HÉIBUGUÑA meha bián würiña nibureintiña lidan fulasu le lánina bísinisi lidan uburugu Baguio (Filipína). Aba harihin aban tarufudaagüle agumeiraguagüdüni, gama lumoun mayarafaduntiña lun. Ábanti tarihin Helen hawagu, aban hádangiñe íbirigu ha meha lurugabuboun tarufudaagüle agumeiraguagüdüni, ábati táhayachun hawagu. Sigí hamuti würiña hagía héibugun, gama lumoun mabulieidun hamuti táhayachun Helen hawagun lau gamadóuni.

Dan lárigiñe, dan le hagiribuduña lubéi hábiñoun tidan busu, aba harihini létüra jw.org tuagu aban Luban Adamuridaguni. Aba haritaguni ligiaméme lan létüra le harihibei luagu tarufudaagüle agumeiraguagüdüni fiu weyu lubaragiñe. Aba hararirun tídangiñe busu ani aba houdin ariha ka lan oura ladügǘwa adamuridaguni tidan Luban Adamuridaguni tuguya.

Ábanti houdin bián würiña hagía lidoun aban adamuridaguni. Aba taweiridun hanigi dan le harihinbarun Helen dan le hebelurunbei tidoun Luban Adamuridaguni! Aba haritaguni tuguyaméme lan gürigia to meha áhayachuboun hawagun. Ariñagatu Helen: “ Aba nasandirun anufudei dan hayarafadunbei nun. Sun nariñagun adügaadina lan aban katei wuribati”. Gama lumoun, aba hafuranguagüdüni würiña nibureintiña hagía tun Helen ka lan asuseredubei.

Wéiriti meha línsiñe adamuridaguni ligía houn würiña hagía ani buiti meha giñe hasandiragun houngua hama íbirigu. Dan le harihin arumadaha hamutu lan íbirigu Luban Adamuridaguni lárigiñe adamuridaguni, aba hálügüdaha anhein gayara lubéi hídehan. Mawinwandunharu aban hádangiñe würiña hagía Filipína, lau sun lira anuhagua to aban abasiiha lidoun adamuridaguni ani gumeseeru giñe aturiahoun Bíbülia. Seremei lun aban áhayachuni!