1, 2. a) Ka lariñagubei Heowá lasusereduba lan lidan wadaani? b) Kaba burí álügüdahani wóunaba lidan arütíkulu le? (Ariha huméi dibuhu le lídanbei lagumeseha arütíkulu).

AYANUHATI meha Heowá luagu aban katei le lunbei meha lasuseredun lidan wadaani. Ariñagati: “Lídanme dan ligía, hárügüdübei diisi terencha ha lílana burí fulasu aban huríu tuéigiñe ladaüragun, hariñagame lun: ‘Busentiwa woudin huma, ladüga aganbatiwa luagu anihein lan Bungiu huma!’” (Sakaríasi 8:23). Huríu ligía mini lan kristiánugu ha lanúadirubaña Bungiu lau sífiri sandu. Watu Bíbülia houn: “Ísüraeli le lani Bungiu” (Galasiana 6:16, TNM). Ani “diisi terencha” hagía mini lan sun ha hemenigibaña hawinwandun lun súnwandan ubouagu. Ka uagu busén habéi houdin hama kristiánugu anuadirúaaña? Ladüga subudi hamuti anihein lan Heowá hama ani subudi hamuti aban lan lueirin chansi háhuduragun lun Bungiu úara hama.

² Ítara kei Sakaríasi, arufudahati meha Hesusu lídanbaña lan aban sun lubúeingu Bungiu. Wati houn ha hemenigibaña hawinwandun sielu ‘mudún míbetiña’. Ani wati houn ha lúnbaña hawinwandun ya ubouagu “amu mudún”. Ariñagati Hesusu herederuba lan lubúeingu “lidan aban fárüga” ani ligíarügübei  lan ‘hóuniri’ (Lúkasi 12:32; Huan 10:16). Gama lumoun, gayarati wálügüdagun woungua: Mégeitiwa san wasubudiruni hiri sun kristiánugu anuadirúaaña? Ida liña san lunti lan hóuserun kristiánugu anuadirúaaña? Anhein agumesera aban lílana damuriguaü le ñein lubéi weseriwida eiga tídangiñe fein gurá ligía tídangiñe diwéin lidan Aritaguagülei, ida luba wóuseruni? Anhein aganwoundeina haña lubéi kristiánugu ha ariñagubaña anuadirúaaña lan, lunti san wadiheridun? Wóunabubei álügüdahani burí le lidan arütíkulu le.

3. Ka uagu siñá lubéi wasubudiruni lau ichouruni kaba lan ñüdün sielun lun hádangiñe hamá 144,000?

³ Lunti san wálugun wasubudiruni hiri kristiánugu anuadirúaaña ha añaheinguabaña ubouagu? Uá. Ka uagu? Lugundun siñati wachoururuni anhein hóudiba lubéi sielu ^[1] (ariha huméi abürüdǘni lidan lagumuha arütíkulu). Inarüni amisuraha laaña lan Bungiu lun houdin sielun, gama lumoun ánhaña úaragu darí lagumuhóun, ligíarügübei houdin. Subudi lumuti Mafia katei le, ligía layusurunbaliña ‘profetagu yéetiña’ lun louchun ladügün lun múaragun hamá (Matéu 24:24). Siñabei hachoururuni kristiánugu anuadirúaaña luagu hóudinba lan sielun darime líchuguni Heowá lagumuhóun seyu houn. Ru lumuti Bungiu seyu le hawagu lubaragiñe hounwen o murusun dan lubaragiñe lagumeserun “óunwenbu asufuriruni” (Arufudúni 2:10; 7:3, 14).

4. Anhein ibidiñe lubéi hiri sun kristiánugu anuadirúaaña ha añaheinguabaña ubouagu houn amu mudún, ka uagu gayara lubéi hariñagun houn: “Busentiwa woudin huma”?

