1, 2. a) Ka burí katei aniheinbei lidan lubuidun idewesei le líchugubei Bungiu woun? b) Kaba burí álügüdahani wóunaba lidan arütíkulu le?

WÉIRITI wínsiñe lun Heowá darí lun lóunahani Liráü le hínsiñebei lun ubouagun lun líchuguni libagari wawagu (Huan 3:16; 1 Huan 4:9, 10). Ligía idewesei wéiritimati le resibi wamaalibei. Ligía lariñagunbei apostolu Pábulu siñati lan wadarirun “dimurei le buídurügüti ubuidun lun wadimurehan luagu” (2 Korintuna 9:15). Ka san labusenrubei Pábulu lariñagun lau dimurei burí le?

² Subudi lumuti meha Pábulu chóurugüda lumuti lan lounwen Hesusu lagunfulirubei lan Bungiu sun le füramase lubéi (aliiha huméi 2 Korintuna 1:20). Mini lan le anihein lan lani Hesusu sákürifisiu lidan ‘óunwenbu idewesei le líchugubei Bungiu’. Anihein giñe ínsiñeni luma sun katei buiti le lunbei líchuguni Bungiu woun. Hanarimeti lubuidun idewesei le darí lun siñá lan wafuranguagüdüni lau dimurei. Ida luba hamuga san wasandiragun  woungua luagu lubuidun idewesei le? Ka lunbei wadügüni guentó lau ayarafadeina liña lan Aritaguagülei luagu lounwen Kristu? Lidan irumu le laritawagúba luagu-ǘrüwa 23 lidan ǘrüwa-hati.

3, 4. a) Ida liña wasandiragun woungua dan le líchugun aban gürigia somu idewesei woun? b) Ida liña gayara lan lasansiruni somu idewesei wabagari?

³ Sun idewesei le wibihin barüti ugundani woun. Ani anihein idewesei le wéiriti lubuidun darí lun gayara lan lasansiruni wabagari. Ru wamá aban hénpulu. Samina humá aba lan hadügün aban katei wuribati ani aba hasiadirún lun hafarún. Gama lumoun sódini aba liabin aban gürigia le ibidiñeti hun ariñaga líchigaali lan libagari huagu. Ida liña hamuga san hasandiragun hungua?

⁴ Háfuga hadügüña lan hamuga fiú asansiruni lidan hibagari. Háfuga aba lan hamuga gíchigaditimahadün lan, o ménrengunhali lan hamuga hun feruduna humaniña ha achararubaña hun. Chóuruti hayusurubei lan hamuga hibagari lun harufuduni heteingiradi luagu le ladügübei gürigia ligía huagu.

5. Ka uagu gayara lubéi wariñagun Bungiu lan íchugubalin idewesei le buídutimabei ligibuagu ubóu woun?

⁵ Wéiritimati idewesei le líchugubei Bungiu woun sügǘ lau le uágubei wayanuha lidan hénpulu le akutiha wamaalibei (1 Féduru 3:18). Kei le gafigoun wabéi, súngubei wagía siadiwaadiwa lun wóunwegun (Rómana 5:12). Gama lumoun, wéiriti wínsiñe lun Bungiu darí lun lóunahani Liráü lun lounwen wawagu (Ebüréu 2:9). Gama lumoun, libihiba lani Hesusu sákürifisiu ábanya katei. Lagumuchuba lau óunweni lun súnwandan (Isaíasi 25:7, 8; 1 Korintuna 15:22, 26). Sun ha afiñerubaña luagu Hesusu hawinwanduba lau ugundani luma lau darangilaü lun súnwandan, hawinwanduba fiú sielu luma Kristu ani ha híbiri hawinwanduba ya ubouagu (Rómana 6:23; Arufudúni 5:9, 10). Gama lumoun, anihein ámuya katei buiti lidan idewesei le ru láalibei Bungiu woun.

6. a) Ka katei buiti hagurabubei hibihin ámuñegü? b) Ida liña gayara lan warufuduni weteingiradi luagu línsiñehabu Bungiu?

⁶ Kaba amu katei buiti lanüga idewesei le líchugubei Bungiu woun? Ábanbei paraísu Ubóu, hareidaguba sánditiña ani hawinwandayaba hilaaña (Isaíasi 33:24; 35:5, 6; Huan 5:28, 29). Hínsiñeti Heowá luma Hesusu woun luagu lubuidun idewesei le. Ida liña gayara lan warufuduni weteingiradi luagu katei le? Furumiñe, lau wáyeihani lani Hesusu hénpulu. Libiaman, lau warufudun ínsiñeni hawagu wíbirigu. Ani le lǘrüwan, lau feruduna wamaniña amu tídangiñe sun wanigi.

