1, 2. a) Írida humá fiú lídangiñe turóbuli le lanügübei márügüdagun hamá gürigia houngua. b) Ka uagu súdini lubéi layanuhóun luagu ragüguaü unguaü uguñe weyu?

ABAN igaburi lúmagiñeti Heowá ragüguaü unguaü (Gal. 5:22, 23). Arufuda lumuti Heowá igaburi le buidu buidu. Ánheinti wagía gafigountiwa ani ligía hénrengu lubéi woun wárügüdagun woungua. Le linarün katei, susereti saragu lídangiñe turóbuli le ubouagubei ladüga márügüdagun hamá gürigia houngua. Adügati katei le lun hígiruni saragu gürigia katei le súdinitimabei lubá agumuhóuni ani lun magunfulirun hamá buidu lidan hawadigimari o leskuelarugu. Barüti giñe márügüdagun hamá gürigia houngua amu burí turóbuli, kéiburi hariñagun katei le gáriti houn amu, átaguni, ageindaguni, ígiraguni, hádaragun houngua lidoun dúeiti, bísiu, adaürǘni, damichi le hénrenguti lagidarun lídangiñe hasaminan, sandi le lanügübei agamariduni luma dageinaü le magurabúnwati (Sal. 34:11-14).

² Kei aubei warihei, barütiña gürigia ha márügüdagunbaña houngua turóbuli hóuniwagua luma houn amu. Ani lau lásügürün dan, wéiritimati larihín turóbuli le ubouagu. Lidan irumu 1940 aturiahóuati luáguti hafosuragun gürigia houngua lun hadügün o lun madügün hamá somu katei, gama lumoun, arufudati iseri burí aturiahani murusuntimarügaaña lan gürigia arufudutiña igaburi le. Ani maweiriduntu wanigi luagu le, ladüga anihein profesía tidan Bíbülia le ariñagubei luagu marufudunbaña lan gürigia ragüguaü unguaü lidan “lagumuhóun dan” (2 Tim. 3:1-3).

3. Ka uagu megei wabéi wafurendeirun árügüdagua woungua?

 ³ Ka uagu megei wabéi wafurendeirun árügüdagua woungua? Ariha wamá bián resun súdiniti. Le furumiñeti, ladüga gürigia ha árügüdagubaña houngua, mádaraguntiña houngua lidoun turóbuli wéinamuti. Ménrenguntimati houn gürigia hagía hanaagun houngua buidu hama amu, lun magañidun hamá, lun mírudun hamá saragu ani lun deregüdagu lan hasaminan. Le libiaman, ladüga mosu lan hárügüdagun gürigia houngua luéi óuchawaguni luma luéi luriban ayumahani lun gunda lan Bungiu hau. Arufudati figóu le ladügübei Adán tuma Ewa luagu ítara liña lan (Agu. 3:6). Ítara kei hagía, gíbetiña gürigia asufurirutiña uguñe weyu ladüga márügüdagun hamá houngua.

4. Kaba íchiga dǘgüdaguaü houn ha gaturobulinbaña lun harufudun ragüguaü unguaü?

⁴ Kei le gafigoun habéi sun gürigia, siñati warufudun ragüguaü unguaü machararunga. Subudi lumuti Heowá áfaagua wamá, wagía lubúeingu, lun wárügüdagun woungua luéi luriban wayumahan, ani busenti líderaguniwa adügei (1 Uru. 8:46-50). Ruti gurasu woun wasubudiruni Wamada lan, ani íderagua lumutiña lan ha busenbaña heseriwidun lun ani gaturobulintiña lun harufudun ragüguaü unguaü lidan somu katei. Lidan arütíkulu le, warihibei hénpulu úaraguati le líchugubei Heowá. Lárigiñe, wafurendeiruba fiú katei lídangiñe hénpulu burí buiti luma wuribati le aniheinbei tidan Bíbülia. Lagumuhóun, warihibei ka lan lunbei wadügüni lun warufudun ragüguaü unguaü.

