ABAHÜDAGUNI LUÁGUTI IBAGARI
Ábanhali abiniruni nawadigimaridun hama wügüriña ha hínsiñeti Bungiu houn
LAMIDANGUOUN burí irumu 1930, aba háguyun nagübürigu —James tuma Jessie Sinclair— uburugun Bronx, Newayoru. Ñein hasubudirei Willie Sneddon, le achülürübei Eskosiagiñe, kei hagía. Murusun oura lárigiñe hasubudiragun houngua, aba hagumeserun ayanuha hawagu haduheñu. Susereti katei le fiú irumu lubaragiñe nasirua nan.
Aba tabahüdahani núguchu lun Willie aba lan lañaradagun túguchi luma tati lidan barana le luágunbei nórute lubaragiñe Óunwenbu Wuribu. Tídanñanu meha aban waporu lánina óuchahani, aba tabuguchun waporu tuguya tuagu aban bonba. Aba lariñagun Willie tun: “Anihein búguchi máfiougati”. Gefenti meha luagu Heowá Willie, ani lidan igaburi le tasubudirei núguchu inarüni.
Willie tuma Liz Sneddon
Mínsiñeti meha dimurei burí ligía tun núguchu, ladüga subudi tumuti aban lan meha wügüri buiti túguchi. Ábayati lariñagun Willie: “Hasandiraguña hamuga san hungua buidu ánhana ariñaga hun ñüdün lan giñe Hesusu máfiougatin?”. Aba taritagun núguchu luagun le arufudahóubei tidan tiligilisin, luagu ñüdün lan Kristu máfiougatin ani aba lan lásaarun lidan lǘrüwan weyu. Ligía aba lubéi tálügüdagun tungua ka lan funa uagu lidin Hesusu lidoun aban fulasu le ñein lubéi hasufuriragüdüwa wuribatiña lidan watu gemeti. Katei ligía adügübei lun busén tan núguchu tasubudiruni inarüni. Aba tagumeserun adamuridagua lidan damuriguaü le ñeinbei Bronx ani aba tabadiseirun lidan irumu 1940.
Tuma núguchu ani saragu irumu lárigiñe, luma núguchi
Lidan dan ligía mariñawagúnti meha furangu luagu mosu lan haturiahanu agübürigu Bíbülia hama hasaanigu. Dan meha le ñǘraügidina, aba meha letenirun núguchi nun dan le anungura lan núguchu adamuridagua luma apurichiha samudi luma dimaasu. Fiú irumu lárigiñe, aba giñe labasihan núguchi numa adamuridagua úara tuma núguchu. Apurichihatu meha núguchu saragu ani gíbetiña meha gürigia úntiña tíchiga aturiahani. Anihein meha aban dan aturiaha hamá fiú gürigia úara ladüga lidan lan ligiaméme fulasu hawinwanda. Dan le meha lidaani bakechanu leskuelarugu, aba meha nidin tuma núguchu apurichiha. Ítara liña nafurendeirun saragu tuagu Bíbülia luma ida luba lan narufudahani uganu buiti houn gürigia.
