1. Ítara kei urúei Dawidi ka gayaraabei hálügüdagun fiu kristiánugu houngua?

SUN wagía, busentiwa wawinwandun lidan darangilaü. Gama lumoun, lau sun mínsiñe lan woun, anihein dan mosu wagagibudagun luma saragu lénrengunga. Másiñati gayara lan hasandiragun fiu kristiánugu houngua kei urúei Dawidi le álügüdübalin Heowá: “Ídaba san lásura tasufurirun nanigi tabu sun nuani íruni sun weyu?” (Sal. 13:2).

2. Kaba wariha lidan aturiahani le?

² Íbini siñá lan wesefurun sunsuinagubei lídangiñe saragu idiheri anihein katei le gayaraati wadügüni lun gayaraabei lan wóunigiragun woungua. Lidan aturiahani le, wakutiha fiu katei le adügübei lun wadiheridun. Lárigiñeme ábame wakutiha sisi adundehani lun gayara lan darangilu wamá danme le wagagibudagun luma turobuli.

3. Ka lénrengunga úmabei wagagibudagua, ani gabafutiwa san luagu?

³ Anihein katei le adügübei lun wadiheridun saragu ani lóuguati wabafu luagu o mabafugubeitiwa luagu. Kéiburi, siñati wararamuni maserudun lan éigini sagü irumu ni maserudun tan daüguaü ni maserudun tan muna. Mabafutiwa giñe hawagu wapanaagu leskuelarugu ni hawagu ha lídanbaña wadagimanu lun mínchahan hamaniwa lun móuserun wamá lau arumani o magíaguni. Furanguti siñá lan wagumuchun lau anarimeni le lídanbei  fulasu le ñein lubéi wawinwanda. Sun katei le arufuda lumuti ida liña lan ligaburi ubóu le ídanbei wawinwanda uguñe weyu, hiibe agei gürigia mígiraguagüdüntiña houngua lun tadundehaniña Lererun Bungiu. Subudi lumuti Mafia le lubungiute ubóu le adüga lan “katei le lánina ibagari le” lun meseriwidun hamá gürigia lun Heowá (Mat. 13:22; 1 Huan 5:19). Ligíati buin liña lubéi ubóu le lau saragu turobuli le adügübei lun nidiheri hamá gürigia saragu.

4. Kaba san wadüga danme le ladügüdarúniwa wawagu?

⁴ Dan le ladügüdarúña lan wawagu, háfuga sandigua wamá woungua buinha lan wachügü lau saragu idiheri. Másiñati nidiheri wamá luagu lougua lan wagañeirun lun wagañeihani katei le wemegeirubei. O nidiheri wamá wasandiruba lan ani siñabei lan woudin awadigimarida ani ladügame lira gayaraabei weferidiruni wawadigimari. Másiñati giñe nidiheri wamá úabei lan úaragua wamá danme le lóuchawagun wafiñen. O nidiheri wamá luagu kaba lan wadüga danme le ladügün Mafia lun hábürüha gürigia ha lábugiñebaña lubafu hawagun lumutuniña Bungiu. Fagua wálügüdagun woungua: “Wuribati san nadiheridun luagu sun le?”.

5. Ka labusenrubei Hesusu lariñagun lau dimurei “Madiheri humá”?

⁵ Ariñagati Hesusu houn lani disipulugu: “Madiheri humá” (Mat. 6:25). Le san labusenrunbei lariñagun houn moun lumuti lan hasandirun ni murusun idiheri? Ua. Lidan meha dan le sügühalibei añahein meha lubúeingu Heowá ha úaraguabaña súfuritiña meha giñe saragu idiheri ani mama meha ladüga hasandirun saragu idiheri lun magundan lan Bungiu hau (1 Uru. 19:4; Sal. 6:3). * Le linarün katei líchuguña meha Hesusu darangilaü woun. Mabusenrunti lun wabuinchun lau saragu idiheri ladüga turobuli lánina ibagari darí lun leberesehani weseriwidun lun Heowá. Ligíati ka gayaraabei wadügüni dan le wasandirun saragu idiheri? (Ariha huméi rekuáduru “ Ida luba hibihini”).

6. Según Filipuna 4:6, 7, ka gayaraabei líderaguniwa lun darangilaü wamá?

⁶ 1) Furíei humá súnwandan. Hasandiraguba houngua darangilañu dan le hafurieidun lun Heowá saragu dan le habuinchagun lau turobuli (1 Fe. 5:7). Dan le lóunabuni Heowá furíei le hadügübei ru lumuti “lidarangilan hun, le wéiritimabei luéi sun subudi” (aliiha huméi Filipuna 4:6, 7). Yusu lumuti Heowá lubafu sífiri sandu lun gayara lan líchugun darangilaü woun (Gal. 5:22).

