1. a) Ka igaburi espechaliti ídanbei larufudagua Heowá lungua lun Moisesi? b) Ka uagu súdini lubéi meha larufudagun Heowá lungua lidan igaburi le?

LUAGU aban dan, aba lasubudiragüdüni Bungiu liri lun Moisesi luma fiú lídangiñe ligaburi. Lubaragiñe lariñagun chuti lan lau ani gabafu lan, ariñagati lun furumiñe luagu gudemehabu lan ani gaguraasunti lan (aliiha huméi Áfuriduni 34:5-7). Subudi lumuti meha busenti lan Moisesi lachoururuni luagu líderagubei lan, ligía layanuhanbei luagu igaburi le arufudubalin aranseñu liña lan lun líderaguniña lubúeingu (Afu. 33:13). Ma ruti gurasu woun wasubudiruni berese lan Bungiu wau saragu? Lidan arütíkulu le layanuhóuba luagu gudemehabu, lidan amu dimurei, aban katei le adügübei lun tañuludagun wanigi dan le warihin gürigia asufurira ani aba línchahaniwa lun wíderaguniña.

2, 3. a) Ka uagu gudemehabu wabéi? b) Ka uagu lunti lubéi wayanuhan luagu le tariñagubei Bíbülia luagu gudemehabu?

² Kei aubei warihei, gudemehabuti Heowá. Ani lenege guánarügü ladügawa. Ligía berese wabéi hau amu. Íbini gürigia ha masubudirunbalin Bungiu le inarüniti gudemehabutiña houn amu (Agu. 1:27). Daritiwa saragu sügǘ tidan Bíbülia hawaguti gürigia ha arufudubaña gudemehabu. Kéiburi hawaguti bián würiña ha asigenehabaña  ligibugiñe Salomón luagu ka lan hádangiñe lúchuguboun aban irahü. Dan le líchugunbei urúei gumadi lun hadüraaguni lamidan lúmagua, aba tírudun lúguchu saragu darí lun himei tani híchuguni tun to aban würi mama lun háfaruni (1 Uru. 3:23-27). Haritaguatiwa giñe tuagun liráü faraón. Dan le tadarirunbalin Moisesi dúnarugu, aba tíchugun fe aban lan irahü ebüréu ani moun lumuti lan tesefuruni. Gama lumoun, aba “lagudemedagun tun” ani aba desidírü tan tagüriahani kei tisaani (Afu. 2:5, 6).

³ Ka uagu lunti lubéi wayanuhan luagu gudemehabu? Ladüga ariñagatu Bíbülia lunti lan wáyeihani Heowá (Efe. 5:1). Adüga lumutiwa Heowá lun gudemehabu wamá. Gama lumoun, kei le gafigoun wabéi luéigiñe Adán, anihein dan wawouguounrügüñein lan wasaminara. Anihein dan hénrengu lan woun desidírü wamá anhein wíderaguba lubéi amu gürigia o anhein wóunguarügübei lubéi wetenira. Kaba san íderaguawa lun gudemehabutima wamá? Furumiñe, ariha waméi ida liña lan larufudun Heowá hama amu gürigia gudemehabu. Lárigiñe, akutiha waméi ida luba lan wáyeihani Heowá luma kaba lan buiti lanüga woun.

4. a) Ka meha uagu lóunaha Heowá fiú ánheligu Sodoma? b) Ka larufudahabei likesin Lotu hama liduheñu woun?

⁴ Daritiwa saragu hénpulu lánina lugudemehabu Bungiu tidan Bíbülia. Ariha waméi le ladügübei luagu Lotu, aban wügüri le meha hírubei saragu ladüga lanarime luriban hóuserun lílana Sodoma luma Gomora. Wéiriti meha hadaagun figóu lánina agamariduni darí lun desidírü lan Bungiu óunweni lan hadünabei (2 Fe. 2:7, 8). Lun lesefuruni Heowá Lotu, aba lóunahan fiú ánheligu awisarei luagu lagünrinchawagua lan uburugu burí ligía ani mosu lan lanurahan hau liduheñu. “Keiti ladarasahan Lotu, aba hárügüdüni lani Bungiu ánheligu lúhabu [...]. Barǘ hamutu giñe lúmari hama lirahüñü würiña aba hasagaruniña uburugugiñe” (Agu. 19:16). Arufudahati sügǘ le woun subudi lani Heowá haturobulin sun lubúeingu ha úaraguabaña buidu buidu (Isa. 63:7-9; Sant. 5:11; 2 Fe. 2:9).

