1. Ka álügüdahani lunbei tadügüni aban íbiri dan le tasaminaruña lan kaba lan uma tamarieida?

SUN kristiánugu awanhein lábugiñe lugumadin Hesukrístu, ichügüdinaü le macharabei. Gama lumoun dan le tamarieidun aban würi kristiána, aba terederun lábugiñe lugumadin aban wügüri le charati, ani mama aban katei ménrengunti le. Ligíati, anhein hasaminaruña lubéi hamarieidun luma ítaga íbiri, buídubei lun hálügüdagun hungua: “Ida luba nasubudiruni anhein ábanbei lubéi ichügüdinaü le buiti? Súdiniti san leseriwidun lun Heowá lun? Anhein mítaran, ka adügübei lun nasaminarun ábanbei lan ichügüdinaü le lunbei ladügün lun buídubei lan wamadagua luma Heowá lárigiñeme wamarieidun?”. Luagu le aban oubaü, lunti giñe tálügüdagun íbiri tungua: “Ka igaburi nuágubei le gayaraabei lanügün buiti lun wamarieidun? Gaguraasuntina san ani gíchigadi nuguya? Derebuguti san numadagua luma Heowá?” (Apur. 4:9, 12). Ugundani le tasandirubei aban würi lidan tibagari keisi maríeitu, gániti luma le tadügübei lubaragiñe tamarieidun.

2. Kaba wariha lidan aturiahani le?

² Saragu míñunu íbirigu würiña arufudatiña igaburi buiti lau gaganbadi hamá lun hani weiriei. Ruti ugundani woun weseriwidun lun Heowá úara hama íbirigu ha, ani ariñagatiwa houn gunda wamá hau ladüga úaragua hamá. Lidan aturiahani le, warihibei óunabagülei lun ǘrüwa álügüdahani le: Ka turobuli úmabei gayara lan tagagibudagun würi maríeitu? Ka uagu gaganbadi tubéi würi maríeitu lun lugumadin tani weiriei? Ani ka gayaraabei hafurendeirun kristiánugu maríeitiña dandu würiña kei wügüriña, lúmagiñe Hesusu, túmagiñe Awigaili luma túmagiñe María to lani Hosé weiriou to meha lúguchu Hesusu, luagu ichügüdinaü?

3. Ka uagu gaturobulin habéi sun maríeitiña?

³ Maríei, ligía aban idewesei lúmagiñeti Bungiu ani úati mégeiti luagu, gama lumoun wagía le gürigia charatiwa (1 Huan 1:8). Ligía  tariñagunbei Lererun Bungiu houn maríeitiña ñeinbei lan “saragu lénrengunga houn ha maríeibaña” (1 Ko. 7:28). Anihán fiu lídangiñe turobuli le úmabei gayara lan tagagibudagun würi maríeitu.

4. Ka uagu gayara lubéi tasandiragun aban würi tungua aban lan ǘnabudaguagüdüni gaganbadi tan lun lugumadin tani weiriei?

⁴ Másiñati adüga lan ligaburi tagüriarún aban würi lun tasandirun tǘnabudaguagüdüña lan tungua lau gaganbadi tan lun tani weiriei. Ariñagatu Marisol, to awinwanduboun Meriga: “Lidan fulasu le ñein lubéi naweirida súnwandan lariñawagún houn hiñaruñu lunti lan aban lan labu houserúniwa lidan sun katei kei eyeriñu. Ani subudi numuti rúhali lan Heowá lúrudu houn eyeriñu lun ichügüdinaü hamá, ani lúmagiñe liabin lun gaganbadi tan hiñaru luma lun inebewa tan. Íbini ítara hénrenguti lun larihín ichügüdinaü lau lubudubu”.

