1. Ka asuseredubei lun aban nibureinti dan laganbunbei aban yanu lidan aban adamurini lidan irumu 1935?

DISIWÍDÜ meha irumu lau aban nibureinti dan le labadiseirunbei lidan irumu 1926. Aturiahatiña meha Bíbülia lagübürigu, kei hasubudirúniwa gefentiña luagu Heowá lidan dan ligía. Séingüñanu meha hasaanigu lagübürigu, ǘrüwa wügüriña hama bián würiña, ani arufudahatiña meha houn lun heseriwidun lun Heowá luma lun hafalaruni Hesukrístu. Sagü meha irumu leigin nibureinti úaraguati le tídangiñe fein, gurá ligía tídangiñe diwéin lidan Ladinerun Aburemei, kei meha hadügüni sun Aturiahatiña Bíbülia lidan dan ligía. Danti le laganbunbalin nibureinti le yanu le gíribei “Saragu gürigia”, le líchugubei íbiri Joseph Rutherford lidan aban adamurini le adügǘbei uburugu Washington (Meriga) lidan irumu 1935, aba lasansirun sun katei lun. Ka afuranguagüdüwabei lidan adamurini ligía?

2. Ka katei buiti lafuranguagüdübei íbiri Rutherford lidan liyanun?

² Afuranguagüda lumuti íbiri Rutherford lidan liyanun kátaña lan “saragu gürigia” ha uágubaña layanuhóua lidan Arufudúni 7:9. Lidoun meha dan ligía, saminawati meha íbini lan hóudiba lan “saragu gürigia” sielun, lídanbaña lan aban sétanu le ǘnabutimati ladüga nege lougua lan úaragua hamá. Yusu lumutu íbiri Rutherford Bíbülia lun lafuranguagüdüni mídinbaña lan “saragu  gürigia” sielun, hádangiñetiña lan amu mudún * ha lúnbaña hásügürün wínwanñu lídangiñe “óunwenbu asufuriruni” lun hawinwandun lun súnwandan ligibuagu Ubóu le (Aruf. 7:14). Ariñagati Hesusu: “Añahein giñe amu mudún numa ha mámabaña lídangiñe fárüga le; lunti giñe nanügüniña lun nánigubaña lan. Haganbubadina, ábame herederun súngubei lidan aban fárüga luma aban óunigiruti” (Huan 10:16). Hádangiñetiña gefentiña luagu Heowá ha hemenigibaña hawinwandun lun súnwandan ubouagu danme le paraísuhali lílana sétanu le (Mat. 25:31-33, 46). Ariha waméi ida liña lan lasansiruni iseri afuranguagüdüni le habagari saragu lubúeingu Heowá íbini libagari nibureinti le meha disiwídübei irumu lau (Sal. 97:11; Ari. 4:18).

3, 4. Ka gunfuranda habéi saragu milu íbirigu lidan adamurini le adügǘbei lidan irumu 1935 ani ka uagu?

³ Sanditiña sun ha lídanbaña adamurini saragu ugundani dan le lálügüdahanbei íbiri Rutherford: “Gayaraati san hararamun sun ha hemenigibaña hawinwandun lun súnwandan ya ubouagu?”. Ariñagati aban hádangiñe íbirigu ha meha ñéinbaña, aba lan hararamun hóugiñe diisi milu hádangiñe kéiburi 20,000 gürigia ha meha ñéinbaña. Ábati lariñagun íchuguti yanu: “Añahán saragu gürigia!”. Ábati hapouhani súngubei háhabu aganbúa ligía agúarahani le lánina ugundani. Gunfuranda hamaali meha ha araramubaña magunbirahoun hamá lun houdin awinwanda sielu, manuadirún hagía lau sífiri sandu. Weyu lárigiñe, aba habadiseirun 840 gürigia lidan adamurini ligía ani hádangiñetiña meha amu mudún hiibe-agei hádangiñe.