⁴ Anhein ibidiñe lubéi hiri sun kristiánugu anuadirúaaña ha añaheinguabaña ubouagu houn amu mudún, ka uagu gayara lubéi hariñagun houn: “Busentiwa woudin huma”? Ariñagatu Bíbülia hárügüdüba lan “diisi terencha” tuagu ladaüragun aban “huríu” ábame hariñagun: “Busentiwa woudin huma, ladüga aganbatiwa luagu anihein lan Bungiu huma”. Kei aubei warihei, ayanuhati bérusu le luagu aban “huríu”, ani lárigiñe aba lariñagun “huma”. Ligíati, mama ábanrügü gürigia “huríu” ligía, mini lan sun kristiánugu anuadirúaaña keisi sétanu. Subuditi katei le houn amu mudún, ligía gayara lubéi hariñagun ‘hóudiña lan’ hama kristiánugu anuadirúaaña, o lidan amu dimurei, luagu heseriwiduña lan lun Heowá úara hama. Memegeiruntiña hasubudiruni hiri sun kristiánugu anuadirúaaña lun hafalaruni kada aban hádangiñe. Ka uagu? Ladüga ariñagatu Bíbülia Hesusurügübei lan wafalara (Matéu 23:10).

5. a) Ka eweridihani lunbei harihini kristiánugu anuadirúaaña keisi aban katei sériuti? b) Ka uagu súdini lubéi eweridihani le?

⁵ Mosu seriu lan harihini kristiánugu anuadirúaaña eweridihani le wadarirubei lidan 1 Korintuna 11:27-29 (aliiha huméi). Anhein móunigirun lan aban kristiánu anuadirúaali lumadagua luma Heowá ani houmémelagiru fein gurá ligía diwéin lidan Aritaguagülei, ladügüñein “madünamouga”. Lidan amu dimurei, lóuseruña hamuga  lau minebenehabuni (Ebüréu 6:4-6; 10:26-29). Sériuti eweridihani le lugundun anhein múaragun aban kristiánu anuadirúaali lun Heowá, siñabei leresibiruni “le lunbei líchuguni Bungiu sielu lun le agañeiruti, lídangiñe Kristu Hesusu” (Filipuna 3:13-16).

6. Ida luba hóuserun kristiánugu anuadirúaaña?

⁶ Ariñagati Pábulu houn kristiánugu anuadirúaaña: “Ligía namuriahabei huma [...] lun hóuseragun hungua kei lunti lan hadügüni ha únbaña wáhali lan Bungiu lun lánigu hamá kei lagúarun hun”. Ida luba meha hadügüni katei le? Afuranguagüda lumuti Pábulu: “Ǘnabugu humá, hínsiñehabu, gaguraasun humá, areida huguyame houn híbirigu”. Haritaguagüda lumuti giñe houn mosu lan lidan hamá aban ani lun ñein lan darangilaü haganagua (Éfesuna 4:1-3). Íderagua lumutiña sífiri sandu lubúeingu Bungiu lun ǘnabugu hamá, ani lun manaagun hamá houngua (Kolosana 3:12). Ligía masaminarun habéi kristiánugu anuadirúaaña buídutima hamá hawéi amu. Masaminaruntiña gíbetima lan sífiri sandu hama hawéi ha híbiri kristiánugu ladügarügü anuadirúaaña lan. Masaminaruntiña giñe gunfurandatima hamanu Bíbülia hawéi ha híbiri íbirigu. Ani mínchahan hamutiña amu lun heigin tídangiñe fein ni lun hatun tídangiñe diwéin lidan Aritaguagülei ladügarügü samina hamá anuadirúaali lan gürigia ligía. Kei le ǘnabugu habéi, subudi hamuti Heowárügüñein lan gayara lamisurahan aban gürigia lun lidin sielun.

7, 8. Ka burí katei madügün habéi kristiánugu anuadirúaaña, ani ka uagu?