5. Ka saminaü mabuidunti hasaminarunbei fiu wügüriña hawagu würiña?

⁵ Luagu le aban oubaü másiñati maríei tan aban würi luma aban wügüri le asaminaruti masudinin hamá würiña. Ariñagatu aban íbiri gíritu Ivón, to awinwanduboun Suedi Meriga: “Le ñein lubéi nawinwanda, eyeriñu éigibaña furumiñe, lárigiñe ligía heigin hiñaruñu. Lúmagiñe ñǘbürigiña hiñaruñu, agurabúati lun hábougun luma lun harumadahanu muna, ánhañati eyeriñu irahüñü háguchu eseriwidubaliña o hátunu, ani aba lariñawagúniwa houn hagía lan ‘urúeibaña múnada’”. Ariñagatu giñe aban íbiri to gíriboun Yingling, to awinwanduboun Asia: “Lidan nererun anihein aban ariñawagúni le gunfurandawabei mama lan mosu lun huali lan hachügü hiñaruñu ni lun hafurendeirun somu fisiu. Ani le tifisiutebei aban hiñaru tetenirun lun fisiu le múnadana, ani siñati tariñaguni tisaminan luagu ítaga katei lun tani weiriei”. Wügüri maríeiti le ígiraguagüdübei lungua lun burí igaburi le, le mídinbei luma le tariñagubei Bíbülia, adügati lun hénrengu lan ibagari tun lani weiriou, máyeihan lumuti ligaburi Hesusu ani magundanti Heowá lau (Efe. 5:28, 29; 1 Fe. 3:7).

6. Ka katei lunbei hadügüni würiña maríeitiña lun hederebudagüdüni hamadagua luma Heowá?

⁶ Kei lariñawagún lidan aturiahani le lubaragiñebei le, agurabati Heowá lun líchuguni wügüri kristiánu maríeiti le hemegeirubei tílana luban houn, luma lun letenirun lun hamadagua luma Bungiu (1 Tim. 5:8). Gama lumoun, mosu hadireirun íbirigu würiña maríeitiña lídangiñe hadaani sagü weyu lun haliihanu Lererun Bungiu, hasaminarun luagu le haliihabei luma lun hafurieidun lun Heowá tídangiñe sun hanigi. Gayaraabei hénrengu lan katei le lugundun súnwandan beresegu tan aban würi maríeitu. Másiñati sandigua tan tungua ua lan dan ni erei lun tadügüni sun le, gama lumoun súdiniti lun tasagarun dan lun tadügüni. Ka uagu? Ladüga busén lan Heowá lun gamadagua hamá lubúeingu luma (Adü. 17:27).

7. Kaba íderaguoun würi maríeitu agunfuliroun tigaradan?

⁷ Másiñati mosu lan táfaagun aban würi lun gaganbadi tan lun tani weiriei ani inebe ligíame tun íbini chará lan. Lau sun lira, ménrenguntimabei tun lun tagunfulirun tau gárada to líchuguboun Heowá tun, anhein gunfuranda tan ani anha tuguyame lun sun le tídanbei Bíbülia le arufudubalin lunti lan tánharun lun lugumadin tani weiriei.

8. Según Éfesuna 5:22-24, ka uagu tánhara würi kristiána lun lugumadin tani weiriei?

⁸ Ánhatu würi kristiána lun lugumadin tani weiriei lugundun ligía lagurabahabei Heowá túmagiñe (aliiha huméi Éfesuna 5:22-24). Afiñetu luagu Bungiu Túguchi le siélubei, subudi tumuti hínsiñe tan lun ani sun lan le lamuriahabei tuma lun tadügün, lun lan tubuidun guánarügü (2 Lur. 6:24; 1 Huan 5:3).

9. Kaba ibihúa anhein inebe lugumadin tani würi weiriei tun?

 ⁹ Ariñagati ubóu houn würiña lun lan madügün hamá gasu lau lilurudun Heowá, ani hǘnabudaguagüdüña lan houngua lau herederun lábugiñe lugumadin hani weiriei. Ligíati, ha awanseragüdübalin saminaü le ibidiñeti Wabungiute le hínsiñehabubei houn. Maweiyasunbei Heowá ariñaga houn lisaanigu ha hínsiñebaña lun, lun hadügün katei le lunbei ladügün lun hasandiragun houngua kei ni kata. Würi to áfaaguboun lun tagunfulirun tau gárada to líchuguboun Heowá tun adügatu lun ñein lan darangilaü túbiñe (Sal. 119:165). Ani ítarati, hasagaruba súngubei buiti lídangiñe taganbadi dandu tuguya, kei tani weiriei hama tisaanigu.