7. Ka katei lunti gabaroun wamani dan le wafurieidun lun Bungiu?

⁷ Danme le hafurieidun lun Heowá, dará humoun hanigi lun. Ariñaga huméi lun ka lan hiturobulinbei luma ida liña lan ladügün turobuli le lun hasandiragun hungua. Anhein gayara lubéi haranseruni hiturobulin amuriaha humá lichú au lun hadariruni lárani luma erei lun hadügüni. Anhein siñá hubalin hiturobulin aransera amuriaha humá luma Heowá lun madiheridun humá saragu luagu. Anhein habahüdahan hiturobulin lun Heowá, harihibei furangu ida liña lan lóunabunün. Anhein móunabun lan hafurieidun lau lóufudagun mábürüha lan harüna. Amu luéi habahüdahani hiturobulin lun Heowá busenti giñe lun hafurieidun lun súnwandan (Luk. 11:8-10).

8. Ka gayaraabei wíridun lidan wafurieidun?

⁸ Danme le hafurieidun lun Heowá lun hawaragun, súdiniti lun hasaminarun luagu sun  buiti le húmabei, íbini laganagua turobuli, ani ru humá giñe seremei lun luagu. Aniheinbei dan hénrengubei lan lun hadarirun dimurei le buiti lun habahüdahani le hasandirubei. Haritagua huméi luagu gayara lan lóunabuni Heowá hafurieidun, íbini láurügü hariñagun: “Bungiu Baba íderaguabana!” (2 Kro. 18:31; Rom. 8:26).

9. Ida luba wadarirun darangilaü le tímatimaati?

⁹ 2) Afiñe humá luagu Heowá mama lan huougua hafiñera. Lidan sígulu widü lb.l.K, hanufudetiña meha lumutuniña Hudá luéi hábürüha asiriana hawagu luma luéi hanügüniña idamunime, ábanti hamuriahan ísüraelina ídemuei luma Ehiptu (Isa. 30:1, 2). Wéridi lumutiña Heowá lanügübaña lan katei le lidoun günringuaü (Isa. 30:7, 12, 13). Ariñagati Heowá liyumulugugiñe Isaíasi ida luba lan hadarirun lumutuniña ichouruni le tímatimaati. Ariñagati Isaíasi: “Darangilu humá, ábame hesefurun. Lídanbei darangilaü luma emenigini here” (Isa. 30:15b).

10. Írida humá fiu sügǘ le ídanbei gayara lan harufudun afiñe humá luagu Heowá.

¹⁰ Ariha wamá fiu sügǘ le ídanbei gayara lan warufudun afiñe wamá luagu Heowá. Samina humá lichugúña lan aban wadagimanu le fáyeiti hun gama lumoun lagidarúba saragu dan huéi ani ladügüba lun hénrengu lan lun hetenirun lun heseriwidun lun Heowá. O háfuga anihein lan aban hupaaná lidan wadagimanu ladarihañadün ani mama Gefenti. Samina humá giñe aba lan lariñagun aban hiduhe le hínsiñebei hun mínsiñeedün lan lun ladüga heseriwidun lun Heowá. Hénrenguti dan le lagagibudagun gürigia luma sügǘ burí le, gama lumoun lidan kada kesi ru lumuti Heowá adundehani le wemegeirubei woun (Mat. 6:33; 10:37; 1 Ko. 7:39). Ligíati, harufuduba san afiñe humá luagu Heowá ani hasigirubei san ladundehan?

11. Ka sügǘ tídangiñeti Bíbülia gayaraabei waturiahani lun wakipuragun woungua darangilañu dan le wásügürün lídangiñe lénrengunga?