5. Ka wafurendeirubei luagu gudemehabu lidan bérusu kéiburi 1 Huan 3:17?

⁵ Mama óuserarügü lumutiwa Heowá lau gudemehabu, arufudahati giñe woun lun gudemehabu wamá. Samina wamá luagun aban lídangiñe lúrudu le líchugubei houn ísüraelina. Anhein meha afuredeira aban ísüraelina seinsu lun amu, gayarati meha lerederun tau aban tídangiñe ladaüragun lun lachoururuni luagu lafayeirubei lan (aliiha huméi Áfuriduni 22:26, 27). Gayarati meha busén lan le afuredeihabei lerederun tau daüguaü lun lígiruni le aban madaüragunga áriebu. Ligía meha líchugunbei Heowá gumadi houn ísüraelina lun gudemehabu hamá ani lun hagiribudagüdünu daüguaü lun tabureme “dan le lálüdün weyu”. Ka wafurendeirubei lídangiñe adundehani le ídangiñebei liabin lúrudu le? Furendeitiwa anhein lan megei lubéi aban íbiri ídemuei ani gayarati wíderaguni, lunti wadügüni (Kol. 3:12; Sant. 2:15, 16; aliiha huméi 1 Huan 3:17).

6. Ka wafurendeirubei lídangiñe lugudemehabu Bungiu houn ísüraelina ha afigouhabaña?

⁶ Gudemehabuti meha Heowá houn ísüraelina íbini dan le hafigouhanbei. Ariñagatu Bíbülia: “Wéridi lumutiña Wabureme le Habungiute hagüchagu saragu wéiyaasu hádangiñe lóunagülegu, lugundun yebe lugudemehabu houn lumutuniña luma lun fulasu le ñein lubéi laganawa” (2 Kro. 36:15). Ítarameme, lunti giñe gudemehabu wamá houn ha ibidiñehabubaña lun Bungiu ani gayaraagili hasakürihan lun lumadagu hamá.  Mabusenrunti Heowá lun lagünrinchawagun ni aban gürigia (2 Fe. 3:9). Ligíati, lidan anihagua lan dan, sigí wamá anügei uganu lánina eweridihani houn sun gürigia lun gayara lan gudemehabu lan Bungiu houn.

7, 8. Ida liña hasandiruni liduheñu Milan gudemehabu lan Heowá houn?

⁷ Lidan wadaani, gíbeeña Gefentiña asandirutiña gudemehabu haali lan Bungiu houn. Ariha waméi le asuseredubei lidan lagumeseha irumu 1990 lidan aban turóbuli luáguti rasa Bosnia. Haweiyasuhaña fiú Gefentiña tidan busu Bosniagiñe lun Serbioun. Haganagua anihein aban irahü 12 irumu lau gíriti Milan, anihein giñe aban lamulen hama lagübürigu. Hóudiña súngubei hagía lidoun aban adamurini, le ñeinba lubéi meha habadiseirúa lagübürigu Milan. Lidan láfadaragun ageiraü, aba hasagaruniña súdaragu iduheñu hagía tídangiñe ugunei ladüga lídangiñetiña lan amu rasa, gama lumoun, ígira hamutiña ha híbiri Gefentiña lun hásügürün. Bián weyu lárigiñe, aba lagúarun súdara le agumadihabei ñein tuagu radiu lun lábuti lun lálügüdüni kaba lan ladüga hau iduheñu hagía. Rara liña súdara ligía hagibugiñe, ani aganba hamuti súngubei hagía lóunabagüle ábuti: “Sagabaña bóugudin ábame bíchugun aban balu hawagu!”.

⁸ Lidan aniha lan ábuti ligía ayanuha hama súdaragu, aba hayarafadun bián wügüriña houn iduheñu hagía ani aba hariñagun harigeirugun: “Gefentiña wagía; abahüdaha hamuti íbirigu ha tídanbaña busu le asuseredubei woun”. Lárigiñe, aba hariñagun lun Milan luma lun lamulen lun hádinun tidoun hagune lun hánhiñuraguni láfadaragun ageiraü, ladüga maríahan hamanu súdaragu hagaradan irahüñü. Lárigiñe, aba hariñagun houn agübürigu: “Huguya hiñugua humá éibugeina lanagangiñe fulasu le ñein lubéi hechekürüwa gürigia”. Dan le laganbunbalin Milan katei le, ibidiñeti lun anhein lun lubéi léherehan o layahun. Aba hálügüdahan lagübürigu: “Inarüni san afiñe humá hígirubadiwa lan lun woudin?”. Aba hagumeserun ánhiñuraguei láfadaragun ageiraü, ani íbini aríagu haña lan súdaragu houn, ítara liña kamá marihin hamutiña. Aba hadunragun iduheñu ha luéigiñe le aban louba fulasu ani aba hasigiruni haweiyasun lidoun fulasu le ñein lubéi adamurini, lau ichouruni luagu óunaba lani Heowá hayumuragun. Subudi wamuti ariñaga tan Bíbülia mama lan súnwandan lóunigiruniña Heowá lubúeingu ítara furangu (Adü. 7:58-60). Gama lumoun, lidan kesi le, ariñaga lumuti Milan ida liña lan lasansiragun lungua: “Genegeti nun aba lan hadouruni ánheligu harihin súdaragu ani aba lesefuruniwa Heowá” (Sal. 97:10).

