1. Ka larihibei Heowá dan le letenirun houn lumutuniña?

MA WAGUNDAN wasubudiruni gunda lan Heowá “hau lumutuniña”! (Sal. 149:4). Ariha lumuti lubuidun wagaburi, le wayaraabei adüga ani gamadaguati wama. Ánhawa úaragua lun, lerederuba warugabu śunwandan (Huan 6:44).

2. Ka uagu añahein lubéi hádangiñe íbirigu hénrenguti houn hafiñerun hínsiñe hamá lun Heowá?

² Másiñati lariñagun somu gürigia: “Subudi numuti hínsiñe hamá sun lumutuniña Heowá lun, gama lumoun, ida luba nasubudiruni anhein hínsiñe nubéi lun?”. Ka uagu añahein lubéi íbirigu adüga hamuti álügüdahani le? Ariha waméi le tariñagubei Oksana, * to meha hénrengubei tibagari lidan tiñüraü: “Gúndaatina meha dan le nabadiseirunbei ani adügagua nuguya nungua prekursora. Lau sun lira, 15 irumu lárigiñe aba liabin nichügüwagun binadu luriban sügǘ le meha nawinwandubei. Aba nagumeserun asaminara magundali lan Heowá nau ani madüna nan lun hínsiñe nan lun”. Abahüdahatu aban prekursora gíritu Yua to wuribabei giñe lidin tun lidan tiñüraü: “Derege numuti nibagari lun Heowá ladüga busén nan nagundaaragüdüni, íbini ítara chouru numuti meha maweiyasunbei lan asandira ínsiñeni nuagu”.

3. Kaba álügüdahani wóunaba lidan aturiahani le?

³ Ítara kei bián íbirigu úaraguatiña ha hínsiñeti Heowá woun saragu, gama lumoun másiñati hénrenguti lan woun wafiñerun hínsiñe wamá lun. Lidan aturiahani le wóunabubei bián álügüdahani  le: ka uagu lunti lubéi wachoururuni hínsiñe wamá lun Heowá? ani kaba wadüga danme le liábingua saminaü mabuidunti wachügüwagu?

4. Ka uagu dencha lubéi machourun wamá luagu línsiñehabu Heowá?

⁴ Anhein chouru wabalin luagu hínsiñe wamá lun Heowá, línchahabadiwa katei le lun wíchuguni le buídutimabei wámagiñegua lun, meberesenga turobuli le úmabei wagagibudagua lidan wabagari. Gama lumoun, ánhawa machourun luagu línsiñehabu lalouguaduba were (Ari. 24:10). Anhein ábürüha warüna ani gumese wagía afiñera mínsiñe wamá lun Heowá, mérebadiwa danme le labürühan Satanási wawagu (Efe. 6:16).

5. Ka asuseredubei houn fiu íbirigu ha machourunbalin línsiñehabu Bungiu?

⁵ Añahein kristiánugu ha úaraguatiña gumeseeña asandira machouruni luagu berese lan Heowá hau, adügati katei le lun ledebilidun hafiñen. Ariñagati aban wéiyaali lidan afiñeni gíriti James: “Íbini leseriwiduña lan meha Betelirugu ani apurichiha au lidan aban damuriguaü le ñein lubéi layanuhóua amu iñeñein, aba meha nálügüdagun nungua anhein gunda lubéi Heowá lau áfaaguni le nadügübei. Chülüti dan aba machourun nan anhein laganbuñein lubéi nafurieidun”. Ariñagatu giñe Eva, íbiri to eseriwiduboun lidan dan dayarüti: “Aba níchugun fe dencha lan machouruni luagu línsiñehabu Heowá lugundun adügati katei le lun mabuseerun ban lun badügün somu katei luagu luma lun leferidirun ugundani lidan beseriwidun lun”. Ani ariñagati Michael, aban prekursoru ani wéiyaali lidan afiñeni: “Anhein mafiñen bubéi berese lan Bungiu bau, badiseduña luéi murusun murusun”.

