1. ka lébunabei úara hamá lubúeingu Heowá?

GÚNDAATIWA hádangiñetiwa lan lubúeingu Heowá. Gúndaatiwa giñe ani darangilatiwa ladüga áfaaguatiwa lun inebe hamá woun ha únbaña líchiga Heowá ubafu. Le linarün katei, úaraguatima baadiwa ánhawa gunfurandei buidu ru lan Heowá ubafu houn amu.

2. Kaba álügüdahani wóunaba lidan aturiahani le?

² Lidan aturiahani le, wayanuha luagu ubafu le hawagubei ha lídanbaña damuriguaü. Wóunabubei giñe álügüdahani burí le: Ka hagaradanboun íbirigu würiña? Inarüni san hachügüdina lan sun íbirigu würiña íbirigu wügüriña ha lídanbaña damuriguaü? Ligiaméme san luwuyeri ubafu le hámabei wéiyaaña lidan afiñeni luma ubafu le hámabei hachügüdina tílana muna? Furumiñe, ariha waméi ka lan hagaradanboun íbirigu würiña ani ida luba lan warihiniña.

3. Kaba íderaguawa lun gebegitima lan woun sun le hadügübei wíbirigu würiña?

³ Gebegitiña wíbirigu würiña woun ladüga sun le hadügübei lun hóunigiruniña tílana haban, ladüga hapurichihani uganu buiti luma ladüga híderaguniña íbirigu lidan damuriguaü. Gebegitimabaña woun ánhawa arihaña kei larihiniña Heowá luma Hesusu. Ani wafurendeiruba ida luba lunti lan houserúniwa würiña lídangiñe ligaburi lóuseruniña apostolu Pábulu.

4. Ida liña tarufuduni Bíbülia gebegi hamá wügüriña lun Heowá ítara kei gebegi hamá würiña lun?

 ⁴ Ítara kei gebegi hamá wügüriña lun Heowá ítara giñe gebegi hamá würiña lun. Kéiburi, afuranguagüdatu Bíbülia lidan lan furumiñeti sígulu ru lan Heowá ubafu dandu houn wügüriña kei houn würiña lun hadügün milaguru, kéiburi lun hadimureha lidan burí amu luwuyeri iñeñein (Adü. 2:1-4, 15-18). Anuadirúaaña dandu wügüriña kei würiña lau sífiri sandu lun harúeihan úara luma Kristu (Gal. 3:26-29). Ani lichugúba chansi houn wügüriña luma houn würiña lun heresibirun ibagari magumuchaditi Ubouagu (Aruf. 7:9, 10, 13-15). Ruti giñe Hesusu gumadi dandu houn wügüriña kei houn würiña lun hapurichihan luma lun harufudahani uganu buiti (Mat. 28:19, 20). Ayanuhatu líburu Adügaü tuagu aban würi kristiána to gíriboun Pürisíla. Tuguya úara luma Akila le tani weiriei, afuranguagüda hamuti inarüni lun aban wügüri subudihabúti le gíribei Apolosu (Adü. 18:24-26).

5. Según Lúkasi 10:38, 39, 42, ida liña larufuduni Hesusu inebe hamá würiña lun?

⁵ Inebetiña wügüriña hama würiña lun Hesusu. Mítaranti meha Hesusu kei fariséugu ha meha asaminarubaña ǘnabu hamá würiña hawéi wügüriña, mayanuhatiña meha hama würiña hagibugiñe saragu gürigia ani mayanuha hagía hama ni tuagu Bíbülia. Ánheinti Hesusu, ayanuhati meha dandu hama wügüriña kei hama würiña luáguti inarüni súdiniti le tídanbei Bíbülia (aliiha huméi Lúkasi 10:38, 39, 42). * Ígirati meha giñe lun haweiyasuhan würiña luma dan le lídinbei apurichiha (Luk. 8:1-3). Ani ruti aban lubuidun chansi houn fiu hádangiñe lun hariñaguni houn apostolugu águyuguaali lan (Huan 20:16-18).

