:48b).
KA MINI LUBÉI ICHÜGÜDINAÜ LAN ABAN WÜGÜRI?
3. Ka larufudahabei 1 Korintuna 11:3 luáguti ichügüdinaü?
3 (Aliiha huméi 1 Korintuna 11:3). Ariñaga lumuti bérusu burí le, ida liña lan laransehaniña Heowá lisaanigu ha ubouagubaña hama ha siélubaña. Anihein bián katei le lunbei gabaroun hamani ha únbaña lichugúa ubafu: ubafu le hawagubei luma ligaburi hayusuruni. Heowá ‘ichügüdinabei’ le gabafutimabei ani sun lisaanigu dandu ha siélubaña kei ha ubouagubaña lunti hóunabun luagu ubafu le ichugúbei houn (Rom. 14:10; Efe. 3:14, 15). Rúhali Heowá ubafu lun Hesusu luagu damuriguaü; gama lumoun lunti lóunabun Hesusu lun Heowá luagu ligaburi lóuseruniwa (1 Ko. 15:27). Rúhali giñe Heowá ubafu lun wügüri maríeiti tuagu lani weiriou luma hawagu lisaanigu, gama lumoun lóunabuba wügüri maríeiti lun Heowá luagu ligaburi lóuseruniña (1 Fe. 3:7).
4. Ka ubafu luágubei Heowá luma Hesusu?
4 Heowá hachügüdinabei sun ánheligu hama gürigia ha ubouagubaña, ligíati gabafuti lun líchugun gumadi houn lisaanigu luma lun ladügün lun hagunfuliruni (Isa. 33:22). Lichügüdina giñe damuriguaü kristiánu Hesusu ani garichati giñe lun líchugun gumadi luma lun ladügün lun lagunfulirúniwa (Gal. 6:2; Kol. 1:18-20).
5. Ka ubafu hámabei hachügüdina tílana muna ha kristiánu, ani halía lébeda habafu?
5 Ítara kei Heowá luma Hesusu, gabafuti giñe hachügüdina tílana muna le kristiánu lun lanúadiruni le buídubei houn tílana luban (Rom. 7:2; Efe. 6:4). Gama lumoun gébehati lubafu. Kei hénpulu lunti lafalaruni le tariñagubei Bíbülia lidan luáguti lichugún gumadi (Ari. 3:5, 6). Ámuya katei, mabafuti hachügüdina tílana muna lun líchugun gumadi houn gürigia ha mama tílana luban (Rom. 14:4). Dan le haweinamudun lisaanigu ani aba háluaagun houngua, inebemémegili háguchi houn, gama lumoun mámaaña lábugiñe lubafu (Mat. 19:5).
KA UAGU LÍCHIGA HEOWÁ UBAFU HOUN GÜRIGIA?
6. Ka uagu líchiga Heowá ubafu houn gürigia?
6 Ruti Heowá ubafu houn gürigia ladüga hínsiñe hamá lisaanigu lun. Ligía aban idewesei lúmagiñeti Heowá. Seremei lun ubafu le, adüga hamuti lisaanigu Heowá katei lau aban gálumaü ani sin ni murusun chagaguaü (1 Ko. 14:33, 40). Lun hamuga ua lan furangu lan ka lan úmañei ubafu hadan tílana muna, aniheinbei hamuga chagaguaü ani úabei hamuga ugundani múnada. Kéiburi, úabei hamuga asubudiruti ka lan úmañein lagumuhóun dimurei dan le ladügǘwa lan somu katei, ibidiñewabei hamuga giñe kaba lan anügei ubaraü.