9. Ka meha ladügübei Hesusu dan le larihinbaliña gürigia ha afalarubalin? (Ariha huméi dibuhu le lídanbei lagumeseha arütíkulu).

⁹ Gayarati giñe wafurendeirun lídangiñe lani Hesusu hénpulu. Ka ladügübei Hesusu dan le larihinbaliña gürigia ha afalarubalin luagu “nidiheri hamá, maguraasun hagía, kamá mudún ha móuniritiña”? “Aba hagudemedagun lun” ani “aba lagumeserun arufudaha saragu katei houn” (Mat. 9:36; aliiha huméi Márükosu 6:34). Ámuti meha lóuserun hawéi fariséugu, ha mabusenrunbaña híderaguniña gürigia (Mat. 12:9-14; 23:4; Huan 7:49). Ítara waña san kei Hesusu ani busentiwa tídangiñe sun wanigi wíderaguniña ha mégeibaña hasubudiruni Heowá?

10, 11. Mosu san gudemehabu wamá súnwandan? Afuranguagüda huméi.

¹⁰ Mini lan san le mosu lan warufudun gudemehabu súnwandan? Uá. Lun gunfuranda wamani, ariha wamá aban sügǘ le ídanbei mabuidun lan larihini Heowá larufudún gudemehabu. Dan le lariñagunbei Heowá lun Saulu lun láfaraguniña amaléküna hau sun halügüniña animaalu, aba feruduna lani Saulu libagari urúei luma habagari habuidun-agei lilügüniña mudún. Háfuga samina lan larufuduña  lan gudemehabu, gama lumoun, aba mabusenrun laali lan Heowá kei lurúeite Ísüraeli ladüga maganbadi lan (1 Sam. 15:3, 9, 15). Aban aguseragüdüti richati Heowá. Gayarati larihini le tídanbei hanigi gürigia, ligía subudi lubalin ídaba lan marufudun lan gudemehabu (Aya. 2:17; Ese. 5:11). Málühali aguseragüdaña sun ha maganbadibaña lun (2 Tesa. 1:6-10). Mámaalime dan lun gudemehabu lan Bungiu houn ha siadi láañabaña. Le linarün katei, lagumuchuba hau lun lesefuruniña lubúeingu ha úaraguabaña luma lun larufudun gudemehabu houn.

¹¹ Mama woun yu lan wariñaguni anhein lunti lubéi lesefurun Heowá o lasíadirun aban gürigia, lubaragiñe lira, lunti wadügüni sun wayaraati lun wíderaguniña gürigia guentó. Ligíati, ida luba warufudun gudemehabu houn amu? Ariha wamá fiú adundehani.

12. Írida humá aban ligaburi larufudún gudemehabu houn amu?

¹² Áluaha wamá ida luba lan wíderaguniña ha híbiri gürigia lidan katei le lánina sagü weyu. Lunti gudemehabu hamá kristiánugu houn híbirigu luma houn ha híbiri gürigia (Huan 13:34, 35; 1 Fe. 3:8). Gayarati lafuranguagüdüniwa “larufudún gudemehabu” kei “wasufurirun hama amu”. Mini lan le, hasandirun gürigia megei hamá híderaguniña ha asufurirubaña ladüga somu turóbuli. Áluaha wamá chansi lun wadügüni. Kei hénpulu, gayarati wariñagun houn gürigia gayara lan wíderagunniña adüga somu katei hábiñe o wáfuridun adüga somu gararaguaü houn (Mat. 7:12).

13. Ida liña harufudun lubúeingu Bungiu gudemehabu dan le ñein lan somu chagaguaü lánina liñawan dan?

¹³ Ídeha wamá lidan híderawagun ha asufurirubaña ladüga somu chagaguaü. Arufudatiña saragu íbirigu gudemehabu houn ha asufurirubaña ladüga somu chagaguaü lánina liñawan dan. Subudiwatiña lubúeingu Heowá luagu hídehan lidan burí sügǘ le (1 Fe. 2:17). Wínwantu meha aban íbiri hapónna lidan aban fulasu le ñein lubéi lasusereda aban hárabaganali ani aba giñe liabin aban óunwenbu lugudi barana le agünrinchagubalin fulasu ligía lidan irumu 2011. Ariñagatu ragǘ tan gurasu luma erei dan le tarihin bandi ídehatiña dandu lídangiñe amu fulasu Hapón kei lídangiñe amu burí ageiraü aranseha muna tuma burí Luban Adamuridaguni.  Abürühatu: “Sun le nawinwandubei adügati lun níchugun fe luagu hínsiñe wamá lun Heowá, luma luagu nidiheri wamá, wagía Gefentiña, hawagu wíbirigu. Gíbetiña íbirigu lídangiñeti amu fulasu ubouagu afurieidutiña wawagu.