6. Ida liña larufuduni apostolu Pábulu inebe hamá würiña lun?

⁶ Haritaguagüda lumuti apostolu Pábulu Timotéu lun inebe hamá würiña lun. Ariñagati lun lun lóuseruniña ‘wéiyaaña würiña kei lóuserunu lúguchu’ luma lun lóuseruniña ‘nibureingiña keisi lítunu’ (1 Tim. 5:1, 2). Lau sun íderagua lumuti lan Pábulu Timotéu lun derebugu lan lafiñen, subudi lumuti lúguchu lan tuma lagütü arufudahabaña lun tuagu Lererun Bungiu (2 Tim. 1:5; 3:14, 15). Ani tidan gárada to labürühaboun Pábulu houn rómana, óunahati mábuiga houn fiu íbirigu würiña ani írida lumuti hiri. Ariha lumuti Pábulu le hadügübei íbirigu ha ani ariñagati gebegi lan hawadigimari lun (Rom. 16:1-4, 6, 12; Fili. 4:3).

7. Kaba álügüdahani wóunaba?

⁷ Kei le ariha wamaalibei, marufuduntu Bíbülia ǘnabu hamá íbirigu würiña hawéi íbirigu wügüriña. Íderagua hamuti wíbirigu würiña ha hínsiñehabubaña ani gudemehabu hagía damuriguaü, ani íderagua hamutiña giñe wéiyaaña lidan afiñeni akipurei darangilaü luma úarani lidan damuriguaü. Íbini ítara, anihaguameme fiu álügüdahani lun lounabún: Ka uagu líchiga Heowá gumadi lun hadouragun würiña lau hachügü dan le hadügün somu dasi? Ani kei le íbirigu wügüriñarügüñanu lan iridúa kei ídehatiña lidan damuriguaü o kei wéiyaaña lidan afiñeni, mini lan san lira hachügüdina lan sun íbirigu würiña íbirigu wügüriña?

8. Según Éfesuna 5:23, ka uagu mama lubéi hachügüdina sun íbirigu würiña íbirigu wügüriña?

⁸ Hachügüdina san sun íbirigu würiña íbirigu wügüriña? Ua. Krísturügüñein hachügüdina sun íbirigu würiña lidan damuriguaü (aliiha huméi Éfesuna 5:23). Wügüri maríeiti tichügüdinabei lani weiriou. Gama lumoun, aban isaani badiseihali mama ligía tichügüdinabei lúguchu (Efe. 6:1, 2). Ani lidan damuriguaü, gébehati ubafu le hámabei wéiyaaña lidan afiñeni hawagun íbirigu würiña luma hawagu íbirigu wügüriña (1 Tesa. 5:12; Ebü. 13:17). Kaba wariñaga tuagu aban  íbiri würi mamarieidungiru to mawinwanduharu hama tagübürigu? Lunti inebeméme hamá tagübürigu tun, íbini mawinwanduharu lan hama. Ani inebetiña giñe wéiyaaña lidan afiñeni tun, gama lumoun ítara kei íbirigu wügüriña ábanrügüñein tichügüdina: Hesusu.

9. Ka uagu anihein lubéi dan mosu lan hadouragun íbirigu würiña lau hachügü?

⁹ Inarüni anúadiralaña lan Heowá wügüriña lun hagíaba lan anügei ubaraü lidan áhudurawaguni luma arufudahani lidan damuriguaü, mama houn würiña lichugúa ubafu le (1 Tim. 2:12). Ka uagu? Ligía lébunabei líriduni Heowá Hesusu lichügüdiname wügüri: lun buidu lan léibugun sun katei lidan damuriguaü. Anhein mosu lubéi tadügün aban íbiri aban dasi le lunbei hamuga ladügüni aban wügüri, amuriahati Heowá tuma lun tadouragun lau tichügü (1 Ko. 11:4-7). * Mamuriaha lumuti Heowá le hama íbirigu würiña lun lǘnabudagüdüniña, lubaragiñe lira líchuguña aban chansi houn lun harufuduni inebe hamá houn ha únbaña líchiga Heowá ubafu. Guentó óunaba waméi álügüdahani le: Ka san ubafu hámabei wéiyaaña lidan afiñeni luma hama hachügüdina tílana muna?