⁴ Lúmagiñe dan ligía, aba méiginhaña lan saragu milu íbirigu —nibureinti ligía haganagua— tídangiñe fein, matun hagía tídangiñe diwéin lidan Ladinerun Aburemei. Ítara liña meha hasandiragun saragu íbirigu houngua kei aban íbiri le ariñagubei lau saragu ǘnabuguni: “Lidan irumu 1935 neiga luagu lagumuhóun wéiyaasu tídangiñe fein gurá nuguya tídangiñe diwéin lidan Aritaguagülei. Aba níchugun fe michu lani Heowá emenigini lun nidin sielun tidoun nanigi. Nawinwandun ya ubouagu nemeniginbei, lun nídehan lidan ladügǘniwa Ubóu paraísume” (Rom. 8:16, 17; 2 Ko. 1:21, 22). Lúmagiñe dan ligía, aganwoundeina haña “saragu gürigia” ani hawadigimariduña lidan úarani hama kristiánugu anuadirúaaña ha añahaguabaña ubouagu. *

5. Ida liña larihiniña Heowá íbirigu ha méiginhañabaña tídangiñe fein matun hagía tídangiñe diwéin lidan Aritaguagülei?

⁵ Ida liña larihiniña Heowá íbirigu ha meha méiginhañabaña tídangiñe fein matun tídangiñe diwéin lidan Aritaguagülei lárigiñe irumu 1935? Ani ka lasaminarubei Heowá hawagu íbirigu ha meha éigibaña fein gurá hagía tídangiñe diwéin lidan Aritaguagülei uguñe weyu ani aba híchugun fe, lau lásügürün dan, manúadirun lániña lun houdin sielun? (1 Ko. 11:28). Añahein meha éigitiña tídangiñe fein, gurá hagía tídangiñe diwéin lidan Aritaguagülei ladüga samina hamá hóudiba lan sielun. Íbini ítara, ánhaña ánhara lun hachara, ígira hameime heigin tídangiñe fein luma hatun tídangiñe diwéin lidan Aritaguagülei, sigí hagía  eseriwida lun Heowá lau úaraguni, lánharuba lun hádangiñe hamá amu mudún. Lau sun méiginhaña lan tídangiñe fein matun hagía tídangiñe diwéin, chülütiña lidoun Aritaguagülei ladüga teinki hamani Heowá luma Hesusu luagu le adüga hamaalibei hawagu.

6. Ka gumadi líchugubei Hesusu houn ánheligu?

⁶ Yarafaali óunwenbu asufuriruni. Ligía líchuguba lubéi gurasu woun wakutihani le ariñawagúbei lidan Arufudúni kapítulu 7 hawagu kristiánugu anuadirúaaña luma hama saragu gürigia ha hádangiñebaña amu mudún. Ñein, ruti Hesusu gumadi houn ánheligu lun merede lan hágüdahani gádürü garabali le lánina agünrinchawaguni. Moun lumuti hígirun lun láfurun garabali burí le luagun ubóu darime ru laali Heowá lagumuhóun liseyun hawagu kristiánugu anuadirúaaña (Aruf. 7:1-4). Afayeiruahaü le lunbei heresibiruni kristiánugu anuadirúaaña ladüga úaragua hamá, harúeihan luma hafadirihan úara luma Kristu sielu (Aruf. 20:6). Wéiribei ugundani le lunbei lasandiruni Heowá, Hesusu hama ánheligu danme le heresibiruni 144,000 kristiánugu anuadirúaaña hafayeiruaha sielu.