10. Ka wafurendeirubei lídangiñe le tariñagubei Carol?

¹⁰ Würi to erederuboun lábugiñe lugumadin tani weiriei íbini chará lan, tarufuduña ínsiñeni luma inebesei lun Heowá, Bungiu le adügübei lun ñein lan ichügüdinaü. Ariñagatu Carol, to erederuboun Suedi Meriga: “Subudi numuti lachararuba lan nani weiriei. Ani subudi numuti giñe ladügüba lan ligaburi nóunabun lun gebegi lan numadagua luma Heowá nun. Ligíati náfaaguba lun inebeméme lan nani weiriei nun ladüga busentina nadügüni le aubei lagundaara Heowá”.

11. a) Ka íderagubarun Aneese lun feruduna tániña amu? b) Ka wafurendeirubei lídangiñe tigaburi?

¹¹ Anhein tasandira aban würi maríeitu madügün lan tani weiriei gasu lau le tasandirubei ni lau le adiheridagüdübarun, másiñati hénrengubei lan tun lun inebe lan tun, luma lun gaganbadi tan lun lugumadin. Ariha waméi le tadügübei Aneese, aban íbiri maríeitu, dan le lasuseredun katei le tun, ariñagatu: “Adüga numuti sun niyaraati lun magañidun nan, ani gabaroun numuti sun lan wagía charatiwa. Áfaaguatina lun feruduna nániña ha achararubaña ítara nun kei ladügüni Heowá. Dan le nadügüni aba nagalumadun (Sal. 86:5). Chóuruti würi lan to héchuboun lun feruduna tani hachara amu ménrengunti tun lun inebe lan lugumadin tani weiriei tun.

12. Ka hénpulu wadarirubei tidan Bíbülia?

¹² Másiñati añahein lan asaminarutiña gürigia lan ha erederubaña lábugiñe hagumadihan amu débili hamá. Gama lumoun, mítaranti. Daritiwa tidan Bíbülia añahein lan meha gürigia rédeitiña lábugiñe habafu amu, íbini ítara mama meha gürigia  débilitiña hagía. Ariha waméi ka lan gayaraabei wafurendeirun lúmagiñe Hesusu, túmagiñe Awigaili luma túmagiñe María.

13. Afuranguagüda huméi ka lan uéigiñe inebe lubéi lugumadin Heowá lun Hesusu.

¹³ Inebeti lugumadin Heowá lun Hesusu, mama ladüga machú lan lau Hesusu, ni ladüga siñagua lan lungua. Arufudati ligaburi larufudahan Hesusu hanarime lan lichú lau (Huan 7:45, 46). Inebeti iyaraani le luágubei Hesusu lun Heowá darí lun lígirun lun lawadigimaridun Hesusu luma dan le ladügünbalin sun katei dandu sielu kei ubouagu (Ari. 8:30; Ebü. 1:2-4). Lúmagiñe láguyugun Hesusu, ru laali Heowá sun ubafu lun sielu luma ubouagu (Mat. 28:18). Íbini gayaraagua lan Hesusu lungua saragu, áluaha lágili ladundehan Heowá, ladügünbalin lira ladüga hínsiñe lan Lúguchi lun (Huan 14:31).

14. a) Ka gayaraabei hafurendeirun wügüriña maríeitiña lúmagiñe Heowá b) Ka gayaraabei hafurendeirun wügüriña maríeitiña lídangiñe le lariñagubei Ariñawagúni 31?

¹⁴ Ka gayaraabei hafurendeiruni wügüriña maríeitiña? Mama ladüga samina lan Heowá ǘnabu hamá würiña hawéi wügüriña líchugunbaliña wügüriña hachügüdiname würiña. Furanguti larufuduni mítaran lan lau lanúadirun würiña hama wügüriña lun harúeihan luma Hesusu (Gal. 3:26-29). Ítara kei larufuduni Heowá afiñe lan luagu Hesusu lau líchugun ubafu lun, líchuguba giñe wügüri le chubei lau murusun ubafu tun lani weiriou. Ariñagatu Lererun Bungiu ítaratiña lan würi maríeitu to benefatu kei aban würi to abugurubarun tuban, to agañeihaboun ani aluguraha tuguya fulasu ani adüga tuguya bísinisi (aliiha huméi Ariñawagúni 31:15, 16, 18). Mama aban idamuni tuguya to siñaboun tariñaguni le tasaminarubei. Lubaragiñe lira, afiñerügüti tani weiriei tuagu ani aganbaléi le tasaminarubei (aliiha huméi Ariñawagúni 31:11, 26, 27). Dan le inebe tan lani wügüri weiriou lun ítara, gúndaaboun lun terederun lábugiñe lubafu.