6. Ka gayaraabei wadügüni danme liábingua luriban saminaü mabuidunti wachügüwagu?

⁶ Yanu burí libe le íderagua lumutiwa gunfurandei ka lan uagu dencha lubéi lasandirun gürigia machouruni luagu línsiñehabu Bungiu. Kaba wadüga danme liabin saminaü mabuidunti wachügüwagu? Wasagaruni lau lóufudagun. Amuriaha wamá luma Heowá lun líchugun darangilaü woun luma lun lóunigirunu wanigi luma wasaminan lun gayara lan wesefurun luéi saminaü mabuidunti (Sal. 139:23; Fili. 4:6, 7). Ani mabulieida waméi añahein lan hádangiñe kristiánugu úaraguatiña hageindaguña giñe luma luriban saminaü ítara kei huguya.  Añahein meha giñe lubúeingu Heowá ha lánina binadu dan sandiguatiña meha houngua ítara. Ariha waméi le gayaraabei wafurendeirun lúmagiñe apostolu Pábulu.

7. Ka meha liturobulinbei Pábulu?

⁷ Gíbeti san katei lunti wadügüni darí lun wasandirun siñá lan wadügüni súngubei? Ítara liña meha lasandiragun apostolu Pábulu lungua. Ariñagati nidiheri lan mámarügü luagu aban damuriguaü, nidiheriti hawagun lílana sun damuriguaü (2 Ko. 11:23-28). Wasufuriruña san ladüga aban sandi le mareidaguaditi le agidarubalin wagundan? Ibidiñeti meha lun Pábulu kaba lan ladüga, ladüga siñá lani hiiyu le charuñubei luagu agidara másiñati aban lan sandi luágubei (2 Ko. 12:7-10). Ábürühati san warüna ladüga chará wamá? Anihein meha giñe dan ítara liña meha lasandiragun Pábulu lungua. Ariñagati fugiabu lan ligía ladüga sun dan lau ageindagua lun ladügüni le richabei (Rom. 7:21-24).

8. Ka íderagubalin Pábulu asigira eseriwida lun Heowá laganagua lénrengunga?

⁸ Íbini laganagua saragu óuchawaguni luma lénrengunga, sigiti Pábulu eseriwida lun Heowá. Halíagiñe lasagara erei? Íbini subudi lani chará lan, anihein meha aban afiñeni luagu esefuruni lidan le mahalachaguaditi. Lau sun lira subudi lumuti meha le füramase lubéi Hesusu “sun lan ha afiñerutiña luagu, meferidirun hamaamuga, gabagarirügü hamaamuga aban ibagari le magumuchaditi” (Huan 3:16; Rom. 6:23). Chóuruti afiñe lan meha Pábulu luagu esefuruni. Chouru lumuti meha aranseñu liña lan Heowá lun feruduna lániña íbini ha adügübaña aban figóu le wéiriti ánhaña asaküriha (Sal. 86:5).

9. Ka larufudubei dimurei le lariñagubei Pábulu lidan Galasiana 2:20?

⁹ Afiñeti meha Pábulu hínsiñe lan lun Bungiu saragu ladüga óunaha lani Hesusu ounwe luagu. Teni wamá lun lubuidun dimurei le íchuguti dǘgüdaguaü le wadarirubei lidan lagumuchagüle Galasiana 2:20 (aliiha huméi). Ariñagati Pábulu: “Liráü Bungiu le hínsiñehabubei nun, aba lederegeragun lungua lun lounwen nuagu”. Masaminarunti Pábulu gébeha lan ínsiñeni le lasandirubei Bungiu luagu, kamá hamuga lariñaguña: “Gunfuranda numuti hínsiñe hamá sun níbirigu lun Heowá, gama lumoun siñati nínsiñedun lun”. Aba laritaguagüdüniña Rómana: “Arufuda lumuti lueirin línsiñehabu woun lau lóunahani Hesukrístu lun lounwen wawagu, lau sun meha gafigoungidiwa lan” (Rom. 5:8). Mébehati línsiñehabu Bungiu.

10. Ka larufudahabei Rómana 8:38, 39 woun?

 ¹⁰ (Aliiha huméi Rómana 8:38, 39). Chouru lumuti meha Pábulu buidu buidu gabafu lan línsiñehabu Bungiu. Abürühati: “Ua lan ni kata lun lafanreinraguniwa luéi línsiñehabu Bungiu”. Subudi lumuti meha gaguraasun lan Heowá habá ísüraelina. Subudi lumuti giñe arufuda lan Heowá gudemehabu lun. Lidan murusun dimurei, lariñaguña Pábulu: “Anhein óunaha lubalin Heowá Lisaani lun lounwen nuagu, mébunati lun machourun nan hínsiñe nan lun Heowá” (Rom. 8:32).