14. Ida luba wíderaguniña ha wéiyougaañabaña hama ha sándibaña?

¹⁴ Íderagua wamaña ha wéiyougaañabaña hama ha sándibaña. Dan le warihin somu gürigia asufurira ladüga aweiyaduni o ladüga sandi, aba hagudemedagun woun. Ani aba wamuriahan luma Heowá lun liabin Larúeihan lun lagidaruni sandi luma aweiyaduni. Lidan wagurabahan liabin dan ligía, adüga wamuti sun wayaraati lun wíderaguniña ha mégeibaña. Abahüdagua lumuti aban abürühati le asuseredubei tun lúguchu, to gawaguboun aban sandi gíriti Alzheimer. Aba weyu, aba tawiyedun tougua. Dan le anuhán lubéi áluaha tarumadahan, aba haguarun bián íbirigu ha abisidahabarun súnwandan luagu tubenari. Dan le harihini le asuseredubei, aba hálügüdünu anhein gayara lubéi híderagunu. Aba tóunabun: “Anha, íbini ru lan busiganu nun”. Ligía aba lubéi híderagunu, aba hadügün aban kopu bachati tun ani aba herederun ayanuha tuma. Wéiriti leteingiruniña tisaani gürigia tuguya darí lun lariñagun inebe hamá lun saragu ladüga winwan hamani le hapurichihabei. Ínchaha lumutiwa san gudemehabu le wasandirubei hawagu ha wéiyougaañabaña hama ha sándibaña lun wíderaguniña? (Fili. 2:3, 4).

15. Ka uagu hu lubéi apurichihani lun wíderagun amu gürigia?

¹⁵ Íderagua wamaña gürigia asubudirei Heowá. Uguñe weyu, gaturobulintiña gürigia ani nidiheritiña. Warufudahan houn luagu Bungiu luma luagu le lunbei ladügüni hawagu gürigia ligía katei buídutimati le gayarabei wadügüni hawagu. Gayarati giñe wíderaguniña arihei lanügüba lan gaganbadi hamá lun lilurudun Bungiu saragu buiti houn (Isa. 48:17, 18). Ru lumuti apurichihani lubuidun chansi woun lun wíchugun uéiriguni lun Heowá luma lun warufudun gudemehabu houn amu. Gayarati san waganwoundagüdüni dan le wásügürübei lidan apurichihani? (1 Tim. 2:3, 4).

16. Ka buiti lanügübei woun gudemehabu wamá?

¹⁶ Según surusiagu ha agaranihabaña lun ichügü, ídehati gudemehabu wamá lun buidu lan wátuadi luma lun buidu lan wanaagun woungua hama amu. Dan le wíderaguniña ha asufurirubaña, gúndaatimatiwa ani saminatiwa luagun katei buiti, masandiraguntiwa woungua wábugua ani masaminaruntiwa saragu luagun katei wuribati. Furanguti barǘ lan gudemehabu wamá saragu buiti woun (Efe. 4:31, 32). Anhein hínsiñe habéi amu gürigia woun ani áluaha wagía ida luba lan wíderaguniña, buídubei wasaminan ladüga wasubudirubei wadügüñein lan le labusenrubei Heowá. Ani ladügüba katei le lun buídutima wamá kei agübürigu, úmarigu o umadagu. Ani ha arufudubaña gudemehabu libe-agei dan resibitiña ídemuei dan le hemegeiruni (aliiha huméi Matéu 5:7; Lúkasi 6:38).

17. Ka uagu busén hubéi gudemehabu humá?

¹⁷ Mama ladügarügü barǘ lan gudemehabu buiti woun warufudunbei gudemehabu. Adüga wamuti ladüga busén wamá wáyeihani ani ru wagíame uéiriguni lun Heowá, le úmagiñebei liabin ínsiñeni luma gudemehabu (Ari. 14:31). Ligíati, adüga waméi sun wayaraati lun wáyeihani hénpulu úaraguati le líchugubei Heowá. Ítara luba wayarafaduntima houn wíbirigu ani buídutimabei wanaagun woungua hama ha yarafabaña woun (Gal. 6:10; 1 Huan 4:16).