7. Según Arufudúni 7:9, 10, kátaña larihubaña Huan ani ka hadaagubei? (Ariha huméi dibuhu le luágubei tidáü).

⁷ Lárigiñe layanuhan Huan hawagu 144,000 urúeigu hama fádirigu, aba larihin aban katei le íchugubei saragu ugundani lun: “Saragu gürigia” ha ásügürübaña wínwanñu lídangiñe Arümahedón. Mítaranti libiaman sétanu le kei le furumiñeti lugundun gíbetimatiña ha ani ibidiñewati átiriñanu lan (aliiha huméi Arufudúni 7:9, 10). “Harutu hadaüragun”, le arufudubei “madaseirun [h]amá lau burí katei wuribati le lani ubóu le” lábugiñebei lubafu Satanási ani úaraguatiña lun Bungiu luma lun Kristu (Sant. 1:27). Agúarahatiña lau umalali héreti seremei lan lun le ladügübei Heowá luma Hesusu, le Mudún, hawagu hesefurunbei. Barütiña giñe ubanaü kamá tubana fáluma háhaburugu le arufudubalin lau lan sun hagundan hánhara lun Hesusu keisi Urúei le líchugunbei Heowá (ariha huméi giñe Huan 12:12, 13).

8. Ka lariñagubei Arufudúni 7:11, 12 hawagu sun ha siélubaña?

⁸ Aliiha huméi Arufudúni 7:11, 12. Ka asuseredubei sielu dan le harihinbaliña sun ha ñéinbaña saragu gürigia? Arihati Huan aba lan hagundaarun saragu ani aba halawahani Bungiu. Gúndaabei Heowá hau sun ha siélubaña danme le lagunfulirun arufudúni hawaguti saragu gürigia ha lúnbaña hásügürün wínwanñu lídangiñe saragu asufuriruni.

9. Según Arufudúni 7:13-15, ka hadügübei ha hádangiñebaña saragu gürigia?

⁹ Aliiha huméi Arufudúni 7:13-15. Ariñagati giñe Huan chibá hamaaru lan saragu gürigia “hadaüragun, harumagüda hamóun lau lita Mudún”. Mini lan lira, haruma lan hasaminan ani gunda lan Heowá hau (Isa. 1:18). Kristiánugu hagía ha deregeguaabaña houngua lun Heowá ani badisei hagía. Derebuguti hafiñen luagu lani Hesusu sákürifisiu ani lumadagu giñe Heowá hagía (Huan 3:36; 1 Fe. 3:21). Ligíati gayara lubéi herederun ligibugiñe lálana Larúeihan Bungiu “eseriwida lun wéyuagu áriebu” ya ubouagu. Hagíatima etenirubaña lun apurichihani luma lun hadügǘn disipulugu ani ru hamuti katei burí le lánina Larúeihan Bungiu lóugiñe sun katei (Mat. 6:33; 24:14; 28:19, 20).

10. Ka hachoururubei saragu gürigia ani kaba füramasei hariha agunfulira?

¹⁰ Chouru hamuti saragu gürigia lasigiruba lan Bungiu óunigiraña lárigiñe saragu asufuriruni ladüga ariñagatu Bíbülia “lóunigirubaña [lan] le ñunbei luagu lálana arúeihani lau lerederun hama”. Ábame giñe lagunfulirun füramase  le agurabaha hamaalibei amu mudún luagu saragu dan: “Laragahabei [Bungiu] sun háguira; úaalime óunweni ni ayahuni ni íruni ni igarigu” (Aruf. 21:3, 4).

11, 12. a) Según Arufudúni 7:16, 17, ka abiniruni hagurabubei saragu gürigia? b) Lidan Aritaguagülei, ka gayaraabei hadügüni amu mudún ani ka uagu hadügei?

¹¹ Aliiha huméi Arufudúni 7:16, 17. Uguñe weyu, añahein lubúeingu Heowá ha asufurirutiña halama ladüga maseinsuni o ladüga lanarime burí turobuli le lanügübei wuribu. Híbiri, hadaürǘña ladüga hafiñen. Íbini ítara, wéiriti ugundani le hasandirubei saragu gürigia lau hasubudiruni danme lan le háfuridun lídangiñe óunwenbu asufuriruni, ñeinbei lan saragu éigini luma ariñahani lúmagiñeti Bungiu hama súnwandan. Danme le lagünrinchaguni Heowá ubóu le lábugiñebei lubafu Mafia lóunigirubaña saragu gürigia luéi ligañi le ítarabei kei watu gemeti. Lárigiñeme óunwenbu asufuriruni, ladundehabaña Hesusu sun ha erederutiña wínwanñu “lidoun duna le íchugubei ibagari”. Samina wamá luagun lubuidun emenigini le hagurabubei saragu gürigia: hádangiñe saragu milu míñunu gürigia ha wínwanhañabaña, hagíarügübaña móunwegun (Huan 11:26).