11. Íbini adüga lan meha Pábulu figóu kei burí le íridubei lidan 1 Timotéu 1:12, 14, 15, ka uagu chouru lubalin hínsiñe lan lun Bungiu?

¹¹ (Aliiha huméi 1 Timotéu 1:12, 14, 15). Chóuruti sandigua lan meha Pábulu lungua wuriba luagu duru le meha ladügübei lidan dan le sügühalibei. Ariñagati ligía lan gafigoutimabei. Lubaragiñe meha lafurendeiruni inarüni éibaaha lumutiña kristiánugu lau furundei lidan saragu uburugu ani dagua laaña hádangiñe furisunrugu ani ídeha ligía lidan háfarun ha híbiri (Adü. 26:10, 11). Samina wamá luagu lídehan lun háfarun aban feru maríeitiña kristiánugu ani guentó aba lasubudiruni hasaani. Ida liña lasandiragun Pábulu lungua? Sarí lumuti meha le ladügübei lidan dan le sügühalibei, lau sun lira siñá ladügün ni kata lun lasansiruni. Lau ichouruni aba labürühan, hilá lan Kristu luagu, ani ariñagati: “Gama lumoun, ítara nubéi guentó lugundun areidati Bungiu numa” (1 Ko. 15:3, 10). Ka wafurendeirubei? Lunti wafiñerun hilá lan Kristu luagu kada aban wádangiñe ani ítara liña ladügün lun gamadagua wamá luma Bungiu (Adü. 3:19). Le gebegibei lun Bungiu le wadügübei guentó luma le lunbei wadügüni ámuñegü, mama charati le adüga wamaalibei lidan dan le sügühalibei, meberesenga anhein gefentiña lubéi luagu Heowá dan ligía o mama wamá gefentiña (Isa. 1:18).

12. Según 1 Huan 3:19, 20, ka lunbei wadügüni ánhawa asandira mebegi wamá lun ni kata o madüna wamá lun hínsiñewa wamá?

 ¹² Anihein dan gayaraati teyeeduniwa wanigi lau tadügün lun wasandiragun woungua mebegi wamá lun ni kata o lun wasandiragun woungua madüna wamá lun hínsiñewa wamá (aliiha huméi 1 Huan 3:19, 20). Másiñati wasaminarun ua lan buídurügü lan lani Hesusu sákürifisiu lun ferudunawa lan wafigoun. Danme le wasandiragun woungua ítara, aritagua waméi “weiri lan Bungiu sügǘ tuéi wanigi”. Íbini wasandiragun woungua kamá hamuga mínsiñetiwa lun Wáguchi Bungiu le siélubei ani sandigua wagía woungua kamá hamuga úabei feruduna lániwa, le linarün katei, hínsiñetiwa lun ani feruduna lumuti wachara. Lunti giñe wádaruni saminaü le tidoun wanigi lun gayara lan tánharun lun. Lun wibihini mosu waturiahanu Lererun Bungiu sagü weyu, wafurieidun súnwandan luma lun wásügürün dan hama wíbirigu. Ariha waméi ka lan uagu súdini lubéi ǘrüwa katei le.

13. Ida liña líderaguniwa waturiahanu Lererun Bungiu? (Ariha huméi rekuáduru “ Ida liña tíderaguniwa Lererun Bungiu”).

¹³ Waturiahanu Lererun Bungiu sagü weyu. Ánhawa adügei, wasubudirubei lubuidun ligaburi Heowá ani wíchuguba fe luagu hínsiñe wamá lun saragu. Líderagubadiwa wararamagun asaminara sagü weyu luagu le tariñagubei Bíbülia lun furangu lan wasaminarun luma lun ladügün lun wígiruni katei le mabuidunbei (2 Tim. 3:16). Ariñagati aban wéiyaali lidan afiñeni gíriti Kevin, le ageindagubei luma saminaü mabuidunti: “Íderagua lumutina naliihani Sálumu 103 luma nararamagun asaminara luagu, lun narihini katei kei lubéi, luma lun gunfuranda nani le lasaminarubei Heowá nuagu”. Ariñagatu Eva, to buga uáguboun wayanuhan lidan párafu 5: “Dan le lagumuchun weyu, díreitina murusun dan lun nararamagun asaminara lau darangilaü ida liña lan larihini Heowá katei. Ruti katei le darangilaü tun nanigi ani derebugüda lumuti nafiñen”.