7. Según Éfesuna 5:25, 28, ida liña labusenrun Heowá lun lóuserunu aban wügüri lani weiriou?
7 Anhein buidu lubéi lun gabafu hamá wügüriña hawagun tílana haban, ka uagu añahein lubéi saragu würiña uguñe weyu sandiguatiña houngua lóuseraguñanu lan hani weiriei ani lamudiraguñanu lan? Hóuserubei ítara lugundun maganbaditiña saragu wügüriña lun lugumadin Heowá libügürü hóuseruniña tílana haban, ani himei hamuti wügüriña ha hafalaruni hechun luma hechun gürigia ha lídanbaña fulasu le ñein lubéi hawinwanda. Másiñati giñe hóuserubaliña wügüriña ha hani weiriou wuriba lúnrügü hasandiragun houngua buidu. Kéiburi, másiñati gumadi lanu wügüri lani weiriou lun lasandiragun lungua súdini lan, luma lun larufuduni houn amu “wügüri lan ligía”. Anhein siñá lubéi libihin lun línsiñedun tun lani weiriou saminati gayaraabei lan libihini lau tanufudedun luéi. Añahein hádangiñe yusu hamuti anufudei le lúntima gabafu hamá tuagu hani weiriou. * Furanguti adügati lan igaburi burí le lun magundan lan tasandiragun tungua luma lun tasandiragun tungua mineben tan lun tani weiriei. Lanwoun lira, múaranti igaburi le luma le labusenrubei Heowá (aliiha huméi Éfesuna 5:25, 28).
IDA LUBA LAFURENDEIRUN ABAN WÜGÜRI LUN ABAN LAN HACHÜGÜDINA TÍLANA MUNA LE BUITI?
8. Ida luba lafurendeirun aban wügüri lun aban lan hachügüdina tílana muna le buiti?
8 Gayaraati lafurendeirun aban wügüri lun aban lan hachügüdina tílana muna le buiti lau láyeihani ligaburi layusuruni Heowá luma Hesusu habafu. Akutiha waméi bián igaburi le larufudubei Heowá luma Hesusu, ani ariha waméi ida luba lan háyeihaniña hachügüdina tílana muna lidan ligaburi hóuserunu hani weiriou hama hasaanigu.
9. Ida liña larufudun Heowá ǘnabuguni?
9 Ǘnabuguni. Heowá ligía Bungiu le chútimabei au lidan sun ubóu, íbini ítara aganba lumutiña lubúeingu (Agu. 18:23, 24, 32). Ígirati giñe Heowá lun hariñaguni ha lábugiñebaña lubafu le hasaminarubei (1 Uru. 22:19-22). Lau sun machara lan Heowá magurabunti lun macharabadiwa lan. Lubaragiñe lira, íderagua lumutiña giñe lubúeingu lun buidu lan lidin houn lau sun chará hamá (Sal. 113:6, 7). Ani tidan Bíbülia ariñagati Dawidi luagu Heowá: “Buguyarügüñein íderaguana!” (Sal. 27:9; Ebü. 13:6). Subudi lumuti meha Dawidi sun lan le ladügübei seremei lan lun lǘnabugun luma lídehan Heowá (2 Sam. 22:36).
10. Ida liña larufudun Hesusu ǘnabuguni?
10 Ariha waméi le ladügübei Hesusu. Íbini ‘Máisturu lan ani Aburemei’ ligía, aranseñu liña meha lun lachibuni hagudi lani disipulugu. Ka lébunabei lígirun Heowá lun labürüdǘniwa sügǘ le tidan Bíbülia? Chóuruti lun lan larufudahan ǘnabuguni woun, íbini houn hachügüdina tílana muna. Ariñagati Hesusu: “Rúhadina aban hénpulu hun lun hadügüni libeméme le nadügübei” (Huan 13:12-17). Lau sun gabafu lan meha Hesusu saragu, magurabunti meha lun leseriwidúniwa lun, le ladügübei aban leseriwidun houn amu (Mat. 20:28).
Arufudati aban hachügüdina tílana muna ǘnabuguni luma ínsiñeni lau lídehan lidan dasi le múnadati luma dan le letenirun lun hamadagua tílana luban luma Heowá. (Ariha huméi párafu 11 luma 13).