7, 8. a) Anhein geteingiradi wabéi luagu línsiñehabu Hesusu, kaba san wasandira? b) Ka lunbei wadügüni anhein geteingiradi wabéi luagu línsiñehabu Hesusu?

⁷ Furumiñe, lunti línchahaniwa ínsiñeni le lasandirubei Bungiu wawagu lun wayusuruni wabagari lun wíchugun inebesei lun Hesusu. Ariñagati apostolu Pábulu: “Gumadi lumutiwa línsiñehabu Kristu” (aliiha huméi 2 Korintuna 5:14, 15). Subudi lumuti meha Pábulu anhein lan warufuda luagu geteingiradi wamá luagu línsiñehabu Hesusu, busenbadiwa lan warufudun ínsiñeni luma inebesei lun. Dan le gunfuranda wamani sun le adüga láalibei Heowá wawagu buidu, aba wáfaagun lun wíchugun inebesei lun Hesusu lau ligaburi wawinwandun. Ida liña san wadügüni katei le?

⁸ Mosu wasigiruni lani Hesusu hénpulu lau  duari (1 Féduru 2:21; 1 Huan 2:6). Dan le gaganbadi wamá lun Bungiu luma lun Kristu, arufudatiwa hínsiñe hamá woun. Ariñagati Hesusu: “Ha subudihabútiña lun nugumadin ani úaragua hagía luma, arufuda hamuti luagu hínsiñe nan houn le tímatimaati. Ani hínsiñehabubei Núguchi houn ha hínsiñehabutiña nun, hínsiñebaña giñe nun, arufudagua aume nungua houn” (Huan 14:21; 1 Huan 5:3).

9. Ka burí óuchawaguni úmabei wagagibudagua?

⁹ Kei layarafaduña lubéi lidaani Aritaguagülei, lunti wasaminarun luagun ida liña lan wayusuruni wabagari (ariha huméi rekuáduru “Ka mini lubéi?”). Álügüdagua wamá woungua: “Ka idan gumeseedina lan áyeihei Hesusu? Anihein funa san somu katei le lunbei nabuiduragüdüni?”. Súdiniti lun wadügüni álügüdahani burí le, lugundun adügati ubóu le erei wawagu lun wáyeihani le hadügübei sun gürigia (Rómana 12:2). Ánhawa móunigiragun woungua, gayarabei wagumeserun áyeihei le hadügübei ha chúbaña au lidan ubóu le, gürigia subudiwatiña hama ha wéirigubaña lidan huraraü (Kolosana 2:8; 1 Huan 2:15-17). Ka lunbei wadügüni lun méiguadun wamá lidoun óuchawaguni le?

10. a) Ka álügüdahani lunbei wadügüni wóuniwagua lidan lidaani Aritaguagülei le? b) Ka burí asansiruni háfuga lunbei wadügüni? (Ariha humóun iyawaü burí to lídanboun lagumeseha arütíkulu).

¹⁰ Lidan lidaani Aritaguagülei le buídubei lun wakutihani ka lan tídanbei wani konputadora, gágamuru, músika, pelikula luma ida tiña lan wadaüragun. Álügüdagua wamá woungua: “Líchuguña hamuga san busiganu nun lun hamuga larihini Hesusu ida liña lan nasansiragun?” (aliiha huméi 1 Timotéu 2:9, 10). Arufuda lumuti san ligaburi nasansiragun nasigiruñein lan lani Kristu hénpulu? Hínsiñebei hamuga san pelikula burí le naríagubei luma músika le naganbahabei lun Hesusu? Ganigibadina hamuga san nafuredeiruni nigagamurun lun Hesusu? Gayarabei san narufuduni lun Hesusu ka lan burí bidéu lánina huraraü hínsiñetimabei nun, ani afuranguagüdaneime lun ka lan uéigiñe hínsiñe lubéi nun?”. Anhein hínsiñe lubéi Heowá woun, mosu wadisedun luéi furumiñeguarügü katei le wuribabei lun aban kristiánu, íbini hénrengu lan woun wadügüni (Adügaü 19:19, 20). Dan le meha wederegerunbalin wabagari lun Heowá, aba meha füramase wamá lun wayusurubei lan wabagari lun wíchugun uéiriguni lun Kristu. Ligía moun lumuti lubéi wakipurun katei le gayarati ladügün lun hénrengu lan wasigiruni lani Hesusu hénpulu (Matéu 5:29, 30; Filipuna 4:8).