¹² Rútiña amu mudún óunwenbu seremei lun Heowá luma lun Hesusu luagu lubuidun hemenigin. Lau sun manúadirun lániña Heowá lun hawinwandun sielu, wéiriti hebegi lun ani hínsiñetiña lun kei hínsiñe kristiánugu anuadirúaaña lun. Dandu amu mudún keisi kristiánugu anuadirúaaña gayaraati halawahani Bungiu luma Kristu ani aban igaburi lun hadügüni lau hachülürün lidoun Ladinerun Aburemei.

13, 14. Ka uagu lunti lubéi wachülürün sun wagía lidoun Laritaguagüle lounwen Kristu?

¹³ Lidan burí lagumuhóun irumu le, ábanrügüñein íbiri éigiti tídangiñe fein gurá ligía tídangiñe diwéin lidan Aritaguagülei hádangiñe kada milu achülürütiña. Mini lan lira, úa lan ni aban adügüti lira lidan liibe-agei damuriguaü. Hiibe-agei gürigia ha achülürübaña lidoun Aritaguagülei hemenigitiña hawinwandun ya ubouagu. Kati uagu hachülüra lidoun Aritaguagülei? Luaguméme resun le adügübei lun houdin gürigia lidan lamarieidun somu hamada: ladüga busén hamá harufuduni hínsiñehabu houn ha amarieidubaña ani gunda hamá hau. Ligiaméme giñe lébunabei houdin amu mudún lidoun Aritaguagülei:  busentiña harufuduni hínsiñehabu lun Kristu luma houn kristiánugu anuadirúaaña luma lun harufuduni houn hámagiñeñanu lan. Ítara liña giñe harufuduni lun Hesusu seremei hamani luagu sákürifisiu le ladügübei lun gayara lan hawinwandun lun súnwandan ya ubouagu.

¹⁴ Ñǘdüntiña giñe amu mudún lidoun Aritaguagülei ladüga gaganbadi hamá lun gumadi le líchugubei Hesusu. Dan le ladügünbalin adineruni úara hama lani apostolugu ha úaraguabaña, ariñagati houn: “Adügameme huméi katei le, haritaguagüleme nuagun” (1 Ko. 11:23-26). Ligíati, ítarameme haba amu mudún achülüra lidoun Ladinerun Aburemei sunme añahagua lan kristiánugu anuadirúaaña ya ubouagu. Agunbiraha hamutiña giñe sun gürigia lun hóundarun hama lidan adamuridaguni espechaliti le.

15. Ida luba lalawahani kada aban wádangiñe Bungiu luma Kristu lidan Aritaguagülei?

¹⁵ Lidan Aritaguagülei, gachansintiwa lun walawahani Bungiu luma Kristu dan le weremuhan luma dan le wafurieidun úara. “Arufuda wamá eteingiruni luagu le adüga láalibei Bungiu luma Kristu wawagu!”, ligía líribei yanu le lunbei lichugún lidan Aritaguagülei irumu le. Lárigiñeme waganbuni yanu le, wéiritimabei weteingiruni Heowá luma Kristu. Danme le anuha lan fein tuma diwéin ásügüra, sunme wagía le achülürübei lidoun Aritaguagülei, waritagubei le mini tubéi: lúgubu luma lita Hesusu. Waritagubei giñe ígira lan Heowá lun lounwen Liráü wawagu lun gayara lan gabagari wamá (Mat. 20:28). Sun ha hínsiñehabubaña lun Wáguchi le siélubei luma lun Lisaani hachülürüba lidoun Aritaguagülei.