11. Ka gayaraabei hafurendeirun hachügüdina tílana muna libügürü ǘnabuguni lúmagiñe Heowá luma Hesusu?
11 Ka wafurendeirubei? Gayaraati larufudun hachügüdina tílana muna ǘnabuguni lidan ámuñegueinarügü igaburi. Kéiburi, magurabunti lun machara tan lani weiriou ni lisaanigu. Ruti arigei lun le hariñagunbei tílana luban íbini anhein múaran lubéi le hasaminarubei luma le lasaminarubei. Ariñagatu Marley, to awinwanduboun Meriga: “Anihein dan ámuti lan le nasaminarubei libügürü aban katei luéi le lasaminarubei nani weiriei. Íbini ítara, subuditi nun súdini nan lun ani inebe nuguya lun, ladüga lubaragiñe lanúadahan kaba lan ladüga libügürü ítaga katei, álügüda lumutina ka lan nisaminanbei ani akutiha lumuti le nariñagubei buidu lubaragiñe lanúadahan”. Aban wügüri le ǘnabuguti aranseti lun lídehan lidan fisiu múnada, íbini anhein saminawa lubéi hafisiute lan würiña katei le lidan fulasu le ñein lubéi lawinwanda. Ligíati, másiñati hénrengubei lan lun lun larufudun ǘnabuguni lau líderagunu lani weiriou múnada. Ka uagu? Ariñagatu aban íbiri to gíriboun Rachel: “Lidan fulasu le ñéingiñe lubéi niabin, anhein hariha aban eyeri achibagua asiedu o arumadahoun muna, aba hagumeserun lubesinanigu hama liduheñu asaminara anhein aban lubéi ‘eyeri le tímatimaati ligía’. Aba hasaminarun siñá lan lagumadirunu lani weiriou”. Anhein ligiaméme lubéi hasaminarubei saragu gürigia le ñein lubéi hawinwanda, haritagua huméi chibá lani meha Hesusu hagudi lani disipulugu, lau sun barǘ hamuti lan meha gürigia wadagimanu le kei hawadigimari idamuni. Aban hachügüdina tílana muna le buiti súdinitimati lun lun gunda hamá tílana luban mama lun buidu lan larihín hagibugiñe amu. Amu luéi ǘnabuguni, ariha wamá ka lan amu igaburi buídubei lun gama hamani hachügüdina tílana muna.
12. Ka ladügübei Heowá luma Hesusu ladüga ínsiñeni?
12 Ínsiñeni. Sun le ladügübei Heowá, adüga lumuti lau ínsiñeni (1 Huan 4:7, 8). Arufuda lumuti woun hínsiñe wamá lun ani busén lan lun gamadagua wamá luma, lau líchugunu Lererun tuma lóundarun woun. Íderagua lumutiwa lun chouru lan wasandiragun woungua lau laritaguagüdüniwa hínsiñe wamá lun. Agia le wemegeirubei? Ru lumuti Heowá “sun katei woun gibe lun wagundaarun” lau (1 Tim. 6:17). Dan le wachararun ererehati woun, lau sun lira hínsiñememegidiwa lun. Ladüga wínsiñe lun Heowá, óunaha lumuti Lisaani lun lasalbaruniwa ani ladüga wínsiñe lun Hesusu aranseñu liña meha lun líchuguni libagari wawagun (Huan 3:16; 15:13). Úatiña ni aban lun hararamuni Heowá ni Hesusu lun marufudun hamá ínsiñeni houn ha úaraguabaña houn (Huan 13:1; Rom. 8:35, 38, 39).
13. Ka uagu súdini lubéi lun harufudun hachügüdina tílana muna ínsiñeni? (Ariha huméi giñe rekuáduru “ Ida luba lagañeiruni aban wügüri le sun líñabei lamarieidun tinebehabu lani weiriou?”)
13 Ka wafurendeirubei? Sun le lunbei ladügüni hachügüdina tílana muna lunti ladügüni lau ínsiñeni. Ka uagu súdini lubéi? Ariñagati apostolu Huan: “Lugundun anhein mínsiñe lubéi líbiri aban gürigia lun, le ariha lumuti, siñabei giñe hínsiñe lan Bungiu lun, le marihin lubéi” (1 Huan 4:11, 20). Ligíati, aban wügüri le hínsiñetiña tílana luban lun ani busenti láyeihani ligaburi Heowá luma Hesusu, áfaaguati lun líderaguniña tílana luban lun buidu lan hamadagua luma Heowá, téniti giñe lun ligaburi hasandiragun houngua, ani ru lumuti le hemegeirubei houn (1 Tim. 5:8). Larufudahaba houn lisaanigu ani lererehaba giñe houn. Lafurendeiruba anúadirei le buídubei houn tílana luban ani lanügüba le lanúadirubei uéiriguni lun Heowá. Wakutihaali kada aban lídangiñe katei le, luma ida luba lan háyeihani hachügüdina tílana muna Heowá luma Hesusu.
