Ka uagu lubaragiñe lubéi lounwen Hesusu aba lariñaguni dimurei le lariñagubei Dawidi le waliihabei lidan Sálumu 22:1?

Según Matéu 27:46, murusun oura lubaragiñe lounwen Hesusu, ariñagati: “Nubungiute, Nubungiute, ka san uagu bígirana?”. Ítara liña lagunfuliruni Hesusu dimurei le lariñagubei Dawidi lidan Sálumu 22:1 (Mar. 15:34). Mariñagun lumuti Hesusu dimurei le ladüga lasandirun ígira laali lan Heowá o ladüga féridi laali lan lafiñen. Gunfuranda lumuti meha buidu buidu ka lan uagu lunti lubéi lounwen ani aranseñu liña meha lun ladügüni (Mat. 16:21; 20:28). Subudi lumuti meha luagu lígiruba lan meha Heowá lun háfaruni hilagubei (Hob. 1:10). Ítara liña meha lígirun Heowá lun larufuduni Hesusu úaragua lan meberesenga ligaburi lounwen (Mar. 14:35, 36).

Kati uagu lariñagei Hesusu dimurei ligía? Siñati wafosuruniña gürigia luagu ítara liña lan, gama lumoun ariha wamá fiu katei le arufudubalin luagu ítara liña lan. *

Másiñati le lan labusenrubei Hesusu lariñagun lau dimurei le, lígiruba lan Heowá lun lafarún Hesusu hilagubei. Mosu meha lafayeiruni Hesusu lebegi asalbaruni sin lídehan Heowá. Wügüri meha garaüwarügüti ligía, ligíati “ánhati lun lounwen [...] hawagu sun gürigia” (Ebü. 2:9).

Gayaraati ariñagarügü lan Hesusu fiu dimurei lídangiñe Sálumu 22 lun gayaraabei lan haritaguni gürigia Sálumu le dayarügü. Lidan meha dan ligira, kamaniti meha hafurendeiruni huríu hachügüwagu dimurei burí le lídanbei saragu sálumu.  Ítarati, láurügü haritaguagüdüniwa luágurügü aban bérusu, ábame liabin sun dimurei le lídanbei burí sálumu hachügüwagu. Anhein ligía lubéi meha labusenrubei Hesusu, líderaguñanu meha lani disipulugu ha huríu lun haritaguni saragu profesía le lídanbei sálumu le ayanuhabei luagu lounwen (Sal. 22:7, 8, 15, 16, 18, 24). Gama lumoun, lidan lagumuchagüle sálumu, afuranguagüdati lagañeiruba lan Heowá lidan lagumadiha ani lachawaraguba lan larúeihan “lidan sun larigeirugu ubóu” (Sal. 22:27-31).

Lau layusuruni Hesusu dimurei le lariñagubei Dawidi, másiñati layanuhaña lan Hesusu luagu madurun lan. Lubaragiñe meha lounwen Hesusu, mosu meha lawanduni lasiadirun luagu iyeeni lidan aban aguseruni le marichati (Mat. 26:65, 66). Aba haguseragüdüni lau lóufudagun guñoun ani chubaguatiña fiu lúrudu (Mat. 26:59; Mar. 14:56-59). Lau ladügüni álügüdahani le, másiñati larufuduña lan madügün lan ni kata le adügübei lun lafarúniwa hilagubei.

Másiñati giñe laritaguagüdüñanu lan Hesusu amu dan le lan labürühabalin Dawidi sálumu le lasufuriruña lan, gama lumoun úati mini lan lira féridi laali lan lugundan Heowá. Meferidirun lágili meha Dawidi lafiñen, lárigiñe ladügüni álügüdahani ligía aba lariñagun afiñe lan lesefurubaña lan Bungiu lubúeingu, ani sigimémeti Heowá abinirei (Sal. 22:23, 24, 27). Ítarameme, lau lasufurirun Hesusu le “Liráü Dawidi” luagu wagabu, úati mini lan lira magundan lan Heowá lau (Mat. 21:9).

Gayaraati giñe layanuhaña lan Hesusu luagu gari lan lun lígiruni Heowá, lun gayara lan larufuduni lúaragun sunsuinagubei. Lárigiñe lebedaagun Adán tuma Ewa, lunti buga lasufurirun Hesusu ani hilá ligía. Lau sun lira, mama meha ligía labusenrubei Heowá. Madügünti meha Hesusu ni kata wuribati, gama lumoun mosu meha lasufurirun ani hilá ligía lun lóunabuniwa lasigenehan Satanási luma lun lafayeirún lebegi asalbaruni ani lun gayara lan heresibiruni gürigia le meha eferidirubei (Mar. 8:31; 1 Fe. 2:21-24). Masuseredunbei hamuga anhein mígirun Heowá lun lasuseredun.

Háfuga giñe lóuchuña lan meha Hesusu líderaguniña lani disipulugu lun hetenirun lun resun le uágubei lígira Heowá lun lounwen ítara. * Subuditi meha lun Hesusu ladügüba lan lounwe luagu aban wagabu keisi aban gürigia wuribati lun hachugeragun saragu (1 Ko. 1:23). Ánhaña etenira lun lébuna lounwe, gunfuranda habéi meha lani disipulugu kátima lan uagu lounwe (Gal. 3:13, 14). Ábameti marihin hamani kei aban gürigia wuribati, lubaragiñe lira, harihibei kei aban Esefuhati.

Meberesenga kátima lan uagu lariñagei Hesusu dimurei burí le, subuditi meha lun ladügüñein lan lugundan Heowá lau lounwen luagu wagabu. Murusun dan lárigiñe, ariñagati: “Gúnfuliha sun katei” (Huan 19:30; Luk. 22:37). Anha, mesefu lumuti Heowá Hesusu luagu murusun oura, madügün lubalin, lun gayara lan lagunfuliruni sun le uágubei lóunahei ubouagun. Adügati le lun lagunfulirun sun le bürüwañubei luagu “tidan liliburun Moisesi, tidan haliburun profetagu luma tidan líburu to gíriboun Sálumu” (Luk. 24:44).