Ruti busiganu nun nariñaguni, gama lumoun, dan le meha ñǘraügidina, lóuguati meha línsiñe inarüni nun. Úati meha súdini lan nun. Gama lumoun, dan le 12 lubéi irumu nau aba niridún kei apurichihati, ani lúmagiñe dan ligía mígirun nágili napurichihan. Dan le 16 lubéi irumu nau, aba nederegeragun nungua lun Heowá. Aba
nabadiseirun 24 lidan sedü-hati lidan irumu 1954 lidan aban adamurini Toronto (Kanadá).NUADIGIMARI BETELIRUGU
Fiú hádangiñe íbirigu ha lídanbaña wani damuriguaü heseriwiduña meha o seriwiñahaña Betelirugu. Wéiriti meha hani efekütu nuagu. Hínsiñeti meha ligaburi hayanuhan hagibugiñe gürigia nun luma ligaburi hafuranguagüdüni inarüni le tídanbei Bíbülia. Íbini busén hamá meha numaisturungu lun nidin tidan luban furendei íñuti, busentina meha neseriwidun Betelirugu. Ligía aba lubéi nabuinchagüdünu dugumedu lun nesewidun Betelirugu lidan adamurini ligía Toronto. Ani buíngüdaya numutu lidan irumu le asigirubei lidan adamurini le adügǘbei lidan táhureragüle bali le gíribei Yankees, Newayoru. Murusun dan lárigiñe, dan le 17 lubéi irumu nau, aba nagunbirahóun lun nagumeserun nadagimein Betelirugu Brooklyn 19 lidan nefu-hati lidan irumu 1955. Lidan libiaman weyu nau Betelirugu, aba nidin lidan fulasu le ñein lubéi lafidirawagua tubana líburu, to lídanboun üma Adams númeru 117. Ñeinba meha nawadigimarida. Murusun dan lárigiñe, aba nagumeserun ayusura aban máhina to óundaraguboun 32 páhina lidan aban, lun tásügüragüdüni tidoun máhina to áhüchagubalin tubana líburu.
Lau 17 irumu, dan le nagumeserunbei eseriwida Betelirugu Brooklyn
Lárigiñe aban hati nau nadagimein lidan láhüchawagun tubana líburu, aba nóunahoun lidoun Departamentu le ñein lubéi tapakühóua garüdia to burí hamuriahaboun gürigia ladüga gabürühadi nan lau máhina. Lidan dan ligía, añahein meha íbirigu wügüriña hama würiña ha abürühabalin fulasu le ñein lubéi heredera iseri gürigia ha amuriahabarun garüdia La Atalaya tuma ¡Despertad! Fiú hati lárigiñe, aba nidin lidoun Departamentu lánina tóunahoun agumeiraguagüdüni. Aba lálügüdünina íbiri Klaus Jensen, le arihibei lau departamentu ligía, anhein busén nubéi níderaguni íbiri le anügübarun gafu tau agumeiraguagüdüni luagun wafu lun tóunahoun lidoun amu burí ageiraü. Mosu meha giñe tanügǘn sagü burí tau garüdia to luntu damuriguaü le Merigabei tidoun
áfisi tani koréu. Aba lariñagun íbiri Jensen buídubei lan léiguadun wadagimanu dǘgüdati nun, ladüga wéiriti meha nidurei. San-wein-seingü meha líburu nihürü. Adügati meha wéiyaasu burí ligía luagun wafu luma tidoun áfisi tani koréu lun héretima nan. Linarün meha íbiri Jensen.Téniti meha giñe Departamentu le ñein lubéi tapakühóua garüdia to burí hamuriahaboun gürigia lun tóunahoun sun garüdia to lamuriahaboun damuriguaü. Ítara liña meha nasubudiruni liri saragu iñeñein le ídanbei imprimírua tan wani garüdia Brooklyn. Maganbungidina meha layanuhóun luagu saragu lídangiñe, gama lumoun, gúndaatina meha lau nasubudiruni óunahoua tan saragu milu garüdia lidoun fulasu burí le díseti ubouagu. Lidan dan ligía, masaminaruntina meha luagu nibihibei lan chansi lun nabisidahan saragu lídangiñe fulasu ligía saragu irumu lárigiñe.