LE LUNBEI HADÜGÜNI HACHÜGÜDINA TÍLANA MUNA
14. Kaba ladüga hachügüdina tílana muna lun gayaraabei lan buidu lan hamadagua tílana luban luma Bungiu?
14 Letenirun lun hamadagua tílana luban luma Heowá. Ítara kei Heowá le Lúguchi, nidiheriti meha giñe Hesusu hawagu lani disipulugu lun gayaraabei lan hakipuruni hafiñen derebuguñu (Mat. 5:3, 6; Mar. 6:34). Ligiaméme likesin hachügüdina tílana muna, súdinitimati lun lun buidu lan hamadagu tílana luban luma Heowá (2 Lur. 6:6-9). Lun libihini le, mosu lachoururuni haliihañoun lan tílana luban Bíbülia, haturiahañoun lan, habasihaña lan adamuridagua, hapurichihaña lan ani háfaaguña lan lun buidu lan hamadagua luma Heowá.
15. Kaba ladüga hachügüdina tílana muna lun letenirun lun ligaburi hasandiragun tílana luban houngua?
15 Letenirun lun ligaburi hasandiragun tílana luban houngua. Ariñagati Heowá lun Hesusu hagibugiñe amu hínsiñe lan lun (Mat. 3:17). Arufuda lumuti giñe Hesusu houn lani disipulugu hínsiñe hamá lun lau le ladügübei luma lau le lariñagubei. Ani ariñaga hamuti giñe lani disipulugu lun hínsiñe lan houn (Huan 15:9, 12, 13; 21:16). Gayaraati giñe larufuduni hachügüdina tílana muna hínsiñe tan lani weiriou hama lisaanigu lun lau burí katei le ladügübei, kéiburi, dan le laturiahanu Bíbülia hama. Lunti giñe lariñaguni houn hínsiñe hamá lun ani gebegi hamá lun, ani dan le gayara lan, buiti giñe lun lariñagun houn buidu lan hadüga hagibugiñe amu (Ari. 31:28, 29).
Anhein busén lubéi aban hachügüdina tílana muna lun lagundaarun Heowá lau, mosu líchuguni le hemegeirubei tílana luban houn. (Ariha huméi párafu 16).
16. a) Ka amu katei lunbei ladügüni hachügüdina tílana muna? b) Ka katei moun lubéi lun ladügüni?
16 Letenirun lun le hemegeirubei tílana luban. Ru lumuti meha Heowá sun le hemegeirubei ísüraelina houn, íbini dan le labeichuniña dan le maganbadi hamá lun (2 Lur. 2:7; 29:5). Uguñe weyu, ru lumuti giñe Heowá le hemegeirubei lubúeingu houn (Mat. 6:31-33; 7:11). Hóugüda lumutiña meha giñe Hesusu lani disipulugu ani areidaguagüda lumutiña giñe ha sándibaña (Mat. 4:24; 14:17-20). Lun lagundaaragüdüni hachügüdina tílana muna Heowá, lunti letenirun lun le hemegeirubei tílana luban. Gama lumoun, anihein katei le moun lumuti ladügüni. Moun lumuti letenirun saragu lun wadagimanu darí lun metenirun lan lun hamadagua tílana luban luma Bungiu ni lun le hasandirubei.
17. Ida liña larufudahan luma lererehan Heowá luma Hesusu woun?
17 Larufudahan luma lererehan houn. Arufudahati Heowá woun ani erereha ligía woun ladüga busén lan lun buidu lan lidin woun (Ebü. 12:7-9). Ítara kei Lúguchi, arufudahati Hesusu ani erereha ligía lau ínsiñeni houn ha lábugiñebaña lubafu (Huan 15:14, 15). Furanguti ligaburi líchugun Hesusu adundehani ani lau ínsiñehabuni (Mat. 20:24-28). Subudi lumuti gafigoun wamá ligía subudi lubéi lun aniheinbei lan dan wachararuba lan (Mat. 26:41).