¹¹ 3) Sagá humá buiti lídangiñe arufudahani lánina binadu dan. Tidan Bíbülia daritiwa saragu sügǘ dandu buiti luma wuribati le arufudubalin gebegi lan lerederun gürigia darangilañu luma lun wíchuguni wafiñen luagu Heowá. Danme le haturiahani sügǘ burí le ariha huméi ka lan íderagubaliña lubúeingu Bungiu lun darangilu hamá dan le hagagibudagun luma lanarime éibaahouni. Kei burí, mígiraguagüdüntiña meha apostolugu houngua lun anufudei, dan le hariñagubei lílana liñun agei lúrudu houn lun herederuni hapurichihan. Lubaragiñe lira ariñagatiña lau ganigi: “Lunti waganbuni Bungiu lun wadügüni le lariñagubei lubaragiñe le hariñagubei wügüriña” (Adü. 5:29). Manufudeduntiña ni lárigiñe lagayuahóun hawagu. Kati uagu? Ladüga subudi hamuti lan anihein lan meha Heowá luéigiñe hóubadina ani gunda lan Heowá hau. Ligíati sigitiña apurichihei uganu buiti (Adü. 5:40-42). Ítarameme dan le meha lagagibudagunbei disipulu Esütéban luma óunweni darangilu liña meha darí lun ítara lan ligibu “kamá ligibu aban ánheli” (Adü. 6:12-15). Ka uagu? Ladüga chouru lumuti lan buidu gunda lan Heowá lau.

12. Según 1 Féduru 3:14 luma 4:14, ka uagu lunti lubéi gunda wamá dan le wéibaahouniwa?

¹² Chouru hamuti meha apostolugu anihein lan meha Heowá hama, ladüga ruti meha ubafu houn lun hadügün milaguru (Adü. 5:12-16; 6:8). Íbini mama lan ligiaméme wakesinbei uguñe weyu yusu lumutu Heowá Lererun luma línsiñehabu lun lachoururagüdüni woun gunda lan wau, ru lumuti giñe lani sífiri sandu woun dan le wasufurirun marichaü (aliiha huméi 1 Féduru 3:14; 4:14). Ligíati lubaragiñe werederun asaminara saragu kaba lan wadüga ámuñegü ánhawa héibaahan wáganiñu,  buítimati lun wetenirun lun le gayaraabei wadügüni guentó lúntima wederebudagüdüni wafiñen líderagubadiwa lan Heowá ani sefu láwame. Ítara kei meha binadu disipulugu lunti waritaguni le füramase lubéi Hesusu: “Anhaün deregüdagumeme, hibihubei ibagari magumuchaditi” (Luk. 21:12-19). Ani mabulieida waméi dan le lan lounwen aban lubúein Heowá le úaraguati haritagua lumuti buidu buidu lun gayaraabei lan láguyuguagüdüni.

13. Ida liña lahuudun woun dan le waturiahani luriban hénpulu hani ha mederaaguagüdünbaña ani mafiñe hagía luagu Heowá?

¹³ Gayaraati giñe wafurendeirun lídangiñe luriban hénpulu le hani ha mederaaguagüdünbaña ani mafiñe hagía luagu Heowá. Líderagubadiwa waturiahani hénpulu burí le lun machugeragun wamá luagu ligiaméme dübü le uágubei hachugeragua gürigia burí ha. Ariha waméi likesin urúei Asá, dan le lagumeserubei urúei Asá arúeiha Hudá, afiñeti meha luagu Heowá dan le lagagibudagunbei hama saragu súdaragu, biní lumuti Heowá lau lagañeiragüdüni wuribu lun (2 Kro. 14:9-12). Gama lumoun, ka asuseredubei dan lárigiñe, dan le lagagibudagunbei urúei Asá hama lisudaranigu Baasá le lurúeite Ísüraeli, ha lóuguatimabaña hawéi lisudaranigu? Lubaragiñe meha láluahani urúei le Heowá kéiñaha ladügüni, ábarüga lafayeiruniña síriana lun híderaguni (2 Kro. 16:1-3). Ani máluaha lumuti giñe lídehan Heowá dan le lasandirubei ani ítagaraü yebe lun lounwe (2 Kro. 16:12).

14. Ka gayaraabei wafurendeirun lídangiñe lichara Asá?

¹⁴ Dan le lagumeserubei Asá arúeiha áluaha lumuti meha lídehan Heowá dan le gaturobulin lan. Lau lásügürün dan, aba máluaha laali lan Asá Lubungiute lun lamuriahan ídemuei luma. Himei lumuti meha ladügüni katei kei auti labusenra. Genegeti hamuga buídubei lan lidin lun Asá lau lamuriahan ídemuei hama asiriana dan le lídinbei ageindagua hama ísüraelina. Gama lumoun wuribati lidin lun. Ariñagati Heowá lun liyumulugugiñe aban profeta: “Séfuha lumutuniña lurúeite Siria búhaburugugiñe, ladüga bárügüdün luéigiñe lurúeite Siria, márügüdüntibu luagu Wabureme le Bubungiute” (2 Kro. 16:7). Wagía giñe sun, mosu wóunigiragun woungua lun mafiñerun wamá saragu wawougua, darí lun hamuga máluaha wamani lídehan Heowá tuma Lererun. Anihein dan wagagibudagun luma sügǘ le ídanbei mosu lan wanúadahan lau lóufudagun kaba lan wadüga, íbini ítara, buídubei lidin woun ánhawa eredera deregüdagu ani afiñe wagíame luagu Heowá.