16. Ka idan genegegua hamá amu mudún hama kristiánugu anuadirúaaña?

¹⁶ Dandu kristiánugu anuadirúaaña kei amu mudún, súdinitiña lun Heowá. Sandí lumuti ligiaméme ínsiñeni hawagu lílana biángubei sétanu le. Fayei lumuti ligiaméme ebegi —libagari Liráü le hínsiñebei lun— dandu hawagu kristiánugu anuadirúaaña kei hawagu amu mudún. Hemenigin lílana bián sétanu le ámuñegueinarügübei luáriuagua, súngubei hagía lunti úaragua hamá lun Heowá luma lun Kristu (Sal. 31:23). Mabulieida waméi gayara lan líchuguni Heowá lani sífiri sandu lun kada gürigia según hemegeiruni meberesenga anhein hádangiñetiña lubéi kristiánugu anuadirúaaña o hádangiñe hamá amu mudún.

17. Ka hayumahabei kristiánugu anuadirúaaña?

¹⁷ Mama lau emenigini lun hawinwandun sielu hágurahoua kristiánugu anuadirúaaña, Heowá íchugubalin emenigini ligía tidoun hanigi. Saminatiña luagun hemenigin, írida hamuti lidan hafurieidun ani hayumahaña heresibiruni hafayeiruaha sielu. Íbini ibidiñe lan  houn ídatima luba lan hágubu le siéluna memeniha hanigi lun hóundaragun luma Heowá, Hesusu, ánheligu luma hama ha híbiri kristiánugu anuadirúaaña háledigu lun hárügüdüni habara lidan Arúeihani le siélubei (Fili. 3:20, 21; 1 Huan 3:2).

18. Ka hayumahabei amu mudún tídangiñe sun hanigi?

¹⁸ Ánhañati amu mudún, anihein emenigini le aubei hágurahoua sun gürigia hawagu: hawinwandun lun súnwandan ligibuagu Ubóu le (Apur. 3:11). Memeniha hanigi lun lachülürün weyu lun hídehan lidan ladügǘn Ubóu le ábanme paraísu, hábununu haban, hachari, hafulurin-agei luma lun buidu lan hátuadi úara hama haduheñu (Isa. 65:21-23). Hayumahaña haweiyasuhan lun hasubudirun ámuñegueinarügü dabíara, barana luma luéinamun burí wübü. Ayumahatiña giñe hafurendeirun saragu luagu burí katei le adüga láalibei Heowá. Íbini ítara, úati amu katei le rútimati ugundani houn kei hasubudiruni derebugutimaabei lan hamadagua luma Heowá éibume lásügürün dan.

19. Ka chansi líchugubei Aritaguagülei woun ani kaba weyu ladügǘwa irumu le?

¹⁹ Rúhali Heowá aban lubuidun emenigini lun kada aban hádangiñe lubúeingu (Her. 29:11). Ruti Laritaguagüle lounwen Kristu chansi woun, súngubei wagía, lun walawahani Bungiu lau sun Kristu luagu le hadügübei wawagu lun gayara lan wawinwandun lun súnwandan. Ligía adamuridaguni súdinitimabei houn kristiánugu inarünitiña lidan irumu. Lidan irumu 2021, ladügǘba adamuridaguni le weyu samudi 27 lidan ǘrüwa-hati, lárigiñe lálüdün Weyu. Hiibe-agei íbirigu, gayaraabei hadügüni Aritaguagülei maturobulinga. Ánhañati amu, hadügübei íbini hagagibudaguña lan luma éibaahouni. Ani ñéinbaña amu, mósume hadügüni Aritaguagülei furisunrugu. Ibiha láamuga kada aban wádangiñe buiti lídangiñe adamuridaguni espechaliti le lábugiñe laríaahan Heowá, Hesusu hama ánheligu!