15. Ka gayaraabei hafurendeiruni würiña maríeitiña lídangiñe ligaburi Hesusu?

¹⁵ Ka gayaraabei hafurendeiruni würiña maríeitiña? Íbini adügaali lan Hesusu saragu, masandiragunti lungua ǘnabudagüda lani lubafu Heowá lau inebe lan lun (1 Ko. 15:28; Fili. 2:5, 6). Ligíati, würi to benefatu to afalarubalin ligaburi Hesusu, masaminaruntu ǘnabudagüda lanu lubafu tani weiriei lau inebe lan tun. Íderagua tumuti tani weiriei ladüga hínsiñe lan tun, gama lumoun, lóugiñe sun katei ladüga hínsiñe lan ani inebe ligía Heowá tun.

16. Según 1 Samueli 25:3, 23-28, ka uma tagagibudagua Awigaili? (Ariha huméi dibuhu le luágubei tidáü garüdia).

¹⁶ Maríeitu meha Awigaili luma Nawali, aban wügüri hángiti, pántati ani meteingiraditi. Íbini ítara, máluahantu Awigaili lun tanurahan luéi. Gayaraati hamuga meha terederun maniñu lun tígirun lun lagumuchun Dawidi hama luwügüriñanigu lau tani weiriei. Gama lumoun, aba tarihin kaba lan tadüga lun tóunigiruni Nawali hau sun gürigia ha túbiñebaña. Ma arufudatu Awigaili ganigi lau tararamun hagibugiñe 400 wügüriña ha táubaña áruma luma lun tadügün lun lasaminarun Dawidi! Ani aranseñutiña meha lun tágawahani lidurun tani weiriei (aliiha huméi 1 Samueli 25:3, 23-28). Lau lóufudagun aba líchugun Dawidi fe layusuruñoun lan Heowá würi ganigitu to lun teweridiruni luma lun madügün lan aban óunwenbu charati.

17. Ka gayaraabei hafurendeirun wügüriña maríeitiña lídangiñe abahüdaguni luáguti Dawidi tuma Awigaili?

¹⁷ Ka gayaraabei hafurendeiruni wügüriña maríeitiña? Aban meha würi chuti tau Awigaili. Ligíati, arufudati meha Dawidi lichú aau lau laganbuni le tariñagubei lun. Ani adügati katei le lun máfaragun lan Dawidi gürigia maduruntiña. Ani ítarameme, wügüri le chubei aau laganbubei le tariñagubei lani weiriou lun, danme le lanúadira lan somu katei le súdiniti. Háfuga lídehan le tariñagubei lani weiriou lun, lun mariban lan le lunbei lanúadiruni.

18. Ka gayaraabei hafurendeirun würiña maríeitiña lídangiñe tigaburi Awigaili?

 ¹⁸ Ka gayaraabei hafurendeiruni würiña maríeitiña? Würi maríeitu to hínsiñebei Heowá tun ani inebe ligía tun gayaraabei tadügün lau tigaburi lun buidu lan lidin houn tílana tuban, íbini meseriwidun lan tani weiriei lun Heowá ani mawinwandun ligía según lilurudun Heowá. Máluahanboun tadüraaguni tibagari keisi maríeitu. Le lunbei tadügüni tarufudun inebesei luma gaganbadi, ani ítara tadügüñame lun busén lan tani weiriei lun lafurendeirun luagu Heowá (1 Fe. 3:1, 2). Íbini madügün lan tani weiriei gasu lau burí lubuidun igaburi le tarufudubei, gayaraati tachoururuni gebegi lan lun Heowá úaraguni le tarufudubei.

