1, 2. Ka íderagubaliwa lun gunfuranda wamani le lariñagubei 1 Féduru 2:21?

SAMINA wamá aba lan woudin asariñaha lidan aban beya ibidiñeti woun ani denchati. Ñǘdünti aban gürigia wamá le subudihabúti lun fulasu ligía, ñein lubéi ladügüra ñein giñe wadügüra. Sódini, aba marihin wamaali lan, lau sun lira manufudeduntiwa. Sun wagía áfaaguatiwa wasigiruni lugudárigi.

² Aba katei ítarati, asuseredubei hou kristiánugu inarünitiña: lídanñadiwa aban ubóu le denchati. Teinki wamuti Heowá lau lichugún aban adundehati le buiti woun Hesukrístu, le Lisaani lun wafalaruni lani hénpulu (1 Fe. 2:21). Según aban ariñahani luáguti dimurei le tídanbei Bíbülia, lagoubaguagüdüñein Féduru, Hesusu luma aban adundehati. Ítara kei gürigia le adundehabaliña asariñahatiña, ítara liña giñe lígiruni Hesusu lugudárigi lun wafalaruni. Guentó, ka ugudárigi lunbei wafalaruni? Ka uagu lunti lubéi wafalaruni? Ani ida luba wadügüni?

3. Ka mini lubéi wafalaruni lugudárigi aban gürigia?

³ Ka mini lubéi wafalaruni lugudárigi aban gürigia? Tidan Bíbülia, dimurei éibuga luma dimurei ugudi anihein dan mini lan le ladügübei gürigia lidan sun libagari (Agu. 6:9; Ari. 4:26). Gayaraati wagoubaguagüdüni lani aban gürigia hénpulu luma pasu le ládarubei o lugudárigi le lígirubei lidan uma le ñéingiñe lubéi lásügüra lidan lasariñahan. Ligíati dan le wafalaruni lugudárigi aban gürigia mini lan wafalaruñein lan ligaburi lawinwandun.

4. Ka mini lubéi wafalaruni lugudárigi Hesusu?

 ⁴ Ligíati, ka mini lubéi wafalaruni lugudárigi Hesusu? Lida murusun dimurei, mini lan wafalaruni lani hénpulu. Lidan bérusu ñéingiñe lubéi lasagarúa aturiahani le, ayanuhati apostolu Féduru luagu lubuidun hénpulu le lígirubei Hesusu lau lawanduni asufuriruni. Íbini ítara, anihein saragu katei le gayaraabei wáyeihani lúmagiñe Hesusu (1 Fe. 2:18-25). Le linarün katei, sun le ladügübei luma le lariñagubei Hesusu aban hénpulu buiti lira woun.

5. Afuranguagüda huméi ka lan uagu gayara lubéi wafalaruni ladundehan Hesusu le úabei macharati luagu íbini gafigoun wamá.

⁵ Gayaraati funa san hafalaruni gürigia gafigountiña lani Hesusu hénpulu? Anha gayaraati. Aritagua waméi mariñagun lan Féduru lunti lan wafalaruni lani Hesusu hénpulu “machararunga”, ariñagarügüti lun lan wafalaruni lau “úaraguni”. Ánhawa asigirei lugudárigi Hesusu buidu, dan le wadügüni sun wayaraati, wafalaruñein adundehani le lariñagubei apostolu Huan “lunti [lan] labagaridun” gürigia kei meha labagaridun Hesusu (1 Huan 2:6).

6, 7. Ka uagu yarafatimabadiwa lubéi lun Heowá ánhawa afalarei lugudárigi Hesusu?

⁶ Ánhawa afalarei lugudárigi Hesusu, wayarafadatimaba lun Heowá. Ka uagu? Furumiñe, ígirati Hesusu aban lubuidun hénpulu lun wafalaruni luáguti le mini lubéi aban ibagari le aubei lagundaara Bungiu (Huan 8:29). Ligíati, ánhawa afalarei lugudárigi Hesusu, gúndaabei Heowá. Ani chouru waméi, layarafaduba lan Wáguchi le siélubei houn ha áfaagubaña lun gamadagua hamá luma (Sant. 4:8).

