Ma lirun, dan le aweirideina nubéi aba eferidireina lan numadagua luma Heowá. Genegeti meha nun hadügüñein lan meha nupaanágu leskuelarugu le habusenrun ani busentina meha giñe nadügüni ligiaméme. Sanditina meha deregüdaya lan halurudun nagübürigu luma le tariñagubei Bíbülia, ábati narihini neseriwidun lun Bungiu kei aban ihürügu, íbini meha chouru nani anihein lan Bungiu, aba nagumeserun asandira mahuu lan numadagua luma Bungiu.

Mígirun numuti napurichihan, gama lumoun, murusunrügüñein meha nadüga lidan nani ministeriu lúnrügü narihín. Maranseruntina meha lubaragiñe náfuridun apurichiha, ligía méhati hénrengu lubéi nun nayanuhan hama gürigia. Ladüga lira, úatiña meha gürigia úntiña níchiga aturiahani ani manügünti meha apurichihani ugundani nun, adügati lira lúntima laminsiñedun dasi le nun. Álügüdaguatina meha nungua: “Ida luba san ladügüni aban gürigia le sagü dimaasu luma sagü hati?”.

Dan le nagunfulirubei 17 irumu, busenhadina meha lun nungua nan. Ligíati aba napakühanu nílagu, aba náguyun Australioun. Aba meha hadiheridun  nagübürigu, lau sun lira, afiñetiña meha nasigiruba lan lidan numadagua luma Bungiu.

Aribadeina liña meha numadagua luma Heowá Australia. Libe-agei dan mídintina meha adamuridagua ani aba meha nóundaragun hama amu nibureintiña ha ítarabaña kei nuguya, aban weyu ñǘdüntiwa adamuridagua ani larugan ñǘdüntiwa abinaha luma átagua. Ábati níchugun fe anihein lan meha aban nugudi lidan inarüni le aban bóugudi, gama lumoun sanditina meha tidan nanigi ua nan lidan ni aban lídangiñe.

Kei burí bián irumu lárigiñe aba nasubudirun aban íbiri, sin tíchugun fe adügatu lun nasaminarun ka lan nadügübei lau nibagari. Hama meha 5 íbirigu hiñaruñu neredera, ani aba wamisurahani óunigiruti sirkuitu tuma lani weiriou, to gíriboun Tamara, eredera wábiñe luagu aban dimaasu. Sun anihán lan íbiri etenira lun lidasin le lánina damuriguaü, sügütu Tamara dan wama ani éherahatiwa saragu. Hínsiñeti meha katei le nun. Magurabuntina yebe gayara lan gunda tan aban gürigia to gamadaguatu luma Bungiu ani ǘnabugu tuguya.

Hínsiñeti meha inarüni tun Tamara luma tani ministeriu darí lun ladügün ubebeni le tuagubei lun wáyeihanu. Gúndaatu meha lau tíchuguni le buídutimabei tuma lun Heowá, lidan anahán lan lau magundani adüga murusun. Adügati lubuidun tigaburi luma tugundan lun nasaminarun nuougua. Adügati tani hénpulu lun naritagun aban inarüni súdiniti: Busenti Heowá lun weseriwidun sun wagía lun “lau ugundani” (Sal. 100:2).

Busentina meha nasandiruni ugundani libe le tasandirubei Tamara, lun lira, mosu meha nadügün fiu asansiruni le súdiniti. Barüti lira meha dan, lidan lagumuhóun aba nagumeserun adüga fiu sánsiguaü. Aba nagumeserun aransera lubá apurichihani ani anihein meha dan seriwitina kei prekursora ídehatu. Íderagua lumutina katei le lun madadagarun nan saragu lidan apurichihani luma lun nasandiragun nungua chóuruñu. Kei yusu nubaroun Bíbülia súnwandan, gúndaati nasandiragun nungua. Málüti luéigiñe, aba nagumeserun eseriwida kei prekursora ídehatu sagü hati.

Aba nagumeserun gamadagua hama íbirigu ha  ámuñegueinarügüti harumudiri, buidu ligía hamadagua luma Bungiu ani gunda hagía lidan heseriwidun lun. Íderagua lumutina lubuidun hani hénpulu lun nasaminarun ka lan súdinitimabei nun lidan nibagari luma lun buídutima lan naturiahan. Eibu dan, aba gúndaatima nan lidan napurichihan ani lagumuhóun aba neseriwidun kei prekursora ha adügütiña 70 oura luagu hati. Anihán meha furumiñeti wéiyaasu le ídanbei gunda lan nasandiragua nungua luma giñe lidan damuriguaü.

Irumu lárigiñe, aba nasubudiruni Alex, aban íbiri le hínsiñeti Heowá lun hínsiñe ligía apurichihani lun. Leseriwiduña meha kei ídehati lidan damuriguaü ani barühali meha 6 irumu eseriwida kei prekursoru. Ñǘdünhali meha giñe apurichiha luagu fiu hati Malaui, le ñein lubéi mégeiwa hamá apurichihatiña. Ñein lásügüra dan hama fiu misionérugu ha íchugubaña aban buiti hénpulu lun ínchaha haméi lun láluahani Larúeihan Bungiu furumiñe.