18. Ka gabaroun lubéi aban hachügüdina tílana muna le buiti?
18 Aban hachügüdina tílana muna le áyeihabalin Heowá luma Hesusu, súnwandan gabaroun lani tachararuba lan lani weiriou hama lisaanigu, ani magañidunti hama (Kol. 3:19). Lubaragiñe lira áfaaguati lun ladügüni le lariñagubei Galasiana 6: 1 lau lererehan houn “lau ínsiñehabuni”, mabulieidugalei lau chará hamá. Ítara kei Hesusu subudi lumuti buídutima lan lun larufudahan lau le ladügübei (1 Fe. 2:21).
19, 20. Ida luba láyeihani hachügüdina tílana muna Heowá luma Hesusu lidan lanúadahan ladügün somu katei?
19 Lanúadiruni le buídubei houn tílana luban. Dan le lanúadahan Heowá, adüga lumuti lau lasaminarun luagu le buídutimabei houn amu. Kéiburi, adüga lumuti Heowá sun katei mama lun lanügün buiti lúniwagua, adüga lumuti lun wagundaarun lau ibagari. Úati ni aban afosuruti Heowá lun lóunahani Lisaani lun lounwen luagu wafigoun. Adüga lumuti ladüga busén lan lun líderaguniwa. Adügati giñe Hesusu katei buiti lun líderaguniña amu (Rom. 15:3). Kéiburi, dan le meha buchá lubéi luagu, aranseñu liña meha lun larufudahan houn gürigia lubaragiñe hamuga lemeraagun (Mar. 6:31-34).
20 Aban hachügüdina tílana muna le buiti, subudi lumuti aban lan lídangiñe katei le hénrengutimabei lun ladügüni, lanúadahan lau lichú aau le buídubei houn tílana luban, ani súdiniti katei le lun. Áfaaguati lun manúadirun lan katei lau igañi ni masaminarunga. Ígirati lun larufudahan Heowá lun lun gayara lan lanúadahan buidu ítarati, saminati luagu le buídubei houn amu mámarügü le buídubei lun (Ari. 2:6, 7; Fili. 2:4). *
21. Kaba wariha lidan leweñegua aturiahani?
21 Rúhali Heowá aban dasi hénrenguti houn hachügüdina tílana muna, ani hóunabuba lun Heowá luagu ligaburi hadügüni dasi le. Lau sun lira, anhein áfaagua aban wügüri maríeiti lun láyeihani Heowá luma Hesusu, ábanbei hachügüdina tílana muna le buiti. Ani anhein tagunfulira würi maríeitu lau le lunbei tadügüni gúndaabei habagari keisi maríeitiña. Ida luba tarihini würi maríeitu ubafu le ichugúbei lun tani weiriei, ani ka turobuli úmabei tagagibudagua? Warihibei lidan leweñegua aturiahani.
UREMU sjj 16 Alawaha waméi Heowá luagu Liráü, le Lanúadirubei.
^ par. 5 Dan le lamarieidun aban wügüri aba ligíaali lan tichügüdina luban. Lidan aturiahani le, warihiba ka lan ubafu líchugunbei Heowá houn amu, ka lan uagu líchiga ubafu houn, luma le lunbei hafurendeiruni wügüriña lúmagiñe Heowá luma lúmagiñe Hesusu. Lídanme leweñegua aturiahani, warihibei ka lan gayaraabei hafurendeiruni dandu wügüriña maríeitiña kei würiña maríeitiña hámagiñe amu gürigia ha uágubaña tayanuhan Bíbülia, luma lúmagiñe Hesusu. Ani lídanme le lagumuhóun aturiahani tidan garüdia to, wakutihabei ida luba lan hayusuruni íbirigu ha anügübalin ubaraü lidan damuriguaü habafu.
^ par. 7 Adügatu pelikula o pikchá, teaturu o katei líbeina lira, lun lanharúniwa lun saminaü mariban lan lóuserunu wügüri lani weiriou wuriba, íbini lagayuahan tuagun. Ligíati, másiñati échuni lan le uguñebei weyu abugurubalin saminaü mariban lun lóuserunu wügüri lani weiriou wuriba.
^ par. 20 Hadariruba lanwoun ariñahani luáguti wanúadahan buidu lidan aturiahani “Tomemos decisions que honren a Dios”, le áfuridubei tidan Garüdia Awisahatu lánina 15 lidan gádürü-hati irumu 2011, páhina 13 darí 17.