11. a) Kaba amu katei wadüga anhein hínsiñe lubéi Heowá luma Hesusu woun? b) Ka gayarabei wadügüni hawagu amu lidan damuriguaü?

¹¹ Lunti giñe línchahaniwa ínsiñeni le wasandirubei luagu Heowá luma Hesusu lun wapurichihan luma lun warufudahan lau ubebeni (Matéu 28:19, 20; Lúkasi 4:43). Lidan lidaani Aritaguagülei le, gayarati san wadügün aransehani lun weseriwidun kei prekursorugu ha adügübaña 30 o 50 oura lidan apurichihani? Samina humá luagun le gádanbalin aban íbiri le hilaaru lani weiriou ani 84 irumu lau. Saminati meha siñabei lan leseriwidun kei prekursoru ídehati ladüga lirumudiri luma luriban látuadi. Gama lumoun, aba hadügün prekursorugu ha erederubaña yarafa lun aransehani lun hanügüni tidan hagune ani anúadaha hagía aban fulasu buiti lun lapurichihan ñein. Seremei lun aransehani le, apurichihati íbiri le 30 oura lidan aban hati. Gayarati san wíderagun somu íbiri lidan damuriguaü lun prekursoru lan lidan ǘrüwa-hati o lidan gádürü-hati? Subudi wamuti luagu siñabei lan weseriwidun sun wagía kei prekursorugu. Gama lumoun,  gayarati wayusuruni wadaani luma were lun waganwoundagüdüni weseriwidun lun Heowá. Anhein wadüga ítara, warufudubei weteingiradi luagu línsiñehabu Kristu, kei meha ladügüni apostolu Pábulu. Ka amu katei gayarabei wadügüni anhein seremei wabalin Bungiu luagu línsiñehabu woun?

12. Anhein busén wabéi lun wínsiñedun lun Bungiu, ka lunbei wadügüni?

¹² Lidan libiaman lúgaaru, lunti línchahaniwa ínsiñeni le lasandirubei Bungiu wawagu lun hínsiñedun wíbirigu woun. Abürühati apostolu Huan: “Anhein hínsiñeediwa lubéi lun Bungiu ítara, lunti giñe hínsiñegua wamá wámagua” (1 Huan 4:7-11). Anhein busén wabéi lun wínsiñedun lun Bungiu, mosu hínsiñedun wíbirigu woun (1 Huan 3:16). Ida luba warufuduni houn hínsiñe hamá woun?

13. Ka hénpulu buiti líchugubei Hesusu woun?

¹³ Lau lani hénpulu, arufudahati meha Hesusu woun ida luba lan warufudun ínsiñeni houn amu. Dan le ya lubéi ubouagu, íderagua lumutiña gürigia hátima ǘnabugubaña. Areidaguagüda lumutiña sánditiña, danimatiña, marihintiña, maganbuntiña hama ha mariñagaditiña (Matéu 11:4, 5). Mítaranti meha Hesusu kei lábutigu relihión, ladüga hínsiñeti meha lun larufudahan houn gürigia ha busenbaña hafurendeirun luagu Bungiu (Huan 7:49). Hínsiñetiña gürigia ha ǘnabugubaña lun ani súnwandan meha láfaagun lun líderaguniña (Matéu 20:28).

14. Ka lunbei wadügüni lun warufuduni hínsiñe hamá wíbirigu woun?

¹⁴ Aban lubuidun chansi lidaani Aritaguagülei lun wasaminarun ida luba lan wíderaguniña wíbirigu lidan damuriguaü, hátima wéiyougaañabaña. Gayarati san wabisidahaniña, wanügün somu éigini houn, wíderaguniña lidan somu fisiu hábiñe, wanügüniña adamuridagua o apurichiha? (Aliiha huméi Lúkasi 14:12-14). Lunti línchahaniwa ínsiñeni le lasandirubei Heowá wawagu lun warufudun ínsiñeni houn wíbirigu.

15. Ka lunbei wasubudiruni sun wagía?

¹⁵ Lidan lǘrüwan lúgaaru, lunti línchahaniwa línsiñehabu Bungiu lun feruduna wamaniña wíbirigu. Sun wagía galagante wamuti figóu luma óunweni lúmagiñe Adán, ligía ua lubéi lunti lariñagun memegeirun lani lani Hesusu sákürifisiu. Íbini lubúein Bungiu létima úaraguabei megei lumuti. Súngubei wagía lunti waritaguni feruduna láadiwa lan Heowá. Ka uagu lunti lubéi gunfuranda wamani katei le? Wadarirubei óunabagülei lidan aban hénpulu le meha líchugubei Hesusu.