10. Ka uagu másiñati busenbei lan aban wéiyaali lidan afiñeni lun líchugun gumadi houn lílana damuriguaü?

¹⁰ Hínsiñeti Kristu houn wéiyaaña lidan afiñeni ani hínsiñetiña giñe lánigu houn, ha líchugubaña Heowá luma Lisaani lábugiñeñoun haríaahan (Huan 21:15-17). Ladüga hínsiñe hamá lílana damuriguaü lun, másiñati ariha lumutiña lan aban wéiyaali lidan afiñeni kamá hamuga lirahüñü. Háfuga lasaminarun: “Anhein garicha lubéi aban hachügüdina tílana muna lun líchugun gumadi lúbiñe lun lóunigiruniña tílana luban, gayaraati giñe líchugun aban wéiyaali lidan  afiñeni gumadi lun lóunigiraña lubúeingu Bungiu”. Ani másiñati hínchahaniña fiu íbirigu lun hadügüni katei le dan le hamuriaha hama lun hagía lan anúadira hawagu. Gama lumoun, ligiaméme san luwuyeri ubafu le hámabei hachügüdina tílana muna luma le hámabei wéiyaaña lidan afiñeni?

11. Ka ida genegegua lan ubafu le hámabei hachügüdina tílana muna luma le hámabei wéiyaaña lidan afiñeni?

¹¹ Ariñagati apostolu Pábulu genegeti lan le lunbei ladügüni aban hachügüdina tílana muna luma le lunbei ladügüni aban wéiyaaña lidan afiñeni (1 Tim. 3:4, 5). Busenti Heowá lun gaganbadi hamá tílana muna lun tichügüdina haban ani busenti lun gaganbadi hamá lílana damuriguaü houn wéiyaaña lidan afiñeni (Kol. 3:20). Agurabati Heowá dandu hámagiñe hachügüdina tílana muna kei hámagiñe wéiyaaña lidan afiñeni lun hachoururuni derebugu lan hafiñen ha lábugiñebaña haríaahan luma lun hasandiragun houngua hínsiñewa hamá, ani gebegi hamá. Ani ítara kei hachügüdina tílana muna ha buítiña íderagua hamutiña wéiyaaña lidan afiñeni íbirigu ha mégeibaña ídemuei (Sant. 2:15-17). Lanwoun lira, agurabati Heowá lun híderaguniña hachügüdina tílana muna hama wéiyaaña lidan afiñeni amu gürigia lun gaganbadi hamá lun lilurudun Bungiu. Ani agurabati giñe Heowá hámagiñe “lun midin [hamá] yagürounmeme luéi le bürüwañubei” tidan Bíbülia (1 Ko. 4:6).

12, 13. Kei larufuduni Rómana 7:2, ida liña amu lan ubafu le hámabei hachügüdina tílana muna luéi le hámabei wéiyaaña lidan afiñeni?

 ¹² Amu ubafu le hámabei hachügüdina tílana muna luéi le hámabei wéiyaaña lidan afiñeni. Kéiburi, rúhali Heowá ubafu houn wéiyaaña lidan afiñeni lun hagíaba lan aguseragüda lidan damuriguaü, ani rúhali giñe ubafu houn lun habuguniña lídangiñe damuriguaü afigouhatiña ha masakürihantiña (1 Ko. 5:11-13).