5, 6. Ka hénpulu lánina ragüguaü unguaü líchugubei Heowá woun?

⁵ Richati ligaburi larufudun Heowá ragüguaü unguaü, ladüga úati charati lidan sun le ladügübei (2 Lur. 32:4). Ánheinti wagía mítarantiwa. Lun gunfuranda wamani le mini lubéi ragüguaü unguaü ani lun warihini ida luba lan buídutima lan wáyeihani ligaburi Bungiu le, mosu wakutihani lani hénpulu. Ida liña san larufudun óunwenbu ragüguaü unguaü?

⁶ Samina wamá ida liña lan lóunabun Heowá dan le lebedaagunbei Satanási. Chóuruti adüga lan lebedaagun Mafia lun ñein lan lanarime igañi hadan lubúeingu Bungiu ha úaraguabaña sielu. Gayarati ítara liña lan giñe wasandiragun woungua dan le wasaminarun luagun sun asufuriruni le lanügübei lebedaagun Mafia. Subudi lumuti meha Heowá mosu lan lóunabun lun ebedaaguni ligía, gama lumoun, mígiraguagüdünti lungua lun le lasandirubei. Arufudati aban igaburi buiti. Gaguraasunti ani richati ligaburi lóunabun lun lebedaagun Satanási (Afu. 34:6; Hob. 2:2-6). Ka san uagu lígira Heowá lun lásügürün dan? Ladüga mabusenrun lan lun hagünrinchawagun gürigia, busenti lun “hasakürihan” súngubei (2 Fe. 3:9).

7. Ka larufudahabei lani Heowá hénpulu woun?

⁷ Arufudahati lani Heowá hénpulu woun moun lumuti lan desidírü wamá lau lóufudagun, mosu wasaminarun buidu lubaragiñe wariñagun o wadügün somu katei. Danme le mosu lan desidírü wamá luagu somu katei súdiniti, ragǘ waméi dan le wemegeirubei lun wasaminarun ani amuriaha wamá luma Heowá lun líchugun lichú aau woun lun wadügüni o lun wariñaguni le richabei (Sal. 141:3). Ánhawa adüga somu katei lau igañi, lagumadirubadiwa le wasandirubei lidan oura ligía. Ligía anihein lubéi dan wasakürihan luagu somu katei le wariñagubei o le wadügübei masaminarunga (Ari. 14:29; 15:28; 19:2).

8. a) Halía gayara lan wadarirun hénpulu buiti lánina árügüdaguni unguaü? b) Ka san íderagubalin Hosé lun méiguadun lan lidoun óuchawaguni? (Ariha huméi dibuhu le lídanbei lagumeseha arütíkulu).

⁸ Ka burí hénpulu tídangiñeti Bíbülia arufudubalin súdini lan wárügüdagun woungua? Chóuruti haritagua wamá hawagun saragu gürigia ha uágubaña tayanuha Bíbülia ani ha arufudubaña ragüguaü unguaü lidan dan hénrenguti. Ariha  waméi le ladügübei Hosé, le liráü Hakobu, dan le leseriwidunbei lúbiñe Potifárü, le hábuti lisudaranigu lurúeite Ehiptu. Aba tafidiruni lani Potifárü weiriou tarihin luagun Hosé ladüga “magadiñe lan”, ani aba tálugun saragu wéiyaasu lun larounrun tuma. Gama lumoun, aba lariñagun: “Siñati [...] nadügün aban katei wuribati ítara lun nafigouhan ligibugiñe Bungiu”. Ka san íderagubalin Hosé lun méiguadun lan lidoun óuchawaguni le? Chóuruti ráramagua lan asaminara luagun katei wuribati le lunbei lasuseredun anhein adüga gasu tau. Ani dan le tárügüdünbalin tuéigiñe ladaüragun lun larourun tuma, aba léibaagun (Agu. 39:6, 9; aliiha huméi Ariñawagúni 1:10).