⁷ Libiaman, áyeiha lumuti Hesusu Lúguchi machararunga. Ligía gayara lubéi lariñagun:  “Le arihitina, larihiñein giñe Bungiu Úguchili” (Huan 14:9). Áyeiha wamuti Heowá dan le wáyeihani lusan luma ligaburi lóuseruniña Hesusu amu, kéiburi, lau ligaburi lóuseruni aban gürigia le laubei lépüra, lubuidun igaburi le larufudubei tun aban würi to meha lauboun aba lanarime sandi luma gudemehabu le larufudubei houn gürigia ha eferidirubaña somu haduhe lidan óunweni (Mar. 1:40, 41; 5:25-34; Huan 11:33-35). Éibutima wáfagun lun wáyeihani ligaburi Heowá, yarafatimabadiwa lun.

8. Afuranguagüda huméi ida luba lan líderaguniwa wafalaruni lugudárigi Hesusu lun wagañeiruni ubóu?

⁸ Ánhawa afalarei lugudárigi Hesusu, mígirunbadiwa lun leredehaniwa lagübüri ubóu luéi weseriwidun lun Heowá. Lidan lagumuhóun guñoun le laubei Hesusu ubouagu, ariñagati: “Gañei naali ubóu” (Huan 16:33). Le mini lubéi Hesusu mígiraguagüdünti lan lungua lun ladügüdarun ubóu le luagun, lidan le labusenrubei ladügün, lidan ligaburi lisaminan luma lusan. Áfaaguati lun madireirun lani larihin luéi le úagubei liabin ya ubouagu: lun inebewalá liri Heowá. Ka lunbei wadügüni? Anihein saragu katei le gayaraati ladügün lun ladireiruni warihin. Ligíati, ánhawa etenira lun wadügüni lugundan Heowá, ítara kei Hesusu wagañeirubei ubóu (1 Huan 5:5).

9. Ka lunbei wadügüni lun máfuridun wama lídangiñe émeri le anügübei lidoun ibagari magumuchaditi?

⁹ Ánhawa afalarei Hesusu, wibihiba ibagari magumuchaditi. Dan le lálügüdünbalin aban wügüri nibureinti Hesusu ka lan lunbei ladügüni lun libihin ibagari magumuchaditi, aba lariñagun Hesusu lun wügüri ligía lun lafalaruni (Mat. 19:16-21). Ariñagati Hesusu houn fiu huríu ha meha mafiñenbaña ligía lan Krístubei: “Subudi hamuti nilügüniña mudún numalali [...] ani falá hamutina, rútina ibagari magumuchaditi houn” (Huan 10:24-29). Ani ariñagati giñe Hesusu lun Nikodému, aban hádangiñe lílana Sanedrín le busenbei meha lasubudirun ka lan larufudahanbei Hesusu, ariñagati Hesusu lun, sun lan ha afiñerutiña luagu heresibiruba ibagari magumuchaditi (Huan 3:16). Arufudatiwa afiñeni luagu Hesusu dan wadügüni le larufudahabei lau le lariñagubei luma lau le ladügübei. Anhein wadüga, máfuridunbadiwa lídangiñe émeri le anügübei lidoun ibagari magumuchaditi (Mat. 7:14).

10. Ka lunbei wadügüni lun buidutimalá wasubudiruni Hesusu? (Huan 17:3).

¹⁰ Lun gayara lan wafalaruni Hesusu lau úaraguni, furumiñe mosu wasubudiruni (aliiha huméi Huan 17:3). Wasubudiruni Hesusu aban katei le lunti mararamagun lan. Eibu dan lunti buídutima lan wasubudiruni Hesusu, lidan amu dimurei, lun wafurendeirun luagu ligaburi, luagu ligaburi lasaminarun luma burí  lilurudun. Íbini anhein murusunrügügili lubéi dan wau lidan inarüni o barühadiwa lan saragu dan, súngubei wagía mosu wáfaagun lun wasubudiruni Heowá luma Lisaani.

11. Ka uagu layanuha gádürü Ewanhéliu?

¹¹ Wéiriti ínsiñeni le lasandirubei Heowá wawagu darí lun líderaguniwa lun wasubudiruni Lisaani, adügati lun labürüdǘniwa gádürü Ewanhéliu tidan Lererun. Ayanuhóuati ñein luagu libagari luma luagu lapurichihan Hesusu. Ayanuhóuati luagu le lariñagubei Hesusu, le ladügübei luma le lasandirubei. Íderagua tumutiwa gádürü líburu to lun wararamagun asaminara luagu lani Hesusu hénpulu (Ebü. 12:3). Ariha wamuti le ladügübei Hesusu ñein. Anhein wakutihan gádürü Ewanhéliu, gayaraabei wasubudiruni Hesusu buidu ani falá wameime lau úaraguni.