16, 17. Ka meha labusenrubei Hesusu larufudahan woun lau hénpulu luáguti urúei le ferudunabalin lidamun aban óunwenbu dúeiti?

¹⁶ Ayanuhati meha Hesusu luagu aban idamuni le adúeirubalin urúei 60 míñunu denariu. Gama lumoun, aba feruduna lani urúei lanarime dúeiti ligía. Dan lárigiñe, úati meha feruduna lani idamuniméme ligía idamuni  líledi le adúeirubalin 100 denariu. Lun hamuga geteingiradi lan musu ligía luagu le ladügübei urúei luagu, feruduna lubéi yebe lani paaná. Dan le líchugunbei urúei fe luagu le ladügübei musu wuribati ligía, aba lagañidun saragu. Ligía aba lubéi lóunaagüdün luagu, ani aba lariñagun lun: “Musu wuribati! Feruduna numuti sun badúeihan ladüga bayumuragun nun. Lunti yebe giñe gudemehabu ban lun bouba kei gudemehabu nan bun” (Matéu 18:23-35). Ka meha labusenrubei Hesusu larufudahan lau hénpulu le? Luagu dan le lan feruduna lani Heowá wafigoun, aba feruduna lani lanarime wachara, le ítarabei kei aban óunwenbu dúeiti. Anhein seremei wabalin Bungiu luagu le ladügübei, ka lunbei wadügüni?

¹⁷ Danme le awanha lan aransera lubá Aritaguagülei, samina wamá: “Óusera láadina san somu íbiri wuriba? Hénrenguti san nun feruduna nani?”. Ábameti wasigiruni lani Heowá hénpulu, le ‘gíchigadibei ferudun’ (Sálumu 86:5; Neemíasi 9:17). Anhein seremei wabalin Heowá luagu feruduna lániwa, feruduna wabaña amu tídangiñe sun wanigi. Anhein busén wabéi lun wínsiñedun lun Heowá, mosu hínsiñedun íbirigu woun ani feruduna wamañame (Matéu 6:14, 15). Inarüni siñati lan lasansiruni ferudun le meha asuseredubei, gama lumoun íderagua lumutiwa lun wawinwandun lau ugundani.

18. Ka meha íderagubarun aban íbiri lun tawanduni tichara amu íbiri?

¹⁸ Anihein dan hénrenguti woun feruduna wamani hachara wíbirigu (aliiha huméi Éfesuna 4:32 luma Kolosana 3:13, 14). Samina wamá luagun le asuseredubei tun aban íbiri gíritu Lily. ^[1] Íderaguatu Lily aban íbiri gíritu Carol, hilaali tani íbiri tuguya weiriei. Ñǘdüntu Lily tuma lidan sun fulasu, kéiburi agañeinha o adüga amu mandóu. Íbini íderagua tanu Lily saragu, súnwandan meha tekeherun Carol. Anihein meha dan hénrenguti houn hanaagun houngua buidu. Gama lumoun, áfaaguatu meha Lily lun tasaminarun luagun igaburi buiti le tuágubei Carol. Ligía gayara lubéi meha tíderagunu luagu saragu irumu darí lachülürün dan lun tasandirun Carol ani aba tounwen. Ariñagatu Lily memeniha lan tanigi táguyugun Carol lun tasubudirunu buidu danme le mafigounharu. Anhein geteingiradi wabéi luagu línsiñehabu Bungiu, gayarabei giñe feruduna wamani hachara wíbirigu. Ani línchahabadiwa ínsiñeni le lun wagurabuni dan danme le mafigounhadiwa ani machara wagíame.

19. Kaba wadüga anhein seremei wabalin Bungiu luagu le ladügübei wawagu?

¹⁹ Furanguti rúhali lan Heowá aban lubuidun idewesei woun. Yusu waméi lidaani Aritaguagülei lun wasaminarun luagun sun le adüga láalibei Heowá luma Hesusu wawagu. Arufuda waméi weteingiradi sagü weyu. Áyeiha waméi lani Hesusu hénpulu, arufuda wamá ínsiñeni houn wíbirigu ani feruduna wamaña tídangiñe sun wanigi.