⁷ Íbini subudi hamuti lan kristiánugu anuadirúaaña aban lan lubuidun chansi hamisurahóun lun houdin sielun, magurabahantiña houserún lau aban igaburi espechaliti (Éfesuna 1:18, 19; aliiha huméi Filipuna 2:2, 3). Subudi hamuti dan le lan meha lanúadirunbaliña Heowá, madügünti lun hasubudiruni sun gürigia. Ligía maweiridun tubéi hanigi kristiánugu anuadirúaaña dan le hénrengu lan lun aban gürigia lafiñerun luagu anuadirúaali lan. Subudi lumuti ariñaga tan Bíbülia woun moun lumuti lan wafiñerun lau lóufudagun dan le lariñagun aban gürigia rúhali lan Heowá aban buligasion espechaliti lun (Arufudúni 2:2). Ani dan le lasubudirun aban kristiánu anuadirúaali amu gürigia luagu furumiñeti wéiyaasu, mídinti ariñaga lun anuadirúaali lan. Ka uagu? Ladüga mabusenrunti laweiridagüdünu hanigi amu. Le linarün katei, háfuga mabahüdagun lubéi ni ka un. Mapantahanti giñe luagu katei buiti le lunbei ladügüni sielu (1 Korintuna 1:28, 29; aliiha huméi 1 Korintuna 4:6-8).

⁸ Masaminaruntiña kristiánugu anuadirúaaña lunti lan hásügürün dan hámarügü amu kristiánugu anuadirúaaña, kamá hamuga lídanñanu aban sétanu espechaliti. Máluahan hamutiña kristiánugu anuadirúaaña háledigu lun hayanuhan o lun haturiahanu Bíbülia hámagua (Galasiana 1:15-17). Lun hamuga hadügüni kristiánugu anuadirúaaña katei le, hadügüña hamuga lun ñein lan fánreinguaü lidan damuriguaü. Hadügüña hamuga aban katei le mídinti úara luma sífiri sandu, erei le layusurubei Bungiu lun ñein lan darangilaü luma úarani hadan lumutuniña (aliiha huméi Rómana 16:17, 18).

9. Ka uagu mosu lubéi wóunigiruni ligaburi wóuseruniña kristiánugu anuadirúaaña? (Ariha huméi rekuáduru “‘Le hínsiñehabubei [...] manarimeguti’”).

⁹ Ariñagati Hesusu houn lani disipulugu: “Íbirigu súngubei huguya”. Ani lárigiñe, aba  lariñagun houn: “Ladüga le anaaguti lungua weiri, lǘnabudagüdüwaba; anhein le anaaguti lungua ǘnabu, laweiridagüdüwaba” (Matéu 23:8-12, TNM). Ligíati, wuribabei hamuga wíchugun saragu uéiriguni lun aban gürigia, íbini anuadirúaali lan. Ariñagatu Bíbülia lunti lan wasigiruni hénpulu lánina afiñeni le híchugubei wéiyaaña lidan afiñeni, gama lumoun, mariñaguntu mosu lan wasigirun aban gürigia (Ebüréu 13:7). Inarüni ariñaga tan Bíbülia añahein lan fiú ha ‘lunti inebewa hamá saragu’, ladüga weiri lan hawadigimaridun apurichiha luma arufudaha, mama ladüga anuadirúaaña lan (1 Timotéu 5:17, Lererun Bungiu to lánina Iseri Daradu). Ánhaña wóusera kristiánugu anuadirúaaña lau aban igaburi espechaliti, gayarabei wuriba lan hasandiragun houngua. Ani létima wuribabei, gayarabei wadügün lun íñugu lan hanaagun houngua (Rómana 12:3). Mabusenruntiwa wadügün lun hafigouhan kristiánugu anuadirúaaña (Lúkasi 17:2).