9. Ida luba waranserun lun wawanduni óuchawaguni?

⁹ Ka wafurendeirubei lídangiñe lani Hosé hénpulu? Aniheinbei lan dan mosu lan wéibaagun luéi somu óuchawaguni lun madüraagun wamani lilurudun Bungiu. Añahein fiú íbirigu, lubaragiñe gefén hamá luagu Heowá, hóutiña meha ani gurá hagía lóugiñe le lubeibei, agumulahatiña meha, yúsutiña meha düroga o adügatiña meha figóu lánina agamariduni. Ani íbini lárigiñe habadiseirun, háfuga anihein lan dan hagagibudagun íbirigu ha luma óuchawaguni lunya hadügüni katei burí le. Anhein asusereda katei le woun, lunti wararamagun asaminara luagu wagadeirubei lan wamadagua luma Heowá ánhawa márügüdagun woungua luéi luriban ayumahani. Áfaagua wamá wasaminarun luagun sügǘ o fulasu burí le ídanbei gayara lan ñein lan óuchawaguni ani samina wamá ida luba lan wanurahan luéi (Sal. 26:4, 5; Ari. 22:3). Ani danme le wagagibudagun luma óuchawaguni, amuriaha wamá luma Heowá lun líchugun lichú aau luma ragüguaü unguaü woun lun wawandun.

10, 11. a) Ka asuseredubei houn saragu nibureintiña leskuelarugu? b) Ka gayarabei líderaguniña nibureintiña kristiánugu lun mábürühan hamá dan le hínchahaniña amu lun hadügün katei wuribati?

¹⁰ Uguñe weyu, gagibuguatiña saragu nibureintiña luma sügǘ libe le úmabei lagagibudagua Hosé. Ariha waméi le asuseredubei tun Kim. Apantahatiña meha hiibe-agei tánigu paaná luagu arumuga hamá hama hadarigu samudi luma dimaasu. Ánheinti tuguya madügüntu meha katei libe burí lira lun tabahüdaguni. Ariñagatu Kim adügati lan mítaran tan kei ha híbiri lun tasandiragun tungua tábugua, ani ariñagatiña lan meha tánigu paaná tun ibidiouguati lan tau ladüga máfuridun tan luma somu wügüri. Íbini ítara, furanguti meha tun luagu weiri lan ayumahani le hasandirubei gürigia lun hagamaridun dan le nibureingiña (2 Tim. 2:22). Súnwandan meha hálügüdünu tánigu paaná anhein gañüngiru lubéi, ani ábaha tayusuruni chansi ligía lun tafuranguagüdüni houn ka lan uagu desidírü tubéi marounrun tan hama wügüriña. Pántatiwa hau nibureintiña ha desidírübaña mígirun hamá lun hínchahaniña amu lun hadügün figóu lánina agamariduni. Ani gúndaati giñe Heowá hau.

¹¹ Luagu amu oubaü, anihein hénpulu wuribati tidan Bíbülia hani gürigia ha ígiraguagüdübaña houngua lun ayumahani lánina agamariduni ani arufuda tumuti luriban resultóu le lanügübei ligaburi hóuserun. Anhein lásügürüña lubéi somu gürigia lídangiñe le tásügürübei Kim, buídubei lun lasaminarun luagun le asuseredubei lun nibureinti ibidiougua tau le uágubei layanuhóua lidan Ariñawagúni kapítulu 7. Gayarati giñe lasaminarun luagun le ladügübei Amünón luma luagun lanarime luriban resultóu le lanügübei lóuserun (2 Sam. 13:1, 2, 10-15, 28-32). Gayarati hayusuruni agübürigu abahüdaguni burí le lidan háhuduragun keisi iduheñu lun híderaguniña hasaanigu arufuda ragüguaü unguaü luma lun desidírü hamá buidu lidan katei libe burí le.

12. a) Ida liña marufudun lani Hosé le lasandirubei hagibugiñe líbirigu? b) Ka burí kesi ídanbei mosu lan wárügüdagun woungua?