Luma Robert Wallen, Charles Molohan luma Don Adams
Lidan irumu 1961 aba nóunahoun nadagimein ñein lubéi larihíwa lau seinsu, ani íbiri meha Grant Suiter arihibei lau wadagimanu ligía. Fiú irumu lárigiñe, aba lamuriahóun numa lun nidin tidan lani íbiri Nathan Knorr áfisi, le meha arihibei lau tuadigimari lóundarun Heowá lidan dan ligía. Aba lariñagun íbiri Knorr nun láfuriduba lan aban hádangiñe íbirigu ha nadagimeinbaña luma luagu aban hati lun lidin tidan Leskuela houn Wéiyaaña hama Ídehatiña, ani danme lan lagiribudun ábame lawadigimaridun lidan Departamentu lánina Eseriwiduni. Aba lariñagun nun lun nárügüdüni lubara íbiri ligía ani lun nawadigimaridun luma íbiri Don Adams. Ligía meha íbiri le eresibirubarun nigaradan lun neseriwidun Betelirugu lidan adamurini lidan irumu 1955. Dan le nachülürünbei ñeinhin, añaheinhaña meha bián íbirigu ñein Robert Wallen luma Charles Molohan. Nadagimeintiwa meha gádürügubei wagía úara lóugiñe 50 irumu. Gúndaatina lau neseriwidun hama íbirigu úaraguatiña ani hínsiñehabutiña lun Bungiu (Sal. 133:1).
Benesuela lidan furumiñeti nabisidahan aban sukursáli (1970)
Lidan irumu 1970 aba nibihin aban iseri wadagimanu: sagü aban o bián irumu mosu meha nadügün aban wéiyaasu luagu saragu dimaasu
lun nabisidahan ámuñegueinarügü sukursáli tani Watch Tower Society. Adügǘwati meha wéiyaasu ligía lun lichugún gurasu tídangiñeti Bíbülia houn íbirigu ha eseriwidubaña Betelirugu, houn misionerugu luma lun takutihóun dugumedu to tídanboun kada sukursáli. Gachansintina meha lun nasubudirun íbirigu ha ñǘdünbaña tidan furumiñetu burí külase tidan Galaadü ani saragu irumu lárigiñe añaheingua eseriwida lau úaraguni lidan ageiraü le ñeinhin lubéi hounahóua. Abisidahaadina lóugiñe 90 ageiraü adügei wadagimanu le. Aban chansi le wéiriti lubuidun.Gúndaatina lau nabisidahaniña íbirigu lidan lóugiñe 90 ageiraü
NADARIRUN ABAN NANI PAANÁ TO ÚARAGUATU
Wagía le eseriwidubei tidan Beteli Brooklyn, aba meha wóunahoun lidoun damuriguaü le burí lídanbei uburugu Newayoru, ani au óunahouatina lidoun aban damuriguaü Bronx. Wéirihali meha furumiñeti damuriguaü le ñeinbei Bronx ani mosu meha lafanreinrawagun. Aba nerederun lidan damuriguaü le gíribei Upper Bronx.
Lamidoun irumu 1960, añahein meha fiú iduheñu Letoniana ha asubudirubalin inarüni luagun suru Bronx, aba háguyun yarafa lun wani damuriguaü. Aba teseriwidun Livija, hasaani to íbugañaü, keisi prekursora dan le tagumuchunbalin tileskuelan. Fiú hati lárigiñe, aba tidin eseriwida Massachusetts lidan aban fulasu le ñein lubéi mégeiwa hamá hanwoun apurichihatiña. Aba burí meha nabürühan tun lun níchugun ñunsu tun luagu damuriguaü, ani aba giñe tabahüdahan nun luagu lubuidun lidin tun lidan tapurichihan Boston.
Tuma Livija
Fiú irumu lárigiñe, aba tiridún Livija kei prekursora espechalitu. Kei le busén tan meha tadügüni sun tiyaraati lidan teseriwidun lun Heowá, buíngüdatu giñe aba dugumedu lun teseriwidun Betelirugu ani amisurahóuatu lidan irumu 1971. Genegeti meha lariñaguña lan Heowá somu katei nun! Aba wamarieidun 27 lidan diisi-hati lidan irumu 1973, ani íbiri meha Knorr íchugubalin yanu. Ariñagati Ariñawagúni 18:22: “Hagamaridun gürigia, kéigubeirügü hadariruni lubuidun-agei katei; arufuda lumuti lira luagu buidu lan Bungiu hama gürigia”. Inarüni katei le. Biní laadiwa Heowá dandu Livija kei au lau ledewehan lóugiñe 40 irumu woun eseriwida úara Betelirugu. Ani awanheingua adamuridagua lidan aban damuriguaü lidan ligiaméme fulasu Bronx.