10. Ida liña warufuduni inebe hamá kristiánugu anuadirúaaña woun?

¹⁰ Ida liña warufudun inebesei houn íbirigu ha lanúadirubaña Bungiu lun houdin sielun? Furumiñe, málügüdün wamutiña ida liña lan hanuadirún, ladüga habagari lira ani mama mosu wasubudiruni (1 Tesalónikana 4:11; 2 Tesalónikana 3:11). Masaminaruntiwa giñe anuadirúaaru lan hani weiriou o hani weiriei, hagübürigu o ha híbiri haduheñu. Mibihínwati lubuidun chansi le kei alagan (1 Tesalónikana 2:12). Madügüntiwa giñe álügüdahani le adügüti lun hasandiragun gürigia houngua wuriba. Kei hénpulu, málügüdün wamutu lani aban kristiánu anuadirúaali weiriou ida liña lan tasandiragun tungua luagu úabei lan tani weiriei tuma lidan Paraísu. Afiñetiwa luagu líchugubei lan Heowá sun le wabusenrubei woun lidan Paraísu (Sálumu 145:16).

11. Ka uagu lunti lubéi wafalaruni adundehani lun maweirigun lan warihin somu gürigia?

¹¹ Góunigiguatiwa woungua dan le wóuseruniña kristiánugu anuadirúaaña kei wóuseruniña sun íbirigu. Ka uagu? Ladüga ariñagatu Bíbülia gayarati lan ñein hamá “íbirigu ha mama tímatimaatiña” lidan damuriguaü ani gayarati íbini lun hariñagun anuadirúaaña lan (Galasiana 2:4, 5; 1 Huan 2:19). Gayarati giñe hagarabaagun fiú kristiánugu anuadirúaaña lun Bungiu (Matéu 25:10-12; 2 Féduru 2:20, 21). Ariñagati disipulu Húdasi moun lumuti lan wéirigu lan warihiniña gürigia. Lidan amu dimurei, moun lumuti wafalarun somu íbiri lidan damuriguaü, ladügarügü anuadirúaali lan, ladüga subudiwa lan o ladüga seriwihali lan lun Heowá luagu saragu irumu. Súdiniti wafalaruni adundehani le, ladüga ánhaña adiseda íbirigu hagía luéi Heowá, meferidirun wabéi wafiñen luagu ani mígirun wabéi giñe weseriwidun lun (Húdasi 16).

12, 13. Ka uagu moun lumuti lubéi wadiheridun luagu átiriñanu lan kristiánugu éigitiña tídangiñe fein gurá hagía tídangiñe diwéin lidan Aritaguagülei?

¹² Luagu saragu irumu arihúati meha ǘnabudeina liña lan hanumerun kristiánugu ha éigibaña tídangiñe fein ani gurá hagía tídangiñe diwéin lidan Aritaguagülei. Gama lumoun, lidan lagumuhóun burí irumu, gánwountimarügütiña. Lunti san wadiheridun luagu katei le? Uá. Ariha waméi ka lan uagu.

¹³ “Subudi lumutiña Wabureme Bungiu lánigu” (2 Timotéu 2:19). Subudi lumuti ka  lan anúadira láalibei luma ka lan manúadirun lubéi. Ánhañati íbirigu ha abahüdübalin átiriñanu lan éigitiña tídangiñe fein gurá hagía tídangiñe diwéin lidan Aritaguagülei ibidiñeti houn. Abahüdǘwatiña ha asaminarubaña anuadirúaaña lan íbini manuadirúniwa hamá. Kei hénpulu, añahein fiú ha meha éigibaña tídangiñe fein ani gurá hagía tídangiñe diwéin, ani guentó madügün hamaali. Ani añahein amu gayarati sandi lan hachügü ani aba hasaminarun hóudiba lan sielun. Ladüga burí katei le ibidiñe lubéi woun lau ichouruni átirirügaaña lan kristiánugu anuadirúaaña ubouagu.

14. Ka tariñagubei Bíbülia luagu átiribaña lan kristiánugu anuadirúaaña erederutiña ubouagu danme le lagumeserun óunwenbu asufuriruni?