¹² Ariha wamá ámuya dan le ídanbei líchiga Hosé aban hénpulu buiti lánina árügüdaguni unguaü. Susereti dan le hóudinbei líbirigu Ehiptu  agañeiha éigini. Busenti meha Hosé lasubudiruni kátima lan hasaminarubei, ligía mariñagun lubalin houn ligía lan Hosébei dan le harufudagunbei houngua ligibugiñe. Ani dan le siñá lubéi laramuduni le lasandirubei, aba lidin ayahuaha lidan amu fulasu (Agu. 43:30, 31; 45:1). Gayarati líderaguniwa lani Hosé hénpulu lun móunabun wamá wuriba dan le ladügün somu waduhe o somu íbiri somu katei le gáriti woun (Ari. 16:32; 17:27). Ani anhein bugawaali lubéi somu waduhe lídangiñe damuriguaü, háfuga mosu lan wárügüdagun woungua lun mayanuhan wamá luma dan le mama lan mosu wadügüni. Gayaraati hénrengu lan katei le, gama lumoun, ménrenguntimabei anhein waritagua wáyeihañein lan Heowá ani warufuduña lan gaganbadi wamá lun leweridihan.

13. Ka bián arufudahani súdiniti wafurendeirubei lídangiñe libagari urúei Dawidi?

¹³ Ayanuhatu giñe Bíbülia luagu lubuidun hénpulu le líchugubei urúei Dawidi. Dan le léibaahanbalin Saulu luma dan le láluahanbei Simí wuribu luma, magañidunti Dawidi ani mayusurun lumuti giñe lubafu lun lageindagun hama (1 Sam. 26:9-11; 2 Sam. 16:5-10). Subudi wamuti márügüdagun lan Dawidi lungua súnwandan. Haritagua waméi ligaburi lóunabun furumiñe dan le maha lubéi Nawali líderaguni luma dan le lafigouhanbei tuma Betüsawé (1 Sam. 25:10-13; 2 Sam. 11:2-4). Ka wafurendeirubei lídangiñe libagari Dawidi? Furumiñe, furendeitiwa mosu lan hárügüdagun íbirigu ha anügübalin ubaraü lidan damuriguaü houngua ani mosu lan góunigi hamá luéi hayusuruni habafu wuriba. Ani libiaman, moun lumuti lan lafiñerun ni aban gürigia luougua saragu lun lasaminarun gayara lan lawandun furumiñeguarügü óuchawaguni (1 Ko. 10:12).

14. a) Ka asuseredubei lun aban íbiri? Ánhawa agagibudagua luma aban sügǘ ítarati, ka uagu buidu lubéi lun wárügüdagun woungua?

¹⁴ Ka gayarabei wadügüni lúntima warufudun ragüguaü unguaü? Ariha waméi le asuseredubei lun aban Gefenti gíriti Luigi. Aba tabuguchun aban karü tuagu lugune tanagangiñe. Íbini le lan aban abugahati gadurunbei, aba lidin abugahati ligía anabei íbiri ani busenti yebe lageindagun luma. Aba lamuriahan Luigi luma Heowá lun líderaguni árügüdagua lungua ani aba lálugun ladügün lun darangilu lan abugahati ligía, gama lumoun, aba lasigirun gürigia ligía águaraha. Íbini ítara, darangiluti Luigi. Aban dimaasu lárigiñe, aba lidin Luigi abisidaha aban würi to busentu tafurendeirun tuagu Bíbülia ani aba líchugun fe abugahati lan ligía tánibei würi tuguya weiriei. Aba lamuriahan wügüri ligía ferudun luma Luigi lau busiganu ani aba lariñagun layanuhaba lan tuma kónpeni to ñein lubéi lafayeiha Luigi lun tachoururúniwa lugune lun taranserún likarün furese. Ani rédeiti giñe lidan yanu tuáguti Bíbülia ligía ani ariñagati hínsiñeti lan lun. Dan le lasaminarun Luigi luagun le asuseredubei, aba líchugun fe luagu lisudinin hakipurun gürigia darangilaü lidan danaguaü luma luagun wuribati le yebe lunbei lasuseredun lun hamuga féridi lani luguraasun (aliiha huméi 2 Korintuna 6:3, 4).