19. Ka burí kesi ídanbei moun lumuti lan taganbuni aban würi maríeitu tani weiriei?

¹⁹ Gama lumoun anhein amuriaha tani aban würi kristiána weiriei tuma lun tadügün somu katei le múaranbei luma le tarufudahabei Bíbülia, madügün tubéi. Samina wamá aban lan lamuriahan wügüri maríeiti le mama kristiánu tuma lani weiriou to kristiána lun teyeehan, lun tíweruhan o lun tadügün furumiñeguarügü amu katei le mínsiñeti lun Heowá. Lóugiñe sun katei lunti úaragu hamá íbirigu würiña ha maríeitiña lun Heowá ítara kei úaragua hamá sun kristiánugu. Ligíati, anhein amuriahóua tuma aban íbiri lun maganbadi tan lun adundehani le tídanbei Bíbülia, lunti madügün tan gasu luma lun tafuranguagüdüni lau ínsiñehabuni moun lumuti lan tadügüni le amuriahóubei tuma (Adü. 5:29).

20. Ida liña wasubudiruni buidu lan meha tumadagua María luma Heowá?

²⁰ Buiti meha tumadagua María luma Heowá. Furanguti meha larihín luagu subudi tanu Lererun Bungiu dan le tayanuhanbei tuma Isawéli to lúguchu Huan le Abadiseihabei, íridatu lóugiñe 20 wéiyaasu dimurei lídangiñe Abürüdǘni Ebüréu (Luk. 1:46-55). Samina wamá luagu le, íbini gadaradun tan meha María luma Hosé, marufudagunti meha ánheli le lóunahabei Heowá lungua lun Hosé furumiñe. Tun meha María layanuha furumiñe ani aba lariñagun tun tágurahabei lan Liráü Bungiu (Luk. 1:26-33). Subuditu meha María lun Heowá buidu ani chouru lumuti meha hínsiñebei lan Liráü tun ani tóunigirubei lan. Ani chóuruti sigí tan meha María gamadagua luma Heowá íbini lárigiñe lounwen Hesusu ani mudei ligía sielun (Adü. 1:14).

21. Ka gayaraabei hafurendeirun wügüriña maríeitiña lídangiñe le tariñagubei Bíbülia tuagu María?

 ²¹ Ka gayaraabei hafurendeirun wügüriña maríeitiña? Wügüri maríeiti le chubei aau gúndaati lau subudi tan Lererun Bungiu tun lani weiriou buidu. Magañidunti tuma ani masandiragun ligía lungua tagidaraali lan lani weiriou ubaraü luéi. Gúndaarügüti lau subudi tan Lererun Bungiu tun buidu, ani adundehani lan le tídanbei gayara lan líderaguniña tílana muna saragu. Lau sun añahein lan würiña aturiahatiña saragu sügǘ luéi hani weiriei, ligía gánibalin buligasion lun ladundehani áhuduraguni keisi iduheñu luma ámuya katei le gániti luma hamadagua luma Bungiu (Efe. 6:4).

22. Ka gayaraabei hafurendeirun würiña maríeitiña túmagiñe María?

²² Ka gayaraabei hafurendeirun würiña maríeitiña? Lunti inebe lan lugumadin tani würi weiriei tun, ani libügürü tumadagua luma Bungiu tuguya lunboun tederebudagüdüni tafiñen (Gal. 6:5). Ligíati lunti tadireirun dan lun taturiahan luma lun tasaminarun luagu le taturiahabei. Líderaguboun le lun línsiñedun luma lun inebe lan Heowá tun, luma lun gunda tan lun terederun lábugiñe lugumadin tani weiriei.

23. Ida liña tasagarun würi maríeitu buiti, ítara kei tílana tuban hama lílana damuriguaü dan le inebe lan lugumadin tani weiriei tun?

²³ Würiña maríeitiña ha inebeti lugumadin hani weiriei houn ladüga línsiñe Heowá houn gúndaatimatiña sügǘ hawéi ha menebenehabubaña lun hachügüdina. Ani arufudatiña giñe aban lubuidun igaburi lun gayara lan háyeihani wügüriña hama würiña ha nibureintimagiña, ani ídehatiña giñe lun ñein lan ugundani hadan tílana haban luma lidan damuriguaü (Titu 2:3-5). Uguñe weyu würiña hiibe-agei lubúeingu Heowá ha úaraguabaña (Sal. 68:11). Súngubei wagía, meberesenga anhein wügüriña wabéi o würiña wamá anuhein aban gárada súdinitu wama lun wagunfulirunu lidan damuriguaü. Lidan leweñegua aturiahani warihibei ida luba lan wagunfulirunu.