NADAGIMEIN ÚARA HAMA LÍBIRIGU KRISTU
Aban katei wéiriti lubuidun nawadigimaridun luma íbiri Knorr. Aban meha gürigia le mabuchadunti luagu nadagimein, hínsiñehabuti lun inarüni ani wéiriti meha ínsiñeni le lasandirubei hawagu misionerugu. Saragu hádangiñe, hagía meha furumiñetiña Gefentiña lidan fulasu le ñeinhin lubéi hóunahoua. Aba ladagarun kánserü luagu íbiri Knorr lidan irumu 1976, ani híruti meha warihini asufurira. Aban weyu, dan le másaarunhali gabanarugugiñe, aba lamuriahan numa lun naliihan aban ariñahani lun le málühali lun imprimírua lan. Aba lariñagun nun lun nagúarun lun Frederick Franz lun giñe laganbuni aliihani ligía. Dan lárigiñe, ligía nasubudiruni marihin lan íbiri Franz buidu ani barühali lan íbiri Knorr fiú dan aliihei ariñahani burí ligía lun.
Lidan aban bisida tidan aban sukursáli luma Daniel tuma Marina Sydlik (1977)
Hilati íbiri Knorr lidan irumu 1977, gama lumoun, wagía le asubudirubalin ani hínsiñe ligía woun, ragütiwa gurasu dan le warihini gúnfuli lan Aruf. 2:10). Lúmagiñe dan ligía, aba letenirun íbiri Franz lun tuadigimari óundaruni.
lau leseriwidun ubouagu lau úaraguni (Lidan dan ligía, au meha lánibei íbiri Milton Henschel sekretariu, nadagimein haali meha íbiri le lun íbiri Knorr luagu saragu irumu. Aba lariñagun nun lunti lan netenirun íderaguei íbiri Franz lidan sun lemegeirun, ligíaba meha nuadigimari. Aba burí naliihani ariñahani le lunbei imprimírua lan lun. Wéiriti meha lubafu lun lakipuruni ariñahani lidan lisaminan luma lun letenirun lun le aliihóubei lun. Gúndaatina lau níderaguni íbiri le ítara darí lagumuchuni libagari ubouagu lidan irumu 1992.
Númeru 124 lidan üma Columbia Heights, ñein lubéi nawadigimarida saragu irumu
Seriwitiña giñe nagübürigu lun Heowá lau úaraguni darí hounwegun, ani memeniha nanigi lun níchuguni lubuidun achülürüni houn lidan aban ubóu buídutimati (Huan 5:28, 29). Fureseti lásügürün ǘrüwa-wein-aban irumu le naubei Betelirugu. Sanditina úati lan ni kata lídangiñe le líchugubei ubóu le gayaraati konparárua lan luma lubuidun chansi lun neseriwidun houn íbirigu lidan sun ubóu úara hama wügüriña hama würiña úaraguatiña. Dandu Livija kei au gayarati wariñagun tídangiñe sun wanigi luagu “ugundani [lan] le líchugubei Bungiu waramudaguagülebei” lidan sun dan le waubei eseriwida lidan dan dayarüti (Neem. 8:10).
Mararamunbei wadagimanu tidan lóundarun Heowá ladüga ua lan aban gürigia; lasigiruba wadagimanu lánina lasubudirawagüdün inarüni luagu Larúeihan Bungiu meberesenga ka lan asuseredubei. Gúndaatina lau nibihini chansi lun nawadigimaridun sun dan le hama saragu íbirigu wügüriña hama würiña ha úaraguatiña. Hiibe-agei kristiánugu anuadirúaaña ha úmabaña nawadigimarida úaaña ubouagu. Gama lumoun, wéiriti neteingiradi luagu gayara lan nawadigimaridun hama íbirigu úaraguatiña ani hínsiñehabutiña lun Bungiu ha lidan heseriwidun.