14. Ida liña líderaguniwa furíei?

¹⁴ Furíei wamá súnwandan (1 Tesa. 5:17). Layanuhóun súnwandan ani furangu, ligía lébunabei aban umadaguaü buiti ani inarüniti lidan wamadagua luma Heowá. Dan wabahüdahani lun Heowá le wasandirubei, le wasaminarubei luma le adiheridagüdübaliwa, warufuduñein afiñe wamá luagu ani subudi lan woun hínsiñe wamá lun (Sal. 94:17-19; 1 Huan 5:14, 15). Abahüdahatu Yua to uáguboun wayanuhan lidan libiaman párafu: “Dan le nafurieidun, áfaaguatina lun nabahüdahani lun Heowá le nadügübei lidan weyu ligía. Aba nadararunu nanigi lun ábati nabahüdahani sun le nasandirubei. Lubaragiñe narihini Heowá kamá hamuga tábuti aban kónpeni, murusun murusun aba nafurendeirun arihei kei aban  Úguchili le hínsiñetiña Lisaanigu lun” (Ariha huméi rekuáduru “ Aliiha humaaru san?”).

15. Ida liña larufuduni Heowá berese lan lau kada aban wádangiñe?

¹⁵ Wásügürün dan hama wíbirigu. Aba idewesei hagía lúmagiñe Heowá (Sant. 1:17). Arufuda lumuti Wáguchi Bungiu le siélubei berese lan lau kada aban wádangiñe lau líchugun íbirigu woun ha ítarabaña kei iduheñu ani hínsiñetiwa houn (Ari. 17:17). Íridati Pábulu fiu kristiánugu tidan ligaradan houn kolosana ha meha íderagubalin ani ariñagati hawagu aba lan hayabin lun “kei aban óunwenbu dǘgüdaguaü” (Kol. 4:10, 11). Mégeiti meha giñe Hesukrístu ídemuei ani ruti meha seremei luagu leresibiruni dandu hámagiñe lumadagu, hámagiñe ánheligu ítara kei hámagiñe gürigia (Luk. 22:28, 43).

16. Ida luba híderaguniwa wíbirigu lun wayarafadun lun Heowá?

¹⁶ Áluaha wamuti san hídeha wíbirigu ha lídanbaña damuriguaü ani anha wagía lun? Wabahüdahani le adiheridagüdübaliwa lun aban íbiri mama aba seini lánina débili lira, gayaraati ladaüragun katei lira wau. Samina wamá luagu le lariñagubei James, le uágubei wayanuhan lidan párafu 5: “Aba salufu nun gamadagua nan hama kristiánugu ha derebuguti hafiñen. Aganba hamutina umadagu hínsiñewatiña ha lau gurasu dan le lebelurun luriban saminaü nichügüwagu, ani haritaguagüda hamutina giñe hínsiñe nan houn. Hámagiñe nasandirei hínsiñe nan lun Heowá ani nidiheri lan nuagu”. Súdiniti lun gamadagua wamá ha buítiña, lidan damuriguaü!

17, 18. Kaba un gaganbadi wamá, ani ka uagu?

¹⁷ Busenti Satanási lun lábürühan warüna luma lun wígiruni ladügǘn le buídubei. Busenti lun wasaminarun mínsiñe wamá lun Heowá ani marihin lániwa buidu wamá lun gayara lan lasalbaruniwa. Gama lumoun, kei le aubei warihei, iyeeni le lariñagubei Satanási.

¹⁸ Hínsiñetiwa lun Heowá ani gebegitiña kada aban hádangiñe lubúeingu lun. Ánhawa gaganbadi lun, súnwandan werederuba lan lidan línsiñehabu, ítara kei meha lerederun Hesusu (Huan 15:10). Ligíati madüga wamá gasu tau wanigi ni lau Satanási dan le lálugun lun wasaminarun mínsiñe wamá lun Heowá. Lubaragiñe lira adüga wamá gasu lau Heowá, Bungiu le etenirubei lun katei buiti le luágubei kada aban wádangiñe. Chouru waméi gúndaati lan “hau lumutuniña”.