¹³ Luagu le aban oubaü, rúhali Heowá ubafu houn hachügüdina tílana muna lun hadügün fiu katei le moun lumuti hadügüni wéiyaaña lidan afiñeni. Kéiburi, rúhali ubafu houn hachügüdina tílana muna lun hagíaba lan íchiga gumadi houn tílana haban luma lun harihin luagu hagunfuliruni tílana haban gumadi burí ligía (aliiha huméi Rómana 7:2). Garichatiña lun hariñaguni houn hasaanigu kaba lan oura hachülüra múnadoun guñoun. Garichatiña giñe lun hererehan houn hasaanigu ánhaña maganbadi (Efe. 6:1). Inarüni, lubaragiñe líchugun gumadi, layanuhaba aban hachügüdina tílana muna le hínsiñehabuti tuma lani weiriou, ladüga mámaaña biama, “ábanrügaaña” (Mat. 19:6). *

14. a) Según le lariñagubei Márükosu 10:45, ka uagu buidu lubéi ladüga Heowá lau lanúadiruni Hesusu kei lichügüdina damuriguaü? b) Ka san lidasinbei Sétanu le arihibei luagu hawadigimaridun gefentiña luagu Heowá lidan sun ubóu? (Ariha huméi rekuáduru “ Lidasin Sétanu le arihibei luagu hawadigimaridun gefentiña luagu Heowá lidan sun ubóu”).

¹⁴ Lau lebegi asalbaruni agañeiha lumuti Heowá habagari sun ha lídanbaña damuriguaü hama sun ha afiñebaña luagu Hesusu (aliiha huméi Márükosu 10:45; Adü. 20:28; 1 Ko. 15:21, 22). Kei le hilá lubéi Hesusu wawagun, gayaraati wariñagun  buidu lan ladüga Heowá lau lanúadiruni Hesusu kei lichügüdina damuriguaü. Ligíati, gabafuti Hesusu lun líchugun gumadi houn gürigia, houn tílana muna luma lun damuriguaü luáguti hagaburi, ani gabafuti giñe lun lachoururuni hagunfulirubei lan gumadi burí ligía (Gal. 6:2). Lau sun lira, mama rúrügüti gumadi: góunigi lumutiwa ani ruti ariñahani woun le ítarabei kei éigini (Efe. 5:29).

15, 16. Ka hafurendeirubei lúmagiñe le tariñagubei Marley luma le lariñagubei Benjamin?

¹⁵ Arufudatiña íbirigu würiña inebe lan Kristu houn lau hasigiruni hadundeha wügüriña ha lanúadirubaña lun hóunigiruniña. Ariñagatu aban íbiri to gíriboun Marley to awinwanduboun Meriga: “Gebegiti nubara kei aban íbiri luma kei aban hiñaru maríeitu nun lidan damuriguaü. Mosu náfaagun lun inebe lan nun ubafu le líchugubei Heowá lun nani weiriei luma le líchugubei houn wéiyaaña lidan afiñeni. Gama lumoun ménrengunti nun lun nadügüni, ladüga inebetina houn ani arufuda hamuti nun gebegi nan houn”. Chóuruti ligiaméme lan hasaminarubei saragu íbirigu würiña.

¹⁶ Arufudatiña íbirigu wügüriña inebe lan ubafu le líchugubei Heowá houn dan le inebe hamá íbirigu würiña houn. Ariñagati Benjamin, aban íbiri le awinwandubei Ingülatéra: “Furendeihadina saragu lídangiñe óunabagülei le híchugubei íbirigu würiña lidan damuriguaü, fiu puntu le híchugunbei libügürü aturiahani luma luáguti apurichihani ani lun buídutima lan ligaburi warufudahan. Saminatina hu lan dasi le hadügübei”.

17. Ka uagu lunti lubéi inebe lan woun rúhali lan Heowá ubafu houn amu?

¹⁷ Aniheinbei darangilaü lidan damuriguaü anhein gunfuranda hamá ani inebe ligía houn lílana damuriguaü —houn wügüriña, würiña, hachügüdina tílana muna hama wéiyaaña lidan afiñeni— rúhali lan Heowá ubafu houn amu. Ani lóugiñe sun katei, rútiwa uéiriguni lun Wáguchi Heowá le siélubei le hínsiñehabubei (Sal. 150:6).