12. Ida luba wasagarun buiti lídangiñe gádürü Ewanhéliu?

¹² Úati buídurügü lan lun waliihani gádürü Ewanhéliu lun wasagarun buiti lídangiñe. Lunti wadireirun dan lun waturiahan buidu luma lun wasaminarun hulili luagu le waliihabei (ariha huméi giñe Hosué 1:8). Ariha wamá bián adundehani le gayaraabei líderaguniwa lun wasaminarun hulili luagu le waliihabei lidan gádürü Ewanhéliu.

13. Ida luba wíchugun ibagari lun abahüdaguni le lídanbei Ewanhéliu?

¹³ Furumiñe, mosu wawinwanduni abahüdaguni le lídanbei. Yusu waméi wasaminan dan le waliiha lun gayara lan warihini, waganbuni luma lun wasandiruni le meha asuseredubei lidan dan ligía. Líderagubadiwa wáluahan ariñahani tidan burí agumeiraguagüdüni to tíchuguboun lóundarun Heowá woun. Akutiha waméi sun ariñahani luáguti abahüdaguni le waturiahabei. Áluaha wamá ariñahani hawagu gürigia, luagu burí fulasu luma burí le asuseredubei dandu lubaragiñe kei lárigiñe abahüdaguni le uágubei waliiha. Ani dan láfuachun abahüdaguni burí le lidan burí amu Ewanhéliu, góubaguagüda waméi háfuga  wadarirun ariñahani súdiniti le mabürüdün lubéi le aban abürühati.

14, 15. Ka lunbei wadügüni lun wíchuguni lidan wabagari abahüdaguni le lídanbei Ewanhéliu?

¹⁴ Le libiaman, adüga waméi le lariñagubei Ewanhéliu lidan wabagari (Huan 13:17). Lárigiñe haturiahan ani samina huguyame luagun abahüdaguni le lídanbei Ewanhéliu, álügüdagua humá hungua: “Ka nafurendeirubei lídangiñe abahüdaguni le? Ida lubá nayusuruni lun níderagun amu?”. Samina wamá hawagu somu gürigia ha gayaraabei wíderaguniña, danme le gachansin wamá, abahüdagua waméi houn le wafurendeirubei lau ínsiñehabuni.

¹⁵ Ariha wamá aban hénpulu ida lubá lan wíchuguni bián adundehani le lidan wabagari. Wakutihabei abahüdaguni tuáguti würi gudemetu to hilaaruboun ani weiriei to uáguboun layanuha Hesusu.

16. Afuranguagüda huméi le abahüdawagúbei lidan Márükosu 12:41.

¹⁶ Ru huma ibagari lun abahüdaguni (aliiha huméi Márükosu 12:41). Dirá waméi le asuseredubei wachüguagu. Weyu 11 lidan nisán irumu 33 lidaaniwagu Kristu. Fiúrügaali meha weyu lubaragiñe lounwe Hesusu, ani arufudahaali sun weyu ténpulurugu. Ani añaha hábutigu alidihatiña relihión ha mínsiñeti houn, óuchaguei. Añahein hádangiñe aba hálügüdaguni ka lan íchugubei ubafu lun lun ladügüni dasi le ladügübei añahein giñe amu aba hálügüdaguni lun hábürügüdüni tidoun sádara (Mar. 11:27-33; 12:13-34). Ábati lidin Hesusu lidan amu fulasu tidan ténpulu, másiñati lidan lan yadü le hani würiña. Ani gayaraati larihinu gafu dísegiñe to ñeinhin lubéi líchuguniwa seinsu. Aba lañuurun aríaguaña gürigia ha íchugubaña budagia. Arihati saragu rísitiña íchiga saragu seinsu. Másiñati yarafa lan lun gayara lan laganbuni lábürühan seinsu tidoun gafu.

17. Ka tadügübei würi gudemetu to uáguboun layanuhóua lidan Márükosu 12:42?

¹⁷ (Aliiha huméi Márükosu 12:42). Murusun lárigiñe, aba larihin Hesusu aban würi gudemetu to hilaaruboun ani weiriei (Luk. 21:2). Dereti lidin tun; ani chóuruti maseinsun tan lun tawinwandun. Lau sun lira, aba tayarafadun tun gafu, hamarugueina, aba tíchuguni bián gáwanaü le túmabei tidoun gafu, ani háfuga mareinchugubeiti. Ánheinti Hesusu subudi lumuti átiriñein lan tíchugun: bián lepütón, lidan meha dan ligía gáwanaü meha le lóuguati lebegi. Lóuguati meha lira, ni lun hagañeihóun harahüñü dunuru, dunuru ha maseruntimabaña ha meha álugurahoubaña lun heigín.