Lidan irumu 2003, aba namarieidun luma Alex, biángubei wagía weseriwiduña lidan dan dayarüti. Furendeihadiwa saragu katei gebegiti ani biní láadiwa giñe Heowá saragu lidan ámuñegueinarügü igaburi.

Lidan irumu 2009, aba wagunbirahóun eseriwida kei misionéru Timor Oriental, aban liraüraü ageiraü le yarafabei lun Indonésia. Wéiritu meha wanigi wounahóua lan ñeinhin ani sanditiwa anufudei. Seingü hati lárigiñe, aba wachülürün Dili, uburugu le lichügüdina ageiraü.

Mosu meha wéchudun luagu saragu katei le iseriti woun: échuni, iñeñein, éigini luma ligaburi hawinwandun gürigia. Lidan wapurichihan, gabügürüguati meha wadarirun gürigia ha gudemetiña, ha lóuguati haleskuelan hama ha amudirawagutiña. Ani aba wasubudirun saragu gürigia ha súfurihaña ladüga wuribu luma anarimeni. *

 Buiti meha apurichihani ñein! Aban weyu, aba wadarirun aban irahü to 13 irumu tau, gíritu María, lauñoun meha saragu íruni. * Sügühali meha fiu irumu lúmagiñe tounwen túguchu ani lóuguati meha giñe tarihini túguchi. Ítara kei saragu irahüñü, ibidiñeti meha tun María kaba lan asusereda lidan tibagari. Haritagua nágili tabahüdahan nun luagu aban dan ayahuaheina ida liña lan tasandiragun tungua. Úati meha gunfuranda nani le tariñagubei, lugundun mayanuhan nágili meha tererun buidu. Aba nadügün aban furíei lun Heowá, amuriaha nuguya luma lun líderagunina íchiga dǘgüdaguaü tun. Aba naliihan fiu bérusu tídangiñe Bíbülia lun níchugun dǘgüdaguaü tun. Lau lásügürün dan, arihatina ida liña lan lasansiruni inarüni tigaburi, tibagari luma ligaburi taríawagun María. Aba tabadiseirún, ani guenlé, tíchuguña aturiahani tídangiñeti Bíbülia. Gíbetimahaña tiduheñu guenlé lidan sun ubóu ani sandiguatu tungua hínsiñewa tan.

Chóuruti labiniruñein lan Heowá apurichihani Timor Oriental. Íbini badisei hamá hiibe-agei apurichihatiña lidan lagumuhóun diisi irumu le, saragu hádangiñe heseriwiduña kei prekursorugu, ídehatiña lidan damuriguaü o kei wéiyaaña lidan afiñeni. Añahein hádangiñe heseriwiduña tidan áfisi le ñein lubéi lásügüragüdüwa ariñahani lidoun iñeñein le ayanuhóubei lidan fulasu. Barüti meha saragu ugundani nun narihiniña eremuha lidan adamuridaguni, narihini háhayachun luma narihini lawanserun hamadagua luma Bungiu.

Ámuti meha ibagari Timor Oriental luéi Australia. Lau sun lira, masandibadina hamuga aban ugundani ítarati lidan amu fulasu. Anihein dan, dinatiwa tidan aban tiraüraü ugunei buin hau gürigia ha agañeihabaña úduraü salei luma bandi éigini mágidurugugiñe. Anihein giñe dan, rútiwa aturiahani tídangiñeti Bíbülia tidan tirahüñü muna to múa turageirugu ani le ñein lubéi hanarime lan lárouga, hámati gayu éibaaguañahan pátiurugu. Íbini lidan saragu lénrengunga, anihein burí dan saminatina: “Mafiñengidina anahán lan ya!”.

Dan le nasaminarun luagu dan le sügühalibei, rútina seremei luagu áfaaguni le hadügübei nagübürigu lun harufudahan nun luagu Heowá luma luagu híderaguniwa íbini lidan aweirideina nan. Gúnfuliti dimurei le lídanbei Ariñawagúni 22:6 lidan nikesin. Gúndaati núguchi tuma núguchu nau luma lau Alex. Ma hagundan harihini ida liña lan layusuruniwa Heowá. Lúmagiñe irumu 2016, weseriwiduña lidan lóunigirun sirkuitu lidan ageiraü le uágubei tariha sukursáli to Australasiaboun.

Mafiñengidina ariha nani meha apurichihani kei aba ihürügün ani guenlé, hínsiñehali apurichihani nun! Rúhadina fe ugundani lan le inarüniti ñǘbuinla lídangiñe weseriwidun lun Heowá tídangiñe sun wanigi, meberesenga ka lan waturobulinbei lidan wabagari. Lagumuhóun 18 irumu le naubei eseriwida lun Heowá lóubawagu Alex, ligíatima íchugubei saragu ugundani nun lidan nibagari. Guenlé ariha naali linarün lan Dawidi dan le lariñagunbei lun Heowá: “Gunda hamá ha hemenigibaña buagu, eremuha hamá lau ugundani súnwandan [...]. Badüga gúndaahabei ha hínsiñehabubaña bun” (Sal. 5:11).