15. Ka gayaraabei wadügüni dan le waliihanu Bíbülia?

¹⁵ 4) Furendei humá bérusu tídangiñeti Bíbülia. Danme le haliiha aban bérusu tídangiñeti Bíbülia le arufudubei ruti lan gálumaü luma afiñeni luagu Heowá erei hun, áfaagua humá lun hafurendeiruni. Másiñati lahuuduba lan hun haliihani lau umalali héreti o habürüdüni luma lun hakutihani. Ariñagati Heowá lun Hosué lun laliihanu liliburun lilurudun Bungiu luma lun lararamagun asaminara tuagu áriebu wéyuagu lun gayaraabei lan ladügüni katei lau lichú au. Líderagubei meha le laliihabei lidan lilurudun Bungiu lun masandirun lan anufudei, ladügüba meha lira lun ganigi lan lun lalidihaniña lumutuniña Heowá (Hos. 1:8, 9). Tidan Lererun Bungiu wadariruba saragu sügǘ le gayaraabei líderaguniwa lun wakipuragun woungua darangilañu dan le burí wasandiragun woungua lau saragu idiheri (Sal. 27:1-3; Ari. 3:25, 26).

16. Ida liña layusuruni Heowá damuriguaü lun líderaguniwa akipuragua woungua darangilañu luma lun wafiñerun luagu?

¹⁶ 5) Sügǘ humá dan hama íbirigu. Yusu lumutiña Heowá wíbirigu lun wakipuragun woungua darangilañu ani afiñeñu luagu. Sagatiwa  buiti lídangiñe wadamuridagun dan le wíchugun arigei lun le arufudahóubei ñein, óunabagülei le híchugubei wíbirigu luma dan le wayanuha hamá (Ebü. 10:24, 25). Gayaraati lahuudun woun wadaarunu wanigi lun aban umadaü buiti le lídanbei damuriguaü. Gayaraati ladügün “dimurei buiti” le ñǘbuinbei lúmagiñe aban umadaü saragu buiti woun ani sefu lawa giñe lídangiñe idiheri (Ari. 12:25).

17. Según Ebüréu 6:19, ida liña ladügün emenigini luagu Larúeihan Bungiu lun derebugu lan wemenigin wachügüwagu meberesenga turobuli le úmabei wagagibudagua?

¹⁷ 6) Kipu huméi hemenigi derebuguñu hichügüwagu. Ítara liña emenigini luagu Larúeihan Bungiu kei aban óunguru le ágüdahabarun aban ugunei, íderagua lumutiwa lun derebugumeme wamá meberesenga turobuli le úmabei wagagibudagua (aliiha huméi Ebüréu 6:19). Samina wamá luagu le füramase lubéi Heowá lagidarubei lan sun saminaü wuribati ámuñegü (Isa. 65:17). Samina wamá lídanñadiwa lan iseri ubóu, le ñeinba lubéi darangilaü ani úabei wuribani ñein (Mik. 4:4). Ábaya igaburi lun wakipuruni wemenigin derebuguñu, lau wayanuha luagu houn amu. Ligíati adüga huméi sun hiyaraati lun hapurichihan luma hadügün disipulugu. Ánhaadün adügei, harufuduñein “afiñeni le darí lumoun lagumuhóun, lun gayaraabei lan hibihini le hagurabubei” (Ebü. 6:11).

18. Ka wagurabubei lubá ámuñegü, ani kaba íderaguawa lun wagagibudagun luma?

¹⁸ Eibu dan wayarafadun lun lagumuchun ubóu le, éibutimaame gaturobulin wamá ani gayaraati ladügün lira lun wasandirun saragu idiheri. Líderagubadiwa bérusu lánina irumu 2021 lun wafiñerun luagu Heowá dan le wagagibudagun luma lénrengunga mama lun wafiñerun luagu wabafu guánarügü. Lídanme sun irumu le, arufuda waméi afiñe wamá luagu füramase lúmagiñeti Heowá le: “Lídanbei darangilaü luma emenigini here” (Isa. 30:15).