18. Según Márükosu 12:43, 44, ka lariñagubei Hesusu tuagu würi gudemetu to hilaaruboun ani weiriei?

¹⁸ (Aliiha huméi Márükosu 12:43, 44). Wéirigüda lumutu lanigi Hesusu le tadügübei würi gudemetu to. Aba lagúarun Hesusu houn lánigu disipulugu lubadu, aba lariñagun houn: “Gíbetima lan tíchugun würi to sügǘ hau sun ha íchugubaña seinsu tidoun gafu to”. Aba lafuranguagüdüni Hesusu houn: “Ladüga sun hagía, [gürigia ha rísibaña] lídangiñe le ígiragubei hama híchiga; anhoun tuguya, lau tugudemen ru tumuti sun le túmabei lun yebe tawinwandun”. Weyu le, tíchugunbalin würi úaraguatu to sun túmati, afiñetu luagu lóunigiruboun lan Heowá (Sal. 26:3).

19. Ka buiti wasagarubei lídangiñe le lariñagubei Hesusu tuagu würi gudemetu to hilaaruboun ani weiriei?

¹⁹ Winwan waméi sügǘ le lidan wabagari. Álügüdagua wamá woungua: “Ka gayaraabei nafurendeiruni lídangiñe le lariñagubei Hesusu tugua würi to hilaaruboun ani weiriei?”.  Samina wamá tuagu. Chouru wamuti, gúndaaboun lan hamuga lun tíchugun saragu lun Heowá. Lau sun lira, adüga tumuti sun tiyaraati lun tíchuguni le buídutimati lun Heowá. Subudi lumuti Hesusu le lan tíchugubei wéiriti lan lebegi lun Lúguchi. Arufudahati le aban puntu súdiniti woun: gunda lan Heowá dan le wíchuguni le buídutimabei lun (Mat. 22:37; Kol 3:23). Gúndaati dan le wadügüni sun wayaraati. Kei burí dan luma erei le wíchugubei lidan wáhuduragun lun, dan le wapurichihan luma dan le woudin adamuridagua.

20. Ida lubá wáyeihani le wafurendeirubei lídangiñe le waliihabei tuagu würi to hilaaruboun ani weiriei? Ru humá aban hénpulu.

²⁰ Ida lubá wáyeihani le wafurendeirubei lídangiñe le waliihabei tuagu würi to hilaaruboun ani weiriei? Samina wamá hawagu ítaga íbirigu lanügüba lan buiti houn luagu waritaguagüdüniña gunda lan Heowá luagu le hadügübei lidan heseriwidun lun. Kei hénpulu, subuditu san somu íbiri woun to derebuguharu ani sanditu ani sandiguatu tungua mahudunhaaru lan lidan teseriwidun kei meha, ladüga tisandi? O subuditi san somu íbiri woun le laubei aban sandi le gáfarahati ani hanarimeti ligari, ani híruti ladüga siñá lan lidin lidan sun wadamuridagun? Gayaraati wíderaguniña íbirigu ha lau wariñagun dimurei le ruti dǘgüdaguaü (Efe. 4:29). Abahüdaha wamá sügǘ buiti kei burí le wafurendeirubei tuagu würi gudemetu to hilaaruboun ani weiriei. Le wabahudahabei houn laritaguagüdübaña gunda lan Heowá dan le wadügüni sun wayaraati lidan weseriwidun lun (Ari. 15:23; 1 Tesa. 5:11). Dan le wariñagun houn amu buidu lan hadüga, luagu híchuguni le buídutimabei lun Heowá íbini genege lan houn lougua lan, wafalaruñein lugudárigi Hesusu.

21. Ka aranseñu wabéi lun wadügün?

²¹ Wéiriti wagundan darí wamá saragu ariñahani luáguti libagari Hesusu lidan Ewanhéliu lun gayaraabei lan wafalaruni. Ma buídubei hamuga lun waturiaha wábuguarügü o hadan iduheñu luagu Ewanhéliu? Lun wasagarun saragu buiti lídangiñe, gasu wíchugun ibagari lun sügǘ le waliihabei luma lun wawinwanduni lidan wabagari. Amu luéi wáyeihani le ladügübei Hesusu, súdiniti giñe lun waganbuni le lariñagubei. Lidan leweñegua aturiahani, wakutihaba ka lan gayaraabei wafurendeiruni lúmagiñe Hesusu dan le luáguñein lan wagabu.