15, 16. Ida liña líderaguniwa taturiahóun Bíbülia lun warufudun ragüguaü unguaü, dandu wagía kei waduheñu?

¹⁵ Wafalarun aban lubuidun programa lánina taturiahóun Bíbülia, ligía aban katei le gayarabei líderaguniwa lun warufudun ragüguaü unguaü. Haritagua waméi le lariñagubei Bungiu lun Hosué: “Águyuguagüdabei le tariñagubei liliburun lilurudun Bungiu súnwandan, saminabá luagu, áriebu wéyuagu, lun badügüni le nariñagubei súnwandan. Ítara luba lasalirun sun le badügübei bun buidu” (Hos. 1:8). Ida liña san líderaguniwa taturiahóun Bíbülia lun wafurendeirun árügüdagua woungua?

¹⁶ Kei aubei warihei, anihein abahüdaguni tidan Bíbülia le arufudubalin buiti o wuribati le lanügübei ligaburi wóuserun. Adügati Heowá lun labürüdǘn abahüdaguni burí le tidan Bíbülia lun wafurendeirun lídangiñe (Rom. 15:4). Ligía lunti  lubéi waliihanu, waturiahanu ani samina wagíame luagun le waliihabei. Samina wamá ida luba lan wasagarun buiti, dandu wagía kei waduheñu, lídangiñe abahüdaguni burí le, ani amuriaha wamá luma Heowá lun líderaguniwa awinwanda úara luma le tarufudahabei Bíbülia. Ánhawa ariha mégeigidiwa lan wárügüdagun woungua, anha wamá luagu ítara liña lan, furíei wamá lun Heowá ani áfaagua wamá lun warihini ka lan idan wemegeira wasansirun (Sant. 1:5). Huuti giñe wáluahan ariñahani tidan burí wani agumeiraguagüdüni.

17. Ida liña gayara lan híderaguniña agübürigu hasaanigu arufuda ragüguaü unguaü?

¹⁷ Agübürigu, ida luba san híderaguniña hisaanigu arufuda ragüguaü unguaü? Furanguti mama lan lau igaburi le hágurahoua, ligía lunti lubéi híchuguni hénpulu houn (Efe. 6:4). Ánhadün ariha hénrengu lan houn hisaanigu hárügüdagun houngua, álügüdagua humá hungua ka lan luwuyeri hénpulu híchugubei houn. Haritagua huméi súdini lan háfuridun apurichiha sun dan, hidin adamuridagua luma hadügüni áhuduraguni hadan iduheñu. Ani manufude humá hariñagun houn hisaanigu uá, dan le lunti lan hadügüni. Ruti meha Heowá lébeha le gayarabei hadügüni Adán tuma Ewa ani arufudahati houn ítara mosu lan inebehabu hamá lun lilurudun. Ítarameme, ídehati harufudahan agübürigu houn hasaanigu luma hani hénpulu lun hafurendeirun hasaanigu árügüdagua houngua. Laganagua katei gebegitimati le gayarabei harufudahani agübürigu houn hasaanigu anihein ínsiñeni luagu lugumadin Bungiu (aliiha huméi Ariñawagúni 1:5, 7, 8).

18. Ka uagu megei wabéi wanúadahaniña wamadagu buidu?

¹⁸ Dandu anhein gasaanigu wabéi o masaanigu wamá, sun wagía mosu wanúadahaniña wamadagu buidu. Anhein hínsiñe lubéi Heowá houn wamadagu, hínchahabadiwa lun wasaminarun wadügün katei buiti lau wabagari luma lun mádaragun wamá woungua lidoun turóbuli (Ari. 13:20). Busenbadiwa giñe wáyeihani ragüguaü unguaü le harufudubei lidan habagari. Luagu amu oubaü, línchahabaña giñe lubuidun wóuserun. Ánhawa arufuda ragüguaü unguaü sagü weyu, lagundaaruba Bungiu wau, wagundaaruba lau wabagari ani buídubei wanaagun woungua hama waduheñu.