¹⁴ Danme le liabin Hesusu lun lanügüniña kristiánugu anuadirúaaña sielun, añaheinbaña lidan saragu fulasu ubouagu. Ariñagatu Bíbülia ariñaga lan Hesusu: “Nóunahabaña nani ánheligu ha siélubaña lau óunwenbu tamuri fidu, lun hóundaruniña nánigu ha anúadira náañabaña lídangiñe gádürü larigei ubóu” (Matéu 24:31). Arufudahatu Bíbülia fiúrügübaña lan kristiánugu anuadirúaaña erederutiña ubouagu lidan lagumuhóun dan (Arufudúni 12:17). Gama lumoun, mariñagun tumuti átiribaña lan ubouagu danme le lagumeserun óunwenbu asufuriruni.

15, 16. Ka bián katei lunbei gunfuranda wamani hawagu kristiánugu anuadirúaaña?

¹⁵ Heowá desidírübalin lidaani lanúadiruniña kristiánugu (Rómana 8:28-30). Gumeseti anúadira fiú gürigia lau sífiri sandu lárigiñe láguyugun Hesusu. Genegeti anuadirúa hamá sun kristiánugu lau sífiri sandu lidan dan ligía. Lárigiñe, sügüti saragu dan le ídanbei ñein hamá bandi kristiánugu  mama inarünitiña. Íbini ítara, anúadira lumutiña Heowá kristiánugu ha inarünitiña lau sífiri sandu. Ítara haña meha kristiánugu hagía kei türigu le uágubei lariñaga Hesusu laweiriduba lan laganagua híduru wuribati (Matéu 13:24-30). Lidan lagumuhóun dan le, aniheingua Heowá anúadaha gürigia lun hádangiñe hamá 144,000 ^[2] (ariha huméi abürüdǘni lidan lagumuha arütíkulu). Anhein desidírü Heowá lanúadirun fiú kristiánugu lubaragiñe lagumuchagüle ubóu, afiñetiwa ladügüñein lan le richabei (Isaíasi 45:9; Danieli 4:35; aliiha huméi Rómana 9:11, 16) ^[3] (ariha huméi abürüdǘni lidan lagumuha arütíkulu). Mabusenruntiwa ítara wamá kei nadagimeintiña ha uágubaña layanuha Hesusu lidan aban hénpulu. Achuragua hamuti hayubudiri luagu ligaburi lóuseruniña ha achülürübaña nadagimein lidan lagumuhóun oura (aliiha huméi Matéu 20:8-15).

¹⁶ Mama lílana “musu úaraguati” sun kristiánugu anuadirúaaña (Matéu 24:45-47). Ítara kei lidan hadaani furumiñetiña kristiánugu, yúsuti Heowá luma Hesusu fiú gürigia lun harufudahani inarüni houn bandi gürigia. Lidan meha hadaani furumiñetiña kristiánugu, murusunrügüñanu meha kristiánugu anuadirúaaña abürüdoun Abürüdǘni Güriegu Kristiánu. Uguñe weyu, fiúrügüñanu kristiánugu anuadirúaaña ibihiti buligasion lun híchuguni “éigini houn [lumutuniña Bungiu] lidan dan”.

17. Ka furendei wamaalibei lidan arütíkulu le?

¹⁷ Ka wafurendeirubei lidan arütíkulu le? Desidírühali Heowá lun yaaba lan ubouagu hawinwanda hiibe-agei lubúeingu lun súnwandan ani ha lúnbaña harúeihan luma Hesusu siéluba hawinwanda. Ruti Heowá hafayeiruaha sun lubúeingu, dandu “diisi terencha” kei “huríu”. Ani agurabati lun gaganbadi hamá biángubei sétanu ha lun ligiaméme lúrudu ani lun úaragua hamá. Lunti ǘnabugu hamá súngubei. Lunti heseriwidun lun Heowá úara ani lun lidan hamá aban. Ani lunti giñe háfaagun lun hakipuruni darangilaü lidan damuriguaü. Lidan awanha lan agurabahei lachülürün lagumuchagüle ubóu, sigí wamá eseriwida lun Heowá ani sigí waméi Hesusu úara kei lílana ábanrügü “fárüga”.